നായകന്‍ രോഹിത്തിന്റെയും വിരാട് കോഹ്‌ലിന്റെയും വെടിക്കെട്ട് ബാറ്റിങ്ങും
ജസ്പ്രീതിന്റെ പന്തും വാചാലമാകാനൊരുങ്ങുന്ന അഹ്മദാബാദ് നരേന്ദ്ര മോദി മൈതാനത്ത് ഇന്ന് ക്രിക്കറ്റിലെ ഏറ്റവും ആവേശകരമായ തീപാറും പോരാട്ടം.

ലോകകപ്പില്‍ 7 വട്ടം മുഖാമുഖം നിന്നിട്ടും ഇന്ത്യക്കെതിരെ ഒരിക്കല്‍ പോലും ജയിക്കാനായില്ലെന്ന മോശം റെക്കോഡ് മറികടക്കാമെന്ന മോഹവുമായി പാകിസ്താന്‍ കളിക്കളത്തിലറങ്ങുമ്പോള്‍ ഇതുവരെയും കാത്ത അപരാജിത കുതിപ്പ് തുടരാനാണ് ആതിഥേയരുടെ അങ്കക്കലി.

അമിതാഭ് ബച്ചനും രജനികാന്തും പോലുള്ള ഇതിഹാസങ്ങള്‍ കളി കാണാനെത്തുന്ന മൈതാനത്ത് ഇത്തിരി നേരത്തേ ആഘോഷം കൊഴുപ്പിച്ചാകും മത്സരത്തിന് തുടക്കമാകുക.

കടലാസില്‍ മുന്‍തൂക്കം ഇന്ത്യക്കു തന്നെ. ബാറ്റിങ്ങിലും ബൗളിങ്ങിലും നിലവിലെ പ്രകടനംവെച്ച് ഏതു വമ്പന്‍മാരെയും അനായാസം മുട്ടുകുത്തിക്കാന്‍ ആതിഥേയര്‍ക്ക് ശൗര്യം ഇത്തിരി കൂടും. മുമ്പ് ജാവേദ് മിയാന്‍ദാദും ചേതന്‍ ശര്‍മയുമെന്ന പോലെ സചിനും ശുഐബ് അക്തറുമെന്ന പോലെ ഏറ്റവുമൊടുവില്‍ വിരാട് കോഹ്‌ലിയും വഹാബ് റിയാസുമെന്നുമുള്ള ദ്വന്ദങ്ങള്‍ക്കു സമാനമായി ഇത്തവണയുമുണ്ട് മുഖാമുഖം നില്‍ക്കാന്‍ ഇരുവശത്തും ഏറ്റവും കരുത്തര്‍.

രോഹിത്തിനെതിരെ ശഹീന്‍ അഫ്രീദിയും കോഹ്‌ലിക്കെതിരെ ഹാരിസ് റഊഫും ബാബര്‍ അഅ്‌സമിനെതിരെ ബുംറയുമെന്നതെല്ലാം സാമ്ബ്‌ളുകള്‍ മാത്രം. കണക്കിലെ കളികളില്‍ മുന്‍തൂക്കം നേടിയാലും ഏതു നിമിഷവും ഫലം മാറ്റാന്‍ ശേഷിയുള്ള ക്രിക്കറ്റില്‍ പാകിസ്താന്‍ കരുതിവെച്ച ചില വജ്രായുധങ്ങള്‍ കളി നിര്‍ണയിക്കുമോയെന്നാണ് ആരാധകര്‍ കാത്തിരിക്കുന്നത്.

ശഹീന്‍ ഫാക്ടര്‍

പറവകളുടെ രാജാവെന്നാണ് ശഹീന്‍ എന്ന പദത്തിനര്‍ഥം. 1,32,000 കാണികളെ ഉള്‍ക്കൊള്ളുന്ന അഹ്മദാബാദ് മൈതാനത്ത് ശഹീന്‍ അഫ്രീദിയെന്ന അതിവേഗക്കാരന്‍ കൊടുങ്കാറ്റ് വിതക്കുമോയെന്നതാണ് കാണികളെ ഉദ്വേഗമുനയില്‍ നിര്‍ത്തുന്നത്. ഏഷ്യകപ്പില്‍ ശുഭ്മന്‍ ഗില്‍ മനോഹര പ്രകടനവുമായി താരത്തെ പിച്ചിച്ചീന്തിയത് ഏറെയൊന്നും പഴക്കമുള്ളതല്ല. എന്നാല്‍, ഗില്‍ ഇറങ്ങുമോയെന്ന് ഇനിയും ഉറപ്പായിട്ടില്ല.

