News

സുവര്‍ണം- പ്രതിഛായ

Published

4 years ago

September 20, 2020

പൊതുപ്രവര്‍ത്തനം ചിലര്‍ക്ക് ജീവിതചര്യയാണ്. നാലാളെ സഹായിക്കുന്നതിലൂടെ കിട്ടുന്ന ഊര്‍ജം ഒന്നുവേറെതന്നെ. ആ വിഭാഗത്തിലാണ് മലയാളികളുടെ ഉമ്മന്‍ചാണ്ടിയും. ഇനീഷ്യലിന്റെയും പദവിയുടെയും അധികാരത്തിന്റെയും വിലാസമില്ലാതെ ആരാലും അറിയപ്പെടുന്ന രാഷ്ട്രീയ വ്യക്തിത്വം. കേരളീയ മനസ്സുകള്‍, അവരേതു രാഷ്ട്രീയക്കാരായാലും അസൂയയോടെയല്ലാതെ ഉമ്മന്‍ചാണ്ടിയെ നോക്കിക്കാണില്ല. കഠിനാധ്വാനവും സഹജീവിതല്‍പരതയുമാണ് കോണ്‍ഗ്രസുകാരുടെ ഒ.സിയും പുതുപ്പള്ളിക്കാരുടെ കുഞ്ഞൂഞ്ഞുമായ ഈ ആറടി ഏഴിഞ്ചുകാരന്റെ പ്രമാണം. അനാവശ്യമായ മസിലുപിടിത്തമില്ല. ഒരുപാട് അര്‍ത്ഥതലങ്ങളുള്ള ആ നിറചിരിയില്‍ അവരവര്‍ക്കിഷ്ടപ്പെട്ടത് കാണാമെന്ന് മാത്രം.

