Football

ലൂന vs ഓഗ്ബജേ

സീസണില്‍ ബ്ലാസ്റ്റേഴ്‌സിന്റെ ആദ്യ വിദേശ സൈനിങായിരുന്നു ലൂണ. എട്ടു മാസങ്ങള്‍ക്കിപ്പുറം ഉറുഗ്വേ താരം വലങ്കാല്‍ കൊണ്ടുള്ള മന്ത്രജാലത്താല്‍ ടീമിന്റെ നെടുന്തൂണായി നിലയുറപ്പിക്കുമ്പോള്‍ ആരാധകര്‍ ഒരേ സ്വരത്തില്‍ പറയുന്നു, ലൂണ ലയണ്‍ തന്നെ !.

Published

3 years ago

March 19, 2022

Test User

കഴിഞ്ഞ ജൂലൈയില്‍ മധ്യനിര താരം അഡ്രിയാന്‍ നിക്കോളസ് ലൂണ റെറ്റാമര്‍ എന്ന ലൂണയെ കേരള ബ്ലാസ്റ്റേഴ്‌സ് ടീമിലെത്തിച്ചപ്പോള്‍ നെറ്റി ചുളിച്ചവരായിരുന്നു ഏറെയും. താരത്തിന്റെ മികവില്‍ ആരാധകര്‍ ഉള്‍പ്പെടെ പലരും സംശയം പ്രകടിപ്പിച്ചു. സീസണില്‍ ബ്ലാസ്റ്റേഴ്‌സിന്റെ ആദ്യ വിദേശ സൈനിങായിരുന്നു ലൂണ. എട്ടു മാസങ്ങള്‍ക്കിപ്പുറം ഉറുഗ്വേ താരം വലങ്കാല്‍ കൊണ്ടുള്ള മന്ത്രജാലത്താല്‍ ടീമിന്റെ നെടുന്തൂണായി നിലയുറപ്പിക്കുമ്പോള്‍ ആരാധകര്‍ ഒരേ സ്വരത്തില്‍ പറയുന്നു, ലൂണ ലയണ്‍ തന്നെ !.

