ഇന്ത്യന്‍ സൂപ്പര്‍ ലീഗില്‍ വിജയത്തുടര്‍ച്ച തേടി കേരള ബ്ലാസ്റ്റേഴ്സ് ഇന്ന് കൊച്ചിയില്‍. കൊച്ചി ജവഹര്‍ലാല്‍ നെഹ്റു സ്റ്റേഡിയത്തില്‍ വൈകിട്ട് 7.30ന് കൊമ്പന്മാര്‍ ഇന്ന് എഫ്‌സി ഗോവയെ നേരിടാനിറങ്ങും.

തുടര്‍ച്ചയായ മൂന്ന് പരാജയങ്ങള്‍ക്ക് ശേഷം, കരുത്തരായ ചെന്നൈയിന്‍ എഫ്സിയെ തകര്‍ത്താണ് ബ്ലാസ്റ്റേഴ്സ് തിരിച്ചെത്തിയത്. ഞായറാഴ്ച കൊച്ചിയില്‍ നടന്ന മത്സരത്തില്‍ ഏകപക്ഷീയമായ മൂന്ന് ഗോളുകളുടെ ഗംഭീരവിജയമാണ് കൊമ്പന്മാര്‍ സ്വന്തമാക്കിയത്. ബ്ലാസ്റ്റേഴ്‌സിന് വേണ്ടി ജീസസ് ജിമിനസും നോഹ സദൗയ്യും മലയാളി താരം രാഹുല്‍ കെ പിയും ആണ് ഗോളടിച്ചത്.

പ്രതിരോധത്തിലും ഒത്തിണക്കം പ്രകടിപ്പിച്ച ബ്ലാസ്റ്റേഴ്‌സ് സീസണില്‍ ആദ്യമായി ഗോള്‍ വഴങ്ങാതെ മത്സരം പൂര്‍ത്തിയാക്കി. ഗോള്‍ കീപ്പര്‍ സച്ചിന്‍ സുരേഷിന്റെ പ്രകടനവും നിര്‍ണായകമായി. നിലവില്‍ ഒമ്പത് മത്സരങ്ങളില്‍ നിന്ന് 11 പോയിന്റുമായി പട്ടികയില്‍ ഒന്‍പതാമതാണ് മൈക്കല്‍ സ്റ്റാറേയുടെ സംഘം.

ചെന്നൈയിന്‍ എഫ്‌സിക്ക് എതിരെ ഇറങ്ങിയ ടീമില്‍ കാര്യമായ മാറ്റം വരുത്താന്‍ കോച്ച് സ്റ്റാറേ തയ്യാറാവാന്‍ സാധ്യതയില്ല. മുന്നേറ്റത്തില്‍ സദൗയ്യും ജീസസ് ജിമിനിസും മികച്ച ഫോമിലാണ്. മധ്യനിരയില്‍ നായകന്‍ അഡ്രിയാന്‍ ലൂണ, വിപിന്‍ മോഹന്‍, കോറോ സിങ്, ഫ്രെഡി ലല്ലമാവിയ എന്നിവര്‍ക്കും മാറ്റമുണ്ടായേക്കില്ല. മിലോസ് ഡ്രിന്‍സിച്ച്, സന്ദീപ് സിങ്, ഹോര്‍മിപാം, നവോച സിംഗ് എന്നിവര്‍ തന്നെയാകും പ്രതിരോധക്കോട്ട കാക്കാന്‍ ഇറങ്ങുക. ചെന്നൈയിനെതിരെ നിര്‍ണായക പ്രകടനം പുറത്തെടുത്ത സച്ചിന്‍ സുരേഷ് തന്നെയാകും ഗോവയ്‌ക്കെതിരെയും ഗോള്‍വലയ്ക്ക് മുന്നിലുണ്ടാവുക.

മറുവശത്ത് ഇന്ത്യന്‍ ടീം കോച്ച് മനോലോ മാര്‍ക്വസ് പരിശീലിപ്പിക്കുന്ന ഗോവയാണ് ബ്ലാസ്റ്റേഴ്‌സിന്റെ എതിരാളികള്‍. പോയിന്റ് പട്ടികയില്‍ ആറാം സ്ഥാനക്കാരാണ് ഗോവ. ബെംഗളൂരു എഫ്സിയെയും പഞ്ചാബ് എഫ്സിയെയും പരാജയപ്പെടുത്തിയാണ് ഗോവ എത്തുന്നത്. സീസണില്‍ എട്ട് ഗോള്‍ നേടി അര്‍മാന്‍ഡോ സാദിക്കുവാണ് ഗോവന്‍ പടയുടെ വജ്രായുധം. ഡെയാന്‍ ഡ്രാന്‍സിച്ച്, ബോര്‍ഹ ഹെരേര എന്നിവരും ഗോവയ്ക്കായി മികച്ച പ്രകടനമാണ് കാഴ്ച വെക്കുന്നത്. പഞ്ചാബിനെതിരെ കളിച്ച ടീമിനെ തന്നെയാകും മനോലോ മാര്‍ക്വസ് കളത്തിലിറക്കുക.

