Video Stories

വേദനിക്കുന്ന കോടീശ്വരന്‍മാരും കണ്ണീര് വീണ കായലും-ശാരി പിവി

Published

7 years ago

August 21, 2017

എല്ലാം ശരിയാക്കല്‍ ടീം ഭരണം തുടങ്ങിയതില്‍ പിന്നെ സംസ്ഥാനത്ത് തഴച്ചു വളരുന്ന ഏക വ്യവസായം വിവാദം മാത്രമാണ്. സാധാരണക്കാരന്റെ നടുവൊടിയുമ്പോഴും വേദനിക്കുന്ന കോടീശ്വരന്‍മാരുടെ കണ്ണീരൊപ്പാന്‍ സര്‍ക്കാര്‍ ഒപ്പമുണ്ടെന്നതാണ് ആകെയൊരു ആശ്വാസം. അതിപ്പോ സ്വന്തം മന്ത്രിസഭയിലെ മന്ത്രിയും എം.എല്‍.എയുമൊക്കെയാവുമ്പോ അതാണല്ലോ അതിന്റെ ഒരു ഇത്. അല്ലെങ്കിലും ഈ പാപ്പരാസി മാധ്യമങ്ങള്‍ക്കും പ്രതിപക്ഷത്തിനും കൊടിയ അസൂയയാണ്. ഫോണ്‍ ട്രാപ്പില്‍ പെട്ട് എ.കെ ശശീന്ദ്രന്‍ രാജിവെച്ചതോടെ കിട്ടിയ ഗതാഗത മന്ത്രി സ്ഥാനം മുള്‍ക്കിരീടമാണെന്ന് മാസങ്ങള്‍ക്കകം മനസിലായെങ്കിലും, പാവങ്ങളുടെ കണ്ണീരൊപ്പാനായി മാത്രം 150 കോടി രൂപയുടെ റിസോര്‍ട്ട് ഹോട്ടല്‍ തുടങ്ങിയ ഒരു മന്ത്രിയെ കുറിച്ചാണ് ഇപ്പോള്‍ ഇല്ലാ വചനം പറഞ്ഞ് പരത്തുന്നത്. സംഗതി റിമോട്ട് ഭരണമാണെങ്കിലും ചാടാന്‍ പറയുമ്പോള്‍ ചാടാനും മിണ്ടാന്‍ പറയുമ്പോള്‍ മിണ്ടാനും തയാറാവുന്ന ഒരാളെ കുറിച്ചാണ് ഈ ഇല്ലാവചനങ്ങളെല്ലാം. ഒരു പാട് പാവങ്ങള്‍ക്ക് അങ്ങ് ഗള്‍ഫില്‍ മേല്‍വിലാസം ഉണ്ടാക്കിക്കൊടുത്തിട്ടുണ്ടെന്നാണ് ടിയാന്റെ സില്‍ബന്ധികള്‍ പറയുന്നത്.

