Video Stories

”ജസ്റ്റ് ഒരു ചെറിയേ ക്യാപ്ഷന്‍ മതിയെടാ…രണ്ട് മിനുട്ടിന്റെ പണി”

Published

7 years ago

March 27, 2018

നസീല്‍ വോയിസി

ആരെയെങ്കിലും സഹായിക്കുന്നതില്‍ ബുദ്ധിമുട്ടുണ്ടായിട്ടൊന്നുമല്ല. പക്ഷേ ആകെ വൃത്തിക്ക് അറിയാവുന്ന പണി, അന്നം തരുന്ന പണി, ”ജസ്റ്റ് ചെറിയൊരു ഹെല്‍പ്പ്” മാത്രമായി പോവുന്നത് കാണുന്നത് കൊണ്ടും കുറച്ചൊക്കെ അനുഭവിക്കേണ്ടി വരുന്നതും കൊണ്ടാണ് ഇങ്ങനെ എഴുതേണ്ടി വരുന്നത്.

ഇടയ്ക്ക് ഓരോ വിളിയും മെസേജുമൊക്കെ വരും. ചിലരൊക്കെ വര്‍ഷങ്ങള്‍ക്ക് ശേഷമാവും വിളിക്കുന്നതും മെസേജ് അയക്കുന്നതുമൊക്കെ. സുഖാണോ എന്നൊക്കെ ചോദിച്ച് പെട്ടെന്ന് അടുത്ത കാര്യത്തിലെത്തും ”എടാ, ചെറിയൊരു ഹെല്‍പ്പ് വേണം. ഒരു ക്യാപ്ഷന്‍ വേണം. രണ്ടു മൂന്ന് വരി മതി. ജസ്റ്റ് ഒന്നാലോചിച്ച് നല്ല റണ്ട് മൂന്ന് ഓപ്ഷന്‍ താ” സാഹചര്യങ്ങള്‍ക്കനുസരിച്ച് അതൊരു ‘ജസ്റ്റ് ചെറിയൊരു ഫീച്ചര്‍’, സ്ഥാപനത്തിന് ‘ജസ്റ്റ് ചെറിയൊരു പേര്’, നോട്ടീസിലടിക്കാന്‍ ‘ജസ്റ്റ് കുറച്ചൊരു കണ്ടന്റ്’ എന്നിങ്ങനെയൊക്കെ ആവും.

അഞ്ച് പത്ത് മിനുറ്റ് കൊണ്ട്, ഒരുപക്ഷേ അര ദിവസം കൊണ്ട്, അല്ലെങ്കില്‍ ഒരു ദിവസം കൊണ്ടൊക്കെ ഇപ്പറഞതൊക്കെ ചെയ്ത് കൊടുക്കാനും പറ്റും. അതോടെ ആവശ്യം കഴിഞ്ഞു. പിന്നെ സലാമടിക്കും. ചെയ്യുന്ന പണിക്ക് കൂലിയോ? എയ്, ഇത് ‘ജസ്റ്റ് ചെറിയൊരു ഹെല്‍പ്പല്ലേ’, അതിനെക്കുറിച്ച് മിണ്ടുകയേ ഇല്ല. ഇനിയഥവാ കൂലി ചോദിച്ചാല്‍, തന്നാല്‍ ”ഈ ചെറിയ പണിക്ക് ഇത്രയും പൈസയോ” എന്ന കമന്റുണ്ടാവും. (ചോദിക്കാനറിയാത്തോണ്ട് കിട്ടാതെ പോയതാണ് ഏറെയും, ഇപ്പോഴുമതേ 🙂 )

