തിരുവനന്തപുരം: ദേഹാസ്വാസ്ഥ്യവും ഛര്‍ദ്ദിയും മൂലം അഞ്ച് വയസുകാരന്‍ മരിച്ചു. മടത്തറ നെല്ലിക്കുന്ന് താഹന മന്‍സിലില്‍ ജമീലിന്റെയും തന്‍സിയയുടെയും മകന്‍ മുഹമ്മദ് ഇഷാന്‍ (5) ആണ് മരണപ്പെട്ടത്. കുമ്മിള്‍ ഏയ്ഞ്ചല്‍ സ്‌കൂള്‍ എല്‍.കെ.ജി വിദ്യാര്‍ഥിയായിരുന്നു ഇഷാന്‍. തലേദിവസം ബേക്കറിയില്‍നിന്നു വാങ്ങിയ മിക്‌സ്ചര്‍ കഴിച്ചതിന് ശേഷമാണ് കുട്ടിക്ക് അസ്വസ്ഥത അനുഭവപ്പെട്ടതെന്ന് രക്ഷിതാക്കള്‍ പറഞ്ഞു.

ബുധനാഴ്ച രാവിലെ കുട്ടിയ്ക്ക് ഛര്‍ദ്ദി അനുഭവപ്പെട്ടതോടെ കടയ്ക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നെങ്കിലും ജീവന്‍ രക്ഷിക്കാനായില്ല. കുട്ടി കഴിച്ച ഭക്ഷണസാധനങ്ങളുടെ അവശിഷ്ടങ്ങള്‍ പൊലീസ് ശേഖരിച്ചു. വിശദ പരിശോധനക്ക് ശേഷമേ മരണ കാരണം വ്യക്തമാകൂ എന്ന് പൊലീസ് അറിയിച്ചു.

കണ്ണൂര്‍: തലശ്ശേരി ആര്‍ച്ച് ബിഷപ്പ് ജോസഫ് പാംപ്ലാനിയെ സന്ദര്‍ശിച്ച് മുസ്‌ലിം ലീഗ് സംസ്ഥാന അധ്യക്ഷന്‍ പാണക്കാട് സാദിഖലി ശിഹാബ് തങ്ങള്‍. ഇന്ന് രാവിലെ തലശ്ശേരി ബിഷപ്പ് ഹൗസിലായിരുന്നു കൂടിക്കാഴ്ച. മതേതരത്വത്തെ ഊട്ടിയുറപ്പിക്കുന്ന സമീപനമാണ് ബിഷപ്പിന്റേതെന്ന് സാദിഖലി തങ്ങള്‍ പറഞ്ഞു. സമൂഹങ്ങളെ അടുപ്പിക്കണം, സമുദായങ്ങള്‍ ചേര്‍ന്നിരിക്കണം, പ്രശ്‌നങ്ങള്‍ കൂടിയിരുന്ന് പരിഹരിക്കണം. മുനമ്പം വിഷയത്തില്‍ സമുദായങ്ങള്‍ തമ്മില്‍ ഇടര്‍ച്ച പാടില്ല. മനുഷ്യത്വപരമായ സമീപനമാണ് വേണ്ടത്. ആദ്യം ആശങ്ക പരിഹരിക്കണം.

സത്വര പരിഹാരത്തിനായി സര്‍ക്കാര്‍ മുന്നിട്ടിറങ്ങണം. താമസക്കാരെ കുടിയിറക്കരുത്. സര്‍ക്കാര്‍ സമാധാനം പുനഃസ്ഥാപിക്കാന്‍ ഒന്നുകൂടി താല്‍പര്യമെടുത്ത് പ്രവര്‍ത്തിക്കണമെന്നും സാദിഖലി തങ്ങള്‍ പറഞ്ഞു. ഷാഫി പറമ്പില്‍ എംപിയും സാദിഖലി തങ്ങളുടൊപ്പമുണ്ടായിരുന്നു.

സാദിഖലി തങ്ങളുടെ സന്ദര്‍ശനം ആദരവായി കാണുന്നുവെന്ന് ജോസഫ് പാംപ്ലാനിയും പറഞ്ഞു. ഇത് സൗഹൃദ സന്ദര്‍ശനമായിരുന്നുവെന്നും ഈ സന്ദര്‍ശനം കാലഘട്ടത്തിന്റെ ആവശ്യമാണെന്ന് പാംപ്ലാനി പറഞ്ഞു. ഇതില്‍ രാഷ്ട്രീയമോ മറ്റു ലക്ഷ്യങ്ങളോയില്ല. വിവിധ വിഷയങ്ങള്‍ സംസാരിച്ചു. ഒരുമിച്ച് നില്‍ക്കാവുന്ന എല്ലാ മേഖലകളിലും ഒരുമിച്ച് നില്‍ക്കുമെന്നും പാംപ്ലാനി കൂട്ടിച്ചേര്‍ത്തു.

കൊല്ലം: 15കാരന്‍ ഓടിച്ച സ്‌കൂട്ടര്‍ ഇടിച്ചു വയോധിക മരിച്ച സംഭവത്തില്‍ മുത്തച്ഛനെതിരെ പൊലീസ് കേസെടുത്തു. തില്ലേരി സ്വദേശി 80 വയസ്സുകാരന്‍ ജോണ്‍സനെതിരെയാണ് കേസ്. സ്‌കൂട്ടറിന് ഇന്‍ഷുറന്‍സ് ഇല്ലെന്നും പൊലീസ് കണ്ടെത്തി. മുണ്ടക്കല്‍ സ്വദേശിയായ സുശീലയാണ് അപകടത്തില്‍ മരിച്ചത്.

ഡിസംബര്‍ 26 ന് വൈകിട്ട് ആയിരുന്നു സംഭവം. മുണ്ടയ്ക്കല്‍ തുമ്പറ ക്ഷേത്രത്തിനു സമീപത്ത് വെച്ച് 15 കാരന്‍ ഓടിച്ച വാഹനം വയോദികയെ ഇടിക്കുകയായിരുന്നു. അപകടത്തിന് ശേഷം 15 കാരനും സുഹൃത്തും സ്‌കൂട്ടര്‍ നിര്‍ത്താതെ പോയി. തുടര്‍ന്ന് പൊലീസ് നടത്തിയ അന്വേഷണത്തില്‍ ജോണ്‍സന്റേതാണ് വാഹനം എന്ന് കണ്ടെത്തി. ജോണ്‍സന്റെ കൊച്ചുമകനാണ് സ്‌കൂട്ടര്‍ ഓടിച്ചിരുന്നതെന്ന് ചോദ്യം ചെയ്യലില്‍ കണ്ടെത്തുകയായിരുന്നു. അപകടത്തിന്റെയും കുട്ടികള്‍ രക്ഷപ്പെടുന്നതിന്റെയും സിസിടിവി ദൃശ്യം ലഭിച്ചിട്ടുണ്ട്.

റോഡ് മുറിച്ചു കടക്കുന്നതിനിടെ തെറ്റായ ദിശയിലെത്തിയ സ്‌കൂട്ടര്‍ മുണ്ടക്കല്‍ സ്വദേശിനിയായ സുശീലയെ ഇടിച്ച് തെറിപ്പിക്കുകയായിരുന്നു. ചികിത്സയിലിരിക്കെ കഴിഞ്ഞ ദിവസം മരണപ്പെടുകയായിരുന്നു. തലയ്ക്ക് ഗുരുതരമായി പരിക്കേറ്റതാണ് മരണത്തിന് ഇടയാക്കിയത്. സുശീലയ്ക്ക് ഒപ്പമുണ്ടായിരുന്ന ശാന്ത നിസാര പരിക്കുകളോടെ രക്ഷപ്പെട്ടു.