എന്നിട്ടും കുവൈത്ത് ചാണ്ടിയെന്ന പേര് മാത്രമായതോടെയാണ് ഈനാട്ടില്‍ കണ്ണീരൊപ്പല്‍ കലാപരിപാടിക്ക് തുടക്കമിട്ടത്. കായല്‍ പരപ്പ് നികത്തിയെന്നും, പൈപ്പിട്ട് വെട്ടിപ്പിടിച്ചുവെന്നുമൊക്കെയാണ് ഇപ്പോള്‍ അസൂയാലുക്കള്‍ പറയുന്നത്. പക്ഷേ ബ്ലൂ വെയില്‍ ഗെയിം കളിച്ച് വല്ലവനും കായലില്‍ ചാടി ആത്മഹത്യ ചെയ്യുന്നത് അവസാനിപ്പിക്കാന്‍ ഇതു കൊണ്ട് സാധിച്ചാല്‍ അത്രേം ആയില്ലേ എന്നു ചോദിക്കുന്നവരുമുണ്ട്. പോരാത്തതിന് റിസോര്‍ട്ടിലേക്ക് സര്‍ക്കാര്‍ ഫണ്ട് ഉപയോഗിച്ച് റോഡും വെട്ടിയത്രേ. കേട്ട പാതി കേള്‍ക്കാത്ത പാതി പ്രതിപക്ഷ പാര്‍ട്ടിയുടെ യുവജന വിഭാഗം മാര്‍ച്ച് നടത്തി കണ്ണില്‍ കണ്ടതെല്ലാം തല്ലിപ്പൊളിച്ചെങ്കിലും പാവങ്ങള്‍ക്കു വേണ്ടി വെമ്പുന്ന മന്ത്രിയുടെ മനസ് കുത്തിപ്പൊളിക്കാനാവാത്തത് ഭാഗ്യം. ഒരു കാര്യവുമില്ലാതെ വെറുതെ പാഴാകുമായിരുന്ന ഒരു കായലാണ് ടിയാന്‍ ഒന്നും രണ്ടുമല്ല 150 കോടി മുടക്കി പാവങ്ങള്‍ക്ക് വേണ്ടി കെട്ടിപ്പൊക്കിയത്. അതും തെരഞ്ഞെടുപ്പ് സത്യവാങ്മൂലത്തില്‍ പോലും രേഖപ്പെടുത്താതെയാണെന്നത് മറക്കരുത്.
വെറും 92 കോടി രൂപയുടെ സ്വത്ത് മാത്രമം നാമനിര്‍ദേശ പത്രികയില്‍ കാണിച്ചിട്ടും 150 കോടി റിസോര്‍ട്ടിന് ചെലവിട്ടതായി നിയമസഭയില്‍ തുറന്ന് പറഞ്ഞ സത്യസന്ധത ആരും വിസ്മരിക്കരുത്. സ്വത്ത് വിവരം മറച്ചു വെക്കുന്നത് ഗുരുതര കുറ്റമായിട്ടു പോലും അത് വെളിപ്പെടുത്തിയ ആ മനസ് കാണാതിരിക്കരുത്, അതാണ് നമ്മുടെ മന്ത്രി. യു.പി മുഖ്യമന്ത്രി യോഗി ആദിത്യ നാഥിനെ പോലെ സ്വന്തം മണ്ഡലത്തിലെ ആസ്പത്രിയില്‍ ശിശുക്കള്‍ മരിച്ചപ്പോള്‍ ചികിത്സിച്ച ഡോക്ടറെ സസ്‌പെന്റ് ചെയ്യുകയല്ല ചാണ്ടി മന്ത്രി ചെയ്തത്.
ഗര്‍ഭിണികളും ഹൃദ്രോഗികളും എന്തിന് ജലദോശം വന്നവരെ പോലും ആസ്പത്രിയിലെത്തിക്കാനായി റിസോര്‍ട്ട് വക സ്പീഡ് ബോട്ട് സ്വന്തം കാശ് മുടക്കി വാങ്ങി, ഓടിച്ച് സഹായിച്ച മഹാനാണ് മന്ത്രിയെന്നത് ഈ വിവാദമുണ്ടാക്കുന്നവര്‍ക്ക് അറിയില്ലല്ലോ. പാവങ്ങളെ ചാണ്ടി സഹായിക്കുമ്പോള്‍ ചാണ്ടിയുടെ അസുഖം സര്‍ക്കാര്‍ ചികിത്സിക്കുമെന്നാണല്ലോ അതിന്റെ ഒരിത്. ദിവസം തോറും എണ്ണയുടെ വില കേന്ദ്രത്തിലെ ആശാന്‍മാര്‍ കൂട്ടുന്നത് കാരണം ഇനി ബോട്ട് ഓടിക്കുന്നത് പന്തിയല്ലെന്ന് കണ്ടാണ് പ്രദേശത്തെ പാവങ്ങള്‍ക്കു വേണ്ടി റോഡ് വെട്ടിയത്. അല്ലാതെ ഛേ..ഛെ. റിസോര്‍ട്ട് തുടങ്ങിയത് ലാഭക്കൊതിക്കൊണ്ടാണെന്നാണ് വേറെ ചില അസൂയാലുക്കള്‍ ഇപ്പോള്‍ തട്ടിവിടുന്നത്. എന്നാല്‍ കേരളത്തിന്റെ ടൂറിസം വ്യവസായത്തെ തന്നാലാവും വിധം സഹായിക്കുന്നതിനായി നഷ്ടം സഹിച്ച് പത്ത് മുന്നൂറ് ജീവനക്കാര്‍ക്ക് ജീവനോപാതി നല്‍കാനാണെന്ന് സാക്ഷാല്‍ ചാണ്ടി മന്ത്രി പറഞ്ഞപ്പോള്‍ മാത്രമാണ് അറിയുന്നത്. കേട്ടവര്‍ കേട്ടവര്‍ ആനന്താശ്രുവോ, അതോ സങ്കടം സഹിക്കവയ്യാതെയാണോ എന്നറിയില്ല. കണ്ണു തുടച്ചാണ് സീറ്റു വിട്ടത്.
