മലപ്പുറം: ക്ഷേമ പെന്‍ഷന്‍ തട്ടിപ്പില്‍ പൊതുഭരണ വകുപ്പിലെ ജീവനക്കാരായ 6 പാര്‍ട്ട് ടൈം സ്വീപ്പര്‍മാരെ പിരിച്ചു വിടണമെന്ന് പൊതു ഭരണ അഡി. സെക്രട്ടറി നിര്‍ദേശം നല്‍കി. 18% പലിശ നിരക്കില്‍ പണം തിരികെ പിടിക്കാനും നിര്‍ദേശം. സംഭവത്തില്‍ സര്‍ക്കാര്‍ ഉദ്യോഗസ്ഥര്‍ക്കെതിരെ കഴിഞ്ഞ ദിവസം വകുപ്പ്തല നടപടി ആരംഭിച്ചിരുന്നു. ഇതിന്റെ ഭാഗമായി മണ്ണ് സംരക്ഷണ വകുപ്പിലെ ആറ് ഉദ്യോഗസ്ഥരെ സസ്‌പെന്‍ഡ് ചെയ്തിരുന്നു.

1458 സര്‍ക്കാര്‍ ജീവനക്കാര്‍ അനര്‍ഹമായി ക്ഷേമ പെന്‍ഷന്‍ കൈപറ്റുന്നുണ്ടെന്ന് ധനവകുപ്പ് കണ്ടെത്തിയിരുന്നു. ഇവരുടെ പട്ടിക അതാത് വകുപ്പുകള്‍ക്ക് കൈമാറി വകുപ്പുതല അച്ചടക്ക നടപടി സ്വീകരിക്കാന്‍ ധനവകുപ്പ് നിര്‍ദേശിക്കുകയും ചെയ്തു. ഇതിന്റെ അടിസ്ഥാനത്തില്‍ മണ്ണ് സംരക്ഷണ വകുപ്പ് വിജിലന്‍സ് സെല്ലിലെ ആറ് ഉദ്യോഗസ്ഥരെ സസ്‌പെന്‍ഡ് ചെയ്തു കൊണ്ട് ഡയറക്ടര്‍ ഉത്തരവ് ഇറക്കിയത്.

ഇതില്‍ നാല് പേര്‍ പാര്‍ട്ട് ടൈം സ്വീപ്പര്‍മാരാണ്. ഒരാള്‍ വര്‍ക്ക് സുപ്രണ്ടും മറ്റൊരാള്‍ അറ്റന്‍ഡറുമാണ്. ഇവര്‍ കൈപറ്റിയ തുക 18 ശതമാനം പിഴ പലിശയോടെ തിരികെ പിടിക്കും. നിലവില്‍ അന്വേഷണ വിധേയമായാണ് സസ്‌പെന്‍ഷന്‍. ഇവരുടെ വിശദീകരണം കൂടി കേട്ട ശേഷം തുടര്‍നടപടികളിലേക്ക് കടക്കും. വരും ദിവസങ്ങളില്‍ മറ്റ് വകുപ്പുകളും സമാന നടപടികളിലേക്ക് നീങ്ങും.

മാനന്തവാടി: വ്യക്തിവൈരാഗ്യത്തിന്റെ പേരില്‍ മകനെ കഞ്ചാവ് കേസില്‍ കുടുക്കാന്‍ ശ്രമിച്ച പിതാവ് അറസ്റ്റില്‍. മാനന്തവാടി ചെറ്റപ്പാലം പുത്തന്‍തറ വീട്ടില്‍ പി അബൂബക്കറാണ്(67) അറസ്റ്റിലായത്. അബൂബക്കറിന്റെ കീഴില്‍ ജോലി ചെയ്യുന്ന വ്യക്തിയുടെ സഹായത്തോടെയാണ് അബൂബക്കര്‍ മകന്റെ കടയില്‍ കഞ്ചാവ് വെച്ചത്. തുടര്‍ന്ന് എക്സൈസിനെ വിവരം അറിയിക്കുകയായിരുന്നു

സെപ്റ്റംബര്‍ ആറിനായിരുന്നു സംഭവം. അബൂബക്കറിന്റെ മകന്‍ നൗഫലിന്റെ മാനന്തവാടി-മൈസൂരു റോഡിലാണ് അബൂബക്കറിന്റെ മകന്‍ നൗഫലിന്റെ സ്ഥാപനമുള്ളത്. നൗഫല്‍ പള്ളിയില്‍ നമസ്‌കരിക്കാന്‍ പോയ സമയത്ത് മറ്റുള്ളവരുടെ സഹായത്തോടെ അബൂബക്കര്‍ കടയില്‍ കഞ്ചാവ് വെക്കുകയായിരുന്നു. പിന്നാലെ അബൂബക്കര്‍ തന്നെ എക്സൈസില്‍ വിളിച്ച് വിവരം നല്‍കുകയായിരുന്നു. തുടര്‍ന്ന് നടത്തിയ പരിശോധനയില്‍ രണ്ട് ഗ്രാം കഞ്ചാവ് കണ്ടെത്തുകയും നൗഫലിനെ കസ്റ്റഡിയിലെടുക്കുകയും ചെയ്തു.

സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ പരിശോധനയിലാണ് നൗഫലിന്റെ നിരപരാധിത്വം തെളിയിക്കാനായത്. തുടര്‍ന്ന് കസ്റ്റഡിയിലെടുത്ത അന്ന് തന്നെ നൗഫലിന് ജാമ്യം നല്‍കിയിരുന്നു. പിന്നീട് നടത്തിയ അന്വേഷണത്തിലാണ് കേസില്‍ അബൂബക്കറിന്റെ പങ്ക് വ്യക്തമായത്.

അബൂബക്കറിന്റെ കീഴില്‍ ജോലി ചെയ്യുന്ന കര്‍ണാടക സ്വദേശിയും ഓട്ടോ ഡ്രൈവറായ ജിന്‍സ് വര്‍ഗീസും അബ്ദുള്ള എന്നയാളുമാണ് അബൂബക്കറിനെ സഹായിച്ചത്. കര്‍ണാടകയില്‍ നിന്നായിരുന്നു സംഘം കഞ്ചാവ് എത്തിച്ചത്. കഞ്ചാവ് കൊണ്ടുവരാന്‍ സഹായം നല്‍കിയ ജിന്‍സിനെ എക്സൈസ് അറസ്റ്റ് ചെയ്തിരുന്നു. അബൂബക്കറിനെ മുഖ്യപ്രതിയാക്കിയാണ് എക്സൈസ് കേസ് രജിസ്റ്റര്‍ ചെയ്തത്. കോടയില്‍ ഹാജരാക്കിയ അബൂബക്കറിനെ റിമാന്‍ഡ് ചെയ്തു.

കോതമംഗലത്ത് ആറുവയസ്സുകാരിയെ രണ്ടാനമ്മ കൊലപ്പെടുത്തിയ സംഭവത്തിനു പിന്നില്‍ ദുര്‍മന്ത്രവാദം സംശയിച്ച് പൊലീസ്.

നെല്ലിക്കുഴിയില്‍ താമസിക്കുന്ന യുപി സ്വദേശി അജാസ് ഖാന്റെ ആറുവയസ്സുള്ള മകളെ ഇന്നലെ രാവിലെ വീടിനുള്ളില്‍ മരിച്ച നിലയില്‍ കണ്ടെത്തുകയായിരുന്നു. അജാസിന്റെ രണ്ടാം ഭാര്യ അനിഷയാണ് കുഞ്ഞിനെ ശ്വാസം മുട്ടിച്ചു കൊലപ്പെടുത്തിയതെന്ന് പൊലീസ് കണ്ടെത്തല്‍. അജാസിന്റെ ആദ്യ ഭാര്യയിലുള്ള കുട്ടിയാണ് കൊല്ലപ്പെട്ട മുസ്‌കാന്‍.

അറസ്റ്റിലായ അനിഷയുടെ മൊഴികളില്‍ വൈരുദ്ധ്യമുണ്ട്. അനിഷയുടെ ഭര്‍ത്താവ് അജാസ് ഖാന്‍ പൊലീസ് കസ്റ്റഡിയില്‍ തുടരുകയാണ്. ആദ്യ വിവാഹത്തില്‍ അനിശക്കും ഒരു കുട്ടിയുണ്ട്. അടുത്തിടെ അനിഷ വീണ്ടും ഗര്‍ഭിണിയായിരുന്നു. എന്നാല്‍ ഒരു കുട്ടി കൂടിയായാല്‍ മുന്നോട്ടുള്ള ജീവിതത്തില്‍ മുസ്‌കാന്‍ തടസമാകുമെന്ന് കരുതിയാണ് കുഞ്ഞിനെ കൊന്നതെന്നാണ് അനിഷ ആദ്യം മൊഴി നല്‍കിയിരുന്നു. എന്നാല്‍ തുടര്‍ന്നുള്ള ചോദ്യം ചെയ്യലില്‍ ദുര്‍മന്ത്രവാദത്തിലേക്ക് എത്തിപ്പെടുന്ന വിവരങ്ങലാണ് പൊലീസിനു ലഭിച്ചത്.

രാത്രി ഉറങ്ങാന്‍ കിടന്ന കുട്ടിക്ക് അനക്കമില്ലെന്ന് അറിയിച്ച് വ്യാഴാഴ്ച രാവിലെ ആറരയോടെ അജാസ് ഖാന്‍ കുട്ടിയുമായി അയല്‍വാസികളെ സമീപിക്കുകയായിരുന്നു. പൊലീസും ശാസ്ത്രീയാന്വേഷണ വിഭാഗവും നടത്തിയ പരിശോധനയില്‍ കൊലപാതകമാണെന്ന സംശയം ഉയര്‍ന്നു. മൃതദേഹം പോസ്റ്റ്‌മോര്‍ട്ടത്തിന് എറണാകുളം ഗവ. മെഡിക്കല്‍ കോളജിലേക്ക് മാറ്റി. പോസ്റ്റ്‌മോര്‍ട്ടത്തിലാണ് കഴുത്തുഞെരിച്ച് ശ്വാസംമുട്ടിച്ച് കൊലപ്പെടുത്തിയതാണെന്ന് സ്ഥിരീകരിച്ചത്. മൃതദേഹം കോതമംഗലം താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.