ബ്ലാസ്റ്റേഴ്‌സിന്റെ ഫൈനല്‍ വരെയുള്ള യാത്രയില്‍ ലൂണയുടെ കൃത്യമായ കയ്യൊപ്പുണ്ട്്. ഗോളടിച്ചും ഗോളടിപ്പിച്ചും ലൂണ ടീമിനെ മുന്നില്‍ നിന്ന് നയിക്കുമ്പോള്‍ ആദ്യകിരീടം അകലെയല്ലെന്ന് ആരാധകരും കണക്ക്കൂട്ടുന്നു. നാളെ ഹൈദരാബാദ് എഫ്‌സിക്കെതിരെ ഇറങ്ങുമ്പോള്‍ ലൂണ തന്നെയാണ് ബ്ലാസ്‌റ്റേഴ്‌സിന്റെ തുറുപ്പ്ചീട്ട്. ബോക്‌സിന് പുറത്ത് ഏതുനിമിഷവും അപകടം വിതയ്ക്കുന്ന ലൂണ നൈസാം പ്രതിരോധ പടയ്ക്ക് തലവേദന സൃഷ്ടിക്കും. ജംഷഡ്പൂരിനെതിരെ രണ്ടാംപാദ സെമിയില്‍ നേടിയ ഗോള്‍ ഉള്‍പ്പെടെ ആറുതവണ ലൂണ എതിരാളികളുടെ വല തുളച്ചു. ആറും ഐഎസ്എലിലെ തന്നെ മനോഹരമായ ഗോളുകള്‍. എടികെ മോഹന്‍ ബഗാന്‍, ചെന്നൈയിന്‍ എഫ്‌സി, എഫ്‌സി ഗോവ ടീമുകള്‍ക്കെതിരായ ലൂണയുടെ ഫ്രീകിക്ക് ഗോളുകള്‍ അതിമനോഹരമായിരുന്നുവെന്ന് എതിരാളികള്‍ പോലും സമ്മതിക്കും. ഏഴു ഗോളുകള്‍ക്ക് ഈ 29കാരന്‍ അവസരമൊരുക്കുകയും ചെയ്തു. ഉറുഗ്വേയുടെ മുന്‍ അണ്ടര്‍-17, അണ്ടര്‍-20 താരമായ ലൂണ, ഇരു വിഭാഗങ്ങളിലായി 19 മത്സരങ്ങളില്‍ ദേശീയ ജഴ്‌സി അണിഞ്ഞു. 2009ല്‍ ഫിഫ അണ്ടര്‍-17 ലോകകപ്പിലും, 2011ല്‍ ഫിഫ അണ്ടര്‍-20 ലോകകപ്പിലും കളിച്ചു. രണ്ട് ടൂര്‍ണമെന്റുകളിലും ഓരോ ഗോള്‍ വീതം നേടി. 12 വര്‍ഷത്തിലേറെ നീണ്ട ക്ലബ് കരിയറില്‍ ഇതുവരെ എല്ലാ ക്ലബ്ബുകള്‍ക്കുമായി 358 മത്സരങ്ങളില്‍ പന്തുതട്ടി. 53 ഗോളുകളും 53 അസിസ്റ്റുകളും സ്വന്തം പേരില്‍ കുറിച്ചു. മെല്‍ബണ്‍ സിറ്റി എഫ്‌സിയെ അവരുടെ ആദ്യ എ ലീഗ് ചാമ്പ്യന്‍ഷിപ്പ് വിജയത്തിലേക്ക് നയിച്ച ശേഷമാണ് രണ്ടു വര്‍ഷത്തെ കരാറില്‍ ബ്ലാസ്‌റ്റേഴ്‌സിലെത്തുന്നത്. ഉപനായകനായാണ് സീസണ്‍ ആരംഭിച്ചത്, ജെസല്‍ കാര്‍നെയ്‌റോയ്ക്ക് പരിക്കേറ്റതിനെത്തുടര്‍ന്ന് ജനുവരിയില്‍ നായകസ്ഥാനത്തെത്തി. കളത്തിലും പുറത്തും ടീമിന്റെ യുവനിരയെയും പരിചയനിരയെയും അസ്വാരസ്യങ്ങളില്ലാതെ ഒത്തിണക്കി കൊണ്ടുപോവുന്നതിലും ലൂണ ജയിച്ചു. ഒരു ജയം അകലെ ബ്ലാസ്‌റ്റേഴ്‌സിന്റെ ഇതിഹാസ നായകനെന്ന പട്ടം ലൂണയെ കാത്തിരിക്കുന്നു. നോര്‍ത്ത് ഈസ്റ്റ് യുണൈറ്റഡ്, കേരള ബ്ലാസ്‌റ്റേഴ്‌സ്, മുംബൈ സിറ്റി, ഹൈദരാബാദ് എഫ്‌സി, നാലു വര്‍ഷമായി ഇന്ത്യന്‍ സൂപ്പര്‍ ലീഗില്‍ പന്തുതട്ടുന്ന നൈജീരിയിന്‍ സ്‌ട്രൈക്കര്‍ ബര്‍ത്തലോമിയോ ഒഗ്‌ബെച്ചെ നാലു സീസണുകളിലായി കളിച്ച ക്ലബുകളാണിത്. ഓരോ സീസണിലും ക്ലബ്ബ് മാറുന്ന താരത്തിന് ഗോളടിക്കുന്നകാര്യത്തില്‍ മാത്രം മാറ്റമില്ല. ഇത്തവണയും ഗോളടി യന്ത്രമായതോടെ ഹൈദരാബാദ് എഫ്‌സി ആദ്യമായി ഐഎസ്എല്‍ ഫൈനലിലേക്കും കുതിച്ചു. കഴിഞ്ഞ തവണ മുംബൈക്കൊപ്പം കിരീടം നേടിയ ഒഗ്‌ബെച്ചെയ്ക്ക് നാളെ ടീമിനെ ജയിപ്പിക്കാനായാല്‍ അത് ചരിത്ര നേട്ടമാവും. കിരീടപോരാട്ടത്തില്‍ ബ്ലാസ്‌റ്റേഴ്‌സിന് ഏറ്റവും ഭീഷണി ഉയര്‍ത്തുന്നതും ഒഗ്‌ബെച്ചെ ആയിരിക്കും. നാളെ ഗോള്‍ കണ്ടെത്തിയാല്‍ ഐഎസ്എലിന്റെ ഒരു സീസണില്‍ ഏറ്റവും കൂടുതല്‍ ഗോളുകള്‍ നേടിയ താരമെന്ന റെക്കോഡും താരത്തെ കാത്തിരിക്കുന്നു. ബ്ലാസ്‌റ്റേഴ്‌സിനെതിരായ അവസാന മത്സരത്തില്‍ ഒഗ്‌ബെച്ചെ ഗോള്‍ കണ്ടെത്തിയിരുന്നു. ഏത് പൊസിഷനിലും തിളങ്ങുന്ന, ഈ അതിവേഗക്കാരനെ തടയാന്‍ ബ്ലാസ്റ്റേഴ്‌സ് പ്രതിരോധത്തിന് കൂടുതല്‍ വിയര്‍പ്പൊഴുക്കേണ്ടി വരും. സീസണില്‍ ഇതുവരെ 18 ഗോളുകളാണ് നൈജീരിയന്‍ ഈഗിള്‍ എന്ന് വിളിപ്പോരുള്ള താരം നേടിയത്. രണ്ടാം സ്ഥാനത്തുള്ള ആംഗുലേയുടെ നേട്ടം പത്തുഗോള്‍ മാത്രം. നിലവില്‍ ഐഎസ്എലിലെ ഏറ്റവും വലിയ ഗോള്‍വേട്ടക്കാരനാണ്, നാലു സീസണുകളിലായി 53 ഗോളുകള്‍. 2001ല്‍ പിഎസ്ജിയിലൂടെ സീനിയര്‍ കരിയര്‍ തുടങ്ങിയ ഒഗ്‌ബെച്ചെ ഇന്ത്യന്‍ സൂപ്പര്‍ ലീഗിലെത്തിയതോടൈ കൂടുതല്‍ കരുത്തനായി. 2018-19 സീസണില്‍ നോര്‍ത്ത് ഈസ്റ്റ് യുണൈറ്റഡിനായാണ് ഐഎസ്എലിലെ അരങ്ങേറ്റം, 12 ഗോള്‍ നേടി വരവറിയിച്ചു. അടുത്ത സീസണില്‍ കേരള ബ്ലാസ്‌റ്റേഴിനൊപ്പം ചേര്‍ന്ന താരം അവിടെയും ഗോളടി തുടര്‍ന്നു. ബ്ലാസ്റ്റേഴ്‌സ് നേടിയ 29 ഗോളുകളില്‍ 15 എണ്ണവും ഒഗ്ബച്ചെയുടെ ബൂട്ടില്‍ നിന്നായിരുന്നു. സീസണിലെ ഗോള്‍നേട്ടത്തില്‍ ബ്ലാസ്‌റ്റേഴ്‌സിലും താരം റെക്കോഡ് സൃഷ്ടിച്ചു. നിലവിലെ ചാമ്പ്യന്‍മാരായ മുംബൈ എഫ്‌സിക്കൊപ്പമായിരുന്നു അടുത്ത സീസണ്‍, അവിടെ എട്ടുഗോളുകള്‍ നേടി. ഈ സീസണില്‍ ഹൈദരാബാദിലെത്തി. തന്റെ എക്കാലത്തെയും മികച്ച ഗോള്‍വേട്ടയുമായി (18) ഒഗ്‌ബെച്ചെ പടയോട്ടം തുടരുന്നു.

