മഹാരാഷ്ട്രയിൽ സർക്കാർ രൂപീകരണവുമായി ബന്ധപ്പെട്ട പ്രതിസന്ധി തുടരുന്നു. മുഖ്യമന്ത്രി സ്ഥാനത്തെ ചൊല്ലിയുള്ള തർക്കമാണ് ഇനിയും പരിഹരിക്കാനാകാതെ മഹായുതി സഖ്യം വിയർക്കുന്നത്. ഇതിനിടെ, ഇന്നു നടക്കേണ്ട രണ്ടു സുപ്രധാന യോഗങ്ങൾ റദ്ദാക്കി ശിവസേന നേതാവും മുൻ മുഖ്യമന്ത്രിയുമായ ഏക്‌നാഥ് ഷിൻഡെ നാട്ടിലേക്കു മടങ്ങിയിരിക്കുകയാണ്.

സർക്കാർ രൂപീകരണവുമായി ബന്ധപ്പെട്ട് ഇന്ന് മുംബൈയിൽ സഖ്യകക്ഷി നേതാക്കളുടെ യോഗം നിശ്ചയിച്ചിരുന്നു. ഇതോടൊപ്പം ഷിൻഡെ ശിവസേനയുടെ യോഗവും നടക്കുമെന്ന് അറിയിച്ചിരുന്നു. എന്നാൽ, രണ്ടു യോഗവും റദ്ദാക്കിയതായാണു വിവരം.

ഇതിനിടെ, ഷിൻഡെ മുംബൈയിൽനിന്ന് 250ഓളം കി.മീറ്റർ ദൂരത്തുള്ള സതാരയിലെ വീട്ടിലേക്ക് പുറപ്പെട്ടതായി ‘ഫ്രീപ്രസ് ജേണൽ’ റിപ്പോർട്ട് ചെയ്തു. ദേവേന്ദ്ര ഫഡ്‌നാവിസ് മുഖ്യമന്ത്രിയാകുമെന്ന വാർത്തകൾക്കിടെയാണ് ഷിൻഡെ അതൃപ്തി പരസ്യമാക്കിയിരിക്കുന്നത്.

നിയമസഭാ തെരഞ്ഞെടുപ്പിൽ സർക്കാർ രൂപീകരണത്തിനുള്ള മാന്ത്രികസംഖ്യയ്ക്ക് തൊട്ടരികെ സീറ്റ് ബിജെപിക്ക് ലഭിച്ചെങ്കിലും മുഖ്യമന്ത്രി സ്ഥാനത്തിൽ ഷിൻഡെ അവകാശവാദം ഉന്നയിച്ചിരുന്നു. ലഡ്കി ബഹിൻ യോജന ഉൾപ്പെടെയുള്ള ഷിൻഡെ സർക്കാരിന്റെ ജനപ്രിയ തീരുമാനങ്ങളും പദ്ധതികളുമാണ് മഹായുതി സഖ്യത്തിന്റെ വമ്പൻ വിജയത്തിനു പിന്നിലെന്നാണ് ശിവസേന നേതാക്കൾ പറയുന്നത്. അതുകൊണ്ട്, മുഖ്യമന്ത്രി പദവി ഷിൻഡെയ്ക്കു തന്നെ നൽകണമെന്നാണ് ആവശ്യം.

എന്നാൽ, മുഖ്യമന്ത്രി സ്ഥാനം വിട്ടുനൽകില്ലെന്ന് ഉറച്ച നിലപാടിലാണ് ബിജെപി. ഇതിന്റെ ഭാഗമായി ഷിൻഡെയ്ക്ക് കേന്ദ്രമന്ത്രി സ്ഥാനം ഓഫർ ചെയ്തതായും വിവരമുണ്ട്. ഇതിനിടെയാണ് സർക്കാർ രൂപീകരണത്തിനു താൻ തടസം നിൽക്കില്ലെന്ന് ശിവസേന നേതാവ് വ്യക്തമാക്കിയത്.

കഴിഞ്ഞ ദിവസം ഫഡ്‌നാവിസും ഷിൻഡെയും അജിത് പവാറും ഡൽഹിയിലെത്തി ബിജെപി ദേശീയ നേതൃത്വവുമായി ചർച്ച നടത്തിയിരുന്നു. കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അധ്യക്ഷൻ ജെപി നഡ്ഡ എന്നിവരാണു ചർച്ചയിൽ പങ്കെടുത്തിരുന്നത്.

സർക്കാർ രൂപീകരണ ഫോർമുലകൾ ചർച്ച ചെയ്യാനായിരുന്നു കൂടിക്കാഴ്ച. എന്നാൽ, നേതാക്കളെ കണ്ട ശേഷം വേഗത്തിൽ മുംബൈയിലേക്കു മടങ്ങിയ ഷിൻഡെ രാവിലെ നേരെ നാട്ടിലേക്കു തിരിക്കുകയായിരുന്നു. ബിജെപി നേതൃത്വവുമായുള്ള ചർച്ചയിൽ ഷിൻഡെ അസംതൃപ്തനാണെന്നാണു വ്യക്തമാകുന്നത്.

