Culture

‘റാഫിയെ രക്ഷിക്കാന്‍ നമുക്കൊരുമിക്കാം. എം.പിയുടെ അവസാന ശമ്പളം നല്‍കും’; കെ.സി വേണുഗോപാല്‍

Published

5 years ago

May 22, 2019

കോഴിക്കോട്: വൃക്ക രോഗവുമായി പടവെട്ടുന്ന കെ.എസ്.യു നേതാവിന് ചികിത്സാസഹായമഭ്യര്‍ത്ഥിച്ച് മുതിര്‍ന്ന കോണ്‍ഗ്രസ് നേതാവ് കെ.സി വേണുഗോപാല്‍. എം.പി എന്ന നിലയില്‍ അവസാനമായി കിട്ടുന്ന ശമ്പളം റാഫിയുടെ ചികിത്സക്കായി നല്‍കുമെന്നും റാഫിയെ രക്ഷിക്കാന്‍ എല്ലാവരും സഹായം നല്‍കണമെന്നും കെ.സി വേണുഗോപാല്‍ പറഞ്ഞു. കായംകുളം സ്വദേശിയായ റാഫിയുടെ ചികിത്സക്ക് വിദ്യാര്‍ത്ഥി സംഘടനയായ എസ്.എഫ്.ഐയും ചികിത്സാ സഹായം നല്‍കിയിരുന്നു. നിലവില്‍ വൃക്കദാനം ചെയ്യാന്‍ മൂന്നുപേര്‍ എത്തിയിരുന്നെങ്കിലും അത് മാച്ച് ചെയ്യാതെ പോവുകയായിരുന്നു. ചികിത്സക്ക് ഭാരിച്ച ചെലവ് വരുമെന്നതിനാല്‍ അത് കണ്ടെത്താന്‍ കായംകുളത്തെ കെ എസ് യു, കോണ്‍ഗ്രസ് നേതാക്കളും പ്രവര്‍ത്തകരും ശ്രമിക്കുകയാണ്. ഇതിനോടൊപ്പം എല്ലാവരുടേയും സഹായ സഹകരണങ്ങള്‍ ഉണ്ടാവണമെന്നും അദ്ദേഹം അഭ്യര്‍ത്ഥിച്ചു.

പോസ്റ്റിന്റെ പൂര്‍ണ്ണരൂപം:

എം പി എന്ന ചുമതലയില്‍ ഇന്ന് അവസാനദിവസമാണ്. 2009 ല്‍ ആദ്യമായി മത്സരിക്കാനെത്തിയപ്പോള്‍ മണ്ഡലത്തിലെ ജനങ്ങളോട് നല്‍കിയ ഒരുവാക്കുണ്ട്. നിങ്ങളുടെ സുഖദുഃഖങ്ങളില്‍ ഞാനും എന്നും ഒപ്പമുണ്ടാകുമെന്ന്.ഒട്ടേറെ പരിമിതികള്‍ക്കുള്ളില്‍ നിന്നുകൊണ്ട് അതിനോട് ഏറെക്കുറെ നീതിപുലര്‍ത്താനായി എന്നാണ് വിശ്വാസം. തിരഞ്ഞെടുപ്പിന്റെ ഏഴാംഘട്ടവും പൂര്‍ത്തിയായി തിരക്കുകള്‍ ഒഴിഞ്ഞപ്പോഴാണ് ഞങ്ങളുടെ കുഞ്ഞനുജന്‍ കെ എസ് യുവിന്റെ കായംകുളത്തെ ചുണക്കുട്ടനായ റാഫിയുടെ രോഗവിവരത്തെകുറിച്ചറിയുന്നത്. വിദ്യാര്‍ത്ഥിയായ റാഫിയുടെ ജീവിതസാഹചര്യങ്ങളും നിര്‍ധനവസ്ഥയുമെല്ലാം മാധ്യമങ്ങളിലൂടെയും നേരിട്ടുമൊക്കെ എല്ലാവര്‍ക്കുമറിയാം എന്നാണ് മനസിലാക്കുന്നത്. ചെറുപ്പത്തിലേ അച്ഛന്‍ ഉപേക്ഷിച്ചുപോയി . ഉമ്മ വീട്ടുജോലിക്കുപോയി കിട്ടുന്ന വരുമാനം കൊണ്ടാണ് അവന്‍ ജീവിക്കുന്നത്. ചെങ്ങന്നൂര്‍ ഗവ ഐ ടി ഐയില്‍ പഠിച്ചിരുന്ന കാലത്തേ പഠനത്തോടൊപ്പം മികച്ച വിദ്യാര്‍ത്ഥി രാഷ്ട്രീയ പ്രവര്‍ത്തകനുമായിരുന്ന റാഫി കിഡ്‌നിക്ക് തകരാറുണ്ടായിരുന്നെന്നറിയാമായിരുന്നെങ്കിലും അതൊന്നും വകവെക്കാതെ ഇക്കഴിഞ്ഞ തിരഞ്ഞെടുപ്പില്‍ വരെ വളരെ സജീവമായിരുന്നു എന്നാണ് കായംകുളത്തെ പ്രാദേശിക കോണ്‍ഗ്രസ് പ്രവര്‍ത്തകരില്‍ നിന്നും അറിയാന്‍ കഴിഞ്ഞത്. ജീവിതത്തില്‍ പിച്ചവെച്ചു തുടങ്ങിയ ഈ പ്രായത്തില്‍ അവനെ ഈ രോഗത്തിന് വിട്ടുകൊടുക്കരുത്. ഒറ്റയ്ക്ക് ഇക്കാലമത്രയൂം ദുരിതങ്ങള്‍ സഹിച്ചു അവനെ പോറ്റിവളര്‍ത്തിയ അമ്മയ്ക്കും പിന്നെ ഈ നാടിനും ആ ചെറുപ്പക്കാരനെ വേണം.വൃക്ക ദാനം ചെയ്യാന്‍ തയ്യാറായി രണ്ടുമൂന്നു പേര്‍ മുന്നോട്ടു വന്നെങ്കിലും അത് മാച്ച് ചെയ്യുന്നില്ല എന്നാണ് അറിഞ്ഞത്. ചികിത്സക്ക് ഭാരിച്ച ചെലവ് വരുമെന്നതിനാല്‍ അത് കണ്ടെത്താന്‍ കായംകുളത്തെ കെ എസ് യു, കോണ്‍ഗ്രസ് നേതാക്കളും പ്രവര്‍ത്തകരും ശ്രമിക്കുകയാണ്, അതിനൊപ്പം എസ് എഫ് ഐ യും ചേര്‍ന്ന് കാരുണ്യ ഹസ്തം നീട്ടിയെന്ന വാര്‍ത്ത മലയാള മനോരമയില്‍ കണ്ടു. റാഫിയെ രക്ഷിക്കാന്‍ നമ്മുക്കെല്ലാം കഴിയുന്ന സഹായങ്ങള്‍ ചെയ്യാം. എം പി എന്ന നിലയില്‍ ലഭിക്കുന്ന അവസാന ശമ്പളം റാഫിക്കു നല്‍കും. ചികിത്സക്ക് വേണ്ട സാഹചര്യം ഒരുക്കാന്‍ എല്ലാ സഹായങ്ങളും ചെയ്യാം എന്ന് റാഫിയോടു പറഞ്ഞിട്ടുണ്ട്. ഇതുവായിക്കുന്നവര്‍ കഴിയുന്ന പോലെ ഇക്കാര്യത്തില്‍ സഹായിക്കാന്‍ സന്നദ്ധരാവണമെന്നുകൂടി അഭ്യര്‍ത്ഥിക്കുന്നു.
വിശദാംശങ്ങള്‍ :
Muhammed Rafi, Federal Bank,
Kayamkulam Branch, Account No:
10540100300824, IFSC: FDRL0001054.

Film

‘തെക്ക് വടക്ക്’ ഒടിടിയിലേക്ക്

മനോരമ മാക്സിലൂടെയാണ് തെക്ക് വടക്ക് ഒടിടിയിലെത്തുന്നത്

Published

18 hours ago

November 15, 2024

webdesk14

മലയാളത്തിലെ പ്രിയ താരങ്ങളായ വിനായകൻ, സുരാജ് വെഞ്ഞാറമ്മൂട് എന്നിവർ കേന്ദ്ര കഥാപാത്രങ്ങളിൽ എത്തിയ ചിത്രം തെക്ക് വടക്ക് ഒടിടിയിലേക്ക്. പ്രേം ശങ്കർ സംവിധാനം നിർവഹിച്ച ചിത്രത്തിന് തീയേറ്ററുകളിൽ മികച്ച പ്രതികരണം ലഭിച്ചിരുന്നു. മധ്യവയസ്ക്കരായ കഥാപാത്രങ്ങാളായാണ് വിനായകനും സുരാജും ചിത്രത്തിലെത്തിയത്. റിലീസായി മാസങ്ങൾക്ക് ശേഷമാണ് തെക്ക് വടക്ക് ഒടിടിയിൽ പ്രദർശനത്തിനൊരുങ്ങുകയാണ്.