പാക് ബൗളിങ് നിരയില്‍ മറ്റെല്ലാവരും ഈ ലോകകപ്പില്‍ നന്നായി തല്ലുവാങ്ങിയവര്‍. വൈസ് ക്യാപ്റ്റന്‍ ശദാബ് ഖാന്‍ മാത്രം കഴിഞ്ഞ രണ്ടുകളികളില്‍ എറിഞ്ഞ 16 ഓവറില്‍ വഴങ്ങിയത് 100 റണ്‍സാണ്. ഹസന്‍ അലിയെ പോലുള്ള പുതുമുഖങ്ങളും ഇന്ത്യന്‍ ബാറ്റര്‍മാര്‍ക്ക് വലിയ ഭീഷണി സൃഷ്ടിച്ചേക്കില്ല. സ്പിന്നില്‍ എന്നും പാകിസ്താന്‍ ദുര്‍ബലമാണെന്നത് വേറെ കാര്യം.

ബാറ്റിങ് കരുത്ത്

ബാറ്റിങ്ങില്‍ പക്ഷേ, അങ്ങനെയല്ല കാര്യങ്ങള്‍. ശ്രീലങ്കക്കെതിരെ മുഹമ്മദ് റിസ്‌വാന്‍ ഗംഭീരമായാണ് ജയം അടിച്ചെടുത്തത്. ഒപ്പം നിന്ന അബ്ദുല്ല ശഫീഖും മാരക ഫോം കാത്തു. ഏതുനാളിലും ടീമിന്റെ അപ്രതീക്ഷിത സാന്നിധ്യമാകാന്‍ കരുത്തുള്ള സഊദ് ശകീല്‍, ക്യാപ്റ്റന്‍ ബാബര്‍ അഅ്‌സം എന്നിങ്ങനെ അതിമിടുക്കരുടെ വലിയ നിര തന്നെ പാകിസ്താനെ വേറിട്ടുനിര്‍ത്തുന്നു.

എന്നാല്‍, പേസര്‍മാര്‍ക്കൊപ്പം ഇന്ത്യന്‍ ബൗളിങ്ങിന്റെ നെടുന്തൂണായി മാറിയ കുല്‍ദീപ് യാദവിനു മുന്നില്‍ തോറ്റുപോകുന്നതാണ് ഈ കരുത്തരത്രയും. ബുംറയും സിറാജും നയിക്കുന്ന പേസും അശ്വിനോ ശാര്‍ദുലോ കൂട്ടുനല്‍കുന്ന സ്പിന്നും ചേര്‍ന്ന ഇന്ത്യന്‍ ബൗളിങ് എന്നും പ്രതിഭാ ധാരാളിത്തത്തിന് പേരുകേട്ടവര്‍.

ടീം ഇന്ത്യ

രോഹിത് ശര്‍മ (ക്യാപ്റ്റന്‍), ഹാര്‍ദിക് പാണ്ഡ്യ (ഉപനായകന്‍), ശുഭ്മന്‍ ഗില്‍, വിരാട് കോഹ്!ലി, ശ്രേയസ് അയ്യര്‍, കെ.എല്‍. രാഹുല്‍, രവീന്ദ്ര ജദേജ, ശാര്‍ദുല്‍ ഠാകുര്‍, ജസ്പ്രീത് ബുംറ, മുഹമ്മദ് സിറാജ്, കുല്‍ദീപ് യാദവ്, മുഹമ്മദ് ഷമി, ആര്‍. അശ്വിന്‍, ഇശാന്‍ കിഷന്‍, സൂര്യകുമാര്‍ യാദവ്.

ടീം പാകിസ്താന്‍

ബാബര്‍ അസം (ക്യാപ്റ്റന്‍), ശദാബ് ഖാന്‍, ഫഖര്‍ സമാന്‍, ഇമാമുല്‍ ഹഖ്, അബ്ദുല്ല ശഫീഖ്, മുഹമ്മദ് റിസ്!വാന്‍, സഊദ് ശകീല്‍, ഇഫ്തിഖാര്‍ അഹ്മദ്, സല്‍മാന്‍ അലി ആഖ, മുഹമ്മദ് നവാസ്, ഉസാമ മിര്‍, ഹാരിസ് റഊഫ്, ഹസന്‍ അലി, ശഹീന്‍ അഫ്രീദി, മുഹമ്മദ് വസീം.