Video Stories

പുതുഭാരതത്തിന്റെ മാഗ്നാകാര്‍ട്ട

Published

6 years ago

April 4, 2019

രാഷ്ട്രത്തിന്റെ സ്വാതന്ത്ര്യലബ്ധിക്കും മതേതരത്വത്തിനും അവിച്ഛിന്നമാര്‍ന്ന അഭ്യുന്നതിക്കും അടിത്തറയും വ്യാപ്തിയും അഗാധത്വവും നല്‍കിയ ഇന്ത്യന്‍ നാഷണല്‍ കോണ്‍ഗ്രസ് ഒരിക്കല്‍കൂടി രാജ്യത്തെ പതിത കോടികളുടെ ശരണമന്ത്രമായി മാറിയിരിക്കുന്നു. പതിനേഴാം ലോക്‌സഭാതെരഞ്ഞെടുപ്പിനുള്ള പ്രകടനപത്രിക പുറത്തിറക്കി കോണ്‍ഗ്രസിന്റെ സമുന്നതരായ നേതാക്കള്‍ ചൊവ്വാഴ്ച നടത്തിയ വാഗ്ദാനങ്ങള്‍ രാജ്യത്തിന്റെ ഭാവി കോണ്‍ഗ്രസ് നേതൃത്വം നല്‍കുന്ന മതേതര പ്രസ്ഥാനത്തിന്റെ കൈകളില്‍ സുരക്ഷിതമായിരിക്കുമെന്ന് അസന്നിഗ്ധമായി വിളംബരപ്പെടുത്തുന്നതാണ്. പാര്‍ട്ടി അധ്യക്ഷന്‍ രാഹുല്‍ഗാന്ധിയും യു.പി.എ അധ്യക്ഷ സോണിയാഗാന്ധിയും മുന്‍പ്രധാനമന്ത്രി ഡോ. മന്‍മോഹന്‍സിങും പ്രവര്‍ത്തക സമിതിയംഗങ്ങളായ എ.കെ ആന്റണി, പി. ചിദംബരം, കെ.സി വേണുഗോപാല്‍ എന്നിവരും ചേര്‍ന്ന് ജനസമക്ഷം സമര്‍പ്പിച്ച പ്രകടനപത്രിക കേശാദിപാദം പരിശോധിക്കുമ്പോള്‍ ഇന്ത്യയുടെ ശോഭനമായ ഭാവിയുടെ ‘മാഗ്നാകാര്‍ട്ട’ യായി വിശേഷിപ്പിക്കപ്പെടാന്‍ പോന്നതാണ്. പ്രകടനപത്രികയിലെ ഓരോ വാഗ്ദാനങ്ങളും പിന്നീട് മാറ്റിപ്പറയാന്‍ കഴിയാത്തവിധം ഉറപ്പുള്ളതാണെന്ന് വ്യക്തമാക്കുന്നതാണ് പത്രികയുടെ മുഖപുറത്തുതന്നെ വ്യക്തമാക്കുന്നതുപോലെ കോണ്‍ഗ്രസ് നടപ്പാക്കും (കോണ്‍ഗ്രസ് വില്‍ ഡെലിവര്‍) എന്ന വാചകം. ഇന്നത്തെ കേന്ദ്ര സര്‍ക്കാരിന്റെ തുടര്‍ച്ചയായ വാഗ്ദാന ലംഘനങ്ങള്‍ വിസ്മരിക്കാത്ത ഓരോ ഇന്ത്യന്‍ പൗരനും ഒരിക്കല്‍പോലും വാക്കുമാറുകയോ ജനങ്ങളെ വഞ്ചിക്കുകയോ ചെയ്യാത്ത ഒരു പ്രസ്ഥാനമാണ് ഈ വാഗ്ദാനങ്ങള്‍ നല്‍കുന്നതെന്നതുകൂടി അടിവരയിട്ട് വായിക്കുകയാണ്.
അടുത്ത അഞ്ചു വര്‍ഷത്തേക്കുള്ള പ്രകടനപത്രികയിലെ സുപ്രധാന ഇനം കാര്‍ഷിക ജനതയോട് കാട്ടിയിരിക്കുന്ന പ്രത്യേക പരിഗണനതന്നെ. കര്‍ഷകരെയും പാവങ്ങളെയും സഹായിക്കുന്നതോടെ ഇന്ന് രാജ്യവും ആ വിഭാഗവും അനുഭവിച്ചുകൊണ്ടിരിക്കുന്ന യാതനകള്‍ക്ക് പരമാവധി സഹായകമാകും. ഇന്ത്യാചരിത്രത്തിലാദ്യമായി കാര്‍ഷിക മേഖലക്കായി പ്രത്യേകബജറ്റ് എന്നതാണ് സുപ്രധാനമായ വാദ്ഗാനം. അറുപത് ശതമാനത്തോളം കാര്‍ഷിക ഗ്രാമീണ മേഖലയുള്ള രാജ്യത്തെ കാര്‍ഷികത്തകര്‍ച്ചയുടെ ഈ പതിതകാലത്ത് ഇതിനെ ചരിത്രപരമെന്നല്ലാതെ എങ്ങനെയാണ് വിശേഷിപ്പിക്കാനാകുക. കാര്‍ഷിക മേഖലയുടെ പുനരുത്ഥാനത്തിന് കാര്‍ഷിക കടങ്ങള്‍ എഴുതിത്തള്ളുമെന്ന പ്രഖ്യാപനവും മറ്റൊരു നാഴികക്കല്ലാണ്. രാജ്യത്തെ കര്‍ഷക സമൂഹം വര്‍ഷങ്ങളായി ആവശ്യപ്പെട്ടുവരുന്നതാണ് ഇത്. മുസ്്‌ലിംലീഗിന്റെ പോഷക സംഘടനയായ സ്വതന്ത്ര കര്‍ഷക സംഘം മുമ്പ് യു.