സുരാജ് വെഞ്ഞാറമ്മൂടും വിനായകനും ആദ്യമായി നായകരായി ഒന്നിക്കുന്ന സിനിമയാണ് തെക്ക് വടക്ക്. കോമഡിക്ക് പ്രാധാന്യം നൽകി ഒരുക്കിയ ചിത്രം തിയേറ്ററിൽ മിശ്ര പ്രതികരണം നേടിയിരുന്നു. എസ്. ഹരീഷ് എഴുതിയ “രാത്രി കാവൽ” എന്ന കഥയെ ആസ്പദമാക്കിയാണ് തെക്ക് വടക്ക് ഒരുക്കിയത്. ഹരീഷ് തന്നെയാണ് സിനിമയുടെയും രചന. അൻജന ഫിലിപ്പും വി.എ ശ്രീകുമാറും, അൻജന തിയറ്റേഴ്സിന്റെയും വാർസ് സ്റ്റുഡിയോസിന്റെയും ബാനറിലാണ് ചിത്രം നിർമ്മിച്ചിരിക്കുന്നത്.

മെൽവിൻ ബാബു, ഷമീർ ഖാൻ, കോട്ടയം രമേഷ്, മെറിൻ ജോസ്, വിനീത് വിശ്വം, ബാലൻ പാലക്കൽ എന്നിവരുൾപ്പെടെ നൂറോളം പേർ ചെറുതും വലുതുമായ വേഷങ്ങളിൽ ചിത്രത്തിൽ അഭിനയിക്കുന്നുണ്ട്. സാം സി. എസ് സംഗീതവും, സുരേഷ് രാജൻ ഛായാഗ്രഹണവും, കിരൺ ദാസ് എഡിറ്റിങും നിർവഹിക്കുന്നു. മനോരമ മാക്സിലൂടെയാണ് തെക്ക് വടക്ക് ഒടിടിയിലെത്തുന്നത്. ചിത്രം ഉടൻ സ്ട്രീമിങ് ആരംഭിക്കുമെന്നാണ് വിവരം.

Film

‘പ്രേക്ഷകർ തലവേദനയെടുത്ത് ഇറങ്ങിപ്പോയാൽ ചിത്രത്തിന് റിപീറ്റ്‌ വാല്യൂ കിട്ടില്ല’; റസൂൽ പൂക്കുട്ടി

നമ്മുടെ ജനപ്രിയ സിനിമകളിലൊന്നിന്റെ സൗണ്ടിനെക്കുറിച്ചുള്ള റിവ്യൂ കാണുമ്പോൾ നിരാശയുണ്ട് എന്ന് റസൂൽ പൂക്കുട്ടി പറയുന്നു

Published

19 hours ago

November 15, 2024

webdesk14

തമിഴ് സൂപ്പർ താരം സൂര്യ ഇരട്ട വേഷത്തിലെത്തിയ ചിത്രം കങ്കുവ തിയേറ്ററുകളിലെത്തിയിരിക്കുകയാണ്. സിരുത്തൈ ശിവ സംവിധാനം ചെയ്ത സിനിമയ്ക്ക് സമ്മിശ്ര പ്രതികരണം മാത്രമാണ് ലഭിക്കുന്നത്. സിനിമയിലെ ശബ്ദ മിശ്രണത്തിനും പശ്ചാത്തല സംഗീതത്തിനും പല കോണുകളിൽ നിന്ന് വിമർശനം നേരിടുന്നുണ്ട്. ഇതിന്റെ പശ്ചാത്തലത്തിൽ ഓസ്കർ ജേതാവ് റസൂൽ പൂക്കുട്ടി നടത്തിയ പ്രതികരണം ഏറെ ശ്രദ്ധ നേടുകയാണ്.

നമ്മുടെ ജനപ്രിയ സിനിമകളിലൊന്നിന്റെ സൗണ്ടിനെക്കുറിച്ചുള്ള റിവ്യൂ കാണുമ്പോൾ നിരാശയുണ്ട് എന്ന് റസൂൽ പൂക്കുട്ടി പറയുന്നു. നമ്മുടെ കലാമികവ് ഈ ‘ലൗഡ്‌നെസ്സ് വാറിൽ’ കുരുങ്ങികിടക്കുകയാണ്. ഇതിൽ ആരെയാണ് പഴിക്കേണ്ടത്? ശബ്ദം ഒരുക്കിയ ആളെയോ? അതോ ഓരോരുത്തരുടെ അരക്ഷിതാബോധം പരിഹരിക്കുന്നതിന് അവസാന നിമിഷം കൊണ്ടുവരുന്ന തിരുത്തലുകളെയോ? ഈ പ്രശ്നങ്ങളെ ഉച്ചത്തിൽ തന്നെ അഭിസംബോധന ചെയ്യേണ്ടതുണ്ട്. പ്രേക്ഷകർ തലവേദനയെടുത്ത് ഇറങ്ങിപ്പോയാൽ ഒരു സിനിമയ്ക്കും റിപീറ്റ് വാല്യു ഉണ്ടാകില്ല എന്ന് റസൂൽ പൂക്കുട്ടി പറഞ്ഞു.

