മാനന്തവാടി ബിഷപ്പ് ഹൗസില്‍ സന്ദര്‍ശനം നടത്തി വയനാട് മണ്ഡലം യു.ഡി.എഫ് സ്ഥാനാര്‍ഥിയും കോണ്‍ഗ്രസ് നേതാവുമായ രാഹുല്‍ ഗാന്ധി. മാനന്തവാടി ബിഷപ്പ് ജോസ് പൊരുന്നേടം, കോഴിക്കോട് ബിഷപ്പ് വര്‍ഗീസ് ചക്കാലക്കല്‍, മാനന്തവാടി രൂപത സഹായ മെത്രാന്‍ അലക്സ് താരാമംഗലം എന്നിവരുമായി കൂടിക്കാഴ്ച നടത്തി. എം.പിയുടെ സ്ഥിരം പ്രതിനിധി മണ്ഡലത്തില്‍ ഉണ്ടാവണമെന്നതുള്‍പ്പെടെ നിരവധി ആവശ്യങ്ങള്‍ നിവേദനമായി ബിഷപ്പുമാര്‍ രാഹുലിനു സമര്‍പ്പിച്ചിട്ടുണ്ട്.
മനുഷ്യ-വന്യജീവി സംഘര്‍ഷവും ഉന്നത വിദ്യാഭ്യാസ സ്ഥാപനങ്ങളുടെ അഭാവവും മണ്ഡലത്തിലുണ്ട്. യുവജനങ്ങള്‍ പഠനത്തിനും ജോലിക്കുമായി വയനാട്ടില്‍നിന്ന് പാലായനം ചെയ്യുന്ന സാഹചര്യമാണുള്ളത്. ജില്ലയില്‍ ചികിത്സാ-ഗതാഗത സൗകര്യങ്ങളുടെ അഭാവമുണ്ടെന്നും ബിഷപ്പുമാര്‍ ചൂണ്ടിക്കാട്ടി.
ബദല്‍പാതകളുടെയും ചുരം റോഡിന്റെയും വികസനം അനിവാര്യമാണെന്നും നിവേദനത്തില്‍ ആവശ്യപ്പെട്ടു. വര്‍ഷങ്ങളായി റെയില്‍വേ പദ്ധതിയെന്നത് വയനാട്ടുകാരുടെ സ്വപ്നം മാത്രമായിരുന്നു നില്‍ക്കുകയാണ്. രാത്രിയാത്ര നിരോധനത്തില്‍ മാറ്റംവരാത്തത് മാറിമാറി വന്ന സര്‍ക്കാരുകളുടെയും രാഷ്ട്രീയപാര്‍ട്ടികളുടെയും വഞ്ചനാപരമായ സമീപനമാണെന്നും ബിഷപ്പുമാര്‍ നിവേദനത്തില്‍ ആരോപിച്ചു.