Football

ഫ്രാന്‍സ് ദേശീയ ടീമില്‍ നിന്ന് എംബാപ്പെയെ പുറത്തിട്ട് ദെഷാംപ്‌സ്‌

റയൽ മഡ്രിഡ് താരത്തെ തൽക്കാലത്തേക്ക് മാത്രമായി മാറ്റിനിർത്തുകയാണെന്നാണ് ഇതുസംബന്ധിച്ച് കോച്ചിന്റെ പ്രതികരണം.

Published

1 week ago

November 8, 2024

webdesk13

ഈ മാസം നടക്കുന്ന നാഷൻസ് ലീഗ് മത്സരങ്ങൾക്കുള്ള ഫ്രാൻസ് ദേശീയ ഫുട്ബാൾ ടീമിൽനിന്ന് സ്റ്റാർ സ്ട്രൈക്കർ കിലിയൻ എംബാപ്പെയെ ഒഴിവാക്കി കോച്ച് ദിദിയർ ദെഷാംപ്സ്. നവംബർ 14ന് ഇസ്രാഈലിനും 17ന് ഇറ്റലിക്കുമെതിരായ മത്സരങ്ങളിലാണ് എംബാപ്പെക്ക് പുറത്തിരിക്കേണ്ടി വരിക. റയൽ മഡ്രിഡ് താരത്തെ തൽക്കാലത്തേക്ക് മാത്രമായി മാറ്റിനിർത്തുകയാണെന്നാണ് ഇതുസംബന്ധിച്ച് കോച്ചിന്റെ പ്രതികരണം.

