ദോഹ: അംഗപരിമിതര്‍ക്കെതിരെയും ഉപരോധ രാജ്യങ്ങളുടെ നിയമലംഘനങ്ങളുണ്ടായതായി ഖത്തര്‍. മനുഷ്യചരിത്രത്തില്‍തന്നെ അസാധാരണമായ നടപടികളാണ് ഉപരോധരാജ്യങ്ങള്‍ സ്വീകരിച്ചതെന്ന് ഖത്തര്‍ ദേശീയ മനുഷ്യാവകാശ കമ്മിറ്റി(എന്‍എച്ച്ആര്‍സി) ചെയര്‍മാന്‍ ഡോ. അലി ബിന്‍ സമൈഖ് അല്‍മര്‍റി കുറ്റപ്പെടുത്തി. ഉപരോധരാജ്യങ്ങള്‍ അംഗപരിമിതരെപ്പോലും വെറുതെവിട്ടില്ല.
നിരവധിപേരുടെ കുടുംബബന്ധങ്ങള്‍ വിഛേദിക്കപ്പെട്ടു. സഊദി അറേബ്യ ഉള്‍പ്പടെയുള്ള രാജ്യങ്ങളില്‍ നിന്നും ആസ്പത്രികളില്‍ നിന്നും രോഗികളെ പുറത്താക്കുന്നതുള്‍പ്പടെയുള്ള നടപടികള്‍ സ്വീകരിച്ചതായി ഡോ. അല്‍മര്‍റി ചൂണ്ടിക്കാട്ടി. ഇക്കാര്യങ്ങളില്‍ യുഎന്‍ മനുഷ്യാവകാശ കൗണ്‍സിലിന്റെ ശക്തമായ നടപടിയുണ്ടാകണമെന്നും അദ്ദേഹം ജനീവയില്‍ ആവശ്യപ്പെട്ടു. ചരിത്രത്തില്‍ തന്നെ അപൂര്‍വമായ ക്രൂരതകളാണ് ഉപരോധ രാജ്യങ്ങളുടെ ഭാഗത്തുനിന്നുണ്ടായതെന്ന് ഡോ. അല്‍മര്‍റി ആവര്‍ത്തിച്ചു.യുഎന്നിന്റെ അംഗ വൈകല്യം സംഭവിച്ചവരുടെ അവകാശം സംരക്ഷിക്കുന്നതിനു ചുമതലയുള്ള സ്‌പെഷ്യല്‍ ഓഫീസര്‍ കാറ്റലീന ദേവന്‍ദാസുമായി നടത്തിയ ചര്‍ച്ചയിലാണ് അദ്ദേഹം ഇക്കാര്യങ്ങള്‍ വിശദീകരിച്ചത്. ഇതുസംബന്ധമായ പൂര്‍ണവിവരങ്ങള്‍ കാറ്റലീനയ്ക്ക് കൈമാറി. വളരെ ദാരുണമായ അവസ്ഥയിലായിരുവരെപോലും പുറത്താക്കി. മനുഷ്യത്വമില്ലാത്ത സമീപനമാണ് ഉപരോധ രാജ്യങ്ങള്‍ സ്വീകരിച്ചത്. യൂ.എന്‍. മനുഷ്യാവകാശ സമിതിക്ക് മുമ്പില്‍ കാറ്റലീന സമര്‍പ്പിക്കുന്ന റിപ്പോര്‍ട്ടില്‍ ഈ ക്രൂരതകള്‍ ഉള്‍പ്പെടുത്തണമെന്നും ഖത്തര്‍ ആവശ്യപ്പെട്ടു. അംഗപരിമിതര്‍ക്കെതിരെ ഉപരോധ രാജ്യങ്ങളുടെ നിയമലംഘനങ്ങള്‍ ഖത്തര്‍ സൂക്ഷ്മമായി നിരീക്ഷിച്ചുവരികയാണ്. നിയമലംഘനങ്ങളുടെ വ്യാപ്തി കൃത്യമായി മനസിലാക്കാന്‍ യുഎന്‍ ഉദ്യോഗസ്ഥര്‍ ഈ രാജ്യങ്ങള്‍ സന്ദര്‍ശിക്കണമെന്നും ഡോ.അല്‍മര്‍റി ആവശ്യപ്പെട്ടു. അതേസമയം ഖത്തറിനെതിരായ ഉപരോധം തികച്ചും അന്യായവും നിയമവിരുദ്ധവുമാണെന്ന് യുഎന്നിലെ ഖത്തറിന്റെ സ്ഥിരം പ്രതിനിധി ശൈഖ ആലിയ അഹ്മദ് ബിന്‍ സെയ്ഫ് അല്‍താനി ചൂണ്ടിക്കാട്ടി. മേഖലയിലെ പ്രതിസന്ധി കൃത്രിമമായി കെട്ടിച്ചമച്ചയ്ക്കപ്പെട്ടതാണ്. അന്താരാഷ്ട്ര നിയമങ്ങള്‍ക്കും ഐക്യരാഷ്ട്രസഭയുടെ ചാര്‍ട്ടര്‍ നിബന്ധനകള്‍ക്കും തീര്‍ത്തും വിരുദ്ധമാണ് ഉപരോധരാജ്യങ്ങളുടെ നയനിലപാടുകളെന്നും അവര്‍ ചൂണ്ടിക്കാട്ടി.
