Video Stories

ആശങ്കപ്പെടേണ്ട ഭാവി

Published

6 years ago

September 13, 2018

മാറ്റത്തിന് മാറ്റമില്ലെന്നും എല്ലാ ചരാചരങ്ങളെയുംപോലെ പ്രപഞ്ചവും നാശോന്മുഖമാണെന്നും ശാസ്ത്രവും മതങ്ങളും ഏതാണ്ടൊരേ സ്വരത്തില്‍ വിളിച്ചുപറഞ്ഞിട്ടുണ്ട്. അത് ശരിവെക്കുംവണ്ണം അടുത്തകാലത്തായി ഭൗമാന്തരീക്ഷ താപനിലയില്‍ കാര്യമായ വര്‍ധനയുണ്ടാകുന്നതായി ശാസ്ത്രവും അനുഭവവും മനുഷ്യരെ ഇതിനകം ഓര്‍മപ്പെടുത്തിക്കഴിഞ്ഞു. ഭൂഖണ്ഡാന്തര ഭേദമില്ലാതെ ഇന്ത്യയിലും അമേരിക്കയിലും ആഫ്രിക്കയിലും തെക്കേ അമേരിക്കയിലും ആസ്‌ത്രേലിയയിലും കാലാവസ്ഥാവ്യതിയാനം മൂലമുണ്ടായിക്കൊണ്ടിരിക്കുന്ന പ്രളയവും കൊടും വരള്‍ച്ചയും മനുഷ്യകുലത്തെയാകെ ആത്മാര്‍ത്ഥമായ തിരിച്ചറിവുകള്‍ക്കും കൂലങ്കഷമായ പുനരാലോചനകള്‍ക്കും നിര്‍ബന്ധിതമാക്കുന്നുണ്ട്. അടുത്ത അഞ്ചുവര്‍ഷത്തിനകം താപനില 1.5 ഡിഗ്രി സെല്‍ഷ്യസ് വര്‍ധിക്കുമെന്ന പാരിസ് ഉച്ചകോടിയുടെ വിലയിരുത്തല്‍ മറികടക്കുമെന്നാണ് പുതിയ റിപ്പോര്‍ട്ട്. ആഗോളതാപനം വലിയ വെല്ലുവിളി ഉയര്‍ത്തിക്കൊണ്ടിരിക്കുന്നുവെന്ന് രാജ്യങ്ങളെല്ലാം ഏകസ്വരത്തില്‍ സമ്മതിക്കുമ്പോള്‍ തന്നെയാണ് അതിന് കാരണമാകുന്ന പരിസ്ഥിതിവിരുദ്ധവും വ്യാവസായികവുമായ ഹരിത ഗൃഹവാതകങ്ങളുടെയും കാര്‍ബണ്‍ അവശിഷ്ടങ്ങളുടെയും വ്യാപനത്തിനെതിരെ കാര്യമായി ഒന്നും ചെയ്യാന്‍ നമുക്കാവുന്നില്ലെന്ന നഗ്ന യാഥാര്‍ഥ്യം.
കേരളത്തില്‍ ഇക്കഴിഞ്ഞ ജൂലൈയിലും ആഗസ്റ്റിലുമായി ആഞ്ഞടിച്ച പ്രളയത്തിന്റെ കെടുതികള്‍ വിവരണാതീതമാണ്. 2000 മില്ലിമീറ്ററിന്റെ സ്ഥാനത്ത് അതിന്റെ ഇരട്ടിയോളമാണ് മഴ പെയ്തത്. അതുപോലെതന്നെ ഭയപ്പെടുത്തുന്നതാണ് കഴിഞ്ഞുപോയതും വരാനിരിക്കുന്നതുമായ വരള്‍ച്ചയുടെ ഘട്ടവും. പ്രളയത്തിന്‌ശേഷം വെറും പത്തു ദിവസത്തിനകം കേരളത്തിലെ പുഴകളില്‍ പതിനഞ്ചടിയോളം വെള്ളം താഴ്ന്നിരിക്കുന്നുവെന്നും ഭാരതപ്പുഴ പോലുള്ളവയില്‍ ചെറുനീര്‍ചാലുപോലും പൊടുന്നനെ അപ്രത്യക്ഷമാകുന്നു എന്നൊക്കെയുള്ള വിവരങ്ങള്‍ ഭാവിയുടെ നേര്‍ക്കുള്ള വ്യക്തമായ ചൂണ്ടുപലകയാണ്. പാലക്കാട് ജില്ലയില്‍ ഇന്നലെ വേനല്‍ കാലത്തിന് സമാനമായ 35 ഡിഗ്രിസെല്‍ഷ്യസ് ചൂടാണ് രേഖപ്പെടുത്തിയത്. കടുത്ത കുടിവെള്ളക്ഷാമവും കൃഷിനാശവുമാണ് ഇതുമൂലം വരുംനാളുകളില്‍ നേരിടേണ്ടിവരിക. കഴിഞ്ഞ പത്തു കൊല്ലത്തിനകം ആഗോളതാപ നിലയില്‍ ഒരുഡിഗ്രി ചൂട് വര്‍ധിച്ചതായാണ് പഠനങ്ങള്‍ പറയുന്നത്. ഈ പശ്ചാത്തലത്തിലാണ് വരള്‍ച്ചമൂലം കൊടിയ ദാരിദ്ര്യം വരാനിരിക്കുന്നു എന്ന് സൂചിപ്പിച്ചുകൊണ്ട് ഐക്യരാഷ്ട്രസഭ ചൊവ്വാഴ്ച വാര്‍ഷിക റിപ്പോര്‍ട്ട് പുറത്തുവിട്ടിരിക്കുന്നത്. കാലാവസ്ഥാവ്യതിയാനത്തെപ്പറ്റി സംസാരിക്കുമ്പോള്‍ യു.