പാര്‍ലമെന്ററി നിയമങ്ങളും പെരുമാറ്റവും പാലിക്കാന്‍ എന്‍.ഡി.എയിലെ എം.പിമാരോട് ആവശ്യപ്പെട്ട് പ്രധാന മന്ത്രി നരേന്ദ്രമോദി. എം.പിമാര്‍ തങ്ങളുടെ മണ്ഡലവുമായി ബന്ധപ്പെട്ട കാര്യങ്ങളില്‍ വ്യക്തമായ വിവരമുള്ളവരായിരിക്കണമെന്നും അദ്ദേഹം ഉപദേശിച്ചു. മാധ്യമങ്ങളോട് അഭിപ്രായം പറയുന്നതിന് മുമ്പ് പ്രസ്തുത കാര്യങ്ങളെ കുറിച്ച് വിശദമായി പഠിക്കണമെന്നും അദ്ദേഹം എം.പിമാരോട് പറഞ്ഞു.
രാഹുല്‍ ഗാന്ധി ബി.ജെ.പി ക്കെതിരെ ഉന്നയിച്ച പരാമര്‍ശത്തെ തുടര്‍ന്നുണ്ടായ സഭയിലെ ബഹളത്തിന് പിന്നാലെയാണ് മോദിയുടെ ഉപദേശം. ബിജെപിയുടെ ഉന്നത നേതാക്കളും മന്ത്രിമാരും പങ്കെടുത്ത എന്‍.ഡി.എ പാര്‍ലമെന്ററി പാര്‍ട്ടി യോഗത്തിലാണ് മോദി എം.പിമാരെ ഉപദേശിച്ചത്.
ഏത് പാര്‍ട്ടിയായാലും പാര്‍ലമെന്റിലെ അംഗം രാജ്യത്തെ മുഴുവന്‍ ആളുകളെയും സേവിക്കുമെന്നും, രാജ്യത്തുണ്ടായിരുന്ന ഓരോ പ്രധാനമന്ത്രിയെ കുറിച്ചും എല്ലാവരും അറിഞ്ഞിരിക്കണമെന്നും പ്രധാനമന്ത്രി പറഞ്ഞു. ഓരോ എന്‍.ഡി.എ എം.പിയും രാജ്യത്തിന് മുന്‍ഗണന നല്‍കി പ്രവര്‍ത്തിക്കണമെന്നാണ് പ്രധാനമന്ത്രി പറഞ്ഞതെന്ന്, യോഗത്തിനു ശേഷം പാര്‍ലമെന്ററി കാര്യമന്ത്രി കിരണ്‍ റിജിജു മാധ്യമ പ്രവര്‍ത്തകരോട് പറഞ്ഞു.
ഭരണകക്ഷി നേതാക്കള്‍ ഭരണഘടനയെ ആക്രമിക്കുകയാണെന്നും അന്വേഷണ ഏജന്‍സികളെ രാഷ്ട്രീയ നേട്ടങ്ങള്‍ക്കായി ദുരുപയോഗം ചെയ്യുകയാണെന്നും ആരോപിച്ച് പ്രതിപക്ഷ നേതാവ് ബി.ജെ.പിക്കെതിരെ വിമര്‍ശനമുന്നയിച്ചിരുന്നു, ഇതിനെതിരെ ബി.ജെ.പി എം.പിമാര്‍ രംഗത്തുവരികയും സഭയില്‍ ബഹളമരങ്ങേറുകയുമായിരുന്നു. തങ്ങള്‍ക്കിടയിലെ ഏകോപനം വര്‍ധിപ്പിക്കുന്നതിനുവേണ്ടിയുള്ള ചര്‍ച്ചകളാണ് നടന്നതെന്നും കിരണ്‍ റിജിജു മാധ്യമങ്ങളോട് പറഞ്ഞു.