ഈയിടെയായി റയൽ മഡ്രിഡ് നിരയിൽ സ്വതസിദ്ധമായ ഫോമിലല്ല എംബാപ്പെ. എൽ ക്ലാസിക്കോയിൽ ബാഴ്സലോണയോട് 4-0ത്തിന് തകർന്നടിഞ്ഞ റയൽ, ചാമ്പ്യൻസ് ലീഗിൽ എ.സി മിലാനു മുന്നിൽ കൊമ്പുകുത്തിയത് 3-1നാണ്. ഗോളുകൾ നേടാൻ കഴിയാത്ത എംബാപ്പെയെ വിമർശിച്ച് മുൻ ഫ്രഞ്ച് നായകൻ തിയറി ഹെന്റി ഈയിടെ രംഗത്തെത്തിയിരുന്നു. റയൽ നിരയിൽ 15 കളികളിൽനിന്ന് എട്ടു ഗോളുകളാണ് 25കാരനായ എംബാപ്പെയുടെ പേരിലുള്ളത്. കഴിഞ്ഞ ആറു മത്സരങ്ങളിൽ ഒരു തവണ മാത്രമേ താരത്തിന് വല കുലുക്കാനായിട്ടുള്ളൂ.

റയലിന്റെ ആക്രമണനിരയിൽ തന്റെ ഇഷ്ടപൊസിഷനായ ഇടതുവിങ്ങിൽ കളിക്കാൻ നിലവിൽ മുൻ ഫ്രഞ്ച് ക്യാപ്റ്റന് അവസരം കിട്ടുന്നില്ല. ബ്രസീൽ താരം വിനീഷ്യസ് ജൂനിയറിനെയാണ് കോച്ച് കാർലോ ആഞ്ചലോട്ടി ഈ പൊസിഷനിൽ കളത്തിലിറക്കുന്നത്.

പാരിസ് സെന്റ് ജെർമെയ്നിൽനിന്ന് ഇക്കഴിഞ്ഞ ജൂലൈയിൽ റയലിലേക്ക് കൂടുമാറിയ എംബാപ്പെക്ക് പരിക്കുകാരണം കഴിഞ്ഞ മാസം ഫ്രാൻസിനെതിരായ മത്സരങ്ങൾ നഷ്ടമായിരുന്നു. പരിക്കുമാറി ക്ലബിനുവേണ്ടി കളത്തിൽ തിരിച്ചെത്തിയെങ്കിലും തൽക്കാലം എംബാപ്പെയില്ലാതെ അടുത്ത രണ്ടു മത്സരങ്ങളിൽ കളത്തിലിറങ്ങാനാണ് ദെഷാംപ്സിന്റെ തീരുമാനം. താരവുമായി ചർച്ച ചെയ്ത ശേഷമാണ് തീരുമാനമെടുത്തതെന്നും അദ്ദേഹം പറഞ്ഞു.

ഫ്രഞ്ച് ടീമിൽ തിരിച്ചെത്തണമെന്ന് കിലിയൻ ആഗ്രഹിച്ചിരുന്നതായി കോച്ച് പറഞ്ഞു. എന്നാൽ, താരത്തെ ഒഴിവാക്കി ദെഷാംപ്സ് ടീം പ്രഖ്യാപിക്കുകയായിരുന്നു. 2018ൽ ലോകകപ്പ് നേടിയ ഫ്രഞ്ച് ടീമിലെ മുന്നണിപ്പോരാളിയായ എംബാപ്പെ 86 കളികളിൽ രാജ്യത്തിനായി ഇതുവരെ 48 ഗോളുകൾ നേടിയിട്ടുണ്ട്.

Football

ഹൈദരാബാദിനോടും തോല്‍വി വഴങ്ങി കേരള ബ്ലാസ്റ്റേഴ്‌സ്

2-1നാണ് ബ്ലാസ്റ്റേഴ്‌സിന്റെ തോല്‍വി.