ഈ കുറഞ്ഞ നേരം കൊണ്ട് ഇതെങ്ങനെയാ ചെയ്യുന്നതെന്ന് ഇവരെന്നെങ്കിലും ഓര്‍ക്കുന്നുണ്ടോ ആവോ? ഇല്ലെങ്കില്‍ ഈ വായിക്കുന്നവരെങ്കിലും ഓര്‍ക്കണം. അഞ്ചോ പത്തോ മിനുറ്റ് കൊണ്ട് ഒരാള്‍ നല്ലൊരു ക്യാപ്ഷന്‍ തരുന്നുണ്ടെങ്കില്‍,അര ദിവസം കൊണ്ട് ഒരു കുറിപ്പോ ഫീച്ചറോ തരുന്നുണ്ടെങ്കില്‍, ഒരു ഡിസൈന്‍ തരുന്നുണ്ടെങ്കില്‍ അയാളുടെ ഒരുപാട് വര്‍ഷത്തെ ആലോചനകളും ചിന്തകളും യാത്രകളും വായനകളുമൊക്കെ കൂട്ടിപ്പിഴിഞ്ഞതിനെ ഫലമാണത്. അയാളുടെ കുറേ ഉറക്കമില്ലാത്ത രാത്രികളും സിനിമകാണലുകളും എന്നിങ്ങനെ അയാളുടെ അനുഭവങ്ങളുടെ ആകെ ഫലം. അതാണ് ജസ്റ്റ് ചെറിയൊരു ഹെല്‍പ്പ് ആയി ഓസായിപ്പോവുന്നത്. കിട്ടുന്നവന് അത് കുറച്ച് നേരം കൊണ്ട് എളുപ്പം ചെയ്‌തെടുക്കാവുന്ന പണിയായൊക്കെ ആയിതോന്നാം, പക്ഷേ ഒരാളുടെ ഉള്ള് കിടന്ന് കുറേ വിയര്‍ത്തതിന്റെ, വിയര്‍ക്കുന്നതിന്റെ ഉപ്പുരസത്തില്‍ നിന്ന് വേരെടുത്തതാണ് ചങ്ങാതീ ആ ഫലം.

കൂടെ പണിയെടുത്തിരുന്ന, ചങ്ങാതിമാരായ ആര്‍ട്ടിസ്റ്റ്മാരില്‍ പലരും ഇങ്ങനെ ഊറ്റിയെടുക്കപ്പെട്ടവരായിരുന്നു. രാത്രി ഉറക്കമിളച്ചിരുന്നും കണ്ണില്‍ കണ്ട ഡിസൈനിലും സിനിമാ പോസ്റ്ററിലും പറമ്പിലുമൊക്കെ നോക്കിയിരുന്നും പുസ്തകം വായിച്ചുമൊക്കെ അവരുടെ മനസ്സില്‍ രൂപപ്പെട്ട പല അച്ചുകളും ജസ്റ്റ് ചെറിയൊരു ഹെല്‍പ്പായി പോവുന്നത് കാണാറുണ്ട്. മണിക്കൂറുകളോളം കംപ്യൂട്ടര്‍ സ്‌ക്രീനില്‍ നോക്കിയിരുന്ന അവര്‍ക്ക് ബാക്കിയാവുന്നത് തലവേദനയും ഉറക്കമൊഴിക്കലും.

ഏജന്‍സികളില്‍ പോയാല്‍ പതിനായിരങ്ങളും ലക്ഷങ്ങളും വിലകൊടുക്കേണ്ടി വരുന്ന കണ്ടന്റും ഡിസൈനുകളുമൊക്കെയാണ് ഈ ജസ്റ്റ് വെറും ഹെല്‍പ്പുകളായി നിങ്ങള്‍ക്ക് കിട്ടുന്നതെന്ന് എപ്പോഴെങ്കിലുമൊക്കെ ഒന്നോര്‍ക്കണം. കുറേ അലഞ്ഞും ആലോചിച്ചുമൊക്കെ മനസ്സിലിങ്ങനെ ഉരുത്തിരിഞ്ഞ അക്ഷരങ്ങളും വാക്കുകളും പ്രയോഗങ്ങളുമൊക്കെയാണ് ‘ജസ്റ്റ് അഞ്ചു മിനുറ്റിന്റെ പണിയായി’ നിങ്ങള്‍ വിധിയെഴുതുന്നത്. തൊണ്ണൂറ് സെക്കന്റിന്റെ സ്‌ക്രിപ്റ്റില്‍ മുഴുവന്‍ മെസേജും വേണമെന്നൊക്കെ പറയുമ്പോള്‍ തൊണ്ണൂറായിരം ഞരമ്പ് മുറുകിയാണ് അതുണ്ടാവുന്നതെന്ന് വല്ലപ്പോഴുമൊക്കെ സ്മരിക്കണം.

”ഈഫ് യു ആര്‍ ഗുഡ് അറ്റ് സംതിങ്ങ്, നെവര്‍ ഡു ഇറ്റ് ഫോര്‍ ഫ്രീ” എന്നൊക്കെ ഇടയ്ക്ക് സ്വയം ഗുമ്മിന് പറയുമെന്നേയുള്ളൂ. ഇപ്പണിക്ക് കൂലി ചോദിച്ചു വാങ്ങാനറിയാത്തതുകൊണ്ടാണ്. ശരിക്കും അറിയാത്തത് കൊണ്ടാണ് എഴുതേണ്ടി വന്നത്.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

1 day ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

6 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

1 week ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.