എന്‍ സെക്രട്ടറി ജനറല്‍ ആന്റോണിയോ ഗുട്ടറസ് കഴിഞ്ഞദിവസം കേരളത്തെ പരാമര്‍ശിച്ചതും ഇത്തരുണത്തില്‍ ശ്രദ്ധേയമാണ്.
ലോക ഭക്ഷ്യ സംഘടനയായ ഡബ്ലിയു.എഫ്.പിയുടെ റിപ്പോര്‍ട്ടില്‍ വരള്‍ച്ചകാരണം ദരിദ്രരുടെ സംഖ്യ കഴിഞ്ഞ വര്‍ഷങ്ങളില്‍ വര്‍ധിച്ചതായി വെളിപ്പെടുത്തുന്നു. 2016ല്‍ 80.4 കോടിയായിരുന്ന ദരിദ്രരുടെ എണ്ണം 2017 ആയപ്പോഴേക്ക് 81.7 കോടിയായതായാണ് ഐക്യരാഷ്ട്ര ഏജന്‍സികള്‍ വെളിപ്പെടുത്തിയിരിക്കുന്നത്. ഒറ്റവര്‍ഷം കൊണ്ട് 1.30 കോടി ആളുകള്‍ കൂടുതലായി ദരിദ്രരുടെ പട്ടികയിലേക്ക് മാറ്റപ്പെട്ടുവെന്നര്‍ത്ഥം. വരള്‍ച്ചയും പ്രളയവുംമൂലം ഉണ്ടാകുന്ന കൃഷിനാശവും തന്മൂലമുണ്ടാകുന്ന ഭക്ഷ്യക്ഷാമവുമാണ് ദരിദ്രരുടെ തോത് വര്‍ധിക്കാന്‍ കാരണമായത്. പ്രധാനമായും തെക്കേ അമേരിക്കയിലും ആഫ്രിക്കയിലുമാണ് ദരിദ്രരുടെ സംഖ്യവര്‍ധിക്കുന്നതെങ്കിലും ഇന്ത്യ ഉള്‍പ്പെടെയുള്ള ഏഷ്യന്‍ രാജ്യങ്ങളിലും കൃഷിനാശവും പോഷകാഹാരക്കുറവും മൂലമുള്ള പ്രശ്‌നങ്ങള്‍ വര്‍ധിച്ചുവരികയാണത്രെ. കഴിഞ്ഞ മൂന്നു വര്‍ഷംകൊണ്ടാണ് വരള്‍ച്ചയുടെ തോത് കൂടിയതും കൃഷിനാശം വ്യാപകമായതുമെന്ന് റിപ്പോര്‍ട്ട് പറയുന്നു. അടുത്ത മുപ്പതു വര്‍ഷംകൊണ്ട് ലോക ജനസംഖ്യ 750 കോടിയില്‍നിന്ന് ആയിരം കോടിയിലെത്തുമെന്നും അത് വലിയ ദുരന്തത്തിലേക്ക് ഭൂമിയെ വലിച്ചിഴക്കുമെന്നുമാണ് പഠനം ചൂണ്ടിക്കാട്ടുന്നത്. അപ്പോഴേക്ക് ലണ്ടനിലെയും പാരിസിലെയും വാഷിംഗ്ടണിലെയും ജനങ്ങള്‍ക്കുകൂടി ആവശ്യത്തിന് ഭക്ഷണം കിട്ടാതാകുമെന്നും റിപ്പോര്‍ട്ട് പ്രവചിക്കുന്നുണ്ട്. കഴിഞ്ഞവര്‍ഷം ഐക്യരാഷ്ട്രസഭ പുറത്തുവിട്ട മറ്റൊരു കണക്കില്‍ പതിറ്റാണ്ടിലാദ്യമായി ദരിദ്രരുടെ സംഖ്യ വര്‍ധിച്ചതായി വെളിപ്പെടുത്തിയിരുന്നു. 2015ല്‍ 77.7 കോടി ആളുകളാണ് മതിയായ പോഷകാഹാരം കിട്ടാത്ത ദരിദ്രരുടെ ഗണത്തില്‍പെട്ടതെങ്കില്‍ അതില്‍നിന്ന് എത്രയോ കൂടുതലാണ് ഇപ്പോഴത്തെ അവസ്ഥ.
