Video Stories

തര്‍ക്കങ്ങള്‍ക്കിടെ ഭരണം മറക്കരുത്

Published

8 years ago

April 27, 2017

സ്വജനപക്ഷപാതം മുതല്‍ മൂന്നാര്‍ കയ്യേറ്റം വരെയുള്ള വിഷയങ്ങളില്‍ തട്ടി പതിനൊന്നു മാസമായി സംസ്ഥാന ഭരണം കുത്തഴിഞ്ഞു കിടക്കുകയാണ്. മുഖ്യമന്ത്രിയടക്കം മുതിര്‍ന്ന മന്ത്രിമാരുടെ കഴിവുകേടുകളും ആഭ്യന്തര വകുപ്പുള്‍പ്പെടെ സുപ്രധാന വകുപ്പുകളുടെ വീഴ്ചകളും ഒന്നിനുപിറകെ മറ്റൊന്നായി വിവാദമുയര്‍ത്തുന്നതിലൂടെ ഉടലെടുത്ത ഭരണ സ്തംഭനം തെല്ലൊന്നുമല്ല ജനങ്ങളെ ദുരിതത്തിലാക്കുന്നത്. കൊടും വരള്‍ച്ചയും കുടിവെള്ള ക്ഷാമവും രൂക്ഷമായ വിലക്കയറ്റവും റേഷന്‍ ലഭ്യതക്കുറവും ക്രമസമാധാന തകര്‍ച്ചയും കൊണ്ട് ജനങ്ങള്‍ പൊറുതിമുട്ടുന്നതു കാണാന്‍ പിണറായി സര്‍ക്കാറിന് സമയം കിട്ടുന്നില്ല. സമീപ കാലങ്ങളില്‍ ചേര്‍ന്ന മന്ത്രിസഭാ യോഗങ്ങളത്രയും തര്‍ക്കങ്ങള്‍ തീര്‍ക്കാന്‍ വേണ്ടി മാത്രമാകുന്നതില്‍ നിന്നു തന്നെ മനസിലാക്കാം ഇടതുസര്‍ക്കാറിന്റെ ഭരണ പരാജയത്തിന്റെ ആഴം. മുന്നണിയെ വിടാതെ പിന്തുടരുന്ന പടലപ്പിണക്കങ്ങളും മന്ത്രിമാര്‍ക്കെതിരെ ഉയര്‍ന്നുവരുന്ന ഗുരുതരമായ ആരോപണങ്ങളും വകുപ്പുകളില്‍ നിന്ന് ഉടലെടുക്കുന്ന ക്ഷന്തവ്യമല്ലാത്ത ക്രമക്കേടുകളും ചര്‍ച്ച ചെയ്യാനല്ലാതെ, ജനജീവിതത്തെ സ്പര്‍ശിക്കുന്ന വികസനഗന്ധിയായ ഒരു വിഷയത്തിലും ഈ സര്‍ക്കാറിന് ക്രിയാത്മകമായി ഇടപെടാന്‍ കഴിഞ്ഞില്ല എന്നതാണ് വാസ്തവം. പതിനൊന്നു മാസത്തിനിടെ കൂടിയ നിയമസഭാ സമ്മേളനങ്ങള്‍ പോലും ജനോപകാരപ്രദമാക്കാന്‍ കഴിയില്ല എന്നതിന്റെ തെളിവ് നടപ്പുസമ്മേളനത്തില്‍പോലും പ്രകടമാണ്. മന്ത്രിസഭയുടെ കൂട്ടുത്തരവാദിത്വ കുറവും വകുപ്പുകള്‍ തമ്മിലെ ഏകോപനമില്ലായ്മയും ഭരണത്തെ പിറകോട്ടുവലിക്കുന്നു എന്ന യാഥാര്‍ഥ്യം മൂന്നാര്‍ കുടിയൊഴിപ്പിക്കലിലും കണ്ടു. ആദ്യ സഭാ സമ്മേളനത്തിന്റെ സ്മരണ പുതുക്കാന്‍ പഴയ നിയമസഭാ മന്ദിരത്തില്‍ ഇന്നലെ ചേര്‍ന്ന പ്രത്യേക സമ്മേളനത്തില്‍ എക്‌സൈസ് മന്ത്രി അവതരിപ്പിച്ച മദ്യ ലഭ്യതയുടെയും വരുമാനത്തിന്റെയും കണക്കുകളും ഇത് സാക്ഷ്യപ്പെടുത്തുന്നു. നയവും നിലപാടുകളുമില്ലാതെ, വീക്ഷണങ്ങളും വൈഭവവുമില്ലാതെയാണ് പിണറായി സര്‍ക്കാറിലെ മന്ത്രിമാര്‍ ഭരണത്തെ പതുക്കെ തള്ളിനീക്കാന്‍ ശ്രമിക്കുന്നത്. എന്നാല്‍ ഏതെങ്കിലും ‘കുരിശി’ല്‍ തട്ടി ഭരണം സ്തംഭിച്ചു നില്‍ക്കുമ്പോള്‍ സടകുടഞ്ഞെഴുന്നേല്‍ക്കുന്ന മുഖ്യമന്ത്രി കേവലം നോക്കുകുത്തിയാകുന്നത് സംസ്ഥാന ചരിത്രത്തില്‍ ഇതാദ്യമാണെന്ന് പറയാതെ വയ്യ. മികച്ച കപ്പിത്താനു മാത്രമേ കാറ്റിലും കോളിലും പെടാതെ കപ്പലിനെ കരക്കടുപ്പിക്കാനാവൂ എന്ന പാഠം ഇനിയെങ്കിലും ഇടതു മുന്നണി പഠിക്കുന്നതു നന്ന്.
രണ്ടു പ്രധാന കാരണങ്ങളാണ് ഭരണ സ്തംഭനത്തിലേക്ക് കേരളത്തെ നയിച്ചത്. കാര്യക്ഷമമല്ലാത്ത ഭരണ നിര്‍വഹണമാണ് ഇതില്‍ പ്രധാനം. വിവിധ തട്ടുകളിലുള്ള സര്‍ക്കാര്‍ ജീവനക്കാരാണ് മറ്റൊരു ഘടകം. തെരഞ്ഞെടുപ്പ് വാഗ്ദാനങ്ങള്‍ക്ക് നേര്‍ വിപരീതമായാണ് സര്‍ക്കാറിന്റെ പ്രവര്‍ത്തനങ്ങളെല്ലാം. ശരിയാംവണ്ണം നടന്നിരുന്ന സംവിധാനങ്ങള്‍ പോലും ഇടതു സര്‍ക്കാര്‍ അട്ടിമറിച്ചു. സര്‍വ മേഖലകളിലെയും സ്വജനപക്ഷപാതം ഭരണ സുതാര്യത മരീചികയാക്കി. മന്ത്രിസഭയിലെ രണ്ടാമനായിരുന്ന വ്യവസായ മന്ത്രിക്ക് ഇക്കാരണത്താല്‍ പുറത്തുപോകേണ്ടി വന്നു. ഇതേ കാലയളവില്‍ രണ്ടു മന്ത്രിമാര്‍ക്കെതിരെ ഇവ്വിഷയത്തില്‍ ഗുരുതരമായ ആരോപണമുയര്‍ന്നു. തദ്ദേശ സ്വയംഭരണ മന്ത്രിക്കെതിരെ കഴിഞ്ഞ ദിവസമാണ് ഇക്കാരണം ചൂണ്ടിക്കാട്ടി വിജിലന്‍സില്‍ പരാതി ലഭിച്ചിട്ടുള്ളത്. ക്രമസമാധാനത്തകര്‍ച്ചയില്‍ സംസ്ഥാനത്തിന്റെ ഗ്രാഫ് ദൈനംദിനം ഉയരുകയാണ് എന്നത് ഭീതി വളര്‍ത്തിയിരിക്കുകയാണ്. ഇടതു സര്‍ക്കാര്‍ അധികാരത്തിലേറിയതിനു ശേഷം