കൊച്ചി: തൃക്കാക്കര എംഎല്‍എ ഉമാ തോമസ് പരിക്ക് പറ്റിയ കലൂരിലെ നൃത്ത പരിപാടിയുമായി ബന്ധപ്പെട്ട് അറസ്റ്റ് ചെയ്ത മൂന്ന് പ്രതികള്‍ക്ക് ഇടക്കാല ജാമ്യം. മജിസ്‌ട്രേറ്റിന്റെ വസതിയില്‍ ഹാജരാക്കിയ കേസിലെ രണ്ടാം പ്രതിയായ ഷമീര്‍ അബ്ദുള്‍ റഹീം, നാലാം പ്രതി കൃഷ്ണകുമാര്‍ അഞ്ചാം പ്രതി ബെന്നി എന്നിവര്‍ക്കാണ് ജാമ്യം ലഭിച്ചത്. ഇവരുടെ ജാമ്യപേക്ഷ മൂന്നാം തീയതി പരിഗണിക്കും.

നേരത്തെ കേസില്‍ അഞ്ചുപേരെ പ്രതി ചേര്‍ത്തിരുന്നു. മൃദംഗവിഷന്‍ എം ഡി നിഗോഷ് കുമാര്‍ ഒന്നാം പ്രതി ഷമീര്‍, ജനീഷ്, കൃഷ്ണകുമാര്‍, ബെന്നി എന്നിവരാണ് കേസിലെ അഞ്ച് പ്രതികള്‍.

ഇടുക്കി: പോക്‌സോ കേസില്‍ 55 കാരന് 15 വര്‍ഷം കഠിന തടവും ഒരു ലക്ഷത്തി എഴുപത്താറായിരം രൂപ പിഴയും വിധിച്ച് കോടതി. എട്ട് വയസുകാരിയോട് ലൈംഗികാതിക്രമം കാണിച്ച കേസില്‍ കുമിളി ചെങ്കര സ്വദേശി മാരിമുത്തു അറുമുഖനെയാണ് ഇടുക്കി പൈനാവ് അതിവേഗ കോടതി ജഡ്ജി ലൈജുമോള്‍ ഷെരീഫ് ശിക്ഷിച്ചത്.

2023 ജൂലൈയില്‍ ആയിരുന്നു സംഭവം. സ്‌കൂള്‍ വിട്ട് വീട്ടിലെക്ക് വരുന്ന വഴി ആളൊഴിഞ്ഞ സ്ഥലത്ത് വെച്ച് ബാലികയോട് ലൈംഗിക അതിക്രമം നടത്തുകയായിരുന്നു. പിഴ അടക്കാത്ത പക്ഷം പ്രതി അധിക ശിക്ഷ അനുഭവിക്കണം.

ജില്ലാ ലീഗല്‍ സെര്‍വിസിസ് അതോര്‍ട്ടിയോട് ഇരക്ക് മതിയായ നഷ്ടപരിഹാരം നല്‍കാനും പ്രതിയില്‍ നിന്ന് ഈടാക്കുന്ന പിഴ തുക ഇരക്ക് നല്‍കാനും കോടതി വിധിച്ചു. പ്രൊസീക്യൂഷന് വേണ്ടി സ്‌പെഷ്യല്‍ പബ്ലിക് പ്രൊസിക്യൂട്ടര്‍ അഡ്വ. ഷിജോമോന്‍ ജോസഫ് കോടതിയില്‍ ഹാജരായി.

സംസ്ഥാന സ്‌കൂള്‍ കലോത്സവത്തില്‍ എംടി വാസുദേവന്‍ നായര്‍ക്ക് ആദരം. കലോത്സവത്തിന്റെ പ്രധാനവേദിയുടെ പേര് എംടി-നിള എന്നാക്കി മാറ്റി. വിദ്യാഭ്യാസ മന്ത്രി വി. ശിവന്‍കുട്ടിയുടെ നിര്‍ദ്ദേശപ്രകാരമാണ് പൊതുവിദ്യാഭ്യാസ വകുപ്പിന്റെ തീരുമാനം.

പ്രധാനവേദിയില്‍ എംടിയുടെ നിളയെ കുറിച്ചുള്ള പ്രസിദ്ധമായ ഉദ്ധരണി ആലേഖനം ചെയ്യും. ഭാരതപ്പുഴ എന്ന പേരിനെ എംടി-നിള എന്നാക്കി പുനര്‍നാമകരണം ചെയ്തു.

63-ാമത് കേരള സ്‌കൂള്‍ കലോത്സവം ജനുവരി നാല് മുതല്‍ എട്ട് വരെ തിരുവനന്തപുരത്ത് വച്ച് നടക്കും. നഗരത്തിലെ 25 വേദികളിലായി ഏകദേശം പതിനായിരം കുട്ടികള്‍ പങ്കെടുക്കുന്ന 249 മത്സര ഇനങ്ങള്‍ അരങ്ങേറും.