Video Stories

രാഷ്ട്രീയത്തിലെ മിനിമം മര്യാദകള്‍

Published

6 years ago

April 6, 2019

ലോകത്തെ ഏറ്റവുംവലിയ ജനാധിപത്യരാജ്യം പതിനേഴാമത് പൊതുതിരഞ്ഞെടുപ്പിന്റെ പടിവാതില്‍ക്കല്‍ നില്‍ക്കവെയാണ് ഇക്കഴിഞ്ഞ ഏപ്രില്‍ 2ന് മിസോറാമില്‍നിന്നുള്ള ഒരുചിത്രം വന്‍ജനശ്രദ്ധ പിടിച്ചുപറ്റിയത്. വടക്കുകിഴക്കന്‍ സംസ്ഥാനത്തെ സാരംഗില്‍നിന്നുള്ള ആറുവയസ്സുള്ള ഡെറക് ലാല്‍ചെന്നിമ ഇടതുകൈയില്‍ ചത്ത കോഴിക്കുഞ്ഞും വലതുകൈയില്‍ പത്തുരൂപയുമായി സങ്കടത്തോടെ ക്യാമറക്ക് പോസ്‌ചെയ്യുന്ന ചിത്രമാണ് സമൂഹമാധ്യമങ്ങളില്‍ പ്രത്യക്ഷപ്പെട്ടത്. സാധാരണഗതിയില്‍ ഇത്തരംചിത്രങ്ങളും ചലച്ചിത്രങ്ങളും ചിലവിരുതന്മാര്‍ വ്യാജമായി നിര്‍മിച്ച് പോസ്റ്റുചെയ്യാറുണ്ട്. കൊച്ചുഡെറക്കിന്റെ കാര്യത്തില്‍ പക്ഷേ നൂറുശതമാനം സത്യമായിരുന്നുവെന്നാണ് പിന്നീടുവന്ന വാര്‍ത്തകള്‍ വെളിപ്പെടുത്തിയത്. ഡെറക് സൈക്കിള്‍ ഓടിക്കുമ്പോള്‍ അയല്‍വീട്ടിലെ കോഴിക്കുഞ്ഞിനുമേല്‍ ചക്രങ്ങള്‍ കയറിയിറങ്ങുകയും അത് വൈകാതെ ചാകുകയുമായിരുന്നു. എന്നാല്‍ കുഞ്ഞുഡെറക് വീട്ടില്‍ചെന്ന് മാതാപിതാക്കളോട് കേണ് പത്തുരൂപ വാങ്ങി തൊട്ടടുത്ത ആസ്പത്രിയിലേക്ക് ഓടുകയായിരുന്നു. ചിത്രം മറ്റൊരാളാണ് പോസ്റ്റുചെയ്തത്. വൈകാതെ ലോകമാകമാനം ലക്ഷക്കണക്കിനാളുകള്‍ ഇത് പങ്കുവെക്കുകയുണ്ടായി.
