സഭകളില്‍ നിന്ന് പ്രതിപക്ഷ എം.പിമാരെ സസ്പെന്‍ഡ് ചെയ്തത് എന്തുകൊണ്ടാണ് മാധ്യമങ്ങള്‍ ചര്‍ച്ചചെയ്യാത്തതെന്ന് എം.പിയും കോണ്‍ഗ്രസ് നേതാവുമായ
രാഹുല്‍ ഗാന്ധി. ഞങ്ങളുടെ 150 എംപിമാരെ പുറത്താക്കി, അതേക്കുറിച്ച് ഒരു ചര്‍ച്ചയും നടന്നിട്ടില്ല. അദാനിയെ കുറിച്ചും റഫേലിനെ കുറിച്ചും ചര്‍ച്ചയില്ല. അന്വേഷണം അനുവദിക്കില്ലെന്ന് ഫ്രാന്‍സ് അറിയിച്ചു. അതിനെക്കുറിച്ച് പോലും ഒരു ചര്‍ച്ചയുമില്ല.
ടിഎംസി നേതാവ് കല്യാണ്‍ ബാനര്‍ജി രാജ്യസഭാ അധ്യക്ഷനെ അനുകരിക്കുന്ന വീഡിയോ താന്‍ ഷെയര്‍ ചെയ്തിട്ടില്ല. താന്‍ എടുത്ത വീഡിയോ തന്റെ ഫോണില്‍ തന്നെ ഉണ്ട്. ആരും അദ്ദേഹത്തെ അപമാനിച്ചിട്ടില്ല. എന്നാല്‍ ദേശീയ മാധ്യമങ്ങളാണ് ആ ദൃശ്യങ്ങള്‍ ഇപ്പോഴും കാണിക്കുന്നതും അതില്‍ ചര്‍ച്ചനടത്തുന്നതും.
രാജ്യത്തിന്റെ ചരിത്രത്തിലാദ്യമായി ഇത്രയുമധികം എം.പി മാരെ സസ്പെന്‍ഡ് ചെയ്തത് പ്രധാന വാര്‍ത്തയാവുകയോ ചര്‍ച്ചയാവുകയോ ചെയ്യുന്നില്ല. പ്രതിപക്ഷം ഉന്നയിക്കുന്ന വിഷയങ്ങള്‍ ഉയര്‍ത്താനോ ചര്‍ച്ച ചെയ്യാനോ മാധ്യമങ്ങള്‍ തയാറാകുന്നില്ലെന്നും അദ്ദേഹം കുറ്റപ്പെടുത്തി.