മാലിന്യവും പോളയും തടയാന്‍ പ്ലാസ്റ്റിക്കിട്ടെന്നു വരെ പറഞ്ഞ് മുഖ്യമന്ത്രി പിന്തുണച്ചിട്ടും കിട്ടിയ ചാന്‍സില്‍ ടിയാനെ മന്ത്രിസ്ഥാനത്തു നിന്നും കുത്തിച്ചാടിക്കാനായി നടക്കുകയാണ് എന്‍.സി.പിയിലെ നേതാക്കള്‍. പക്ഷേ വിലപിക്കുന്ന കോടീശ്വരന്‍മാരെ കേന്ദ്രം നേതൃത്വം കൈവിടില്ലെന്ന പ്രപഞ്ച തത്വം ഈ നേതാക്കന്‍മാരുണ്ടോ അറിയുന്നു. അല്ലേലും എന്‍.സി.പി എന്ന ജനബാഹുല്യം കാരണം നിന്നു തിരിയാന്‍ ഇടമില്ലാത്ത പാര്‍ട്ടിയില്‍ നേതാക്കന്‍മാരാണല്ലോ എല്ലാമെല്ലാം. എല്‍.ഡി.എഫ് സര്‍ക്കാര്‍ അധികാരത്തില്‍ വന്നതില്‍ പിന്നെ പ്രധാന തൊഴില്‍ ന്യായീകരണമാക്കി നടക്കുന്ന സി.പി.എം സംസ്ഥാന സെക്രട്ടറി തോമസ് ചാണ്ടിക്കു വേണ്ടിയും രംഗത്തെത്തിയിട്ടുണ്ട്. ചാണ്ടിക്കെതിരായ ആരോപണങ്ങള്‍ എല്ലാം രാഷ്ട്രീയ പ്രേരിതമെന്നാണ് കോടിയേരി സഖാവ് പറയുന്നത്. പണ്ട് ഏതോ സീസറെയും പൊക്കിപ്പിടിച്ച് സീസറിന്റെ ഭാര്യ സംശയങ്ങള്‍ക്ക് അതീതമാവണമെന്നൊക്കെ അലറി വിളിച്ചിരുന്നത് സത്യം പറഞ്ഞാല്‍ ഇപ്പോള്‍ ഭരണ പക്ഷത്തിന് ഓര്‍മയില്ല അത്ര തന്നെ. അല്ലേലും മന്ത്രിയായ ശേഷമാണ് തോമസ് ചാണ്ടിക്കു നേരെ ആരോപണം ഉന്നയിക്കുന്നതെന്നാണ് ടിയാന്റെ വാദം. അപ്പോള്‍ മന്ത്രിയായാല്‍ എന്തുമാവാം, ആരോപണത്തിന് പ്രസക്തിയില്ലെന്ന് വ്യക്തം. ഇപ്പോള്‍ കൊണ്ടു വന്ന ആരോപണമെല്ലാം എന്തു കൊണ്ട് മുന്‍പ് ഉന്നയിച്ചില്ലെന്നാണ് കോടിയേരിയുടെ ചോദ്യം. അതായത് കായല്‍ നികത്തും മുമ്പ് വേണമായിരുന്നു നികത്തിയ പരാതി നല്‍കാനെന്ന് സാരം. എങ്ങനെയുണ്ട് കൊടിയേരിയുടെ ഫുദ്ധി. മന്ത്രിയുടെ സ്ഥിതി ഇതാണേല്‍ മല തുരന്നുവെന്നാണ് എം.എല്‍.എക്കെതിരായ ആരോപണം. പക്ഷേ ടിയാനും പാവങ്ങളുടെ കണ്ണീരൊപ്പാനായി മാത്രം ജനപ്രതിനിധിയായ ആളാണ്. അദ്ദേഹത്തിനെതിരെ ആരോപണമുന്നയിക്കുന്നത് പഴയ മന്ത്രിയുടെ ബിനാമിയാണ് പോലും. പക്ഷേ പാവങ്ങളുടെ കണ്ണീരൊപ്പാനെത്തിയതിനാല്‍ ഭരണ, പ്രതിപക്ഷ ഭേദമില്ലാതെ ഒരു പഞ്ചായത്ത് മുഴുവന്‍ മേപ്പടിയാനൊപ്പം തുരന്നില്ലെന്ന വാദവുമായാണ് നിന്നത്. മന്ത്രിമാര്‍ക്കുള്ളതിനേക്കാളും സ്റ്റാഫിനെ സ്വന്തമായി വെച്ച് പാവങ്ങളുടെ കണ്ണീരൊപ്പാന്‍ എം.എല്‍.എ ഓഫീസ് നടത്തുന്നുണ്ടെന്ന് പത്ര സമ്മേളനത്തില്‍ പറഞ്ഞ് കരഞ്ഞ ആ സീന്‍ കണ്ടാല്‍ ഇന്‍ഹരിഹര്‍ നഗര്‍ സിനിമയിലെ അപ്പുക്കുട്ടന്‍ പോലും നടുങ്ങും ഏതാണ്ട് അതായിരുന്നു ലവല്‍.
വൃക്ക രോഗികളുടെ കാര്യത്തില്‍ മുട്ടാപ്പോക്ക് കൊണ്ടു വന്ന മന്ത്രിയുടെ ജില്ലക്കാരനായിട്ടും ഡയാലിസിസ് യന്ത്രമൊക്കെ വാങ്ങി നല്‍കി മാതൃക പുകുഷോത്തമനായ എം.എല്‍.എയുടെ ഈ കരച്ചിലൊക്കെ മാലോകര്‍ കേള്‍ക്കാന്‍ തയാറായി. എന്നിട്ടും കേള്‍ക്കാന്‍ തയാറാവാത്ത ഒരാളുണ്ട്. സാക്ഷാല്‍ ഭരണ പരിഷ്‌കാര കമ്മീഷന്‍ ചെയര്‍മാന്‍ തന്നെ. ഇരുവര്‍ക്കുമെതിരായ ആരോപണങ്ങള്‍ അന്വേഷിച്ച് നടപടിയെടുക്കണമെന്നാണ് സഖാവിന്റെ ആവശ്യം. നഷ്ടം സഹിച്ച് പാവങ്ങളെ സഹായിക്കുന്ന ലേക്പാലസ് റിസോര്‍ട്ടും, മഞ്ഞളിപ്പ് തടയാന്‍ പാര്‍ക്ക് കൊണ്ടു വന്നതുമൊന്നും ടിയാന് മാത്രം ദഹിക്കുന്നില്ല.
ലാസ്റ്റ് ലീഫ്:
മിനിമം ബാലന്‍സ് പിഴയായി എസ്.ബി.ഐ പിഴിഞ്ഞെടുത്തത് 235 കോടി രൂപയെന്ന് റിപ്പോര്‍ട്ട്. സബ്‌കെ സാത് സബ്‌കെ വികാസ് അത്ര തന്നെ.

