ഇന്ത്യയും ഓസ്‌ട്രേലിയയും കൊമ്പുകോര്‍ക്കുന്ന ബോര്‍ഡര്‍ ഗവാസ്‌കര്‍ പരമ്പരയിലെ രണ്ടാം ടെസ്റ്റിനിടെയുണ്ടായ വാഗ്വാദത്തില്‍ ഇന്ത്യന്‍ പേസര്‍ മുഹമ്മദ് സിറാജും ഓസീസ് ബാറ്റര്‍ ട്രാവിസ് ഹെഡും കുറ്റക്കാരാണെന്ന് ഐ.സി.സി വിധിച്ചു. ഇരുവര്‍ക്കും ഓരോ ഡീമെരിറ്റ് പോയിന്റ് വീതം നല്‍കി. സിറാജിന് മാച്ച് ഫീയുടെ 20 ശതമാനം പിഴയുമുണ്ട്. ഐ.സി.സി പെരുമാറ്റച്ചട്ടം ലംഘിച്ചതിനാണ് നടപടി. രണ്ടാമതൊരു ഡീമെറിറ്റ് കൂടി പോയിന്റ് കൂടി ലഭിച്ചാല്‍ താരങ്ങള്‍ക്ക് മത്സരത്തില്‍ വിലക്കുവരും.

ബാറ്റര്‍ വിക്കറ്റ് നഷ്ടമായി പുറത്തേക്ക് പോകുമ്പോള്‍ അധിക്ഷേപകരമോ പ്രകോപനപരമായതോ ആയ ഭാഷാപ്രയോഗം, ആംഗ്യം എന്നിവ പാടില്ലെന്ന വ്യവസ്ഥയാണ് സിറാജ് ലംഘിച്ചത്. കളിക്കാരനെയോ സപ്പോര്‍ട്ടിങ് സ്റ്റാഫിനെയോ അമ്പയറെയോ മാച്ച് റഫറിയെയോ അധിഷേപിക്കുന്ന തരത്തിലുള്ള പെരുമാറ്റം പാടില്ലെന്ന വ്യവസ്ഥയാണ് ഹെഡ് ലംഘിച്ചത്.

എന്നാല്‍ താരത്തിന് പിഴ നല്‍കേണ്ടെന്ന് ഐ.സി.സി വിലയിരുത്തി. ഇരുവരും തങ്ങളുടെ കുറ്റം സമ്മതിക്കുകയും മാച്ച് റഫറി രഞ്ജന്‍ മദുഗല്ലെ നിര്‍ദേശിച്ച ശിക്ഷ അംഗീകരിക്കുകയും ചെയ്‌തെന്ന് ഐ.സി.സി വ്യക്തമാക്കി.

ഓസീസിന്റെ ആദ്യ ഇന്നിങ്‌സിലെ 82ാം ഓവറിലായിരുന്നു നാടകീയ സംഭവങ്ങള്‍ അരങ്ങേറിയത്. ആദ്യ പന്തില്‍ സിറാജിനെ ബൗണ്ടറി കടത്തിയ ഹെഡ് മൂന്നാം പന്തില്‍ സിക്‌സറിനും പറത്തി. എന്നാല്‍ തൊട്ടടുത്ത ഫുള്‍ലെങ്ത് ഡെലിവറിയില്‍ സിറാജ് ഹെഡിനെ ബൗള്‍ഡാക്കി.

പിന്നാലെ ഏറെ അഗ്രസീവായാണ് സിറാജ് ആഘോഷിച്ചത്. ഹെഡ് തിരികെ പ്രതികരിച്ചതോടെ സിറാജ് പവലിയനിലേക്ക് കയറിപ്പോകാന്‍ ആംഗ്യം കാണിച്ചു. ഇത് വലിയ രീതിയില്‍ ചര്‍ച്ചയായിരുന്നു.

മത്സരത്തില്‍ ആക്രമിച്ച് കളിച്ച ട്രാവിസ് ഹെഡ് അഡ്‌ലെയ്ഡില്‍ തന്റെ ടെസ്റ്റ് കരിയറിലെ എട്ടാം സെഞ്ച്വറി പൂര്‍ത്തിയാക്കി. സെഞ്ച്വറിക്ക് ശേഷം സ്‌കോറിങ് ഹെഡ് ഇരട്ടിവേഗത്തിലാക്കി. 141 പന്തില്‍ 140 റണ്‍സുമായാണ് താരം പുറത്തായത്. 17 ഫോറും നാല് സിക്‌സറുമടങ്ങുന്നതാണ് ഇന്നിങ്‌സ്. അഡ്‌ലെയ്ഡ് സ്‌റ്റേഡിയത്തില്‍ നിറഞ്ഞ കാണികള്‍ സഞ്ച്വറി നേടിയ ഹെഡിന് വേണ്ടി കൈയടിക്കുകയും സിറാജിനെ കൂവി വിളിക്കുകയും ചെയ്തു.