2004-2006ലും 2011-2016ലും മുഖ്യമന്ത്രി പദവി. രാഷ്ട്രീയ ഗുരു എ.കെ ആന്റണിയില്‍നിന്നാണ് 2004ല്‍ മുഖ്യമന്ത്രി പദവി ഏറ്റുവാങ്ങുന്നത്. പാര്‍ട്ടിയുടെ കനത്ത ലോക്‌സഭാപരാജയത്തിന്റെ പശ്ചാത്തലത്തിലായിരുന്നു ആന്റണിയുടെ രാജി. പിന്നെയാരാണ് ആ കസേരയിലേക്കെന്നതിന് മറിച്ചൊരു ചിന്തക്കും പ്രസക്തിയുണ്ടായില്ല. ആന്റണിയിലെ ‘എ’ ആണ്് കോണ്‍ഗ്രസിലെ എ വിഭാഗത്തിലെങ്കിലും ഗ്രൂപ്പിന്റെ വക്താവ് എന്നും ഉമ്മന്‍ചാണ്ടിതന്നെ. പാര്‍ട്ടി കഴിഞ്ഞേ പക്ഷേ ഉമ്മന്‍ചാണ്ടിക്ക് ഗ്രൂപ്പുള്ളൂ. സത്യക്രിസ്ത്യാനിയാണെങ്കിലും എല്ലാ ജാതിമത-ഉപവിഭാഗങ്ങളുമായും ഉമ്മന്‍ചാണ്ടിക്കുള്ള സ്വാധീനം അധികമാര്‍ക്കും കോണ്‍ഗ്രസിലിന്നില്ല. ആരുകയറിച്ചെന്ന് എന്ത് ആവശ്യമുന്നയിച്ചാലും പറ്റില്ലെന്ന് പറയുന്ന ശീലമേയില്ല. ട്രെയിനിലെ സഹയാത്രികരെപോലും ആവശ്യം ചോദിച്ചറിഞ്ഞ് സഹായിക്കുന്ന പ്രകൃതം. പൊതുജനം അതറിഞ്ഞത് മുഖ്യമന്ത്രി കാലത്തെ ജനസമ്പര്‍ക്ക പരിപാടിയിലൂടെയാണ്. ഭക്ഷണംപോലും കഴിക്കാതെ മണിക്കൂറുകള്‍ നിന്നനില്‍പില്‍ പാവപ്പെട്ടവരുടെയും വികലാംഗരുടെയും പ്രശ്‌നങ്ങള്‍ക്ക് പരിഹാരംകണ്ട എഴുപതുകാരനായ മുഖ്യമന്ത്രിയെ ചെറുപ്പക്കാരായ എം.എല്‍.എമാരും ഉദ്യോഗസ്ഥരും ജനങ്ങളും അത്ഭുതത്തോടെയാണ് നോക്കിക്കണ്ടത്. 750 കോടി രൂപയുടെ സഹായധനമാണ് ആ ജനകീയ പരിപാടിയിലൂടെ പാവങ്ങള്‍ക്കായി വിതരണം ചെയത്. വെറുതെയല്ല, നീണ്ട 50 വര്‍ഷം ഒരേ നിയമസഭാമണ്ഡലത്തില്‍ നിന്ന് സാമാജികനായതും. കഴിഞ്ഞ സെപ്തംബര്‍ 17 ആയിരുന്നു പാര്‍ലമെന്ററി രാഷ്ട്രീയത്തിലെ ഒ.സിയുടെ സുവര്‍ണ ജൂബിലിദിനം. കോട്ടയം ജില്ലയിലെ പുതുപ്പള്ളിയാണ് ആ ഭാഗ്യമണ്ഡലം. ഇതുപോലെ മറ്റൊരാള്‍ പാലായില്‍നിന്നുള്ള അന്തരിച്ച കെ.എം മാണി മാത്രമാണ്. മണ്ഡലത്തിലെ ഓരോ കുടുംബത്തിന്റെയും പേരെടുത്ത് വിളിക്കാന്‍ അടുപ്പമുള്ള ജനകീയന്‍. തിരുവനന്തപുരത്തെ വസതിയുടെ പേര് പുതുപ്പള്ളിയായതും അതുകൊണ്ടാണ്. എല്ലാ ഞാറാഴ്ചയും പുതുപ്പള്ളിയിലെത്തിയാലേ ഉറക്കംവരൂ. ബസ്സിലാണെങ്കിലും അത് മുടക്കില്ല. 1970ലെ പ്രഥമ തിരഞ്ഞെടുപ്പിലെ ഭൂരിപക്ഷം 7,228 ആയിരുന്നെങ്കില്‍ 2011ലത് 33,255 ആയി. 2016ല്‍ 27,092ഉം.