സംസ്ഥാനത്ത് 1,75,000 ക്രിമിനല്‍ കേസുകളാണ് രജിസ്റ്റര്‍ ചെയ്തത്. സ്ത്രീകള്‍ക്കെതിരെയുള്ള പീഡന കേസുകളാണ് ഏറെയും. കൊടും കുറ്റവാളികളെ ജയിലില്‍ നിന്നു തുറന്നുവിടാന്‍ മനസുവെച്ച സര്‍ക്കാറിനു കുഴലൂത്തു നടത്തുകയാണ് ക്രമസമാധാനപാലകര്‍. കാക്കിക്കുള്ളില്‍ കാവി കളസമണിഞ്ഞ ചില ക്രമസമാധാന പാലകര്‍ ക്വട്ടേഷന്‍ സംഘങ്ങളെ പാലൂട്ടി വളര്‍ത്തുകയാണ്. പിറന്നുവീണ പെണ്‍കുഞ്ഞിനു മുതല്‍ പടുവൃദ്ധകള്‍ക്കുവരെ മാനാഭിമാനത്തോടെ ജീവിക്കാന്‍ കഴിയാത്ത നാടായി സംസ്ഥാനം പരിവര്‍ത്തിക്കപ്പെട്ടു. നവ കേരളം കെട്ടിപ്പടുക്കാനൊരുമ്പെട്ടവര്‍ നിഷ്‌ക്രിയരായി നില്‍ക്കുന്ന നാണക്കേടാണ് കേരളത്തെ ഇവ്വിധം അരക്ഷിതാവസ്ഥയിലെത്തിച്ചത്. സര്‍ക്കാറിന്റെ പല പ്രവര്‍ത്തനങ്ങളും ന്യൂനപക്ഷങ്ങള്‍ക്കിടയില്‍ ഭീതിവളര്‍ത്തുകയും വര്‍ഗീയ ഫാസിസ്റ്റുകള്‍ക്ക് വളം വെച്ചു കൊടുക്കുകയും ചെയ്യുന്നു. ഭരണം സക്രിയമല്ലാതിരിക്കുമ്പോള്‍ ഉടലെടുക്കുന്ന സ്വാഭാവിക പ്രക്രിയകള്‍ സമൂഹത്തിന്റെ സ്വസ്ഥതയെ തകര്‍ക്കുമെന്നത് തിരിച്ചറിയാന്‍ വിവേകശാലികളായ ഭരണാധികാരികളില്ലാതെ പോയതാണ് നാടിന്റെ ശാപം.
ഐ.പി.എസ്, ഐ.എ.സ് തലം മുതല്‍ താഴേ തട്ടിലുള്ള ജീവനക്കാര്‍ വരെ അസംതൃപ്തരായാണ് കഴിയുന്നത്. തങ്ങളുടെ ഇംഗിതത്തിനൊത്തു തുള്ളുമെന്ന് കരുതി ടി.പി സെന്‍കുമാറിനു പകരം ഡി.ജി.പിയായി നിയമിച്ച ലോക്‌നാഥ് ബെഹ്‌റ എന്തു ചെയ്യണമെന്നറിയാതെ ഉഴലുകയാണ്. സുപ്രീം കോടതിയില്‍ നിന്ന് അനുകൂല വിധി സമ്പാദിച്ച സെന്‍കുമാറിനെ പൊറുക്കാതിരിക്കാനാവില്ലെന്ന് ഇന്നലെ നിയമ സെക്രട്ടറി സര്‍ക്കാറിന് റിപ്പോര്‍ട്ട് സമര്‍പിച്ചു കഴിഞ്ഞു. വിജിലന്‍സ് ഡയറക്ടര്‍ വരുത്തിവച്ച വിനകള്‍ സര്‍ക്കാറിനെ തിരിഞ്ഞുകൊത്തുകയും ചെയ്യുന്നു. കെ.എ.