ടെസ്റ്റ് ക്രിക്കറ്റിൽ ജസ്പ്രീത് ബുംറയുടെ വിക്കറ്റ് വേട്ട തുടരുന്നു. അഡ്‌ലൈഡിൽ അരങ്ങേറുന്ന ബോർഡർ ഗവാസ്‌കർ ട്രോഫിയിലെ ആദ്യ ഇന്നിങ്‌സിൽ ആസ്‌ട്രേലിയന്‍ ഓപ്പണര്‍ ഉസ്മാൻ ഖ്വാജയെ പുറത്താക്കിയതോടെ കലണ്ടർ വർഷം ബുംറ 50 വിക്കറ്റുകൾ തന്റെ പേരിൽ കുറിച്ചു. ഈ വർഷം ഈ നേട്ടത്തിലെത്തുന്ന ആദ്യ താരമാണ് ബുംറ. വെറും 11 ടെസ്റ്റുകളിൽ നിന്നാണ് ഇന്ത്യൻ പേസറുടെ നേട്ടം.

ഇന്ത്യൻ ക്രിക്കറ്റിൽ കപിൽ ദേവ്, സഹീർ ഖാൻ എന്നിവർ മാത്രമാണ് മുമ്പ് ഒരു കലണ്ടർ വർഷം 50 വിക്കറ്റ് നേടിയിട്ടുള്ള കളിക്കാർ. 15.14 ആവറേജിലാണ് ബുംറയുടെ ചരിത്ര നേട്ടം. 3 ആണ് താരത്തിന്റെ എക്കോണമി റേറ്റ്. പെർത്തിൽ അരങ്ങേറിയ ബോർഡർ ഗവാസ്‌കർ ട്രോഫിയിലെ ആദ്യ മത്സരത്തിൽ ബുംറയുടെ ചിറകേറിയാണ് ഇന്ത്യം ജയം പിടിച്ചത്. രണ്ട് ഇന്നിങ്‌സിലുമായി എട്ട് വിക്കറ്റാണ് ബുംറ തന്റെ പോക്കറ്റിലാക്കിയത്.

അതേസമയം അഡ്‍ലൈഡ് ടെസ്റ്റിലെ ആദ്യ ഇന്നിങ്സില്‍ ഇന്ത്യന്‍ ബാറ്റിങ് നിര ഓസീസ് ബോളര്‍മാര്‍ക്ക് മുന്നില്‍ തകര്‍ന്നടിഞ്ഞു. മിച്ചൽ സ്റ്റാർക്ക് കൊടുങ്കാറ്റായാവതരിച്ചപ്പോൾ വെറും 180 റൺസിന് സന്ദർശകർ കൂടാരം കയറി. 15 ഓവറിൽ 48 റൺസ് വഴങ്ങി ആറ് വിക്കറ്റ് പിഴുതാണ് മിച്ചൽ സ്റ്റാർക്ക് ഇന്ത്യൻ ബാറ്റിങ് നിരയുടെ ചിറകൊടിച്ചത്‌.

42 റൺസെടുത്ത നിതീഷ് റെഡ്ഡിയാണ് ഇന്ത്യൻ നിരയിലെ ടോപ് സ്‌കോറർ. 37 റൺസെടുത്ത കെ.എൽ രാഹുലും 31 റൺസെടുത്ത ശുഭ്മാൻ ഗില്ലും 22 റൺസെടുത്ത അശ്വിനുമാണ് അൽപമെങ്കിലും പൊരുതി നോക്കിയ മറ്റു ബാറ്റർമാർ. ഇന്ത്യൻ നിരയിൽ മൂന്ന് കളിക്കാർ സംപൂജ്യരായി മടങ്ങി

കിങ്സ്റ്റണ്‍: കരീബിയന്‍ മണ്ണില്‍ ചരിത്രവിജയം നേടി ബംഗ്ലാദേശ്. വെസ്റ്റ്ഇന്‍ഡീസിനെതിരെ രണ്ടാം ടെസ്റ്റില്‍ 101 റണ്‍സിനാണ് പരാജയപ്പെടുത്തിയത്. പതിനഞ്ച് വര്‍ഷത്തിനിടെ ആദ്യമായാണ് കരീബിയന്‍ മണ്ണില്‍ ബംഗ്ലാദേശ് വിജയം നേടുന്നത്. രണ്ടാം ഇന്നിങ്സില്‍ 287 റണ്‍സ് വിജയലക്ഷ്യവുമായി ഇറങ്ങിയ വിന്‍ഡിസിനെ 185 റണ്‍സിന് ബംഗ്ലാദേശ് പുറത്താക്കി.