കെ. കരുണാകരനാണ് ഉമ്മന്‍ചാണ്ടിയെ ഉയരത്തിലെത്തിച്ചതിലൊരു പങ്ക്. സംഘടനാതിരഞ്ഞെടുപ്പുമായി ബന്ധപ്പെട്ടുണ്ടായ തര്‍ക്കവും ഗ്രൂപ്പിസവും യുവാവായ ചാണ്ടിയെ കരുണാകരന്റെ എതിര്‍ സ്ഥാനത്താക്കുകയായിരുന്നു. അന്നാണ് കേരളത്തിലെ കോണ്‍ഗ്രസ് ഗ്രൂപ്പിസത്തിന്റെ മൂര്‍ധന്യം. ചാരക്കേസ് കാലത്ത് ഉരുളക്കുപ്പേരികള്‍ ഇരുഭാഗത്തുനിന്നും വന്നു. പാര്‍ട്ടിയിലെ പോലെ ഐക്യജനാധിപത്യ മുന്നണിയിലും സര്‍വസ്വീകാര്യനാണ് ഉമ്മന്‍ചാണ്ടി. തന്ത്രങ്ങള്‍ മെനയുന്നതില്‍ കേമനായതിനാല്‍ മുന്നണിയിലാകെ ഈ സാന്നിധ്യം അനിവാര്യം. സോളാര്‍ കേസുമായി പ്രതിപക്ഷം യു.ഡി.എഫ് സര്‍ക്കാരിനെയും ഉമ്മന്‍ചാണ്ടിയെ പ്രത്യേകിച്ചും സര്‍വസന്നാഹങ്ങളുമായി നേരിട്ടപ്പോഴായിരുന്നു ഭീഷണി തേടിയെത്തിയത്. പക്ഷേ മാധ്യമങ്ങളോടും എതിര്‍ രാഷ്ട്രീയക്കാരോടും മാന്യമായും പക്വതയോടെയുമുള്ള പെരുമാറ്റംകൊണ്ട് പുഷ്പം പോലെ അതെല്ലാം മറികടക്കാന്‍ അദ്ദേഹത്തിന് കഴിഞ്ഞു. ഇടതുസര്‍ക്കാര്‍ അന്വേഷിച്ചിട്ടും കേസ് കുമിളയായി.
2016 നിയമസഭാതിരഞ്ഞെടുപ്പില്‍ മുഖ്യമന്ത്രിസ്ഥാനത്തുനിന്ന് മാറേണ്ടിവന്നതോടെ രാഷ്ട്രീയ വനവാസത്തിലേക്ക് മാറിയെങ്കിലും രണ്ടടി മുന്നോട്ടുവെക്കാനായി ഒരടി പിന്നോട്ട് നീങ്ങിയതായാണ് പലരും കരുതിയത്. കോണ്‍ഗ്രസ് നേതൃത്വം 2018 ജൂണില്‍ ചാണ്ടിയെ പിടിച്ച് ജനറല്‍ സെക്രട്ടറിയാക്കി ആന്ധ്രപ്രദേശിന്റെ ചുമതല നല്‍കി. ഇടക്കാലത്ത് തൊണ്ടയ്ക്കുണ്ടായ തകരാര്‍ പരിഹരിച്ചുവരികയാണ്. മൊബൈല്‍ ഫോണും റിസ്റ്റ്‌വാച്ചും ഉപയോഗിക്കുന്നുണ്ടെങ്കിലും അതൊന്നും ആ ഖദറിനകത്ത് കാണില്ല. ആഭ്യന്തരം, ധനകാര്യം വകുപ്പുകള്‍ കൈകാര്യം ചെയ്തു. 1943 ഒക്ടോബര്‍ 31ന് കുമരകത്ത് ജനിച്ച ഉമ്മന്‍ചാണ്ടി സ്‌കൂള്‍ കാലത്ത് കെ.എസ്.യുവിലൂടെയാണ് പൊതുരംഗത്തെത്തിയത്. 1967-69ല്‍ അതിന്റെ സംസ്ഥാനഅധ്യക്ഷനും 1970ല്‍ യൂത്ത് കോണ്‍ഗ്രസ് സംസ്ഥാന അധ്യക്ഷനുമായി. സംസ്ഥാനത്താകെ ചുറ്റിനടന്ന് പാര്‍ട്ടിയെ വളര്‍ത്തി. ധനതത്വശാസ്ത്രത്തിലും നിയമത്തിലും ബിരുദം. മറിയാമ്മയാണ് ഭാര്യ. യൂത്ത്‌കോണ്‍ഗ്രസ് നേതാവ് ചാണ്ടിഉമ്മന്‍, മരിയയും അച്ചുവും മക്കള്‍.

Film

ഐ.എഫ്.എഫ്.കെ: ഡെലിഗേറ്റ് രജിസ്‌ട്രേഷന്‍ നവംബര്‍ 25 മുതല്‍

സംവിധായകരും സാങ്കേതിക പ്രവര്‍ത്തകരും ജൂറി അംഗങ്ങളുമുള്‍പ്പെടെ വിദേശരാജ്യങ്ങളില്‍നിന്നുള്ള നൂറില്‍പ്പരം അതിഥികള്‍ മേളയില്‍ പങ്കെടുക്കും.

