വിവാദ ഇടനിലക്കാരന്‍ നന്ദകുമാറിന്റെ പരിപാടിയില്‍ പങ്കെടുത്ത് സി.പി.എം നേതാവ് ഇ.പി ജയരാജന്‍. എറണാകുളത്ത് കഴിഞ്ഞ രാത്രിയാണ് ചടങ്ങ് നടന്നത്. മുന്‍കോണ്‍ഗ്രസ്‌നേതാവ് കെ.വി തോമസും പരിപാടിയില്‍ പങ്കെടുത്തതിന്റെ വീഡിയോ പുറത്തുവന്നത്. രഹസ്യമായിരുന്നു സന്ദര്‍ശനം. സി.പി.എം സംസ്ഥാന സെക്രട്ടറി എം.വി ഗോവിന്ദന്‍ നയിക്കുന്ന പ്രതിരോധ യാത്രയില്‍ പങ്കെടുക്കാത്തതിനെതിരെ വിവാദം ഉയര്‍ന്ന സാഹചര്യത്തിലാണ് ജയരാജന്റെ കൊച്ചിയിലെ ചടങ്ങ്. ഇതേക്കുറിച്ച് പക്ഷേ സി.പി.എം മൗനം പാലിക്കുകയാണ്. ഇടതുമുന്നണി കണ്‍വീനര്‍കൂടിയായ ഇ.പി ജയരാജന്‍ മുമ്പൊരിക്കലും ഒരു കണ്‍വീനറും ചെയ്യാത്ത രീതിയിലാണ് മുന്നണിയെയും പാര്‍ട്ടിയെയും വഴിയിലിട്ട് സ്വന്തം പരിപാടികളുമായി മുന്നോട്ടുപോകുന്നത്. പി.ജയരാജനുമായുള്ള തര്‍ക്കമാണ് പുറത്തെങ്കിലും ഗോവിന്ദനെ സെക്രട്ടറിയാക്കിയതില്‍ ഗോവിന്ദനോടും പിണറായി വിജയനോടുമുള്ള പ്രതിഷേധംകൂടിയാണ് ജയരാജന്‍ പ്രകടിപ്പിക്കുന്നത്. സ്വകാര്യചടങ്ങാണെങ്കിലും വീഡിയോ എടുക്കുന്നത് ജയരാജനും മറ്റും അറിയാമെന്നതിനാല്‍ പിണറായിക്കും പാര്‍ട്ടിക്കും മുന്നറിയിപ്പ് നല്‍കുകകൂടിയാണ് ജയരാജന്‍ ഇതിലൂടെ ചെയ്തിരിക്കുന്നത്.