ഡല്‍ഹി മുനിസിപ്പല്‍ കോര്‍പ്പറേഷന്‍ തിരഞ്ഞെടുപ്പ് വോട്ടെടുപ്പ് പുരോഗമിക്കുന്നു. രാവിലെ മുതല്‍ പോളിങ് സ്‌റ്റേഷനുകളില്‍ വോട്ടര്‍മാരുടെ നീണ്ട നിരയാണ്. 250 വാര്‍ഡുകളില്‍ നിന്നായി 1349 സ്ഥാനാര്‍ഥികളാണ് എംസിഡി നഗരസഭാ തിരഞ്ഞെടുപ്പില്‍ ഭാഗ്യം പരീക്ഷിക്കുന്നത്. കനത്ത പോളിങ്ങാണ് ഇതുവരെ ഉള്ളത്.
1.45 കോടിയിലധികം വോട്ടര്‍മാരാണ് ഇന്ന് സ്ഥാനാര്‍ത്ഥികളുടെ വിധി നിര്‍ണയിക്കുന്നത്. കന്നിവോട്ട് ചെയ്യാനെത്തിയത് 95,458 യുവാക്കളാണ്. ലോകത്തിലെ ഏറ്റവും വലിയ സ്ഥാപനങ്ങളിലൊന്നാണ് ഡല്‍ഹി മുനിസിപ്പല്‍ കോര്‍പ്പറേഷന്‍.
ഡല്‍ഹി കോണ്‍ഗ്രസ് അധ്യക്ഷന്‍ അനില്‍ ചൗധരിയുടെ പേര് വോട്ടര്‍ പട്ടികയിലില്ല. കോണ്ട്‌ലി വാര്‍ഡിലെ പോളിംഗ് സ്‌റ്റേഷനില്‍ വോട്ട് ചെയ്യാന്‍ അനില്‍ ചൗധരി എത്തിയപ്പോഴാണ് വോട്ടര്‍ പട്ടികയില്‍ പേരില്ലാത്തത് അറിഞ്ഞത്. വോട്ടര്‍ പട്ടികയില്‍ പേരില്ലാത്തതിനാല്‍ അനില്‍ ചൗധരിക്ക് വോട്ട് ചെയ്യാതെ മടങ്ങേണ്ടി വന്നു.