kerala

സി.പി.എം എന്ന വർഗീയതയുടെ കാളിയൻ

രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

Published

2 days ago

November 20, 2024

webdesk13

മുന്‍കൂട്ടി തയ്യാറാക്കിയ പൊറാട്ടുനാടകങ്ങളെല്ലാം എട്ടു നിലയില്‍ പൊട്ടുകയും ജനങ്ങളുടെ മുന്നില്‍ തീര്‍ത്തും പരിഹാസ്യരായി മാറുകയും ചെയ്തപ്പോള്‍ കേവല രാഷ്ട്രീയ നേട്ടങ്ങള്‍ക്കായി സംഘ്പരിവാറിനെ നാണിപ്പിക്കുന്ന വര്‍ഗീയ ധ്രുവീകരണത്തിന്റെ മാറാപ്പുപേറുന്ന സി.പി.എമ്മിന്റെ നെറികെട്ട സമീപനം കണ്ട് കേരളം മൂക്കത്തുവിരല്‍ മൂക്കത്തുവിരല്‍ വെച്ചുപോവുകയാണ്. ഈ രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

കേരളം ഇന്നേവരെ സാക്ഷ്യം വഹിച്ചിട്ടില്ലാത്തവിധം അഴിമതിയുടെയും സ്വജനപക്ഷപാതത്തിന്റെയും കൂത്തരങ്ങായി സംസ്ഥാനം മാറിയപ്പോള്‍ ഭരണത്തെക്കുറിച്ച് ഒരക്ഷരംപോലും ഉരിയാടാന്‍ കഴിയാത്ത മുഖ്യമന്ത്രിയും സംഘവും ന്യൂനപക്ഷ ഭൂരിപക്ഷ പ്രീണനങ്ങള്‍ തരാതതരംപോലെ ഉപയോഗിച്ച് കൊണ്ടിരിക്കുകയാണ്. എന്നാല്‍ പഞ്ചതന്ത്രം കഥയിലെ കുറുക്കന്റെ ഈ കുശാഗ്രബുദ്ധി തിരിച്ചറിഞ്ഞ ജനാധിപത്യ വിശ്വാസികള്‍ മൂര്‍ത്താവ് നോക്കി പ്രഹരം നല്‍കിയിട്ടും അതില്‍നിന്നൊന്നും ഒരുപാഠവും പഠിക്കാന്‍ ഇക്കൂട്ടര്‍ക്ക് സാധിച്ചിട്ടില്ല എന്നാണ് പാലക്കാട് ഉപതിരഞ്ഞെടുപ്പ് തെളിയിക്കുന്നത്.

ലോക്‌സഭാ തിരഞ്ഞെടുപ്പില്‍ മുസ്‌ലിം ഭൂരിപക്ഷ പ്രദേശങ്ങളില്‍ പൗരത്വ വിഷയവും ക്രിസ്ത്യന്‍ പ്രദേശങ്ങളില്‍ മണിപ്പൂരുമെല്ലാം ഉയര്‍ത്തിപ്പിടിച്ച് പ്രചണ്ഡമായ പ്രചരണങ്ങള്‍ നടത്തിയെങ്കിലും ഈ കുതന്ത്രങ്ങള്‍ തിരിച്ചറിഞ്ഞ ജനങ്ങള്‍ ലക്ഷോപലക്ഷം വോട്ടുകള്‍ക്കാണ് അവരെ തൂത്തെറിഞ്ഞത്. എന്നിട്ടും പുഴുത്തുനാറിയ ഇതേ തന്ത്രങ്ങള്‍ തന്നെ വീണ്ടുംപയറ്റിക്കൊണ്ടിരിക്കുമ്പോള്‍ ഇടതുമുന്നണി യെന്ന സംവിധാനം എത്തിപ്പെട്ട അപചയം എത്രമേല്‍ ഭീതിതമാണെന്നതാണ് പ്രകടമായിക്കൊണ്ടിരിക്കുന്നത്. പാലക്കാട് ഉപതിരഞ്ഞെടുപ്പില്‍ എത്രമാത്രം പച്ചയായ രീതിയിലാണ് വര്‍ഗീയതയുടെ വിഷവിത്തുകള്‍ സി.പി.എം വിതറിക്കൊണ്ടിരിക്കുന്നത് എന്നതിന്റെ ഏറ്റവും ഒടുവില ത്തെ ഉദാഹരണമാണ് ഇന്നലെ രണ്ടുപത്രങ്ങള്‍ക്ക് നല്‍കിയ പരസ്യങ്ങള്‍. തിരഞ്ഞെടുപ്പു കമ്മീഷന്റെ അനുമതിപോലും നേടാതെ മുസ്‌ലിം സമുദായത്തിലെ രണ്ടു വിഭാഗങ്ങള്‍ നടത്തുന്ന പത്രങ്ങള്‍ക്ക് വര്‍ഗീയ വിഷംചീറ്റുന്ന പരസ്യങ്ങള്‍ നല്‍കിയതിലൂടെ ന്യൂനപക്ഷവോട്ടുകള്‍ സ്വന്തംപെ ട്ടിയിലാക്കാമെന്ന് കരുതുന്ന പിണറായിയും കൂട്ടരും ഈ സമുദായത്തെക്കുറിച്ച് എന്താണ് ധരിച്ചുവെച്ചിരിക്കുന്നത് എന്നതാണ് ബോധ്യമാകാത്തത്.