എസ് നടപ്പാക്കുന്നതിനെതിരെ സെക്രട്ടറിയേറ്റില്‍ രൂപപ്പെട്ട സമരത്തിന്റെ വീര്യം ഇപ്പോഴും അടങ്ങിയിട്ടില്ല. തദ്ദേശ സ്ഥാപനങ്ങള്‍ വരെ ഇതിന്റെ അലയൊലികള്‍ ഉയര്‍ന്നു തുടങ്ങിയിട്ടുണ്ട്. ജീവനക്കാരുടെ അഭാവവും നിസ്സഹകരണവും ഭരണസ്തംഭനത്തിന് ആക്കം കൂട്ടുന്നു. ഭരണസ്തംഭനം ഒഴിവാക്കാന്‍ മുഖ്യമന്ത്രി ഇടപെടണമെന്ന് പ്രതിപക്ഷം മാത്രമല്ല, ഭരണ പരിഷ്‌കാര കമ്മീഷന്‍ ചെയര്‍മാനും മുന്‍ മുഖ്യമന്ത്രിയുമായ വി.എസ് അച്യുതാനന്ദന്‍ പലതവണ ആവശ്യപ്പെട്ടിട്ടും പിണറായി വിജയന് കുലുക്കമില്ല.
ഫയല്‍ നീക്കം അസാധാരണമായി വൈകുന്നുവെന്ന് മാസങ്ങള്‍ക്ക് മമ്പ് സര്‍ക്കാര്‍ വിലയിരുത്തിയതാണ്. നിയമ വകുപ്പ് ഒഴികെയുള്ളിടത്ത് ഫയല്‍ നീക്കത്തില്‍ കാലതാമസം ഉണ്ടാകുന്നുവെന്ന് പൊതുഭരണ വകുപ്പും കണ്ടെത്തിയിരുന്നു. ജില്ലാ ഭരണകൂടം മുതല്‍ താഴോട്ടും ഇതിന്റെ പ്രതിഫലനം കണ്ടുതുടങ്ങി. പല കലക്്ടറേറ്റുകളിലും സെക്രട്ടറിമാരുടെയും അസി. സെക്രട്ടറിമാരുടെയും അഭാവം ഭരണ നിര്‍വഹണത്തെ സാരമായി ബാധിക്കുന്നുണ്ട്. തദ്ദേശ സ്വയംഭരണ സ്ഥാപനങ്ങളുടെ സ്ഥിതിയും തഥൈവ. ജീവല്‍ പ്രശ്‌നങ്ങളുമായി ഭരണകൂടങ്ങളെ സമീപിക്കുന്ന സാധാരണക്കാരാണ് ഇതുകൊണ്ട് പ്രയാസപ്പെടുന്നത്. വരള്‍ച്ച വിതച്ച ദുരിതത്തിനിടയില്‍ ജീവിതം തീക്ഷ്ണമാകുമ്പോള്‍ ഭരണകൂട നിസംഗത നിസാരമായി കണ്ടുകൂടാ. തര്‍ക്കങ്ങള്‍ക്കും കോലാഹലങ്ങള്‍ക്കുമിടയില്‍ പൊതുജനങ്ങളുടെ ക്ഷേമൈശ്വര്യങ്ങള്‍ കാണാതെ പോകുന്നത് കൊടുംക്രൂരതയാണ്. ഭരണാധികാരികള്‍ പ്രതിബദ്ധത പുലര്‍ത്തേണ്ടത് പൊതുജനങ്ങളോടാണ്. എന്നാല്‍ അത് പാര്‍ട്ടിയോടും മുന്നണിയോടും മാത്രമായി ചുരുങ്ങുമ്പോഴാണ് നാട് നിശ്ചലമാകുന്നത്. സങ്കുചിതത്വത്തിന്റെ ഈ നീരാളിക്കൈകളിലമര്‍ന്നാണ് ഇന്നു കേരളം നരകിക്കുന്നത്. ഇതില്‍നിന്നുള്ള മോചനം സാധ്യമാകണം.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

2 days ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.