Published

4 mins ago

November 23, 2024

webdesk13

കേരള സംസ്ഥാന ചലച്ചിത്ര അക്കാദമി 2024 ഡിസംബര്‍ 13 മുതല്‍ 20 വരെ തിരുവനന്തപുരത്ത് സംഘടിപ്പിക്കുന്ന 29ാമത് ഐ.എഫ്.എഫ്.കെയുടെ ഡെലിഗേറ്റ് രജിസ്‌ട്രേഷന്‍ നവംബര്‍ 25 തിങ്കളാഴ്ച രാവിലെ 10 മണിക്ക് ആരംഭിക്കും. registration.iffk.in എന്ന ലിങ്കിലൂടെ ഡെലിഗേറ്റ് രജിസ്‌ട്രേഷന്‍ നടത്താവുന്നതാണ്.

പൊതുവിഭാഗത്തിന് ജി.എസ്.ടി ഉള്‍പ്പെടെ 1180 രൂപയും വിദ്യാര്‍ത്ഥികള്‍ക്ക് ജി.എസ്.ടി ഉള്‍പ്പെടെ 590 രൂപയുമാണ് ഡെലിഗേറ്റ് ഫീസ്. മേളയുടെ മുഖ്യവേദിയായ ടാഗോര്‍ തിയേറ്ററില്‍ സജ്ജീകരിച്ചിട്ടുള്ള ഡെലിഗേറ്റ് സെല്‍ മുഖേന നേരിട്ടും രജിസ്‌ട്രേഷന്‍ നടത്താം.

എട്ടുദിവസങ്ങളിലായി നടക്കുന്ന മേളയില്‍ വിവിധ രാജ്യങ്ങളില്‍നിന്നുള്ള 180 ഓളം ചിത്രങ്ങള്‍ പ്രദര്‍ശിപ്പിക്കും. 15 തിയേറ്ററുകളിലായാണ് പ്രദര്‍ശനം നടക്കുക. ഏഷ്യന്‍, ആഫ്രിക്കന്‍, ലാറ്റിനമേരിക്കന്‍ രാജ്യങ്ങളില്‍നിന്നുള്ള സിനിമകളുടെ അന്താരാഷ്ട്ര മല്‍സര വിഭാഗം, മുന്‍നിര ചലച്ചിത്രമേളകളില്‍ അംഗീകാരങ്ങള്‍ നേടിയ സിനിമകള്‍ ഉള്‍പ്പെടുന്ന ലോകസിനിമാ വിഭാഗം, ഇന്ത്യന്‍ സിനിമ നൗ, മലയാളം സിനിമ റ്റുഡേ, കണ്‍ട്രി ഫോക്കസ് വിഭാഗത്തിലുള്ള ചിത്രങ്ങള്‍, മണ്‍മറഞ്ഞ ചലച്ചിത്രപ്രതിഭകള്‍ക്ക് സ്മരണാഞ്ജലിയര്‍പ്പിക്കുന്ന ഹോമേജ് വിഭാഗം തുടങ്ങിയ പാക്കേജുകള്‍ 29ാമത് ഐ.എഫ്.എഫ്.കെയില്‍ ഉള്‍പ്പെടുത്തിയിട്ടുണ്ട്.

സംവിധായകരും സാങ്കേതിക പ്രവര്‍ത്തകരും ജൂറി അംഗങ്ങളുമുള്‍പ്പെടെ വിദേശരാജ്യങ്ങളില്‍നിന്നുള്ള നൂറില്‍പ്പരം അതിഥികള്‍ മേളയില്‍ പങ്കെടുക്കും. മേളയുടെ ഭാഗമായി ഓപ്പണ്‍ ഫോറം, മീറ്റ് ദ ഡയറക്ടര്‍, ഇന്‍ കോണ്‍വര്‍സേഷന്‍, എക്‌സിബിഷന്‍, കലാസാംസ്‌കാരിക പരിപാടികള്‍ എന്നിവ ഉണ്ടായിരിക്കും

india

‘മഹാരാഷ്ട്രയിലെ ഫലം അപ്രതീക്ഷിതം’; വിശദമായി വിശകലനം ചെയ്യും: രാഹുൽ ഗാന്ധി‘

ജാർഖണ്ഡിൽ ഇന്ത്യ മുന്നണിക്ക് മികച്ച വിജയം നൽകിയ ജനങ്ങളെ അദ്ദേഹം അഭിനന്ദിക്കുകയും ചെയ്തു.