കാലാവസ്ഥാവ്യതിയാനം മാത്രമല്ല ഭക്ഷണത്തിനായി ഉണ്ടാകുന്ന കലാപങ്ങളും ദരിദ്രരുടെ സംഖ്യ വര്‍ധിക്കാനിടയാക്കുന്നതായാണ് യു.എന്‍ ചൂണ്ടിക്കാട്ടുന്നത്. ഇന്ത്യയില്‍ ദരിദ്രരുടെ സംഖ്യ സ്വാതന്ത്ര്യാനന്തരം കുറച്ചുകൊണ്ടുവന്നെങ്കിലും കൂടുതല്‍ പേര്‍ ദാരിദ്ര്യരേഖക്ക് കീഴിലേക്ക് മാറ്റപ്പെടുന്നതായാണ് അടുത്ത കാലത്തായി കണ്ടുവരുന്ന പ്രവണത. വ്യവസായികള്‍ക്കും സമ്പന്നര്‍ക്കും അധികാരികള്‍ വാരിക്കോരി പണവും സൗകര്യവും ചൊരിയുമ്പോള്‍ ദരിദ്രര്‍ കൂടുതല്‍ ദാരിദ്ര്യത്തിലേക്ക് വഴുതിവീഴുന്നുവെന്നാണ് ചൂണ്ടിക്കാട്ടപ്പെടുന്നത്. പക്ഷേ കണക്കുകള്‍ പരിശോധിക്കുമ്പോള്‍ രാജ്യം വളര്‍ച്ച നേടുന്നതായി കാണാന്‍ കഴിയുന്ന ഗ്രാഫിക് വിദ്യകളാകും ഭരണകൂടം പൊതുജനത്തിന്റെ മുമ്പില്‍ വെക്കുക. ഉദാഹരണത്തിന് നോട്ടു നിരോധനവും ചരക്കുസേവനനികുതിയും മൂലം കഴിഞ്ഞ രണ്ടു വര്‍ഷംകൊണ്ട് ലക്ഷക്കണക്കിന് ചെറുകിട കര്‍ഷകരുടെയും സാധാരണക്കാരുടെയും പാവങ്ങളുടെയും തൊഴിലും വരുമാനവും നിഷേധിക്കപ്പെട്ടപ്പോള്‍ രാജ്യം എട്ടു ശതമാനം വളര്‍ച്ച നേടിയതായാണ് കഴിഞ്ഞയാഴ്ച ഇന്ത്യാസര്‍ക്കാര്‍ പുറത്തുവിട്ടകണക്ക് പറയുന്നത്. ഇതിന് കാരണം സമ്പന്നരുടെയും പാവപ്പെട്ടവരുടെയും വരുമാനത്തിലെ ശരാശരി എടുത്താണ് ദേശീയ ശരാശരി വളര്‍ച്ച കണക്കാക്കുന്നത് എന്നതിനാലാണ്. പാവപ്പെട്ടവര്‍ വീണ്ടും പാവപ്പെട്ടവരായിക്കൊണ്ടിരിക്കുകയും സമ്പന്നര്‍ അതിസമ്പന്നരായിക്കൊണ്ടിരിക്കുകയുമാണെന്ന് കേന്ദ്ര സര്‍ക്കാരിന്റെതന്നെ കണക്കുകള്‍ തെളിവുതരുന്നുണ്ട്.
അതോടൊപ്പം തന്നെ ദരിദ്രര്‍ക്ക് നിഷേധിക്കപ്പെടുന്നത് വെറും സമ്പത്തുമാത്രല്ല എന്നിടത്താണ് വിഷയത്തിന്റെ ഗൗരവം കുടിയിരിക്കുന്നത്. സാര്‍വത്രികമായ പോഷകാഹാരം, അടിസ്ഥാന സൗകര്യം, വിദ്യാഭ്യാസം, തൊഴില്‍, ജനാധിപത്യാവകാശങ്ങള്‍ തുടങ്ങിയവയൊക്കെ ദാരിദ്ര്യം കാരണം ഇക്കൂട്ടര്‍ക്ക് നിഷേധിക്കപ്പെടുന്നു. ഇവിടെയാണ് സര്‍ക്കാരുകളുടെയും ജനാധിപത്യ സംവിധാനങ്ങളുടെയും കൈത്താങ്ങ് ഈ ജനവിഭാഗങ്ങളിലേക്ക്കൂടി എത്തേണ്ട ആവശ്യകത ബോധ്യപ്പെടുന്നത്. ആഗോളതാപനം കുറച്ചുകൊണ്ടുവരുന്നതിനും ദാരിദ്ര്യം ലഘൂകരിക്കുന്നതിനും 1990 മുതല്‍ ലോക രാഷ്ട്രങ്ങള്‍ ഒറ്റക്കെട്ടായി തീരുമാനം എടുത്തിട്ടുണ്ടെങ്കിലും അമേരിക്ക പോലുള്ള സമ്പന്ന രാഷ്ട്രങ്ങള്‍ വികസ്വര രാജ്യങ്ങളുടെമേല്‍ കുതിരകയറുന്ന നടപടികളാണ് സ്വീകരിച്ചുവരുന്നത്. ഇതിനു പരിഹാരം പൊതുജനാവബോധം കൂട്ടുകയും ഇന്ത്യയുള്‍പ്പെടെയുള്ള വികസ്വര രാജ്യങ്ങള്‍ അവികസിത രാജ്യങ്ങളുടെ സഹകരണത്തോടെ ശക്തമായ പാരിസ്ഥിതിക ഇടപെടലുകള്‍ നടത്തുകയുമാണ്.