പി.എ സര്‍ക്കാരിന് നല്‍കിയ പത്തു ലക്ഷത്തിലധികം പേരുടെ നിവേദനത്തില്‍ ആവശ്യപ്പെട്ട ഒന്നാണ് കാര്‍ഷിക ബജറ്റും കാര്‍ഷിക വായ്പയുടെ എഴുതിത്തള്ളലും.
രാജ്യത്തെ 25 കോടി പേര്‍ക്ക് ഉതകുന്ന വര്‍ഷം 72000 രൂപയുടെ വരുമാന പദ്ധതിയാണ് മറ്റൊന്ന്. ന്യായ് എന്ന പേരില്‍ ഇതിനകം തന്നെ ചര്‍ച്ചാവിഷയമായ പദ്ധതിയാണിത്. വിദഗ്ധരുമായി കൂടിയാലോചിച്ച ശേഷം ആവിഷ്‌കരിച്ച ന്യായ് പദ്ധതി മുമ്പത്തെ യു.പി.എ സര്‍ക്കാരിലെ തൊഴിലുറപ്പു പദ്ധതിക്ക് സമാനമാണ്. അഞ്ചു കോടി നിര്‍ധന കുടുംബങ്ങള്‍ക്ക് അവരുടെ കുടുംബ നാഥയുടെ ബാങ്ക് അക്കൗണ്ടില്‍ പണം വരുന്ന രീതിയിലാണ് ശാസ്ത്രീയമായി പദ്ധതി ആസൂത്രണം ചെയ്തിരിക്കുന്നത്. ദേശീയ തൊഴിലുറപ്പു പദ്ധതിയിലെ തൊഴില്‍ ദിനങ്ങള്‍ വര്‍ഷം 100 എന്നത് 150 ആക്കുന്നതും ദാരിദ്ര്യം തുടച്ചുനീക്കാന്‍ സഹായകമാകുമെന്നതില്‍ തര്‍ക്കമില്ല. അടുത്ത പാര്‍ലമെന്റ് സമ്മേളനത്തില്‍ തന്നെ കൊണ്ടുവരുന്ന 33 ശതമാനം സ്ത്രീ സംവരണമാണ് രാജ്യ ചരിത്രത്തില്‍ നാഴികക്കല്ലാകുന്ന വനിതാസംവരണ ബില്‍. പാര്‍ലമെന്റിലും സംസ്ഥാന നിയമസഭകളിലും സര്‍ക്കാര്‍ സര്‍വീസുകളിലും 33 ശതമാനം സ്ത്രീകളെ പ്രവേശിപ്പിക്കുന്ന കിടിലന്‍ നിര്‍ദേശമാണിത്. രണ്ടു പതിറ്റാണ്ടായി രാജ്യം ചര്‍ച്ച ചെയ്യുകയും പല കാരണങ്ങളാല്‍ മാറ്റിവെക്കപ്പെട്ടതുമായ പദ്ധതി സ്ത്രീകളുടെയും കുട്ടികളുടെയും സുരക്ഷാപിഴവുകള്‍ ദിനേന കേള്‍ക്കുന്ന സമൂഹ വ്യവസ്ഥിതിയെ തന്നെ മാറ്റിമറിക്കുമെന്നതില്‍ തര്‍ക്കമില്ല. സ്ത്രീകള്‍ക്കെതിരായ കുറ്റകൃത്യങ്ങള്‍ അന്വേഷിക്കുന്നതിനുള്ള പ്രത്യേക അന്വേഷണ കമ്മീഷനും കൂറുമാറ്റ നിയമം കര്‍ശനമാക്കുന്നതും വലിയ പ്രതീക്ഷയാണ് സമൂഹത്തിലുളവാക്കുന്നത്. വിദ്യാഭ്യാസത്തിന് മൊത്തആഭ്യന്തര ഉല്‍പാദനത്തിന്റെ ആറിലൊരംശം നീക്കിവെക്കുമെന്ന പ്രഖ്യാപനവും രാജ്യത്ത് പുത്തന്‍ കാല്‍വെയ്പാണ്. നിലവില്‍ ഇത് രണ്ടു ശതമാനത്തിലും താഴെയാണ്. പ്രതിവര്‍ഷം 34 ലക്ഷം യുവാക്കള്‍ക്ക് തൊഴില്‍ നല്‍കുമെന്നതിലെ യാഥാര്‍ത്ഥ്യബോധം അനുകരണീയമാണ്. പ്രതിവര്‍ഷം രണ്ടു കോടി പേര്‍ക്ക് തൊഴില്‍ നല്‍കുമെന്ന് പറഞ്ഞ ബി.