മുഖ്യമന്ത്രി പിണറായി വിജയന്‍ ബിജെപിയുടെ ബി ടീമെന്ന് കെ മുരളീധരന്‍. കോണ്‍ഗ്രസ് ഒറ്റക്കെട്ടായാണ് മുന്നോട്ടുപോകുന്നതെന്നും കെ മുരളീധരന്‍ പ്രതികരിച്ചു.

മുഖ്യമന്ത്രി ലേഖനമെഴുതിയത് ബിജെപിയെ സുഖിപ്പിക്കാനാണെന്നും മൂന്നാം സര്‍ക്കാര്‍ എന്നത് വ്യാമോഹം മാത്രമാണെന്നും മുരളീധരന്‍ പറഞ്ഞു.
മദ്യ മയക്കുമരുന്ന് മാഫിയകളെ നിയന്ത്രിക്കണമെന്നും ആരും മദ്യപിക്കരുത് എന്നാണ് തന്റെ അഭിപ്രായമെന്നും കെ മുരളീധരന്‍ വ്യക്തമാക്കി.

ആശ വര്‍ക്കര്‍മാരെ മഴയത്ത് നിറുത്തിയ പാര്‍ട്ടിയെ ആജീവനാന്തം ആളുകള്‍ പുറത്തു നിറുത്തുമെന്നും മുരളീധരന്‍ ചൂണ്ടിക്കാട്ടി.

അതേസമയം മതനിരപേക്ഷ കക്ഷികള്‍ക്ക് കോണ്‍ഗ്രസിനെ വിശ്വസിക്കാനാവില്ലെന്ന ബിജെപിയുടെ പല്ലവി ഏറ്റുപാടുന്ന മുഖ്യമന്ത്രിയെ ആര്‍എസ്എസ് പ്രചാരക് ആക്കണമെന്ന് കെപിസിസി പ്രസിഡന്റ് കെ സുധാകരന്‍ എംപി പറഞ്ഞു. ബിജെപിയെ ഫാസിസ്റ്റെന്നു വിളിക്കാന്‍ പോലും കഴിയാത്ത മുഖ്യമന്ത്രി ഇന്ത്യാസഖ്യത്തിനു നേതൃത്വം കൊടുക്കുന്ന കോണ്‍ഗ്രസിനെ വളഞ്ഞിട്ട് ആക്രമിക്കാനാണ് ശ്രമിക്കുന്നതെന്ന് സുധാകരന്‍ പറഞ്ഞു.

കണ്ണൂര്‍ കരിക്കോട്ടക്കരിയില്‍ ജനവാസ മേഘലയില്‍ ഇറങ്ങിയ കാട്ടാനയെ മയക്കുവെടിവച്ചതിനു ശേഷം പ്രാഥമിക ചികിത്സ നല്‍കി. വയനാട്ടില്‍ നിന്നെത്തിയ വെറ്ററിനറി സംഘമാണ് ആനയെ മയക്കുവെടി വച്ചത്. വെറ്ററിനറി ഡോക്ടര്‍ അജീഷ് മോഹന്‍ദാസിന്റെ നേതൃത്വത്തിലായിരുന്നു ദൗത്യം. ഗുരുതരമായി പരുക്കേറ്റ കുട്ടിയാനയ്ക്ക് വിദഗ്ധ ചികിത്സ നല്‍കുമെന്ന് വനംവകുപ്പ് അറിയിച്ചു. ആനക്കുട്ടിയുടെ ശാരീരികാവസ്ഥ പരിഗണിച്ചു ചെറിയ അളവിലുള്ള മരുന്നാണ് മയക്കുവെടിക്കായി ഉപയോഗിച്ചത്.

മയക്കുവെടിവച്ചതിനു ശേഷം കാട്ടാന വനപാലകര്‍ക്കു നേരെ ഓടിയടുത്തെങ്കിലും പിന്നീട് റബ്ബര്‍ തോട്ടത്തില്‍ തന്നെ നിലയുറപ്പിക്കുകയായിരുന്നു. ശരീരം തളര്‍ന്ന ആനയുടെ കാലുകളിലും കഴുത്തിലും കയര്‍ ഉപയോഗിച്ച് കുരുക്കിട്ടതിനു ശേഷം പ്രാഥമിക ചികിത്സ നല്‍കി. 15 അംഗ സംഘമാണ് മയക്കുവെടി സംഘത്തില്‍ ഉണ്ടായിരുന്നത്.

നിലമ്പൂരില്‍ വയോധികയ്ക്ക് അയല്‍വാസിയുടെ ക്രൂര മര്‍ദനം. നിലമ്പൂര്‍ സിഎച്ച് നഗറിലെ ഇന്ദ്രാണി ടീച്ചര്‍ക്കാണ് അയല്‍വാസിയില്‍ നിന്നും ക്രൂര മര്‍ദനമേറ്റത്. തുടര്‍ന്ന് വയോധികയെ നിലമ്പൂര്‍ ജില്ലാ ആശുപത്രിയില്‍ പ്രവേശിപ്പിച്ചു. പിന്നാലെ പ്രതിയെ പൊലീസ് കസ്റ്റഡിയില്‍ എടുത്തു.

നിലമ്പൂര്‍ സിഎച്ച് നഗറില്‍ ഇന്നലെ വൈകിട്ടാണ് എണ്‍പതുകാരിയായ പാട്ടത്തൊടി വീട്ടില്‍ ഇന്ദ്രാണി ടീച്ചറെ അയല്‍വാസിയായ ഷാജി മര്‍ദിച്ചത്. വയോധികയുടെ നിലവിളി കേട്ട് ഓടിയെത്തിയ അയല്‍വാസികളാണ് മര്‍ദനമേറ്റ് നിലത്ത് വീണുകിടന്ന വയോധികയെ രക്ഷപ്പെടുത്തിയത്. ഇവരുടെ മകന്‍ പുറത്തുപോകുമ്പോള്‍ അമ്മയെ നോക്കാന്‍ വേണ്ടി ഏല്‍പ്പിച്ചതായിരുന്നു അയല്‍വാസി ഷാജിയെ. മര്‍ദിക്കുമ്പോള്‍ ഷാജി മദ്യലഹരിയിലായിരുന്നെന്ന് പ്രദേശവാസികള്‍ പറഞ്ഞു.

ഇന്ന് വൈകിട്ട് നിലമ്പൂര്‍ പൊലീസ് വീട്ടില്‍ നിന്ന് പ്രതിയെ കസ്റ്റഡിയിലെടുത്തു. ആശുപത്രിയിലെത്തി വയോധികയുടെ മൊഴി പൊലീസ് രേഖപ്പെടുത്തി.