കങ്കുവയെക്കുറിച്ച് ഒരു ദേശീയ മാധ്യമത്തിൽ വന്ന റിവ്യൂ പങ്കുവെച്ചുകൊണ്ടാണ് റസൂൽ പൂക്കുട്ടി തന്റെ അഭിപ്രായം കുറിച്ചത്. ചിത്രം അമിതമായ ശബ്‍ദത്തിന്റെ പേരിൽ വിമർശിക്കപ്പെടുന്നതായാണ് റിവ്യൂവിൽ പറയുന്നത്. അമിത ശബ്ദത്തിലുള്ള ഡയലോഗുകളും സംഗീതവും പ്രേക്ഷകരിൽ മടുപ്പ് ഉളവാക്കുന്നതായും റിവ്യൂവിൽ പറയുന്നു.

Film

ദുല്‍ഖറിനും 100 കോടി; ലക്കി ബാസ്‌ക്കര്‍ കുതിക്കുന്നു

തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളില്‍ റിലീസ് ചെയ്ത ചിത്രം എല്ലാ ഭാഷകളിലും സൂപ്പര്‍ ഹിറ്റായിക്കഴിഞ്ഞു.

Published

2 days ago

November 14, 2024

webdesk13

ദുല്‍ഖര്‍ സല്‍മാന്‍ നായകനായ പാന്‍ ഇന്ത്യന്‍ തെലുങ്ക് ചിത്രം ലക്കി ഭാസ്‌കര്‍ ആഗോള ഗ്രോസ് കളക്ഷന്‍ 100 കോടി കടന്ന് കുതിക്കുന്നു. റിലീസ് ചെയ്ത് മൂന്നാം വാരത്തിലും മെഗാ ബ്ലോക്ക്ബസ്റ്റര്‍ ഹിറ്റായി പ്രദര്‍ശനം തുടരുകയാണ് ചിത്രം.

തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളില്‍ റിലീസ് ചെയ്ത ചിത്രം എല്ലാ ഭാഷകളിലും സൂപ്പര്‍ ഹിറ്റായിക്കഴിഞ്ഞു. ദുല്‍ഖര്‍ സല്‍മാന്റെ കരിയറിലെ തന്നെ ഏറ്റവും വലിയ ഗ്രോസര്‍ ആയും ലക്കി ഭാസ്‌കര്‍ മാറി. ചിത്രത്തിലെ ദുല്‍ഖര്‍ സല്‍മാന്റെ പ്രകടനത്തിന് വലിയ പ്രശംസയാണ് പ്രേക്ഷകരില്‍ നിന്നും നിരൂപകരില്‍നിന്നും ലഭിക്കുന്നത്.

തെലുങ്കില്‍ ഹാട്രിക് ബ്ലോക്ക്ബസ്റ്റര്‍ എന്ന അപൂര്‍വ നേട്ടവും ഈ ചിത്രത്തിന്റെ വിജയത്തോടെ ദുല്‍ഖര്‍ സല്‍മാന്‍ സ്വന്തമാക്കി. കേരളത്തില്‍ 20 കോടി ഗ്രോസ് എന്ന നേട്ടം ലക്ഷ്യമാക്കി മുന്നേറുന്ന ചിത്രം കുടുംബ പ്രേക്ഷകരുടെ പിന്തുണയോടെയാണ് കുതിപ്പ് തുടരുന്നത്. കേരളത്തിലും ഗള്‍ഫിലും ചിത്രം വിതരണം ചെയ്തത് ദുല്‍ഖര്‍ സല്‍മാന്റെ വേഫെറര്‍ ഫിലിംസ് ആണ്. ആവേശവും ആകാംക്ഷയും സമ്മാനിക്കുന്ന രീതിയില്‍ കഥപറയുന്ന ഈ ചിത്രത്തില്‍ കുടുംബ ബന്ധങ്ങളിലെ വൈകാരികതയ്ക്കും പ്രാധാന്യമുണ്ട്. മീനാക്ഷി ചൗധരിയാണ് ചിത്രത്തിലെ നായിക.

വെങ്കി അറ്റ്‌ലൂരി രചിച്ച് സംവിധാനം ചെയ്ത ഈ പിരീഡ് ഡ്രാമ ത്രില്ലര്‍ ചിത്രം നിര്‍മ്മിച്ചിരിക്കുന്നത് സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റര്‍ടൈന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്നാണ്. ചിത്രം അവതരിപ്പിച്ചിരിക്കുന്നത് ശ്രീകര സ്റ്റുഡിയോസ് ആണ്.