ഹര്‍ഷിനക്ക് നീതി ഉറപ്പാക്കണമെന്നും വൈകി കിട്ടുന്ന നീതി അനീതിയാണെന്നും മുസ്ലിംലീഗ് സംസ്ഥാന ജനറല്‍ സെക്രട്ടറി പി.എം.എ സലാം പറഞ്ഞു. കോഴിക്കോട് മെഡിക്കല്‍ കോളേജില്‍ പ്രസവ ശസ്ത്രക്രിയക്കിടെ വയറ്റില്‍ കത്രിക കുടുങ്ങി തീരാവേദനയിലായ ഹര്‍ഷിനയുടെ സമര പന്തല്‍ സന്ദര്‍ശിച്ച് മുസ്ലിംലീഗിന്റെ ഐക്യദാര്‍ഢ്യം അറിയിക്കുകയായിരുന്നു അദ്ദേഹം.
ഹര്‍ഷിന നീതിക്ക് വേണ്ടിയുള്ള പോരാട്ടം തുടരുകയാണ്. ഒരു വര്‍ഷം കഴിഞ്ഞിട്ടും കുറ്റക്കാര്‍ ശിക്ഷിക്കപ്പെട്ടിട്ടില്ല. അര്‍ഹമായ നഷ്ടപരിഹാരവും നല്‍കിയിട്ടില്ല. കുറ്റക്കാര്‍ക്കെതിരെ നടപടി സ്വീകരിക്കുന്നത്വരെ ഹര്‍ഷിനക്കൊപ്പം മുസ്ലിംലീഗുണ്ടാകും. – അദ്ദേഹം പറഞ്ഞു. ഹര്‍ഷിനയുടെ നിയമ പോരാട്ടത്തിനും സമരത്തിനും പാര്‍ട്ടിയുടെ പിന്തുണ പി.എം.എ സലാം അറിയിച്ചു. സര്‍ക്കാര്‍ നിസ്സംഗത വെടിയണമെന്നും സംഭവത്തിന്റെ ഉത്തരവാദിത്തം ആരോഗ്യ വകുപ്പ് ഏറ്റെടുക്കണമെന്നും അദ്ദേഹം ആവശ്യപ്പെട്ടു.