india

ടിബറ്റിലുണ്ടായ ഭൂചലനം മരണസംഖ്യ 120 കടന്നു

7.1 രേഖപ്പെടുത്തിയ അതിശക്തമായ ഭൂചലനത്തിന്റെ ഉത്ഭവ കേന്ദ്രം നേപ്പാള്‍-ടിബറ്റ് അതിര്‍ത്തിയില്‍ ലൊബുചെയില്‍നിന്നു 93 കിലോമീറ്റര്‍ വടക്കുകിഴക്കാണ്

Published

2 days ago

January 8, 2025

webdesk18

ലാസ: ടിബറ്റിലുണ്ടായ ഭൂചലനത്തില്‍ 126 പേര്‍ മരിച്ചതായും 200ലധികം പേര്‍ക്ക് പരിക്കേല്‍ക്കുകയും ചെയ്‌തെന്ന് ചൈനീസ് സ്റ്റേറ്റ് മീഡിയ. 7.1 രേഖപ്പെടുത്തിയ അതിശക്തമായ ഭൂചലനത്തിന്റെ ഉത്ഭവ കേന്ദ്രം നേപ്പാള്‍-ടിബറ്റ് അതിര്‍ത്തിയില്‍ ലൊബുചെയില്‍നിന്നു 93 കിലോമീറ്റര്‍ വടക്കുകിഴക്കാണ്.

ടിബറ്റിലെ തീര്‍ഥാടന കേന്ദ്രമായ ഷിഗാറ്റ്സെ നഗരത്തില്‍ നിരവധി കെട്ടിടങ്ങള്‍ തകര്‍ന്നു വീണു. ഉത്തരേന്ത്യയുടെ പലഭാഗങ്ങളിലും നേപ്പാളിലും ഭൂചലനത്തിന്റെ പ്രകമ്പനം അനുഭവപ്പെട്ടു. 2023 ഡിസംബറിലുണ്ടായ ഭൂചലനത്തിന് ശേഷം രാജ്യത്ത് ഉണ്ടായ ഏറ്റവും വലിയ ഭൂകമ്പമാണിത്. രക്ഷാപ്രവര്‍ത്തനത്തിനും ദുരിതബാധിതരെ പുനരധിവസിപ്പിക്കുന്നതിനും സര്‍വസന്നാഹങ്ങളും സജ്ജമാണെന്ന് ചൈനീസ് പ്രസിഡന്റ് ഷി ജിന്‍പിങ് അറിയിച്ചു.

ഇന്നലെ രാവിലെയാണ് ടിബറ്റില്‍ ആറ് ഭൂചലനങ്ങള്‍ അനുഭവപ്പെട്ടത്. ഡല്‍ഹിയിലും ഉത്തരേന്ത്യയുടെ വിവിധ ഭാഗങ്ങളിലും ബീഹാറിന്റെ തലസ്ഥാനമായ പട്നയിലും സംസ്ഥാനത്തിന്റെ വടക്കന്‍ ഭാഗത്തെ നിരവധി സ്ഥലങ്ങളിലും ശക്തമായ ഭൂചലനം അനുഭവപ്പെട്ടു. പശ്ചിമ ബംഗാളിലും അസം ഉള്‍പ്പെടെയുള്ള വടക്കുകിഴക്കന്‍ സംസ്ഥാനങ്ങളിലും ഇതിന്റെ പ്രകമ്പനം ഉണ്ടായി.

kerala

കെഎഫ്സി അഴിമതി; സര്‍ക്കാരിനോട് ചോദ്യങ്ങളുമായി പ്രതിപക്ഷ നേതാവ് വി.ഡി സതീശന്‍

അനില്‍ അംബാനിയുടെ കമ്പനികള്‍ സാമ്പത്തികമായി തകര്‍ന്നു കൊണ്ടിരിക്കുന്ന കാലത്ത് ആര്‍സിഎഫ്എല്ലില്‍ കേരള ഫിനാന്‍ഷ്യല്‍ കോര്‍പറേഷന്‍ 60.80 കോടി രൂപ നിക്ഷേപിച്ച് സംസ്ഥാന ഖജനാവിന് 101 കോടി രൂപയുടെ നഷ്ടമാണ് ഇതുവരെ ഉണ്ടാക്കിയത്.

Published

5 days ago

January 5, 2025

webdesk13

കെഎഫ്സിക്കെതിരായ 60 കോടിയുടെ അഴിമതി ആരോപണത്തില്‍ സര്‍ക്കാരിനോട് ചോദ്യങ്ങളുമായി പ്രതിപക്ഷ നേതാവ് വി.ഡി സതീശന്‍. അനില്‍ അംബാനിയുടെ കമ്പനികള്‍ സാമ്പത്തികമായി തകര്‍ന്നു കൊണ്ടിരിക്കുന്ന കാലത്ത് ആര്‍സിഎഫ്എല്ലില്‍ കേരള ഫിനാന്‍ഷ്യല്‍ കോര്‍പറേഷന്‍ 60.80 കോടി രൂപ നിക്ഷേപിച്ച് സംസ്ഥാന ഖജനാവിന് 101 കോടി രൂപയുടെ നഷ്ടമാണ് ഇതുവരെ ഉണ്ടാക്കിയത്.