Published

11 mins ago

November 23, 2024

webdesk13

മഹാരാഷ്ട്ര നിയമസഭാ തെരഞ്ഞെടുപ്പിൽ ഫലം അപ്രതീക്ഷിതമെന്ന് പ്രതിപക്ഷ നേതാവ് രാഹുൽ ഗാന്ധി. ഫലംവിശദമായി വിശകലനം ചെയ്യുമെന്നും രാഹുൽ എക്സിൽ കുറിച്ചു.

ജാർഖണ്ഡിൽ ഇന്ത്യ മുന്നണിക്ക് മികച്ച വിജയം നൽകിയ ജനങ്ങളെ അദ്ദേഹം അഭിനന്ദിക്കുകയും ചെയ്തു. സംസ്ഥാനത്ത് മുന്നണിയുടെ വിജയം ഭരണഘടനയോടൊപ്പം വെള്ളവും വനവും ഭൂമിയും സംരക്ഷിച്ചതിെൻറ വിജയം കൂടിയാണെന്നും രാഹുൽ പറഞ്ഞു.

കൂടാതെ പ്രിയങ്ക ഗാന്ധിയെ വിജയിപ്പിച്ചതിന് വയനാട് ജനതക്കും അദ്ദേഹം നന്ദി പറഞ്ഞു. ‘വയനാട്ടിലെ എന്റെ കുടുംബം പ്രിയങ്കയിൽ വിശ്വാസം അർപ്പിച്ചതിൽ അഭിമാനം തോന്നുന്നു. നമ്മുടെ പ്രിയങ്കരമായ വയനാടിനെ പുരോഗതിയുടെയും സമൃദ്ധിയുടെയും വിളക്കുമാടമാക്കി മാറ്റാൻ അവൾ ധൈര്യത്തോടെയും അനുകമ്പയോടെയും അചഞ്ചലമായ അർപ്പണബോധത്തോടെയും നയിക്കുമെന്ന് എനിക്കറിയാം’ -രാഹുൽ ഗാന്ധി എക്സിൽ കുറിച്ചു.

kerala

പിണറായിയുടെ പഞ്ച്‌ ഡയലോഗ് കേട്ട്‌ കോരിത്തരിക്കുന്നവരുടെ എണ്ണം കുറഞ്ഞു; സി.പി.എം ബി.ജെ.പിയുടെ സഖ്യകക്ഷി: വി.ടി ബൽറാം

സി.പി.എമ്മുമായി ബി.ജെ.പി നേതാക്കൾ ഒരുപാട് ഡീലുകൾ ഉണ്ടാക്കിയിട്ടുണ്ടെന്നും ബൽറാം ഫേസ്ബുക്കിൽ കുറിച്ചു.

Published

18 mins ago

November 23, 2024

webdesk13

പിണറായി വിജയന്റെ പഞ്ച്‌ ഡയലോഗുകൾ കേട്ട്‌ കോരിത്തരിക്കുന്നവരുടെ എണ്ണം വലിയ തോതിൽ കുറഞ്ഞിരിക്കുന്നുവെന്നും കുത്തിത്തിരിപ്പുകൾ ഇനിയെങ്കിലും സി.പി.എം ഒഴിവാക്കിയാൽ അവർക്ക്‌ നല്ലതാണെന്നും കോൺഗ്രസ് നേതാവ് വി.ടി. ബൽറാം.