എന്തിനാണ് ഇതിവിടെ പറയുന്നതെന്ന് സംശയിക്കുന്നവരോട്, നമ്മുടെ കൊച്ചുകേരളത്തിലും ഏതാണ്ട് സമാനമായ ഒരുസംഭവം കഴിഞ്ഞദിവസമുണ്ടായി. വയനാട്ടില്‍ യു.ഡി.എഫ് സ്ഥാനാര്‍ത്ഥിയായി പത്രികസമര്‍പ്പിക്കാനെത്തിയ കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയും സഹോദരി പ്രിയങ്കഗാന്ധിയും വ്യാഴാഴ്ച അവിടെ പൊരിവെയിലത്ത് നടത്തിയ റോഡ്‌ഷോക്കിടെ മൂന്ന് മാധ്യമപ്രവര്‍ത്തകര്‍ക്ക് ബാരിക്കേഡ് പൊട്ടിവീണ് പരിക്കേല്‍ക്കുന്നതും അതുകണ്ട രാഹുലും പ്രിയങ്കയും വാഹനത്തില്‍നിന്നിറങ്ങി പരിക്കേറ്റവരെ ശുശ്രൂഷിക്കാന്‍ സഹായിക്കുകയുമുണ്ടായി. ഇതിനിടെ മാധ്യമപ്രവര്‍ത്തകന്റെ ഷൂ നിലത്തുകിടക്കുന്നതുകണ്ട പ്രിയങ്ക ഗാന്ധി അതെടുത്ത് കൈയില്‍ ഏറെനേരം പിടിച്ച് ആംബുലന്‍സില്‍ ഏല്‍പിച്ചസംഭവമാണത്. ഈ ദൃശ്യം പകര്‍ത്തിയ ചിലരാണ് അപ്പോള്‍തന്നെ സമൂഹമാധ്യമത്തില്‍ പോസ്റ്റ് ചെയ്തതും പീന്നീടത് വൈറലായതും. സൂര്യാതപത്താല്‍ താഴെവീണ തൊഴിലാളിയെ പരിചരിക്കുന്ന വൃദ്ധയുടെ മറ്റൊരുചിത്രവും ഇതോടൊപ്പംതന്നെ തരംഗമായി. ഇവയൊക്കെ കാണിക്കുന്നത് മനുഷ്യസമൂഹത്തില്‍, അവരേത് ദേശക്കാരും ജാതി-മത-ഭാഷക്കാരുമായിരുന്നാലും ശരി, പ്രപഞ്ചത്തെ നിലനിര്‍ത്തുന്ന നന്മ പൂര്‍ണമായും നശിച്ചുപോയിട്ടില്ലെന്നുതന്നെയാണ്.
ഇതിനൊക്ക ഇടയില്‍തന്നെയാണ് മറ്റുചിലവാര്‍ത്തകളും വായ്ത്താരികളുംകൂടി ഈ തിരഞ്ഞെടുപ്പുതിരക്കിനിടയില്‍ നമുക്ക് കേള്‍ക്കാനിടവന്നത്. അത് മുന്‍പറഞ്ഞ പോസിറ്റീവായ ചിന്തകകള്‍ക്കും പ്രവൃത്തികള്‍ക്കുമപ്പുറം സമൂഹത്തെയും അവരവരെതന്നെയും സ്വയം നിഷേധിക്കുന്ന ചിലഅല്‍പബുദ്ധികളില്‍നിന്നാണുണ്ടായത്. രാഹുല്‍ഗാന്ധിയോട് വയനാടുവെച്ച് മാധ്യമപ്രവര്‍ത്തകര്‍ സ്വാഭാവികമായും ഉന്നയിച്ച ഒരുചോദ്യത്തിന് കേരളത്തിലെ രാഷ്ട്രീയാവസ്ഥയെക്കുറിച്ച് തനിക്കറിയാമെന്നും തനിക്കെതിരെ സി.പി.എം എന്തൊക്കെ പറഞ്ഞാലും താന്‍ അവര്‍ക്കെതിരെ ഒരുവാക്കുപോലും തിരിച്ചുപറയില്ലെന്നുമാണ ്‌രാഹുല്‍ മറുപടി നല്‍കിയത്. ഏതാനും ദിവസംമുമ്പാണ് രാഹുല്‍ഗാന്ധിയെ ‘പപ്പു’ എന്ന് അധിക്ഷേപിച്ചുകൊണ്ട് സി.പി.എം മുഖപത്രം മുഖപ്രസംഗം പ്രസിദ്ധീകരിച്ചതെന്നതാണ് രാഹുല്‍ വ്യംഗ്യമായി സൂചിപ്പിച്ചത്. എന്നിട്ടുപോലും അതേരീതിയില്‍ സി.പി.എമ്മിന് മറുപടിനല്‍കാന്‍ രാഹുലോ അദ്ദേഹത്തിന്റെ പാര്‍ട്ടിയോ തയ്യാറായില്ല എന്നത് മേല്‍സൂചിപ്പിച്ച നന്മയുടെയും പെരുമാറ്റമാന്യതയുടെയും പച്ചയായ പ്രകടനമാണ്.
കഴിഞ്ഞ ലോക്‌സഭാതിരഞ്ഞെടുപ്പിലാണ് പ്രധാനമന്ത്രി നരേന്ദ്രമോദി രാഹുല്‍ഗാന്ധിയെ പപ്പു എന്ന് ആക്ഷേപിച്ച് പൊതുവേദിയില്‍ സംസാരിച്ചത്. രാജ്യത്തെ ഏറ്റവുംവലിയ പ്രതിപക്ഷകക്ഷിയുടെ അധ്യക്ഷനും രാഷ്ട്രത്തിനുവേണ്ടി മുന്നുപ്രധാനമന്ത്രിമാരെ (അതില്‍ രണ്ടുപേര്‍ കൊലചെയ്യപ്പെട്ടു) സമ്മാനിച്ച കുടുംബാംഗവുമായ വ്യക്തിയെയാണ് പ്രധാനമന്ത്രി അപമാനിച്ചത്. ആ വാക്കുകളെ കടമെടുത്തായിരുന്നു കേരളം പോലുള്ള സാക്ഷരകേരളത്തിലെത്തുന്ന രാഹുലിനെ രാഷ്ട്രീയമായി നേരിടാന്‍കഴിയാതെ സി.പി.എം അതേരീതിയില്‍ അപമാനിച്ചത്. ഇവിടെയും തീരുന്നില്ല സി.പി.എമ്മിന്റെ പരാക്ഷേപം. മോദിയെ മാതൃകയാക്കിക്കൊണ്ട് , പുരോഗമനകേരളത്തിന്റെ മുഖ്യമന്ത്രി പിണറായി വിജയന്‍ ഒരു പ്രതിപക്ഷ കക്ഷി എം.പിക്കെതിരെ പരനാറി എന്ന പ്രയോഗം ആവര്‍ത്തിച്ചതും കഴിഞ്ഞദിവസമാണ്. താന്‍ 2014ലെ തിരഞ്ഞെടുപ്പില്‍ കൊല്ലം ലോക്‌സഭാമണ്ഡലം സ്ഥാനാര്‍ത്ഥിയായ ആര്‍.എസ്.പിയിലെ എന്‍.കെ പ്രേമചന്ദ്രനെതിരെ പ്രയോഗിച്ച നെറികെട്ട പ്രയോഗം ആവര്‍ത്തിക്കാന്‍ പിണറായി വിജയനിലെ ധാര്‍ഷ്ട്യം വീണ്ടും സന്നദ്ധമായി എന്നത് ലളിതമായി കാണേണ്ട ഒന്നല്ല. ഇതുതന്നെയാണ് യു.പി മുഖ്യമന്ത്രി യോഗി ആദിത്യനാഥ് രാജ്യത്തെ നിയമങ്ങള്‍ അനുസരിച്ച് പ്രവര്‍ത്തിച്ചുവരുന്ന മുസ്്‌ലിംലീഗിനെതിരെ കഴിഞ്ഞദിവസം നടത്തിയ പ്രസ്താവനയും.മുസ്്‌ലിംലീഗ് രാജ്യത്തെ വൈറസാണെന്നാണ് യോഗി പറഞ്ഞിരിക്കുന്നത്. സ്വന്തമായി വര്‍ഗീയസേനയുണ്ടാക്കി ന്യൂനപക്ഷങ്ങളെ കൊലക്ക് കൊടുക്കുന്ന ഒരു വര്‍ഗീയഭാണ്ഡമാണ് മതന്യൂനപക്ഷാദി ദലിത് പിന്നാക്കജനതയുടെ നിലനില്‍പ്പിനുവേണ്ടി അക്ഷീണം പ്രവര്‍ത്തിച്ചുവരുന്ന ഒരു പ്രസ്ഥാനത്തെക്കുറിച്ച് ഈ വാക്‌വിസര്‍ജ്യം തൊടുത്തത്. മാന്യത വീട്ടില്‍നിന്നു ലഭിക്കണമെന്നാണ് ഇംഗ്ലീഷിലെ പഴമൊഴി. അത് അങ്ങാടിയില്‍ വാങ്ങാന്‍ കിട്ടുന്നതല്ല; സനാതനത്തിന്റെ പുറംകാവിയണിഞ്ഞാല്‍ കിട്ടുന്നതും.