സി.പി.എം ആര്‍.എസ്.എസ് ബാന്ധവം വ്യത്യസ്ത സാഹചര്യങ്ങളിലായി നിരന്തരം പുറത്തുവന്നുകൊണ്ടിരിക്കുകയും ആ ഡീലിങ്ങിന്റെ അ നന്തരഫലമായി മോദി സര്‍ക്കാറിന്റെ അതേ മാതൃകയില്‍ പതിറ്റാണ്ടുകളുടെ പോരാട്ടത്തിലൂടെ നേടിയെടുത്ത ന്യൂ നപക്ഷങ്ങളുടെ അവകാശങ്ങളുടെ കടക്കല്‍ പിണറായി സര്‍ക്കാറും നിരന്തരമായി കത്തിവെച്ചു കൊണ്ടിരിക്കുകയുമാണ്. ഈ അന്യായത്തിന്റെയും അനീതിയുടെയും പ്രതിഫലനം കൂടിയാണ് ലോക്‌സഭാ തിരഞ്ഞെടുപ്പില്‍ സംസ്ഥാനത്ത് പ്രകടമായത്. ആ യാഥാര്‍ത്ഥ്യത്തെ തിരിച്ചറി ഞ്ഞ് തിരുത്തലുകള്‍ വരുത്തുന്നതിന് പകരം വൈകാരിക വിക്ഷോഭങ്ങള്‍ക്കൊണ്ട് ഒരു സമുദായത്തെ എക്കാലവും വഞ്ചിച്ചുനിര്‍ത്താമെന്നും ബംഗാളിലെയും ത്രിപുരയിലെയും പോലെ അവരെ വണ്ടിക്കാളകളാക്കി മാറ്റാമെന്നുമാണ് സി.പി.എം സ്വപ്‌നംകാണുന്നതെങ്കില്‍ കേരളത്തിലെ ന്യൂനപക്ഷങ്ങളെക്കുറിച്ച് സി.പി.എമ്മിന് ഇനിയും ഒരു ചുക്കും മനസ്സിലായിട്ടില്ല എന്നുമാത്രമേ കരുതാന്‍ കഴിയൂ.

ഒരു ഭാഗത്ത് ന്യൂനപക്ഷങ്ങളുടെ കണ്ണില്‍പൊടിയിടാനുള്ള ശ്രമങ്ങള്‍ നടത്തുമ്പോള്‍ മറുഭാഗത്ത് ഭൂരിപക്ഷ വര്‍ഗീയത ആളിക്കത്തിക്കാനും ഇവര്‍ ഒരുമടിയും കാണിക്കുന്നില്ല. പക്ഷേ അതിനായി രൂപപ്പെടുത്തുന്ന അജണ്ടകളെല്ലാം അമ്പേ പരാജയപ്പെട്ടുപോയി എന്നതാണ് വാസ്തവം. പാണക്കാട് സയ്യിദ് സാദിഖലി ശിഹാബ് തങ്ങള്‍ക്കെതിരെ പിണറായി വിജയന്‍ രംഗത്തെത്തിയത് ഈ അജണ്ടയുടെ ഭാഗമായിരുന്നുവെങ്കില്‍ ആ ഹീനശ്രമങ്ങളെ കക്ഷിരാഷ്ട്രീയങ്ങള്‍ക്കതീതമായി ജനങ്ങള്‍ എതിര്‍ത്തുതോല്‍പ്പിക്കുകയായിരുന്നു. വിഭാഗീയതയുടെയും വിദ്വേഷത്തിന്റെയും വഴിയില്‍ നിന്ന് സ്‌നേഹത്തിന്റെയും സഹിഷ്ണുതയുടെയും മാര്‍ഗത്തിലേക്ക് ഒരാള്‍ കടന്നുവരികയും പുകള്‍പെറ്റ കൊടപ്പനക്കല്‍ തറവാട്ടിലെത്തി അനുഗ്രഹങ്ങളേറ്റുവാങ്ങുകയും ചെയ്യുമ്പോള്‍ ഇടതുപാളയത്തില്‍ നിന്ന് മുഖ്യ മന്ത്രിയുടെ നേതൃത്വത്തില്‍ കൂട്ടനിലവിളികളുയരുന്നതെന്തിനാണെന്ന ജനാധിപത്യകേരളത്തിന്റെ ചോദ്യത്തിന് മുന്നില്‍ സി.പി.എം ഉത്തരംമുട്ടിനില്‍ക്കുകയാണ്. വര്‍ഗീയ തയുടെ കാളിയന്‍മാരായി മാറിയ സി.പി.എമ്മിന്റെ ധ്രുവി കരണ ശ്രമങ്ങള്‍ക്ക് ഏതെങ്കിലും റാന്‍മുളികളുടെ ഒളിഞ്ഞും തെളിഞ്ഞമുള്ള പിന്തുണ ലഭിക്കുന്നുണ്ടാവാം. എന്നാല്‍ ഈ നെറികേടിനെതിരെയുള്ള മതേതര കേരളത്തിന്റെ പ്രതികരണം ഇന്ന് പാലക്കാട് നിയമസഭാ
മണ്ഡലത്തില്‍ വിനിയോഗിക്കപ്പടുമെന്ന കാര്യത്തില്‍ സംശയമില്ല.