ജെ.പി സര്‍ക്കാര്‍ ലക്ഷക്കണക്കിന് പേരുടെ തൊഴില്‍ നഷ്ടപ്പെടുത്തിയെന്നത് നോക്കുമ്പോള്‍ ഇത് പ്രശംസാര്‍ഹമാണ്. രാജ്യത്ത് സംഭവിച്ചുകൊണ്ടിരിക്കുന്ന ആള്‍ക്കൂട്ട കൊലപാതകങ്ങള്‍ക്കും വ്യാജ ഏറ്റുമുട്ടലുകള്‍ക്കുമെതിരെ പ്രത്യേക നിയമനിര്‍മാണം കൊണ്ടുവരുമെന്നതിനെയും നിസ്സാരമായി കാണാന്‍ കഴിയില്ല. പശുവിന്റെയും ബീഫിന്റെയും പേരില്‍ നൂറോളം പേരാണ് രാജ്യത്ത് പട്ടാപ്പകല്‍ തെരുവുകളില്‍ മരിച്ചുവീണത്. സുപ്രീംകോടതി പോലും ഇടപെട്ടിട്ടും അതിന് ശമനമില്ലാതിരുന്നത് സര്‍ക്കാരിന്റെ പരോക്ഷ സഹായം മൂലമായിരുന്നു. മനുഷ്യാവകാശ പ്രവര്‍ത്തകരുടെ ഏറെക്കാലത്തെ ആവശ്യങ്ങളിലൊന്നാണ് രാജ്യത്ത് പലസംസ്ഥാനങ്ങളിലും സുരക്ഷാസേനകള്‍ ദുരുപയോഗപ്പെടുത്തിക്കൊണ്ടിരിക്കുന്ന പ്രത്രേ്യകാവകാശനിയമം-അഫ്‌സ്പ- പിന്‍വലിക്കണമെന്നത്. അക്കാര്യത്തിലും അനുകൂലമായ നിലപാടാണ് പത്രികയിലുള്ളത്. ചരക്കുസേവനനികുതിയുടെ അഞ്ചുതട്ട് സമ്പ്രദായം ഒഴിവാക്കി നികുതി ഭാരം ലളിതമാക്കുമെന്ന പ്രഖ്യാപനവും ജനങ്ങളോടുള്ള കോണ്‍ഗ്രസിന്റെ സത്യസന്ധമായ പ്രതിബദ്ധത ബോധ്യപ്പെടുത്തുന്നതാണ്. സമകാല മുതലാളിത്ത കാലത്ത് ചൈനയോടും അമേരിക്കയോടും മറ്റും തോളോടുതോള്‍ മല്‍സരിക്കാനുതകുന്ന പദ്ധതികളുടേതാണ് കോണ്‍ഗ്രസിന്റെ പ്രകടനപത്രിക എന്ന കാര്യത്തില്‍ സംശയമില്ല.
പ്രകടനപത്രിക പുറത്തിറങ്ങിയയുടന്‍ കേന്ദ്രമന്ത്രി അരുണ്‍ജെയ്റ്റ്‌ലി ഇതിലെ നിര്‍ദേശങ്ങള്‍ക്കെതിരെ രംഗത്തുവന്നതുതന്നെ ബി.ജെ.പിയുടെ വെപ്രാളം വെളിപ്പെടുത്തുന്നതാണ്. എന്തൊക്കെ പരിഭവങ്ങളും പരാതികളുമുണ്ടെങ്കിലും ഇപ്പോഴും രാജ്യത്ത് അവശേഷിക്കുന്ന എല്ലാ സുപ്രധാന പദ്ധതികളും നിയമനിര്‍മാണങ്ങളും കോണ്‍ഗ്രസ് -നേതൃത്വ സര്‍ക്കാരുകളുടെ അറുപതിലധികം കൊല്ലത്തെ ഭരണ നേട്ടങ്ങളാണ്. വിവരാവകാശം, വനാവകാശം, തൊഴിലുറപ്പ് തുടങ്ങിയ നിയമങ്ങള്‍, ദേശീയപാര്‍പ്പിട പദ്ധതി, തദ്ദേശ സ്ഥാപനങ്ങളിലെ സ്ത്രീസംവരണം, വന്‍കിട വ്യവസായങ്ങള്‍, അണക്കെട്ടുകള്‍, ഡിജിറ്റല്‍ സാങ്കേതികവിദ്യ തുടങ്ങിയവക്കെല്ലാം രാജ്യം കടപ്പെട്ടിരിക്കുന്ന പ്രസ്ഥാനമാണിത്. പുതിയ വാഗ്ദാനപ്പെരുമഴയെ അതുകൊണ്ടുതന്നെ അവിശ്വസിക്കാന്‍ ഒരുനിലക്കും മാര്‍ഗം കാണുന്നില്ല.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

2 days ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.