Published

1 week ago

November 7, 2024

webdesk13

ഐഎസ്എല്ലില്‍ ഹൈദരാബാദ് എഫ്‌സിക്കെതിഴെരയും തോല്‍വി ആരാധകരെ നിരാശരാക്കി കേരളാ ബ്ലാസ്‌റ്റേഴ്‌സ്. 2-1നാണ് ബ്ലാസ്റ്റേഴ്‌സിന്റെ തോല്‍വി. ഹൈദരാബാദ് എഫ്‌സിക്കായി ബ്രസീലിയന്‍ താരം ആന്ദ്രെ ആല്‍ബ ഇരട്ടഗോള്‍ നേടിയപ്പോള്‍ ബ്ലാസ്റ്റേഴ്‌സിനായി ഹെസൂസ് ഹിമെനെയുമാണ് ഗോള്‍ നേടിയത്.

കൊച്ചിയില്‍ നടന്ന മത്സരത്തില്‍ ആദ്യ പുകതിയില്‍ മികച്ച പ്രകടനമാണ് ബ്ലാസ്‌റ്റേഴസ് കാഴ്ചവെച്ചത്. മത്സരത്തിന്റെ 13 ആം മിനിറ്റില്‍ തന്നെ ബ്ലാസ്‌റ്റേഴ്‌സ് വല കുലുക്കി. ഹെസൂസ് ഹിമെനെയിലൂടെയാണ് ബ്ലാസ്‌റ്റേഴ്‌സ് ലീഡ് നേടിയത്.

രണ്ടാം പകുതിയുടെ 43 ആം മിനിറ്റില്‍ ആല്‍ഡ്രി ആല്‍ബെയിലൂടെയാണ് ഹൈദരാബാദ് സമനില ഗോള്‍ നേടിയത്. തിരിച്ചടിക്കാന്‍ ബ്ലാസ്‌റ്റേഴസ് ശ്രമിച്ചെങ്കിലും ഗോള്‍ വീണില്ല. പിന്നീട് 70 ആം മിനിറ്റില്‍ ഹൈദരാബാദ് രണ്ടാമത്തെ ഗോളും നേടി ആധിപത്യം ഉറപ്പിച്ചു.

വിവാദത്തോടെ ആയിരുന്നു ആ ഗോള്‍. ഹൈദരാബാദ് താരങ്ങള്‍ ബ്ലാസ്റ്റേഴ്‌സ് ബോക്‌സിലേക്കു നടത്തിയ മുന്നേറ്റത്തില്‍ എഡ്മില്‍സന്റെ ഗോള്‍ശ്രമം തടയാന്‍ ബോക്‌സില്‍ വീണുകിടന്ന ഹോര്‍മിപാമിനെതിരെ റഫറി ഹാന്‍ഡ്‌ബോള്‍ വിളിച്ചു. ഹോര്‍മിപാമിന് മഞ്ഞക്കാര്‍ഡും ഹൈദരാബാദിന് അനുകൂലമായി പെനല്‍റ്റിയും. പെനല്‍റ്റിക്കെതിരെ ബ്ലാസ്റ്റേഴ്‌സ് താരങ്ങള്‍ വാദിച്ചെങ്കിലും ഫലമുണ്ടായില്ല. ഹൈദരാബാദിനായി കിക്കെടുത്ത ആന്ദ്രെ ആല്‍ബ അനായാസം ലക്ഷ്യം കണ്ടു.

വിജയത്തോടെ ഏഴു കളികളില്‍നിന്ന് രണ്ടു ജയവും ഒരു സമനിലയും സഹിതം 7 പോയിന്റുമായി ഹൈദരാബാദ് എഫ്‌സി 11ാം സ്ഥാനത്തുതന്നെ തുടരുന്നു. എട്ടു മത്സരങ്ങളില്‍നിന്ന് സീസണിലെ നാലാം തോല്‍വി വഴങ്ങിയ ബ്ലാസ്റ്റേഴ്‌സ് എട്ടു പോയിന്റുമായി 10ാം സ്ഥാനത്തും.

Football

യുവേഫ ചാമ്പ്യന്‍സ് ലീഗില്‍ വമ്പന്മാര്‍ക്ക് അടിതെറ്റി

അതേ സമയം ഇംഗ്ലീഷ് കരുത്തരായ ലിവർപൂൾ ബയർ ലെവർക്യൂസണെ എതിരില്ലാത്ത നാലുഗോളുകൾക്ക് തകർത്തു.