കെഎഫ്സി പണം നിക്ഷേപിച്ച് സംസ്ഥാനത്തിന് നഷ്ടമുണ്ടാക്കിയതിനു പിന്നില്‍ വന്‍ അഴിമതി നടന്നിട്ടുണ്ട്. ഈ സാഹചര്യത്തില്‍ ഇതുമായി ബന്ധപ്പെട്ട് അഞ്ച് ചോദ്യങ്ങള്‍ ഉന്നയിക്കുകയാണ്. ഈ ചോദ്യങ്ങള്‍ക്ക് സര്‍ക്കാര്‍ മറുപടി നല്‍കിയേ മതിയാകൂവെന്ന് വി ഡി സതീശന്‍ പറഞ്ഞു.

റിലയന്‍സ് കോമേഴ്‌സ്യല്‍ ഫിനാന്‍സ് ലിമിറ്റഡില്‍ കെഎഫ്‌സി 60 കോടി 80 ലക്ഷം രൂപ നിക്ഷേപിച്ചുവെന്നാണ് പ്രതിപക്ഷ നേതാവിന്റെ ആരോപണം. 2018ലാണ് പണം നിക്ഷേപിച്ചത്. 2015 മുതല്‍ അനില്‍ അംബാനിയുടെ ആര്‍സിഎഫ്എല്‍ സാമ്പത്തിക പ്രതിസന്ധി നേരിടുന്ന പശ്ചാത്തലത്തിലായിരുന്നു കെഎഫ്‌സി നിക്ഷേപം നടത്തിയത്. 2019ല്‍ ആര്‍സിഎഫ്എല്‍ പൂട്ടി.

ഇതോടെ കെഎഫ്‌സിയ്ക്ക് തിരിച്ച് കിട്ടിയത് 7 കോടി 9ലക്ഷം രൂപമാത്രമാണെന്നും പലിശ അടക്കം തിരിച്ച് കിട്ടേണ്ടിയിരുന്നത് 101 കോടി രൂപയായിരുന്നുവെന്നും പ്രതിപക്ഷ നേതാവ് ആരോപിച്ചിരുന്നു. പിന്നാലെയാണ് സര്‍ക്കാരിനോട് അഞ്ച് ചോദ്യങ്ങളുമായി വി ഡി സതീശന്‍ രംഗത്തെത്തുന്നത്.

പ്രതിപക്ഷ നേതാവ് ഉന്നയിച്ച ചോദ്യങ്ങള്‍

സ്റ്റേറ്റ് ഫിനാന്‍ഷ്യല്‍ കോര്‍പ്പറേഷന്‍ ആക്ടിലെ സെക്ഷന്‍ 34 പ്രകാരം കെ.എഫ്.സി നടത്തുന്ന നിക്ഷേപങ്ങള്‍ ബോര്‍ഡ് തീരുമാനത്തിന്റെ അടിസ്ഥാനത്തിലായിരിക്കണം എന്നിരിക്കെ സാമ്പത്തികമായി തകര്‍ന്നു കൊണ്ടിരുന്ന അനില്‍ അംബാനിയുടെ റിലയന്‍സ് ഗ്രൂപ്പില്‍ കെഎഫ്സി നടത്തിയ നിക്ഷേപം ബോര്‍ഡ് തീരുമാനത്തിന്റെ അടിസ്ഥാനത്തില്‍ ആയിരുന്നോ?
റിലയന്‍സില്‍ (ആര്‍സിഎഫ്എല്‍) കെഎഫ്സി നിക്ഷേപം നടത്തുന്നതിന് മുന്‍പ് ആര്‍സിഎഫ്എല്ലിന്റെ മാതൃ സ്ഥാപനമായ റിലയന്‍സ് ക്യാപിറ്റല്‍ ലിമിറ്റിഡിന്റെയും സഹോദര സ്ഥാപനമായ റിലയന്‍സ് കമ്മ്യൂണിക്കേഷന്‍സിന്റെയും സാമ്പത്തിക സ്ഥിതിയും സാമ്പത്തിക ബാധ്യതകളും പരിശോധിച്ചിരുന്നോ ?
അനില്‍ അംബാനിയുടെ റിലയന്‍സ് ഗ്രൂപ്പില്‍ കെഎഫ്സി 60.80 കോടി രൂപ നിക്ഷേപിക്കുമ്പോള്‍ റിലയന്‍സ് ഗ്രൂപ്പിന് രാജ്യത്തെ വിവിധ ബാങ്കുകളില്‍ 50000 കോടിയുടെ ബാധ്യത ഉണ്ടെന്ന വസ്തുത വിവിധ മാധ്യമങ്ങളില്‍ വാര്‍ത്ത ആയിട്ടും കെഎഫ്സിയും സര്‍ക്കാരും അറിഞ്ഞില്ലേ?
കെയര്‍(CARE) എന്ന റേറ്റിംഗ് ഏജന്‍സി ആര്‍സിഎഫ്എല്ലിനെയും സഹോദര സ്ഥാപനങ്ങളെയും കുറിച്ച് നല്‍കിയ റിപ്പോര്‍ട്ടില്‍ ‘Credit watch with developing implications’ എന്ന ആശങ്ക രേഖപ്പെടുത്തിയത് കെഎഫ്സി പരിഗണിക്കാതിരുന്നത് എന്തുകൊണ്ടാണെന്ന് വ്യക്തമാക്കാമോ?
അനില്‍ അംബാനിയുടെ ആര്‍.സി.എഫ്.എല്‍ എന്ന സ്ഥാപനത്തില്‍ കെ.എഫ്.സി നടത്തിയ നിക്ഷേപത്തെ കുറിച്ച് 2018 ലെയും, 2019 ലെയും കെ.എഫ്.സി വാര്‍ഷിക റിപ്പോര്‍ട്ടുകളില്‍ മറച്ചുവച്ചതിന്റെ കാരണം വിശദമാക്കാമോ? ഇതു സംബന്ധിച്ച് നിയമസഭയില്‍ മുന്‍പ് രണ്ടു തവണ ചോദ്യം വന്നിട്ടും ഇതുവരെ മറുപടി നല്‍കാതിരുന്നത് എന്തുകൊണ്ടാണ്?

