വഡോദര: ദിവസങ്ങള്‍ക്ക് മുമ്പ് കാണാതായ 95കാരിയുടെ മൃതദേഹം സ്വന്തം വീടിന്റെ ഭൂഗര്‍ഭ ടാങ്കില്‍ നിന്ന് കണ്ടെത്തി. ഗുജറാത്തിലെ വഡോദര മകര്‍പുരയിലാണ് സംഭവം. വീടിലെ പൈപ്പുകളില്‍ നിന്നും ടാങ്കില്‍ നിന്നും ദുര്‍ഗന്ധം വന്നതോടെ വീട്ടുകാര്‍ നടത്തിയ പരിശോധനയിലാണ് മൃതദേഹം കണ്ടെത്തിയത്.

പത്ത് ദിവസങ്ങള്‍ക്ക് മുമ്പാണ് ഉജ്ജം പര്‍മര്‍ എന്ന 95കാരിയെ കാണാതാവുന്നത്. പലയിടത്തും അന്വേഷിച്ചെങ്കിലും കണ്ടെത്താനായില്ല. ഒടുവില്‍ പൊലീസില്‍ പരാതി നല്‍കിയിരുന്നു. സിസിടിവി അടക്കം പരിശോധിച്ച പൊലീസിന് വൃദ്ധയെ കണ്ടെത്താന്‍ കഴിഞ്ഞരുന്നില്ല.

ദിവസങ്ങള്‍ക്ക് ശേഷം വീടിലെ പൈപ്പുകളില്‍ നിന്നും ടാങ്കില്‍ നിന്നും ദുര്‍ഗന്ധം വന്നതോടെ വീട്ടുകാര്‍ ടാങ്ക് വൃത്തിയാക്കാന്‍ ആളെ വിളിച്ചു. ടാങ്ക് തുറന്ന തൊഴിലാളികളാണ് വൃദ്ധയുടെ ജീര്‍ണിച്ച മൃതദേഹം കണ്ടെത്തിയത്. തുടര്‍ന്ന് അധികൃതര്‍ സ്ഥലത്തെത്തുകയും മൃതദേഹം പുറത്തെടുക്കുകയുമായിരുന്നു. പോസ്റ്റുമോര്‍ട്ടത്തില്‍ വൃദ്ധ മുങ്ങിമരിച്ചതാണെന്ന് വ്യക്തമായി.

വീടിന്റെ പൂന്തോട്ടത്തിന്റെ മൂലയിലായിരുന്നു ടാങ്ക് ഉണ്ടായിരുന്നത്. ടാങ്ക് വല്ലപ്പോഴുമേ തുറക്കുകയുണ്ടായിരുന്നതിനാല്‍ ആരും വൃദ്ധ ടാങ്കില്‍ വീണുകാണുമെന്ന് സംശയിച്ചിരുന്നില്ല.

രാജസ്ഥാനില്‍ കുഴല്‍കിണറില്‍ വീണ മൂന്ന് വയസുകാരിയെ പത്ത് ദിവസങ്ങള്‍ക്ക് ശേഷം രക്ഷപ്പെടുത്തി. രാജസ്ഥാന്‍ കോട്ട്പുത്‌ലിയില്‍ ഡിസംബര്‍ 23നാണ് ചേതന എന്ന മുന്ന് വയസുകാരി 700 അടി താഴ്ച്ചയുള്ള കുഴല്‍ കിണറില്‍ വീണത്. കളിച്ചുകൊണ്ടിരിക്കെ കുട്ടി കിണറില്‍ വീഴുകയായിരുന്നു. കുട്ടിയെ കാണാതെ അന്വേഷിച്ചെത്തിയ വീട്ടുകാര്‍ കിണറ്റില്‍ നിന്നും കുട്ടിയുടെ കരച്ചില്‍ കേള്‍ക്കുകയായിരുന്നു.

സ്ഥലത്തെത്തിയ എന്‍ഡിആര്‍എഫ്, എസ്ഡിആര്‍എഫ്, മെഡിക്കല്‍ സംഘങ്ങള്‍ ഉടന്‍ രക്ഷാപ്രവര്‍ത്തനം ആരംഭിച്ചിരുന്നു. കുട്ടിയെ കയറില്‍ കുരുക്കി പുറത്തെടുക്കാന്‍ ശ്രമിച്ചെങ്കിലും ശ്രമം പരാജയപ്പെടുകയായിരുന്നു. തുടര്‍ന്ന് സമാന്തരമായി കുഴിച്ച് രക്ഷിക്കാന്‍ തീരുമാനിക്കുകയായിരുന്നു.
കിണറിലേക്ക് ഓക്‌സിജനും ഭക്ഷണവും വെള്ളവും എത്തിച്ചു.

ആദ്യം നിര്‍മിച്ച കുഴിയുടെ ദിശ മാറിപ്പോയിരുന്നു. ഒടുവില്‍ മറ്റൊരു കുഴി കുഴിക്കുകയായിരുന്നു. അവസാന മണിക്കൂറുകളില്‍ കിണറ്റിലേക്ക് ഓക്‌സിജനോ ഭക്ഷണമോ വെള്ളമോ എത്തിക്കാനായില്ല. എന്നാല്‍ കുട്ടിയെ ജീവനോടെ രക്ഷിക്കാന്‍ കഴിഞ്ഞു. കുട്ടിയെ ഉടന്‍ സമീപത്തെ ആശുപത്രിയില്‍ എത്തിച്ചു. കുട്ടിയുടെ ആരോഗ്യത്തിന് പ്രശ്‌നമില്ലെന്നും കുട്ടി നിരീക്ഷണത്തിലാണെന്നും ഡോക്ടര്‍മാര്‍ പ്രതികരിച്ചു.

തമിഴ്‌നാട്ടില്‍ ആറ് വര്‍ഷക്കാലമായി യാത്രക്കാരുടെ ബാഗുകള്‍ മോഷ്ടിക്കുന്ന റെയില്‍വേ ജീവനക്കാരന്‍ അറസ്റ്റില്‍. റെയില്‍വേ മെക്കാനിക്കായ സെന്തില്‍ കുമാറാണ് പിടിയിലായത്. ഇയാളുടെ മുറിയില്‍ നിന്ന് 200 ല്‍ അധികം ബാഗുകളും 30 പവന്‍ സ്വര്‍ണവും 30 ഫോണ്‍, 9 ലാപ്‌ടോപ്പ് എന്നിവയും കണ്ടെടുത്തു. മധുരയിലും തൊട്ടടുത്തുള്ള സ്‌റ്റേഷനുകളും കേന്ദ്രീകരിച്ചാണ് ഇയാള്‍ മോഷണം നടത്തിയിരുന്നത്.

കഴിഞ്ഞയാഴ്ച മധുര റെയില്‍വേ സ്‌റ്റേഷനില്‍ നിന്ന് ഒരു സ്ത്രീയുടെ 15 പവന്‍ സ്വര്‍ണം മോഷണം പോയിരുന്നു. ഇതുമായി ബന്ധപ്പെട്ട അന്വേഷണത്തിലാണ് പ്രതി പിടിയിലായത്. യുവതിയുടെ മൊഴിപ്രകാരം സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ പരിശോധനയില്‍ സെന്തില്‍ കുമാര്‍ സംശയ നിഴലിലായി. തുടര്‍ന്ന് ഇയാളുടെ മുറി പരിശോധിച്ചപ്പോഴാണ് മോഷണ വസ്തുക്കള്‍ കണ്ടെത്തിയത്.