രണ്ട് ടെസ്റ്റ് മത്സരങ്ങളുടെ പരമ്പരയില്‍ ആദ്യ ടെസ്റ്റ് വെസ്റ്റ്ഇന്‍ഡീസ് ജയിച്ചിരുന്നു. ഇതോടെ ടെസ്റ്റ് പരമ്പര സമനിലയിലായി. മൂന്ന് ഏകദിനങ്ങളും മൂന്ന് ടി20 മത്സരങ്ങളുമാണ് വിന്‍ഡീസ് പര്യടനത്തിലുള്ളത്. തയ്ജുല്‍ ഇസ്ലാമാണ് കളിയിലെ താരം. ടസ്‌കിന്‍ അഹമ്മദും ജയ്ഡന്‍ സീല്‍സുമാണ് ടൂര്‍ണമെന്റിലെ താരങ്ങള്‍.

രണ്ടാം ഇന്നിങ്സില്‍ അഞ്ച് വിക്കറ്റ് നേടി തയ്ജുല്‍ ഇസ്ലാമാണ് വിന്‍ഡീസിനെ തകര്‍ത്തത്. ഹസന്‍ മഹ് മൂദും ടസ്‌കിന്‍ അഹമ്മദും രണ്ടുവീതം വിക്കറ്റ് വീഴ്ത്തിയപ്പോള്‍ അവശേഷിക്കുന്ന വിക്കറ്റ് നഹിദ് റാണയും സ്വന്തമാക്കി. 287 റണ്‍സ് വിജയലക്ഷ്യവുമായി ഇറങ്ങിയ വിന്‍ഡീസ് താരങ്ങള്‍ 187 റണ്‍സിന് പുറത്തായി.

18 റണ്‍സിന്റെ ലീഡുമായി ആരംഭിച്ച ബംഗ്ലാദേശിന്റെ രണ്ടാം ഇന്നിങ്സ് 268 റണ്‍സിന് അവസാനിച്ചു. ഇതില്‍ ജാകര്‍ അലിയാണ് മികച്ച പ്രകടനം കാഴ്ച്ചവെച്ചത്, സെഞ്ച്വറിക്ക് ഒന്‍പത് റണ്‍സ് ആകലെ വച്ച് അല്‍സാരി ജോസഫ് അലിയെ വീഴ്ത്തി. 106 പന്തില്‍ നിന്ന് 91 റണ്‍സ് എടുത്തിരുന്നു. സദ്മന്‍ ഇസ്ലാം (46), ഷഹദത്ത് ഹുസൈന്‍ (28), മെഹ്ദി ഹസന്‍ മിറസ് (42), ലിറ്റന്‍ ദാസ് (25) എന്നിവര്‍ മികച്ച പ്രകടനം പുറത്തെടുത്തു. രണ്ടാം ഇന്നിങ്‌സില്‍ വിന്‍ഡീസിനായി അല്‍സാരി ജോസഫും കെമര്‍ റോച്ചും മൂന്ന് വിക്കറ്റ് വീതം വീഴ്ത്തി ഷമര്‍ ജോസഫ് രണ്ടും ജയ്ഡന്‍ സീല്‍സ്, ജസ്റ്റന്‍ ഗ്രീവ്‌സ് എന്നിവര്‍ ഓരോ വിക്കറ്റും വീഴ്ത്തി.

ബംഗ്ലാദേശിനെ 164 റണ്‍സില്‍ ഒതുക്കി ബാറ്റിങിനിറങ്ങിയ വിന്‍ഡീസിന്റെ ഒന്നാം ഇന്നിങ്‌സ് 146 റണ്‍സില്‍ അവസാനിച്ചു. 40 റണ്‍സെടുത്ത കെസി കാര്‍ട്ടി, 39 റണ്‍സെടുത്ത ക്യാപ്റ്റന്‍ ക്രെയ്ഗ് ബ്രാത്വെയ്റ്റ് എന്നിവര്‍ മാത്രമാണ് ആദ്യ ഇന്നിങ്സില്‍ തിളങ്ങിയത്. മികയ്ല്‍ ലൂയിസാണ് രണ്ടക്കം കടന്ന മറ്റൊരാള്‍. താരം 12 റണ്‍സെടുത്തു.