Video Stories

മഹാരാഷ്ട്രയും ഝാര്‍ഖണ്ഡും വിധിയെഴുതുന്നു

ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം.

Published

2 days ago

November 20, 2024

webdesk13

നിശ്ശബ്ദ പ്രചാരണവും അവസാനിപ്പിച്ച് മഹാരാഷ്ട്ര വിധിയെഴുതുന്നു. 288 സീറ്റുകളിലേക്ക് 4,136 പേരാണ് ജനവിധി തേടുന്നത്. ശിവസേന, ബി.ജെ.പി, എൻ.സി.പി കൂട്ടുകെട്ടിലെ മഹായുതിയും കോൺഗ്രസ്, ശിവസേന-യു.ബി.ടി, എൻ.സി.പി-എസ്.പി കൂട്ടുകെട്ടിലെ മഹാവികാസ് അഘാഡിയും (എം.വി.എ) തമ്മിലാണ് മുഖ്യ പോരാട്ടം.

ഇത്തവണ 102 സീറ്റുകളിലാണ് കോൺഗ്രസ് മത്സരിക്കുന്നത്. ലോക്സഭ തെരഞ്ഞെടുപ്പിലെ തിരിച്ചുവരവാണ് കോൺഗ്രസിനും എം.വി.എയിലെ മറ്റ് ഘടക കക്ഷികൾക്കും ആത്മവിശ്വാസമേകുന്നത്. ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം. ശനിയാഴ്ചയാണ് വോട്ടെണ്ണൽ. ചൊവ്വാഴ്ചക്കകം സർക്കാർ രൂപവത്കരിക്കണം.

ഝാർഖണ്ഡ് നിയമസഭ തെരഞ്ഞെടുപ്പിലെ അവസാന ഘട്ട വോട്ടെടുപ്പും ബുധനാഴ്ച നടക്കും. 38 മണ്ഡലങ്ങളിലേക്കാണ് വോട്ടെടുപ്പ്. മഹാരാഷ്ട്രയിൽ വിമതരുൾപ്പെടെ 2,086 സ്വതന്ത്രരും പ്രാദേശിക പാർട്ടികളും മുന്നണികളിലെ സൗഹൃദ പോരും വിധി നിർണയത്തിൽ മുഖ്യ പങ്കുവഹിക്കും. വിവിധ ജാതി സമുദായങ്ങൾക്കിടയിലെ വിള്ളലും കർഷക രോഷവും പുകയുന്ന മഹാരാഷ്ട്രയിൽ ജനം ആർക്കൊപ്പം നിൽക്കുമെന്ന് മുൻകൂട്ടി പ്രവചിക്കാനാകാത്ത അവസ്ഥ.

ഇരു മുന്നണിയും 170ലേറെ സീറ്റുകൾ കിട്ടുമെന്നാണ് അവകാശപ്പെടുന്നത്. ഭരണം പിടിക്കാൻ 145 സീറ്റ് വേണം. തൂക്കുസഭ സാധ്യതയും പ്രവചിക്കപ്പെടുന്നുണ്ട്. അങ്ങനെ വന്നാൽ പുതിയൊരു രാഷ്ട്രീയ നാടകത്തിനുകൂടി മഹാരാഷ്ട്ര സാക്ഷ്യംവഹിക്കേണ്ടിവരും. ഇരുമുന്നണിയിലെയും ആറ് പാർട്ടികൾക്കും തെരഞ്ഞെടുപ്പ് നിർണായകമാണ്. ഝാർഖണ്ഡിൽനവംബർ 13ന് നടന്ന ആദ്യഘട്ട വോട്ടെടുപ്പിൽ 43 മണ്ഡലങ്ങളിലെ വോട്ടർമാർ വിധിയെഴുതിയിരുന്നു.