kerala

മുക്കിയവരും മുങ്ങിയവരും

സി.പി.എം നേതാക്കളുടെ വഴിവിട്ട നീക്കം വഴി ആകെ പൊളിഞ്ഞ് പാളീസായ അനില്‍ അംബാനിയുടെ സ്ഥാപനത്തില്‍ പണം നിക്ഷേപിക്കുകയും അതുവഴി സര്‍ക്കാര്‍ ഉടമ സ്ഥതയിലുള്ള കെ.എഫ്.സിക്ക് 100 കോടിയോളം രൂപ നഷ്ടമായതും വാര്‍ത്തകളില്‍ നിറഞ്ഞതോടെ പഴയ ധനമന്ത്രിയും പുതിയ ധനമന്ത്രിയും ന്യായീകരിച്ച് തേയുകയാണ്.

Published

5 days ago

January 5, 2025

webdesk13

കേരളത്തില്‍ സി.പി.എമ്മുകാര്‍ അവരുടെ ആസ്ഥാന ബുദ്ധി ജീവിയാക്കി വെച്ചിരുന്ന പഴയ ധനമന്ത്രി കയറു പിരി ശാസ്ത്രജ്ഞന്‍ പറയുന്നതത്രയും അബദ്ധമായിരുന്നെന്ന് മലയാളികള്‍ മുമ്പേ അനുഭവത്തില്‍ പഠിച്ചതായിരുന്നു. അതിപ്പോള്‍ കിഫ്ബിയാണെങ്കിലും മസാല ബോണ്ടാണെങ്കിലും ഡാമില്‍ നിന്നും മണലൂറ്റുന്നതാണെങ്കിലും ലാഭത്തേക്കാളും നഷ്ടക്കച്ചവടം മാത്രമാണ് പറയാനുള്ളത്. ഇപ്പോള്‍ ഇതുപോലൊരു അനുഭവമാണ് കെ.എഫ്.സിയുടെ കാര്യത്തിലും പുറത്തു വരുന്നത്. സി.പി.എം നേതാക്കളുടെ വഴിവിട്ട നീക്കം വഴി ആകെ പൊളിഞ്ഞ് പാളീസായ അനില്‍ അംബാനിയുടെ സ്ഥാപനത്തില്‍ പണം നിക്ഷേപിക്കുകയും അതുവഴി സര്‍ക്കാര്‍ ഉടമ സ്ഥതയിലുള്ള കെ.എഫ്.സിക്ക് 100 കോടിയോളം രൂപ നഷ്ടമായതും വാര്‍ത്തകളില്‍ നിറഞ്ഞതോടെ പഴയ ധനമന്ത്രിയും പുതിയ ധനമന്ത്രിയും ന്യായീകരിച്ച് തേയുകയാണ്.

