വിമാനത്തില്‍ വെച്ച് യുവനടിയോട് യാത്രക്കാരന്‍ അപമര്യാദയായി പെരുമാറിയ സംഭവത്തില്‍ പ്രതിക്കെതിരെ ജാമ്യമില്ലാ വകുപ്പ് ചുമത്തി പൊലീസ്. നടിയുടെ പരാതിയെ തുടര്‍ന്നാണ് നെടുമ്പാശ്ശേരി പൊലീസ് കേസ് എടുത്തത്. ഇന്നലെ എയര്‍ ഇന്ത്യാ വിമാനത്തില്‍ വെച്ചായിരുന്നു സംഭവം. എയര്‍ ഇന്ത്യ ജീവനക്കാര്‍ക്കെതിരെയും നടി മൊഴി നല്‍കി.
കൂടെ നിന്ന എല്ലാവരോടും നന്ദി അറിയിക്കുന്നതായും അവര്‍ കൂട്ടിച്ചേര്‍ത്തു. മുംബൈയില്‍ നിന്ന് കൊച്ചിയിലേക്കുള്ള യാത്രയ്ക്കിടെ എയര്‍ ഇന്ത്യ വിമാനത്തില്‍ വച്ചാണ് മോശം അനുഭവമുണ്ടായതെന്ന് നടി പറയുന്നു. ‘മദ്യലഹരിയില്‍ കൂടെയുണ്ടായിരുന്ന യാത്രക്കാരന്‍ വിമാനത്തില്‍ വച്ച് എന്നെ ഉപദ്രവിക്കുകയായിരുന്നു. സീറ്റുമായി ബന്ധപ്പെട്ട് അയാള്‍ വെറുതെ എന്നോട് തര്‍ക്കിച്ചു. മോശമായി സ്പര്‍ശിക്കുകയും ചെയ്തു. ഇക്കാര്യം എയര്‍ ഹോസ്റ്റസിനോട് പരാതിപ്പെട്ടപ്പോള്‍ അവര്‍ എനിക്ക് മറ്റൊരു സീറ്റ് നല്‍കുകയാണ് ചെയ്തത്. വിമാനം കൊച്ചിയിലെത്തിയപ്പോള്‍ വിഷയം എയര്‍പോട്ട്, എയര്‍ലൈന്‍ ഉദ്യോഗസ്ഥരെ അറിയിച്ചു. കേരള പൊലീസിനും പരാതി നല്‍കി.’ – എന്ന് നടി ഇന്‍സ്റ്റഗ്രാം വഴി പങ്കുവച്ചു.