നിശബ്ദ പ്രചാരണത്തിന്റെ ദിവസമായ ചൊവ്വാഴ്ച ജെ.എം.എം നേതൃത്വത്തിലുള്ള ഇൻഡ്യ സഖ്യവും ബി.ജെ.പി നേതൃത്വത്തിലുള്ള എൻ.ഡി.എ സഖ്യവും സമൂഹമാധ്യമങ്ങളിലൂടെ പിന്തുണ ഉറപ്പാക്കുന്ന തിരക്കിലായിരുന്നു. മുഖ്യമന്ത്രി ഹേമന്ത് സോറനും സംസ്ഥാനത്ത് ബി.ജെ.പിയുടെ തെരഞ്ഞെടുപ്പ് ചുമതലയുള്ള കേന്ദ്രമന്ത്രി ശിവരാജ് സിങ് ചൗഹാനും ‘എക്സി’ലൂടെ വോട്ടഭ്യർഥന നടത്തി. 1.23 കോടി സമ്മതിദായകരാണ് ബുധനാഴ്ച വോട്ട് രേഖപ്പെടുത്തുന്നത്.

ഇതിൽ 60.79 ലക്ഷം വനിതകളാണ്. 14,000ലധികം പോളിങ് സ്റ്റേഷനുകളാണ് സജ്ജീകരിച്ചിട്ടുള്ളത്. കേരളത്തിനുപുറമെ യു.പി, പഞ്ചാബ്, ഉത്തരാഖണ്ഡ് സംസ്ഥാനങ്ങളിലെ 14 നിയമസഭ മണ്ഡലങ്ങളിലേക്കുമുള്ള ഉപതെരഞ്ഞെടുപ്പ് ബുധനാഴ്ച നടക്കും. 23നാണ് വോട്ടെണ്ണൽ.

News

ഗസ്സയിലെ വംശഹത്യ; ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി

ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

Published

3 days ago

November 19, 2024

webdesk13

ഗസയില്‍ വംശഹത്യ തുടരുന്ന ഇസ്രാഈലുമായുള്ള എല്ലാ ബന്ധങ്ങളും അവസാനിപ്പിച്ചെന്ന് പ്രഖ്യാപിച്ചതിന് പിന്നാലെ ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി. ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

ഇതേത്തുടര്‍ന്ന് ഹെര്‍സോഗിന് അസര്‍ബൈജാനില്‍ നടന്ന കാലാവസ്ഥ ഉച്ചകോടിയില്‍ പങ്കെടുക്കാന്‍ സാധിക്കാതെ വന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ സുരക്ഷാ കാരണങ്ങളാലാണ് ഉച്ചകോടിയില്‍ പങ്കെടുക്കാത്തതെന്നാണ് ഇസ്രാഈല്‍ പരിസ്ഥിതി മന്ത്രാലയം ഈ വിഷയത്തില്‍ വിശദീകരണം നല്‍കിയത്.

പ്രസിഡന്റിന്റെ വിമാനം വ്യോമാതിര്‍ത്തിയില്‍ പ്രവേശിക്കാന്‍ തുര്‍ക്കി വിസമ്മതിച്ചതിനാല്‍ ഇസ്രാഈല്‍ പ്രസിഡന്റ് യാത്ര റദ്ദാക്കിയതായി ഞായറാഴ്ച അസര്‍ബൈജാനിലെ ഉദ്യോഗസ്ഥരെ ഉദ്ധരിച്ച് വൈ നെറ്റ് പ്രതികരിച്ചു. കോണ്‍ഫറന്‍സിലെ ബാക്കിയുള്ള ഇസ്രഈല്‍ പ്രതിനിധികള്‍ നവംബര്‍ 11 ന് ജോര്‍ജിയ വഴി ബാക്കുവില്‍ എത്തിയിരുന്നു.

ഇസ്രാഈലില്‍ നിന്ന് അസര്‍ബൈജാന്‍ തലസ്ഥാനമായ ബാക്കുവിലേക്കുള്ള ഏറ്റവും സുരക്ഷിതമായതും എളുപ്പമാര്‍ന്നതുമായ മാര്‍ഗമായിരുന്നു തുര്‍ക്കി വഴിയുള്ളത്. ഗസയിലും ലെബനനിലും ഇസ്രാഈല്‍ സൈന്യം വ്യോമാക്രമണം നടത്തുമ്പോള്‍ ഇസ്രാഈല്‍ പ്രസിഡന്റും പ്രധാനമന്ത്രിയുമെല്ലാം തുര്‍ക്കി വഴിയാണ് വ്യോമമാര്‍ഗം സഞ്ചരിച്ചിരുന്നത്.

