ഹണി റോസിനെതിരെ മോശം പരാമര്‍ശം നടത്തിയെന്ന പരാതിയില്‍ മുന്‍കൂര്‍ ജാമ്യാപേക്ഷ നല്‍കി രാഹുല്‍ ഈശ്വര്‍. ഹൈക്കോടതിയിലാണ് രാഹുല്‍ ഈശ്വര്‍ മുന്‍കൂര്‍ ജാമ്യാപേക്ഷ നല്‍കിയത്. ഹൈക്കോടതി നാളെ മുന്‍കൂര്‍ ജാമ്യാപേക്ഷ പരിഗണിക്കും. ചാനല്‍ ചര്‍ച്ചകളില്‍ നടി ഹണി റോസിനെതിരെ മോശം പരാമര്‍ശം നടത്തിയെന്ന് ചൂണ്ടിക്കാട്ടി തൃശൂര്‍ സ്വദേശിയാണ് പരാതി നല്‍കിയത്. എറണാകുളം സെന്‍ട്രല്‍ പൊലീസ് സ്റ്റേഷനിലാണ് പരാതി നല്‍കിയത്.

അതേസമയം ഹണി റോസ് നല്‍കിയ പരാതിയില്‍ പൊലീസ് ഇതുവരെ കേസെടുത്തിട്ടില്ല. പരാതി വിശദമായി പരിശോധിച്ചു കൊണ്ടിരിക്കുകയാണെന്നാണ് വിശദീകരണം. നിയമവിദഗ്ധരുമായുള്ള ചര്‍ച്ചകള്‍ക്കു ശേഷമേ കേസെടുക്കുന്നതടക്കമുള്ള നടപടികളിലേക്ക് പൊലീസ് കടക്കുകയുള്ളൂ. സൈബര്‍ ക്രൈമിന്റെ പരിധിയില്‍ വിഷയം വരുമോയെന്നതടക്കം പൊലീസ് പരിശോധിക്കുന്നു.

ബോബി ചെമ്മണ്ണൂരിന് പിന്നാലെ രാഹുല്‍ ഈശ്വറിനെതിരെയും നിയമനടപടിക്കൊരുങ്ങുന്നതായി ഹണി റോസ് ഫേസ്ബുക്ക് കുറിപ്പിലൂടെ വ്യക്തമാക്കിയിരുന്നു.

കലൂര്‍ സ്റ്റേഡിയത്തില്‍ നടന്ന നൃത്തപരിപാടിയുടെ ടിക്കറ്റ് വില്‍പ്പനയുടെ വിവരങ്ങള്‍ ബുക്ക് മൈ ഷോ ആപ്പ് കൊച്ചി കോര്‍പറേഷന് കൈമാറിയില്ല. വിവരങ്ങള്‍ കൈമാറണമെന്ന് കോര്‍പറേഷന്‍ മെയില്‍ അയച്ചിരുന്നു. എന്നാല്‍ മൃദംഗവിഷനും മറുപടി നല്‍കാന്‍ തയ്യാറായില്ല.

അതേസമയം കോര്‍പറേഷന്റെ ലെറ്റര്‍ ഹെഡില്‍ തന്നെയുള്ള നോട്ടീസ് വേണമെന്നാണ് ബുക്ക് മൈ ഷോ ആപ്പ് ആവശ്യപ്പെടുന്നത്.

പത്തനംതിട്ടയില്‍ പതിനെട്ടുകാരി പീഡനത്തിനിരയായ സംഭവത്തില്‍ 13 പേര്‍ കൂടി കസ്റ്റഡിയില്‍. ഇതുവരെ ഒന്‍പത് എഫ്‌ഐആറുകള്‍ രജിസ്റ്റര്‍ ചെയ്തു. കേസില്‍ 20 പേരുടെ അറസ്റ്റ് ഇതുവരെ രേഖപ്പെടുത്തി. ഇവരുടെ തെളിവെടുപ്പ് നടപടികള്‍ പുരോഗമിക്കുകയാണ്.

60 ലേറെ പേര്‍ ലൈംഗിക പീഡനത്തിനിരയാക്കി എന്ന് പെണ്‍കുട്ടി കഴിഞ്ഞ ദിവസം മൊഴി നല്‍കിയിരുന്നു. പീഡനത്തിന്റെ ദൃശ്യങ്ങള്‍ അടക്കമുള്ള തെളിവുകള്‍ പൊലീസിന് ലഭിച്ചു. കായിക താരമായ പെണ്‍കുട്ടിയെ പീഡിപ്പിച്ചവരില്‍ പരീശീലകരും സഹപാഠികളും മറ്റ് കായികതാരങ്ങളും ഉണ്ടെന്ന കണ്ടെത്തലുണ്ട്.