യുഎന്‍ സുരക്ഷാസമതിയുമായുള്ള കൂടിക്കാഴ്ചക്ക് മുമ്പായിട്ടായിരുന്നു അവര്‍ ഇക്കാര്യങ്ങള്‍ വിശദീകരിച്ചത്. മേഖലയിലെ സമാധാനത്തിനും സുരക്ഷക്കും നിലവിലെ പ്രതിസന്ധി കനത്ത വെല്ലുവിളിയാകുന്നുണ്ട്. ഒരു രാജ്യത്തിന്റെ ഔദ്യോഗിക വാര്‍ത്താ സംവിധാനം ഹാക്ക് ചെയ്ത് വ്യാജ വാര്‍ത്തകള്‍ പ്രചരിപ്പിക്കുകയും തുടര്‍ന്ന് അതിനെ വലിയൊരു പ്രതിസന്ധിയിലേക്ക് തള്ളിവിടുകയും ചെയ്യുകയെന്നത് അത്യന്തം അപകടകരമാണ്. ഒരു രാജ്യത്തിന്റെ പരമാധികാരത്തിലാണ് ഉപരോധരാജ്യങ്ങള്‍ ഭീഷണിയുമായി രംഗത്തിറങ്ങിയിരിക്കുന്നത്. അയല്‍രാജ്യങ്ങള്‍ തമ്മിലുള്ള ബന്ധങ്ങള്‍ക്കോ രാജ്യങ്ങള്‍ തമ്മിലോ ജനങ്ങള്‍ തമ്മിലോ ഉള്ള പരസ്പര ബന്ധങ്ങള്‍ക്കോ ഉപരോധ രാജ്യങ്ങള്‍ വിലകല്‍പ്പിക്കുന്നില്ല. ജിസിസി കൂട്ടായ്മയുടെ സംരക്ഷണത്തിനു പോലും ഇവര്‍ പ്രാധാന്യം കല്‍പ്പിക്കുന്നില്ലെന്നും അവര്‍ കുറ്റപ്പെടുത്തി. രാജ്യാന്തര സമാധാനത്തിനും സുരക്ഷക്കും ഭീഷണിയാണ് ഉപരോധരാജ്യങ്ങളുടെ പ്രവര്‍ത്തനങ്ങള്‍. ആരോഗ്യകരമായ സംവാദത്തിലൂടെയും ടേബിള്‍ ചര്‍ച്ചകളിലൂടെയുമേ ഗള്‍ഫ് പ്രതിസന്ധി പരിഹരിക്കാനാകു. ഇക്കാര്യത്തില്‍ കുവൈത്ത് അമീര്‍ ശൈഖ് സബാഹ് അല്‍ അഹ്മദ് ആല്‍ ജാബിര്‍ അല്‍ സബാഹ് പോലെയുള്ള നേതാക്കളുടെ ശ്രമങ്ങള്‍ ഏറെ പ്രശംസനീയര്‍ഹമാണെന്നും ശൈഖ ആലിയ വ്യക്തമാക്കി.