Published

1 week ago

November 6, 2024

webdesk13

ചാമ്പ്യൻസ് ലീഗിൽ അടിപതറി വമ്പൻമാർ. സ്വന്തം തട്ടകമായ സാന്റിയാഗോ ബെർണബ്യൂവിൽ എസി മിലാനോട് ഒന്നിനെതിരെ മൂന്ന് ഗോളുകൾക്ക് റയൽ മാഡ്രിഡ് പരാജയപ്പെട്ടു. പോർച്ചുഗീസ് ക്ലബായ സ്പോർട്ടിങ് ലിസ്ബണോട് ഇംഗ്ലീഷ് വമ്പൻമാരായ മാഞ്ചസ്റ്റർ സിറ്റി ഒന്നിനെതിരെ നാലുഗോളുകളുടെ ഞെട്ടിക്കുന്ന തോൽവിയും ഏറ്റുവാങ്ങി. അതേ സമയം ഇംഗ്ലീഷ് കരുത്തരായ ലിവർപൂൾ ബയർ ലെവർക്യൂസണെ എതിരില്ലാത്ത നാലുഗോളുകൾക്ക് തകർത്തു.

മാലിക് ത്യാവൂ, അൽവാരോ മൊറാട്ട, റെജിൻഡേഴ്സ് എന്നിവരുടെ ഗോളിലാണ് മിലാൻ റയലിനെ തരിപ്പണമാക്കിയത്. 23ാം മിനുറ്റിൽ പെനൽറ്റിയിലൂടെ വിനീഷ്യസ് ജൂനിയറാണ് റയലിനായി ഗോൾ നേടിയത്.

സ്വന്തം ഹോം ഗ്രൗണ്ടിൽ മാഞ്ചസ്റ്റർ സിറ്റിയെ ഞെട്ടിക്കുന്ന വിജയമാണ് സ്പോർട്ടിങ് ലിസ്ബൺ നേടിയത്. നാലാം മിനുറ്റിൽ ഫിൽ ഫോഡന്റെ ഗോളിൽ മുന്നിലെത്തിയ സിറ്റിക്കെതിരെ വിക്ടർ ഗ്യോകാരസിന്റെ ഹാട്രിക് ഗോളിലാണ് സ്പോർട്ടിങ് വിജയിച്ചത്. ഇതിൽ രണ്ടെണ്ണം പെനൽറ്റിയിലൂടെയായിരുന്നു. മാക്സിമിലിയാനോ അറോഹോയും സ്പോർട്ടിങ്ങിനായി ഗോൾകുറിച്ചു.

ദിവസങ്ങൾക്കുള്ളിൽ മാഞ്ചസ്റ്റർ യുനൈറ്റഡ് പരിശീലകനാകാനിരിക്കുന്ന റൂബൻ അമോറിം പരിശീലിപ്പിക്കുന്ന ടീമാണ് സ്പോർട്ടിങ്. 27 ശതമാനം മാത്രം ബോൾ പൊസിഷനുമായാണ് സ്പോർട്ടിങ് ആധികാരിക വിജയം നേടിയത്. 68ാം മിനുറ്റിൽ സിറ്റിക്ക് അനുകൂലമായി ലഭിച്ച പെനൽറ്റി എർലിങ് ഹാളണ്ട് ക്രോസ് ബാറിലിടിച്ച് പാഴാക്കി.

തകർപ്പൻ ഫോമിൽ തുടരുന്ന ലൂയിസ് ഡയസിന്റെ ഹാട്രിക് ഗോളുകളിലാണ് ലിവർപൂൾ ലെവർക്യൂസണെ തകർത്തുവിട്ടത്. കോഡി ഗാക്പോയും ലിവർപൂളിനായി സ്കോർ ചെയ്തു. മറ്റുമത്സരങ്ങളിൽ ഡോർട്ട്മുണ്ട് സ്റ്റാം ഗ്രാസിനെയും സെൽറ്റിക് ആർബി ലെപ്സിഗിനെയും തോൽപ്പിച്ചു. യുവന്റസ്-ലോസ്ക് മത്സരം സമനിലയിൽ പിരിഞ്ഞു.