അനില്‍ അംബാനിയുടെ സ്ഥാപനത്തില്‍ പണം നിക്ഷേപിച്ച ശേഷമാണ് ബോര്‍ഡ് യോഗത്തില്‍ പോലും ഇക്കാര്യം അവതരിപ്പിച്ചത്. സുതാര്യത അല്ലാതെന്ത് പറയാന്‍. സി.പി.എം വനിതാ നേതാവിന്റെ മകന്‍ നടത്തിയ ഈ നീക്കത്തിന് സര്‍ക്കാരിന്റെ പിന്തുണയും ഉണ്ടായിരുന്നു. അംബാനിക്കെതിരെയെന്ന് വിരവാദം പറയുമ്പോഴും അംബാനിയെ സഹായിക്കാനായി സി.പി.എമ്മും അംബാനിക്കമ്പനിയുമായുള്ള അന്തര്‍ധാര സജീവമായിരുന്നുവെന്ന് വേണം കരുതാന്‍. ഒരു വശത്തു അംബാനിയെ ചീത്ത വിളിക്കും. മോദിയുടെ ആളാണെന്നും പറഞ്ഞ്. മറുവശത്തു അംബാനിക്ക് എല്ലാ സഹായങ്ങളും ചെയ്യും. അതാണെടാ സി.പി.എം. നിക്ഷേപം നടത്തിയ ശേഷമാണ് ഇക്കാര്യം കെ.എഫ്.സി ബോര്‍ഡ് പോലും അംഗീകരിച്ചത്. അത്ര നിഷ്‌കളങ്കമായിരുന്നില്ല കെ.എഫ്.സിയിലെ ഇടപാട്. ഇതിലൂടെ ഖജനാവിന് നഷ്ടമായത് നൂറു കോടി രൂപയാണ്.

ന്യായീകരണം എന്ന വാക്ക് തന്നെ കണ്ടെത്തിയത് തനിക്ക് വേണ്ടിയാണെന്ന് പലവുരു തെളിയിച്ച മുന്‍ ധനമന്ത്രി ഐസക് സഖാവും നിലവിലെ ധനമന്ത്രി ബാലഗോപാലും അനില്‍ അംബാനിയുടെ സ്ഥാപനത്തില്‍ കെ.എഫ്.സി നടത്തിയ നിക്ഷേപം നിയമപരമാണെന്നാണ് വാദിക്കുന്നത്. എല്ലാ തട്ടിപ്പുകളും ചമക്കുന്ന പതിവ് ന്യായം ധനമന്ത്രി ബാലഗോപാല്‍ ഇത്തവണയും ചുമന്നിട്ടുണ്ട്. ബിസിനസില്‍ ലാഭവും നഷ്ടവും ഉണ്ടാകാം. നിക്ഷേപിക്കുന്ന സമയം ഉയര്‍ന്ന റേറ്റിംഗില്‍ ആയിരുന്നു ആര്‍.സി.എഫ്.എല്‍. യെസ് ബാങ്ക്, കാനറാ ബാങ്ക്, നബാര്‍ഡ്, യൂണിയന്‍ ബാങ്ക് തുടങ്ങി മുന്‍ നിര സ്ഥാപനങ്ങള്‍ 8000 കോടിയോളം നിക്ഷേപം നടത്തിയ കമ്പനിയാണ് റിലയന്‍സ് കമ്പനിയെന്നാണ് ബാലഗോപാല്‍ പറയുന്നത്. ഈ ബാങ്കുകള്‍ വിജയ് മല്യ മുതല്‍ സകല ഉഡായിപ്പുകള്‍ക്കും വായ്പയും നല്‍കിയിരുന്നെന്ന കാര്യം ബാല ഗോപാല്‍ അറിഞ്ഞോ ആവോ?. 60 കോടി നിക്ഷേപിച്ചു, അ തില്‍ 8 കോടി രൂപ തിരിച്ചു കിട്ടി, ബാക്കി കിട്ടാനുള്ള ചര്‍ച്ച ഇപ്പോഴും നടക്കുന്നു, നഷ്ടമാണോ അല്ലെ എന്ന് ചര്‍ച്ച കഴിഞ്ഞാ ലേ അറിയൂ എന്നാണ് കയറുപിരി ശാസ്ത്രജ്ഞന്റെ തിയറി. എങ്ങനുണ്ട്. അരിയെത്ര എന്ന ചോദ്യത്തിന് പയര്‍ അഞ്ഞാഴി എന്ന പതിവ് പരിപാടി തന്നെ.

2018 ഏപ്രില്‍ 16നാണ് റിലയന്‍സ് കമ്പനിയില്‍ കെ.എഫ്.സി നിക്ഷേപം നടത്തിയത്. അതേസമയം 2018 വര്‍ഷത്തെ ആദ്യ ബോര്‍ഡ് മീറ്റിങ് നടന്നത് ജൂണ്‍ 18നാണെന്ന് കെ.എഫ്.സി. വാര്‍ഷിക റിപ്പോര്‍ട്ടില്‍ വ്യക്തവുമാണ്. ബോര്‍ഡിന്റെ അംഗീകാരം പോലും ഇല്ലാതെയാണ് റിലയന്‍സ് കമ്പനിയില്‍ നിക്ഷേപം നടത്തിയതെന്ന് ഇതില്‍നിന്ന് പകല്‍ പോലെ വ്യക്തം. എന്തിനാണ് അറുപത് കോടിയിലധികം ബോര്‍ഡ് അനുമതിയില്ലാതെ പൊളിഞ്ഞ് പാളീസായ അംബാനിയുടെ കമ്പനിയില്‍ നിക്ഷേപിച്ചത് എന്നതാണ് ഉയരുന്ന ചോദ്യം. ഇതിന് സര്‍ക്കാര്‍ ഉയര്‍ത്തുന്ന വാദമാകട്ടെ റിലയന്‍സ് കമ്പനിക്ക് റേറ്റിങ് ഉണ്ടായിരുന്നു എന്നാണ്. എന്നാല്‍, മൂന്നു വര്‍ഷ ത്തെ ബാലന്‍സ് ഷീറ്റ് പോലും ആകുന്നതിനു മുന്‍പാണ്, മുങ്ങിക്കൊണ്ടിരിക്കുന്ന കമ്പനിയില്‍ കെ.എഫ്.സി. 60 കോടി 80 ലക്ഷം നിക്ഷേപിച്ചത്. ഇതിനു പിന്നില്‍ കമ്മിഷന്‍ മാത്രമായിരുന്നു ലക്ഷ്യമെന്ന് വ്യക്തമാണ്.