സി.പി.എമ്മിനെ ബി.ജെ.പിയുടെ സഖ്യകക്ഷി മാത്രമായാണ്‌ ജനങ്ങൾ കാണുന്നത്‌. ‘മതേതരത്വം സംരക്ഷിക്കാൻ’ സി.പി.എം ഒരു കാലത്തും കോൺഗ്രസിന്‌ വോട്ട്‌ മറിച്ചു നൽകില്ല. സി.പി.എമ്മുമായി ബി.ജെ.പി നേതാക്കൾ ഒരുപാട് ഡീലുകൾ ഉണ്ടാക്കിയിട്ടുണ്ടെന്നും ബൽറാം ഫേസ്ബുക്കിൽ കുറിച്ചു.

ഫേസ്ബുക് പോസ്റ്റിന്‍റെ പൂർണരൂപം

പാലക്കാട് തെരഞ്ഞെടുപ്പ് റിസൾട്ടുമായി ബന്ധപ്പെട്ട് ചില പ്രാഥമിക നിരീക്ഷണങ്ങൾ:

1) ബി.ജെ.പിയെ നേർക്കുനേരെയുള്ള പോരാട്ടത്തിൽ പരാജയപ്പെടുത്താൻ സാധിക്കുന്നത് കോൺഗസിനും യു.ഡി.എഫിനുമാണ് എന്ന് കേരളം വീണ്ടും വിധിയെഴുതിയിരിക്കുന്നു. സി.പി.എമ്മിനെ ബി.ജെ.പിയുടെ സഖ്യകക്ഷി മാത്രമായാണ്‌ ജനങ്ങൾ കാണുന്നത്‌.

2) ‘മതേതരത്വം സംരക്ഷിക്കാൻ’ സി.പി.എം ഒരു കാലത്തും കോൺഗ്രസിന്‌ വോട്ട്‌ മറിച്ചു നൽകില്ല. പാലക്കാട്ടെ മുൻ ഇലക്ഷനുകളിലൊന്നും അങ്ങനെ നൽകിയിട്ടുമില്ല. ഷാഫിയും ഇ. ശ്രീധരനും ഏറ്റുമുട്ടുമ്പോഴും ശ്രീകണ്ഠനെതിരെ പൊളിറ്റ്‌ ബ്യൂറോ അംഗം വിജയരാഘവൻ ജയിക്കാനായി മത്സരിക്കുമ്പോഴും ഇപ്പോൾ ഭരണത്തിന്റെ മുഴുവൻ സന്നാഹങ്ങളുമുപയോഗിച്ച് രണ്ടാം സ്ഥാനമെങ്കിലും നേടാൻ ഡസ്പറേറ്റായി നോക്കിയപ്പോഴും എല്ലാം സി.പി.എം സ്ഥിരമായി മൂന്നാം സ്ഥാനത്ത്‌ തന്നെയാണ്‌. അവരുടെ വോട്ടിൽ കാര്യമായ വ്യത്യാസമൊന്നുമില്ല. അവർക്ക്‌ അവിടെ അത്രയേ വോട്ടുള്ളൂ, 35000നും 38000നുമിടക്ക്.

3) ബി.ജെ.പിയുടെ പാലക്കാട്ടെ തകർച്ച തുടങ്ങിക്കഴിഞ്ഞു. അവരെ സംബന്ധിച്ച്‌ പാലക്കാട്‌ ഇനിയൊരു ‘എ’ ക്ലാസ്‌ സീറ്റല്ല. അടുത്ത മുനിസിപ്പൽ തെരഞ്ഞെടുപ്പിൽ അവിടെ ഭരണമാറ്റത്തിന്‌ സാധ്യത വർധിച്ചിരിക്കുന്നു.