അതേസമയം, സർക്കാർ രൂപീകരണ ചർച്ചയിൽ അതൃപ്തി തുടരുന്നതായുള്ള മാധ്യമവാർത്തകൾ തള്ളിയിരിക്കുകയാണ് ഷിൻഡെ സേന നേതാവ് ഉദയ് സാമന്ത്. വ്യക്തിപരമായ ആവശ്യത്തിനു വേണ്ടിയാണ് ഷിൻഡെ സതാരയിലേക്കു തിരിച്ചതെന്നും ഇതിനു പിന്നിൽ മുഖ്യമന്ത്രി സ്ഥാനത്തെ ചൊല്ലിയുള്ള അസംതൃപ്തിയൊന്നുമല്ലെന്നും ഉദയ് വ്യക്തമാക്കി.

ഷിൻഡെയോട് ഉപമുഖ്യമന്ത്രി സ്ഥാനം ഏറ്റെടുക്കണമെന്ന് ശിവസേന അപേക്ഷിച്ചിട്ടുണ്ടെന്നും അദ്ദേഹം അറിയിച്ചു.ഷിൻഡെ നിരസിച്ചാലും ഉപമുഖ്യമന്ത്രി സ്ഥാനം തങ്ങൾക്കു ലഭിക്കുമെന്ന് ശിവസേന നേതാവ് സഞ്ജയ് ഷിർസാതും പറഞ്ഞു. പദവി ഏറ്റെടുക്കാൻ അദ്ദേഹം തയാറായില്ലെങ്കിൽ മറ്റൊരു നേതാവിനെ നിയമിക്കും. ഷിൻഡെ കേന്ദ്രമന്ത്രി സ്ഥാനം സ്വീകരിക്കില്ലെന്നും ഷിർസാത് അറിയിച്ചു.

തുടര്‍ച്ചയായ മൂന്നാം ദിവസവും പാര്‍ലമെന്റില്‍ പ്രതിപക്ഷ പ്രതിഷേധം. വിഷയത്തില്‍ സംയുക്ത പാര്‍ലമെന്ററി സമിതിയുടെ അന്വേഷണം ആവശ്യപ്പെട്ടുള്ള അടിയന്തരപ്രമേയത്തിനു ലോക്‌സഭയിലും രാജ്യസഭയിലും കോണ്‍ഗ്രസ് നോട്ടീസ് നല്‍കിയെങ്കിലും സര്‍ക്കാര്‍ ചര്‍ച്ചയ്ക്ക് തയാറായില്ല.

അദാനി വിരുദ്ധ മുദ്രാവാക്യവുമായി രാവിലെ ഇരുസഭകളും സമ്മേളിച്ചതിന് പിന്നാലെ പ്രതിപക്ഷ എംപിമാര്‍ നടുത്തളത്തിലിറങ്ങി. സഭാനടപടികള്‍ നിര്‍ത്തിവച്ച് വിഷയം ചര്‍ച്ച ചെയ്യണമെന്ന് ലോക്‌സഭയില്‍ ചോദ്യോത്തര വേള ആരംഭിച്ചപ്പോള്‍ തന്നെ പ്രതിപക്ഷം ആവശ്യപ്പെട്ടു.

ചര്‍ച്ച സാധ്യമാക്കാതെ പാര്‍ലമെന്റിന്റെ പ്രവര്‍ത്തനം സുഗമമാകില്ലെന്നും പ്രതിഷേധക്കാര്‍ മുദ്രാവാക്യം മുഴക്കി. എന്നാല്‍ ലോക്സഭയില്‍ ചോദ്യോത്തരവേള പ്രതിപക്ഷ പ്രതിഷേധം അവഗണിച്ച് തുടര്‍ന്നു.

ചോദ്യോത്തരവേള ബഹളത്തെത്തുടര്‍ന്ന് മുന്നോട്ട് കൊണ്ടുപോകാന്‍ സാധിക്കാതെ വന്നതോടെ സഭ 12 വരെ നിര്‍ത്തിവയ്ക്കുകയായിരുന്നു. പിന്നീട് ലോക്‌സഭാ നടപടികള്‍ പുനരാരംഭിച്ചെങ്കിലും പ്രതിപക്ഷ പ്രതിഷേധം തുടര്‍ന്നതോടെ ഇന്നത്തേക്ക് പിരിയുന്നതായി സ്പീക്കര്‍ അറിയിച്ചു.

പാർലമെന്‍റ് ആവർത്തിച്ച് നിർത്തിവെച്ചിട്ടും സർക്കാർ അതിനെ ചെറുക്കാത്തതിലും പകരം അദാനി വിഷയത്തിൽ ഇന്ത്യൻ പാർട്ടികളുടെ ആക്രമണത്തിന് സൗകര്യമൊരുക്കുന്നതിലും വലിയ നിഗൂഢതയെന്ന് കോൺഗ്രസ്.