എന്നാല്‍ തുര്‍ക്കിയുടെ വ്യോമമാര്‍ഗം വഴി ഇസ്രാഈല്‍ നേതാക്കള്‍ക്ക് യാത്ര അനുവദിക്കേണ്ടതില്ലെന്ന് ഉന്നത വൃത്തങ്ങളില്‍ നിന്ന് അറിയിപ്പ് ലഭിച്ചതായി തുര്‍ക്കി വ്യോമയാന ഉദ്യോഗസ്ഥര്‍ പ്രതികരിച്ചു. എന്നാല്‍ ഈ വിലക്ക് ചര്‍ച്ചയിലൂടെ പരിഹരിക്കാമെന്ന് ഇസ്രഈല്‍ പ്രതീക്ഷിക്കുന്നതായി ഇസ്രാഈല്‍ സര്‍ക്കാറിന്റെ കീഴിലുള്ള കാബിര്‍ ന്യൂസ് റിപ്പോര്‍ട്ട് ചെയ്തിരുന്നു

ഇസ്രഈലുമായുള്ള എല്ലാ ബന്ധങ്ങളും അവസാനിപ്പിക്കുന്നുവെന്ന് തുര്‍ക്കി പ്രസിഡന്റ് റജബ് തയ്യിബ് എര്‍ദോഗാനാണ് കഴിഞ്ഞ ദിവസം പ്രഖ്യാപിച്ചത്. ഗസയില്‍ ഇസ്രാഈല്‍ വംശഹത്യ തുടരുന്ന സാഹചര്യത്തിലാണ് ഇസ്രാഈലുമായുള്ള ബന്ധം അവസാനിപ്പിക്കാന്‍ തുര്‍ക്കി ഭരണകൂടം തീരുമാനിച്ചത്.

‘റജബ് തയ്യിബ് എര്‍ദോഗാന്റ നേതൃത്വത്തിലുള്ള തുര്‍ക്കി റിപ്പബ്ലിക് ഇസ്രഈലുമായി ഒരു ബന്ധവും തുടരില്ല. ഞങ്ങളുടെ ഭരണസഖ്യം ഇസ്രാഈലുമായുള്ള ബന്ധം വിച്ഛേദിക്കുന്ന കാര്യത്തില്‍ ഉറച്ച് നില്‍ക്കുന്നു. ഭാവിയിലും ഇത് അപ്രകാരം തന്നെ തുടരും,’ എര്‍ദോഗന്‍ പറഞ്ഞു.

കഴിഞ്ഞ വര്‍ഷം ഒക്ടോബറില്‍ ഇസ്രാഈല്‍ ഗസയില്‍ അധിനിവേശവും വംശഹത്യയും ആരംഭിച്ചതുമുതല്‍ ഇസ്രാഈലിനു നേരെ ശക്തമായ നിലപാട് സ്വീകരിച്ചിരുന്ന നാറ്റോ രാജ്യമാണ് തുര്‍ക്കി. ഇക്കഴിഞ്ഞ മെയില്‍ ഇസ്രാഈലിനുമേല്‍ തുര്‍ക്കി വ്യാപാര ഉപരോധം ഏര്‍പ്പെടുത്തിയിരുന്നെങ്കിലും നയതന്ത്ര ബന്ധം തുടരുകയായിരുന്നു.

ഇതിന്റെ ഭാഗമായി തങ്ങളുടെ അംബാസിഡറെ ഇസ്രഈലില്‍ നിന്ന് തുര്‍ക്കി തിരിച്ച് വിളിച്ചിരുന്നു. എന്നാല്‍ അന്ന് നയതന്ത്രബന്ധം പൂര്‍ണമായി അവസാനിപ്പിച്ചിരുന്നില്ല. സമാനമായി ഇസ്രാഈലും പ്രാദേശിക സുരക്ഷാ ഭീഷണികള്‍ ചൂണ്ടിക്കാട്ടി കഴിഞ്ഞ വര്‍ഷം അങ്കാറയിലെ ഇസ്രാഈല്‍ എംബസി ഒഴിപ്പിച്ചിരുന്നു.

ഗസയില്‍ ഇസ്രാഈല്‍ നടത്തുന്നത് വംശഹത്യയാണെന്ന് മനുഷ്യാവകാശ സംഘടനകള്‍ അടക്കം അഭിപ്രായപ്പെട്ടപ്പോള്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെക്കൊണ്ട് വംശഹത്യയുടെ ഉത്തരവാദിത്വം ഏറ്റെടുപ്പിക്കാന്‍ സാധ്യമായതെല്ലാം ചെയ്യുമെന്ന് എര്‍ദോഗാന്‍ കഴിഞ്ഞ ദിവസം പറഞ്ഞിരുന്നു.

ഈ വര്‍ഷമാദ്യം, ഫലസ്തീനെ പിന്തുണച്ച് അന്താരാഷ്ട്ര നീതിന്യായ കോടതിയില്‍ ഇസ്രാഈലിനെതിരായി ഫയല്‍ ചെയ്ത വംശഹത്യ കേസില്‍ തുര്‍ക്കി ഇടപെട്ടിരുന്നു. ടെല്‍ അവീവിനെതിരെ ലോക രാജ്യങ്ങള്‍ ആയുധ ഉപരോധം ഏര്‍പ്പെടുത്തണമെന്നും തുര്‍ക്കി വാദിച്ചിരുന്നു.