4) കാമ്പുള്ള രാഷ്ട്രീയ വിഷയങ്ങൾ ഉന്നയിക്കാതെ കോൺഗ്രസ്‌ സ്ഥാനാർഥിയെക്കുറിച്ച്‌ നിലവാരമില്ലാത്തതും ബാലിശവുമായ വ്യക്തിപര ആരോപണങ്ങളുന്നയിച്ച്‌ പ്രചരണങ്ങളെ ഡീറെയിൽ ചെയ്യിക്കാനുള്ള സി.പി.എം ശ്രമങ്ങൾ പതിവായി എല്ലാ തെരഞ്ഞെടുപ്പുകളിലും ഇപ്പോൾ പാളുകയാണ്‌. തലക്കകത്തും പുറത്തും ഒന്നുമില്ലാത്ത ചില മാധ്യമ പുംഗവന്മാരുടെ അതിവൈകാരിക പ്രകടനങ്ങൾ കൊണ്ട്‌ അവരുടെ ചാനലിന്റെ റേറ്റിംഗ്‌ മാത്രമേ കൂടുകയുള്ളൂ, സി.പി.എമ്മിന്റെ വോട്ട്‌ കൂടില്ല.

5) ഇനിയെങ്കിലും ഹീനമായ വർഗീയ പ്രചരണങ്ങൾ സി.പി.എം നിർത്തണമെന്ന് ജനങ്ങൾ ആവർത്തിച്ച്‌ ആവശ്യപ്പെടുന്നു. അങ്ങനെ ഏതെങ്കിലും ഒരു സിംഗ്ൾ വിഷയത്തിന്മേൽ വൈകാരികമായി പ്രതികരിക്കുന്നവരല്ല കേരളത്തിലെ ന്യൂനപക്ഷങ്ങൾ ഇപ്പോൾ. സമകാലിക ഇന്ത്യൻ അവസ്ഥയെ സമഗ്രമായി വിലയിരുത്തിയാണ്‌ അവർ ഈയടുത്തകാലത്തായി കോൺഗ്രസിനും യു.ഡി.എഫിനുമൊപ്പം നിൽക്കാൻ തീരുമാനിച്ചിരിക്കുന്നത്‌. പിണറായി വിജയന്റെ പഞ്ച്‌ ഡയലോഗുകൾ കേട്ട്‌ കോരിത്തരിക്കുന്നവരുടെ എണ്ണം വലിയ തോതിൽ കുറഞ്ഞിരിക്കുന്നു. അതുകൊണ്ട്‌ ഓവറായ കുത്തിത്തിരിപ്പുകൾ ഇനിയെങ്കിലും സി.പി.എം ഒഴിവാക്കിയാൽ അവർക്ക്‌ നന്ന്.

6) ബി.ജെ.പി സംസ്ഥാന നേതൃത്വത്തിനെതിരായ കലാപങ്ങൾ ആ പാർട്ടിക്കകത്ത്‌ തുടങ്ങിയിരിക്കുന്നു. പണത്തോട്‌ ആർത്തിയുള്ള സുരേന്ദ്രനെപ്പോലുള്ള നേതാക്കൾ സി.പി.എമ്മുമായി ഒരുപാട്‌ ഡീലുകൾ ഉണ്ടാക്കിയിട്ടുണ്ടെന്ന് ബി.ജെ.പിക്കാർക്ക് പോലും മനസ്സിലാവുന്നുണ്ട്.

7) ക്രെഡിബിലിറ്റിയുള്ള ഒരൊറ്റ നേതാവു പോലും ഇന്ന് സി.പി.എമ്മിലില്ല. “അപ്പ കണ്ടവനെ അപ്പാ” എന്നു വിളിക്കുന്ന, വിചാരിച്ച പോലെ കാര്യം നടന്നില്ലെങ്കിൽ തൊട്ടടുത്ത നിമിഷം മാറ്റിപ്പറയുന്ന അവസരവാദികളാണ് യുവ/സീനിയർ വ്യത്യാസമില്ലാതെ സി.പി.എമ്മിന്റെ നേതാക്കൾ. പുതിയ തലമുറ വോട്ടർമാർക്ക് മുന്നിൽ അവർ മിക്കവരും പരിഹാസ്യ കഥാപാത്രങ്ങളാണ്.