‘മോദാനി വിഷയത്തിൽ പാർലമെന്‍റിൽ ഒരു ദിവസം കൂടി അലങ്കോലമുണ്ടായി. ഏതാനും മിനിറ്റുകൾക്ക് ശേഷം ഇരുസഭകളും ഇന്ന് പിരിഞ്ഞു. എന്തുകൊണ്ടാണ് സഭാ നടപടികൾ മാറ്റിവെക്കുന്നതിനെ സർക്കാർ ചെറുക്കാത്തത് എന്നതാണ് വലിയ നിഗൂഢത -കോൺഗ്രസ് ജനറൽ സെക്രട്ടറി ജയറാം രമേശ് ‘എക്‌സി’ലെ പോസ്റ്റിൽ പറഞ്ഞു. മണിപ്പൂർ, സംഭാൽ, ഡൽഹിയുടെ ക്രമസമാധാനം എന്നിവക്കെതിരായ ഇന്ത്യൻ പാർട്ടികളുടെ ആക്രമണത്തിന് സർക്കാർ സൗകര്യമൊരുക്കുകയാണ്. ഇതിൽ പ്രതിരോധവും ക്ഷമാപണവും ഏറെയുണ്ട് -കോൺഗ്രസ് നേതാവ് പറഞ്ഞു.

അദാനി ഗ്രൂപ്പിനെതിരായ ആരോപണങ്ങളും മണിപ്പൂരിലെയും സംഭലിലെയും അക്രമസംഭവങ്ങളും ചർച്ച ചെയ്യാനുള്ള അടിയന്തര പ്രമേയ നോട്ടീസ് തള്ളിയതിൽ പ്രതിപക്ഷ എം.പിമാർ പ്രതിഷേധിച്ചതിനെ തുടർന്ന് വെള്ളിയാഴ്ച രാജ്യസഭാ നടപടികൾ നിർത്തിവെച്ചതിന് തൊട്ടുപിന്നാലെയാണ് അദ്ദേഹത്തി​ന്‍റെ പരാമർശം.

രാവിലെ സെഷനിൽ ലിസ്‌റ്റ് ചെയ്‌ത പേപ്പറുകൾ വെച്ച ഉടൻ, ഷെഡ്യൂൾ ചെയ്ത കാര്യങ്ങൾ മാറ്റിവെക്കുന്നതിന് സഭയുടെ റൂൾ 267 പ്രകാരം
17 നോട്ടീസുകൾ ലഭിച്ചതായി ചെയർമാൻ ജഗ്ദീപ് ധൻഖർ പറഞ്ഞു. എല്ലാ നോട്ടീസുകളും നിരസിക്കുകയാണെന്നും ചെയർമാൻ പറഞ്ഞു.

ഇതോടെ നിരവധി പ്രതിപക്ഷ എം.പിമാർ മുദ്രാവാക്യം വിളിക്കാൻ തുടങ്ങി. ‘ഞാൻ എംപിമാരോട് ആഴത്തിൽ ചിന്തിക്കാൻ ആവശ്യ​പ്പെടുന്നു. റൂൾ 267നെ സഭ തടസ്സപ്പെടുത്തുന്നതിനുള്ള ഒരു ആയുധമാക്കുകയാണെ’ന്ന് ധൻഖർ പറഞ്ഞു. ചെയർമാ​ന്‍റെ പരാമർശത്തിൽ കോൺഗ്രസ് ഉൾപ്പടെയുള്ള പ്രതിപക്ഷ എം.പിമാർ പ്രതിഷേധിച്ചു.നടപടിക്രമങ്ങൾ ദിവസത്തേക്ക് മാറ്റിവെക്കുന്നതിന് മുമ്പ് സമാനമായ പ്രശ്നങ്ങൾ ആവർത്തിച്ച് ഉന്നയിക്കപ്പെട്ടിട്ടുണ്ടെന്നും ഇത് മൂന്ന് പ്രവൃത്തിദിനങ്ങൾ നഷ്‌ടപ്പെടുത്താൻ ഇടയാക്കിയെന്നും ചെയർമാൻ പറഞ്ഞു.

അദാനി വിവാദത്തിലും ഉത്തർപ്രദേശിലെ സംഭലിൽ അടുത്തിടെയുണ്ടായ അക്രമത്തിലും പ്രതിപക്ഷ അംഗങ്ങളുടെ ബഹളത്തെത്തുടർന്ന് ലോക്‌സഭാ നടപടികൾ വെള്ളിയാഴ്ച ഉച്ചവരെ നിർത്തിവെച്ചു. പിന്നീട്, അധോസഭയും പിരിഞ്ഞു. സഭ തിങ്കളാഴ്ച വീണ്ടും ചേരും.