മന്ത്രിമാര്‍ പറയുന്നതുപോലെ ഇത്രയും സുതാര്യത ഉണ്ടായിരുന്നുവെങ്കില്‍ നിയമസഭയുടെ പതിനൊന്നാം സമ്മേളനത്തില്‍ ചോദ്യം നമ്പര്‍ 4398, 4400 ആയി കെ.എഫ്.സി.യുടെ റിലയന്‍സ് നിക്ഷേപ വിവരങ്ങള്‍ ചോദിച്ചിട്ടും ഇതുവരെ മറുപടി നല്‍കാത്തത് ഇതിലെ കള്ളക്കളി വ്യക്തമാക്കുന്നതാണ്. സംസ്ഥാനത്തെ സൂക്ഷ്മ ചെറുകിട ഇടത്തരം സ്ഥാപനങ്ങള്‍ അടക്കമുള്ള വ്യവസായങ്ങള്‍ക്കു വായ്പകള്‍ നല്‍കാനാണു കെ.എഫ്.സി രൂപീകരിച്ചത്. എന്നാല്‍ 2018 ഏപ്രില്‍ 26ന് അ നില്‍ അംബാനിയുടെ ആര്‍.സി.എഫ്.എല്‍ എന്ന സ്ഥാപനത്തില്‍ 60.80 കോടി രൂപ നിക്ഷേപിച്ചു. കെ.എഫ്.സിയുടെ ആസ്തി വായ്പാ പരിപാലന സമിതിയുടെ തീരുമാനപ്രകാരമാണ് നിക്ഷേപം നടത്തിയത്. എന്നാല്‍ 2018-19 ലെ വാര്‍ഷിക റിപ്പോര്‍ട്ടില്‍ നിക്ഷേപം നടത്തിയ സ്ഥാപനത്തിന്റെ പേര് മറച്ചു വച്ചു ബാങ്കില്‍ ടേം നിക്ഷേപം എന്നാണ് ചൂണ്ടിക്കാട്ടിയത്.

2019 -20ലെ ലെ വാര്‍ഷിക റിപ്പോര്‍ട്ടിലാണെങ്കില്‍ എന്‍.സി.ഡിയിലാണ് എന്നാണ് രേഖപ്പെടുത്തിയിരിക്കുന്നത്. നിയമപ്രകാരം റിസര്‍വ് ബാങ്കിലോ ദേശസാല്‍കൃത ബാങ്കിലോ മാത്രമേ പണം നിക്ഷേപിക്കാന്‍ പാടുള്ളു. ബോണ്ടിലുള്ള നിക്ഷേപം ആണെങ്കില്‍ അത് ബോര്‍ഡ് തീരുമാനത്തിന്റെ അടിസ്ഥാന ത്തില്‍ ആയിരിക്കണം. ഒരു ബാങ്കിങ് ഇതര സ്ഥാപനമായതു കൊണ്ടുതന്നെ നിയമപരമായി അംബാനിക്കമ്പനിയില്‍ കെ.എഫ്.സിക്ക് നിക്ഷേപിക്കാന്‍ സാധിക്കില്ല. വലിയ റേറ്റിങ്ങുണ്ടെന്ന് രണ്ട് പാര്‍ട്ടി ബുദ്ധിജീവികള്‍ അവകാശപ്പെടുന്ന കമ്പനിയായ ആര്‍.സി.എഫ്.എല്‍ കമ്പനി 2019ല്‍ പിരിച്ചുവിടപ്പെട്ടു. 2020 മാര്‍ച്ച് മുതല്‍ പലിശ പോലും ലഭിച്ചിട്ടില്ല. ആര്‍.സി.എഫ്.എല്‍. ലിക്വിഡേറ്റ് ചെയ്തപ്പോള്‍ 7.09 കോടി രൂപ ലഭിച്ചിട്ടുള്ളതായി 2020-21 ലെ വാര്‍ഷിക റിപ്പോര്‍ട്ടില്‍ രേഖപ്പെടുത്തി യിട്ടുണ്ട്. പലിശയുള്‍പ്പെടെ 101 കോടി രൂപ ഈ നിക്ഷേപത്തിലൂടെ നഷ്ടപ്പെട്ടു എന്നാണ് കണക്ക്. കെ.എഫ്.സിയിലെ ഇടത് സംഘടനാ നേതാക്കളും മാനേജ്മെന്റും സര്‍ക്കാരിന്റെ ഒത്താശയോടെ നടത്തിയത് പകല്‍ക്കൊള്ളയാണ്.