സംസ്ഥാനത്ത് സ്വര്‍ണവിലയില്‍ നേരിയ ഇടിവ്. പവന് ഇന്ന് 120 രൂപയാണ് കുറഞ്ഞത്. ഇതോടെ ഒരു പവന്‍ സ്വര്‍ണത്തിന് വില 56,720 രൂപയായി. ഗ്രാമിന് 15 രൂപ കുറഞ്ഞ് 7090 രൂപയിലാണ് വ്യാപാരം നടക്കുന്നത്

ഈ മാസം തുടക്കത്തില്‍ 59,080 രൂപയായിരുന്നു സ്വര്‍ണവില. പിന്നീട് തുടര്‍ച്ചയായ ദിവസങ്ങളില്‍ സ്വര്‍ണവില ഇടിഞ്ഞിരുന്നു. എന്നാല്‍ കഴിഞ്ഞാഴ്ചയോടെ വീണ്ടും വില തിരിച്ചുകയറുന്നതാണ് കണ്ടത്.

ആഗോള വിപണിയില്‍ സംഭവിക്കുന്ന ചെറിയ ചലനങ്ങളാണ് ഇന്ത്യയിലെ സ്വര്‍ണവിലയിലും പ്രതിഫലിക്കുന്നത്. 18 കാരറ്റ് സ്വര്‍ണത്തിന് ഗ്രാമിന് 10 രൂപ കുറഞ്ഞ് 5860 രൂപയായി. വെള്ളിവിലയില്‍ മാറ്റമില്ല. ഗ്രാമിന് 96 രൂപയില്‍ തുടരുകയാണ്.

ജാര്‍ഖണ്ഡിന്റെ 14-ാമത് മുഖ്യമന്ത്രിയായി ഹേമന്ത് സോറന്‍ ഇന്ന് സത്യപ്രതിജ്ഞ ചെയ്യും. റാഞ്ചിയിലെ മൊറാബാഡി ഗ്രൗണ്ടില്‍ ഇന്ന് വൈകീട്ടാണ് ചടങ്ങ്. ഗവര്‍ണര്‍ സന്തോഷ് കുമാര്‍ ഗാംഗ്വാര്‍ സത്യവാചകം ചൊല്ലിക്കൊടുക്കും. ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി ഉള്‍പ്പെടെയുള്ള ഇന്ത്യാ മുന്നണി നേതാക്കള്‍ സത്യപ്രതിജ്ഞാ ചടങ്ങില്‍ പങ്കെടുക്കും. കൂടാതെ പഞ്ചാബ് മുഖ്യമന്ത്രി ഭഗവന്ത് മാന്‍, മേഘാലയ മുഖ്യമന്ത്രി കോണ്‍റാഡ് സാങ്മ, ഹിമാചല്‍ പ്രദേശ് മുഖ്യമന്ത്രി സുഖ്വീന്ദര്‍ സിംഗ് സുഖു സിപിഐ എംഎല്‍ ജനറല്‍ സെക്രട്ടറി ദിപങ്കര്‍ ഭട്ടാചാര്യ, എഎപി നേതാവ് അരവിന്ദ് കെജ്രിവാള്‍ എന്നിവര്‍ ചടങ്ങില്‍ പങ്കെടുക്കും.

മികച്ച വിജയത്തോടെ നാലാം തവണയും ജാര്‍ഖണ്ഡിന്റെ മുഖ്യമന്ത്രി പദത്തിലേക്ക് എത്തുകയാണ് ഹേമന്ത് സോറന്‍. ഹേമന്ത് സോറനൊപ്പം ഭാര്യ കല്‍പ്പന സോറനും ജെഎംഎമ്മില്‍ നിന്നുള്ള 6 മന്ത്രിമാരും കോണ്‍ഗ്രസ് ആര്‍ജെഡി തുടങ്ങിയ പാര്‍ട്ടികളില്‍ നിന്നുള്ളവരും സത്യപ്രതിജ്ഞ ചെയ്യും.അടുത്തയാഴ്ചയോടെ മന്ത്രിസഭയുടെ കാര്യത്തില്‍ അന്തിമ തീരുമാനമാകും.

അതേസമയം, സിപിഐഎംഎല്‍ ലിബറേഷന്‍ സര്‍ക്കാരിനെ പുറത്തുനിന്നായിരിക്കും പിന്തുണയ്ക്കുക. ജാര്‍ഖണ്ഡില്‍ 34 സീറ്റ് നേടിയ ജെഎംഎം ആണ് ഏറ്റവും വലിയ ഒറ്റക്കക്ഷി. കോണ്‍ഗ്രസ് 16 സീറ്റിലും ആര്‍ജെഡി 4 സീറ്റിലും വിജയിച്ചിരുന്നു. സിപിഐഎംഎല്‍ 2 സീറ്റിലാണ് വിജയിച്ചത്‌