പ്രേമത്തിനും യുദ്ധത്തിനും കണ്ണില്ല എന്ന ചൊല്ല് ആരാണ് ഉണ്ടാക്കിയതെന്നറിയില്ല. യുദ്ധത്തില്‍ പിടികൂടപ്പെടുന്നവരെപോലും മാന്യമായി പരിചരിക്കണമെന്നാണ് ആധുനികസമൂഹം രേഖപ്പെടുത്തിവെച്ചിട്ടുള്ളത്. എന്നാല്‍ ഏത് നെറികെട്ടവഴിയും സ്വീകരിക്കാന്‍ മടിയില്ലാത്ത കശ്മലന്മാരുടെ കൂട്ടമായി ആരാണ് മാറിയിരിക്കുന്നതെന്ന് ഇവയിലൂടെയെല്ലാം സുവ്യക്തമായിരിക്കുന്നു. രാഹുല്‍ഗാന്ധിയും പ്രിയങ്കയും പ്രേമചന്ദ്രനും ഇതര യു.ഡി.എഫ്‌നേതാക്കളും ബി.ജെ.പിക്കും സി.പി.എമ്മിനും അതേനാണയത്തില്‍ മറുപടി പറയാത്തത് തിരഞ്ഞെടുപ്പുചട്ടത്തിലെ ഏതെങ്കിലും ഉപവകുപ്പ് ഭയന്നിട്ടൊന്നുമല്ലെന്ന് ജനം തിരിച്ചറിയുന്നുണ്ട്. ശുദ്ധമായ തറവാട്ടുമഹിമയെന്നാണതിന് അതിനുപേര്്. കുടുംബത്തിനുമാത്രമല്ല. അത് രാഷ്ട്രീയത്തിനും രാഷ്ട്രതന്ത്രത്തിനുമൊക്കെ നന്നായി ചേരുമെന്നാണ് ഗാന്ധിജിയുടെയും നെഹ്രുവിന്റെയും ഖാഇദേമില്ലത്തിന്റെയും പാണക്കാട് തങ്ങള്‍മാരുടെയുമൊക്കെ യു.ഡി.എഫ് വീണ്ടും തെളിയിച്ചിരിക്കുന്നത്. ലക്ഷ്യം മാര്‍ഗത്തെ സാധൂകരിക്കുമെന്നാണ് ഭൗതികവാദികള്‍ പറയുന്നതെങ്കില്‍ ലക്ഷ്യത്തെപോലെ മാര്‍ഗവും സുപ്രധാനമാണെന്ന് അക്കൂട്ടരെ എന്നോ തിരുത്താന്‍ ശ്രമിച്ച, നാമൊക്കെ അഭിരമിക്കുന്ന മതേതരഭാരതത്തിനുവേണ്ടി അല്‍പവസ്ത്രവും ഊന്നുവടിയുമായി ഗ്രാമഗ്രാമാന്തരങ്ങളിലൂടെ ഓടിനടന്ന ഒരു മഹാമനീഷിയെ നമുക്കിപ്പോള്‍ മറക്കാതിരിക്കാം.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

2 days ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.