Video Stories

മതമില്ലാകണക്കല്ല,വേണ്ടത് വിശ്വാസികളുടെ മന:ശാന്തി

Published

7 years ago

March 30, 2018

ജാതിയും മതവും രേഖപ്പെടുത്താതെ സംസ്ഥാനത്തെ വിദ്യാലയങ്ങളില്‍ നടപ്പ് അധ്യയനവര്‍ഷം 1,23,630 കുട്ടികള്‍ പ്രവേശനം നേടിയതായി കേരളത്തിന്റെ വിദ്യാഭ്യാസ വകുപ്പുമന്ത്രി നിയമസഭയില്‍ രേഖാമൂലം അറിയിക്കുകയുണ്ടായി. വിവിധ വിദ്യാലയങ്ങളുടെ പേരുവെച്ച കണക്കുകള്‍ സഹിതമായിരുന്നു മന്ത്രിയുടെ ഈ ‘അഭിമാനകരമായ’ പ്രഖ്യാപനം. കേരളത്തില്‍ മതമില്ലാത്തവരും ജാതിയില്ലാത്തവരുമായി വളരുന്നവരുടെ എണ്ണം കൂടുന്നുവെന്ന് കാണിക്കലായിരുന്നു മന്ത്രിയുടെയും ഇടതുമുന്നണി സര്‍ക്കാരിന്റെയും ഈ കണക്കെടുപ്പിനുപിന്നിലെ ഗൂഢലക്ഷ്യം. ഇത്തരത്തിലൊരു വെളിപ്പെടുത്തലില്‍ പലരും അന്നുതന്നെ സംശയം പൂണ്ടിരുന്നു. ഇതിനിടെയാണ് പട്ടികയില്‍ ഉള്‍പ്പെടുന്ന വിദ്യാലയ അധികൃതര്‍ മന്ത്രി പറഞ്ഞ കണക്കുകള്‍ ശരിയല്ലെന്ന് സമൂഹത്തോട് വിളിച്ചുപറഞ്ഞത്. മതത്തിലും ജാതിയിലും ഉള്‍പ്പെടുന്ന നാട്ടിലെ പൗരന്മാരെ മത-ജാതിയില്ലാത്തവരെന്ന് മുദ്രകുത്തുകയായിരുന്നു ഭരണകൂടം. എങ്ങനെയാണ് വിദ്യാഭ്യാസ വകുപ്പിന് ഈ അധികാരം ലഭിച്ചത്. എന്തിനായിരുന്നു ഈ പൊറാട്ടുനാടകം?
ഇതര സംസ്ഥാനങ്ങളില്‍ നിന്ന് വ്യത്യസ്തമായി നമ്മുടെ സംസ്ഥാനത്ത് കമ്യൂണിസ്റ്റ് പാര്‍ട്ടി അംഗങ്ങളുടെ സംഖ്യ കൂടുതലാണെന്നാലും അവരെല്ലാം ദൈവമില്ലെന്ന് വിശ്വസിക്കുന്നവരും ജാതികോളം പൂരിപ്പിക്കാത്തവരുമാണെന്ന് ധരിക്കുന്നത് ശരിയല്ല. കമ്യൂണിസ്റ്റ്-നിരീശ്വരവാദ സംഘടനകളില്‍ വിശ്വസിക്കുന്നവരില്‍ ബഹുഭൂരിപക്ഷവും മതവിശ്വാസികളാണെന്നതാണ് യാഥാര്‍ഥ്യം. ഉന്നത കമ്യൂണിസ്റ്റ് നേതാക്കളുടെ കുടുംബാംഗങ്ങള്‍ മതാചാരങ്ങളില്‍ പങ്കെടുക്കാറുണ്ടെന്നതും പരസ്യമാണ്. മതത്തെയും ജാതിയെയും ഉപരിപ്ലവമായി വിമര്‍ശിക്കുന്ന കപടകമ്യൂണിസ്റ്റ്-നിരീശ്വരവാദികളെ നിക്ഷിപ്ത തല്‍പരരായ ഭിംക്ഷാംദേഹികളെന്നേ വിശേഷിപ്പിക്കാന്‍ കഴിയൂ. മതത്തെ എതിര്‍ക്കുകയല്ല, അതിനെയും അതിലെ ധാര്‍മികതയെയും നിലവിലെ പൊതു-രാഷ്ട്രീയ സാമൂഹിക ഘടനക്കകത്ത് പ്രതിഷ്ഠിച്ചുകൊണ്ടുമാത്രമേ മതനിരപേക്ഷത ഫലപ്രാപ്തിയിലെത്തിക്കാന്‍ കഴിയൂ. ഇന്ത്യയെ പോലുള്ള ബഹുമത സമൂഹത്തില്‍ വിശേഷിച്ചും. ഇന്ത്യാരാജ്യവും ഭരണഘടനയും അത്തരത്തിലുള്ള മതേതരത്വത്തെയാണ് അംഗീകരിക്കുന്നതും പ്രോല്‍സാഹിപ്പിക്കുന്നതും.
രാഷ്ട്രമഹാരഥന്മാര്‍ മതന്യൂനപക്ഷങ്ങള്‍ക്കും ജാതി-ഉപജാതികള്‍ക്കും സര്‍ക്കാര്‍ മേഖലയില്‍ തൊഴില്‍ സംവരണം ഭരണഘടനാപരമായിത്തന്നെ നിര്‍ബന്ധമാക്കിയത് മതവിശ്വാസവും ജാതീയതയും അതിലെ തീണ്ടാരങ്ങളും യാഥാര്‍ത്ഥ്യമാണെന്ന അടിയുറച്ച വിശ്വാസത്തിലായിരുന്നു. സഹസ്രാബ്ദങ്ങളായി ഉച്ചനീചത്വത്തിന്റെയും ചാതുര്‍വര്‍ണ്യത്തിന്റെയും കരാളകരങ്ങളില്‍പെട്ട് ശ്വാസംവിടാന്‍ പോലും കഴിയാതെവന്ന വലിയൊരു ജനതതിയോട് ചെയ്ത പശ്ചാത്താപമാണത്. പതിറ്റാണ്ടുകള്‍ പിന്നിട്ടിട്ടും കമ്യൂണിസ്റ്റുകള്‍ പക്ഷേ മതത്തെയും ജാതിയെയും അതിന്റെ യാഥാര്‍ഥ്യത്തില്‍നിന്ന് അടര്‍ത്തിമാറ്റി വര്‍ഗീയതയുടെ മേലങ്കി ചാര്‍ത്താനാണ് വൃഥാപരിശ്രമം നടത്തിയത്. മത വിശ്വാസികളുടെമേല്‍ കുതിരകയറുന്നതും അവരെ പഴയ നൂറ്റാണ്ടിന്റെ വക്താക്കളെന്ന് ആക്ഷേപിക്കുന്നതുമൊക്കെ സി.പി.എമ്മിന്റെ ശൈലിയാകുന്നതിന് കാരണം മറ്റൊന്നല്ല. സത്യത്തില്‍ മതത്തെ വിമര്‍ശിക്കുമ്പോള്‍ തന്നെ നിരീശ്വരതയെ സ്വയംമതമാക്കി പുന:പ്രതിഷ്ഠിക്കുകയാണ് അവര്‍ ചെയ്തുകൊണ്ടിരിക്കുന്നത്. മതമില്ലാത്തവരെന്നഹങ്കരിച്ചവര്‍ ലോകത്ത് കൊന്നു തള്ളിയവരുടെ എണ്ണമെത്രയാണ്! സ്റ്റാലിനും പോള്‍പോട്ടും മാവോയും എന്നുവേണ്ട, ജന്മിത്വവും മുതലാളിത്തവും ഇന്ത്യയിലെ നവഫാസിസവും ഇതുതന്നെയാണ് മറ്റൊരു രീതിയില്‍ ചെയ്തുകൊണ്ടിരിക്കുന്നത്. നാസിസത്തെയും ഫാസിസത്തെക്കാളുമധികം നിരപരാധികളെ കൊലചെയ്തതും മതവിരുദ്ധതയുടെ ഈ പ്രത്യയശാസ്ത്രക്കാരായിരുന്നു. മതവും ധാര്‍മികതയുമാണ് അവരുടെ ശത്രുക്കള്‍. ഇവര്‍ തമ്മില്‍ സന്ധിക്കുന്ന ബിന്ദുവിലാണ് മതവിരുദ്ധമായ ഏക സിവില്‍കോഡ് ആവശ്യവാദവും. ക്യാമറക്കുമുന്നില്‍ നിലവിളക്ക് കൊളുത്താനായി ഇടിച്ചുകൂടുന്നതും ഈ മതവിരുദ്ധര്‍ തന്നെ. ജ്വലിക്കുന്ന സൂര്യനെ പാഴ്മുറംകൊണ്ട് മറയക്കാന്‍ ശ്രമിക്കുന്നതുപോലെയാണ് പാഴായ കമ്യൂണിസ്റ്റാശയങ്ങളുടെ പിന്‍ഗാമികള്‍ ഇപ്പോള്‍ നടത്തിക്കൊണ്ടിരിക്കുന്ന മതവിരുദ്ധതയുടെ മസ്തിഷ്‌കപ്രക്ഷാളനം. ഇതൊന്നും വിശ്വസിക്കാന്‍ സ്വന്തം അണികളെപോലും കിട്ടുന്നില്ലെന്നതിനു തെളിവാണ് ശബരിമലയിലേക്കും മറ്റും പോകുന്ന സഖാക്കളുടെ സംഖ്യാവര്‍ധന. കിട്ടാത്ത മുന്തിരി പുളിക്കുമെന്നുപറഞ്ഞ പഴയ കുറുക്കന്റെ നിരാശാബോധമാണ് കമ്യൂണിസ്റ്റ് ഭരണക്കാരെക്കൊണ്ട് മതമില്ലാപട്ടിക ഉണ്ടാക്കിക്കുന്നതും മതന്യൂനപക്ഷങ്ങള്‍ക്കെതിരെ കുതിര കയറുന്നതും. ഇവരത്രെ വടക്കേന്ത്യയില്‍ ഗോവാദികളുടെ കൊലക്കത്തികള്‍ക്ക് ഇരയായിക്കൊണ്ടിരിക്കുന്നവരെ ഉയര്‍ത്തിക്കാട്ടി ബാലറ്റുപെട്ടിയിലെ വോട്ടെണ്ണം കൂട്ടാന്‍ മുതലയുടെ കണ്ണീര്‍കൗശലം പുറത്തെടുക്കുന്നതും. ഇത്തരം മതവിരുദ്ധരുടെ സ്വാഭാവിക പരിണാമമാണ് കേരളത്തിലെ മതവിശ്വാസികളോടുള്ള അവരുടെ സമീപനം.
ഇടതുപക്ഷ സര്‍ക്കാരുടെ കീഴില്‍ മതന്യൂനപക്ഷങ്ങള്‍ വിശിഷ്യാ മുസ്‌ലിംകള്‍ അനുഭവിച്ചുകൊണ്ടിരിക്കുന്ന പീഡനത്തെക്കുറിച്ച് കേരളത്തിലെ മുഴുവന്‍ മുസ്‌ലിം സംഘടനകളും ഒരേ മേശക്കുചുറ്റുമിരുന്ന് വേവലാതി പങ്കുവെക്കാന്‍ മുന്നോട്ടുവന്നത് ഈ സാഹചര്യത്തില്‍ ആലോചനാമൃതമാണ്. സാധാരണവിശ്വാസിയെ മാത്രമല്ല, മുസ്‌ലിം മതപണ്ഡിതരെപോലും പള്ളിയിലെയും മത സദസ്സുകളിലെയും പ്രഭാഷണങ്ങളുടെയും അവരുടെ പാഠപുസ്തകങ്ങളുടെയും പേരില്‍ കല്ലറക്കുള്ളിലിടുക, ഭരണഘടന ഉറപ്പുപറയുന്ന സാമൂഹിക സംവരണം ഒരൊറ്റ രാത്രികൊണ്ട് ചര്‍ച്ചയേതും കൂടാതെ എടുത്തുമാറ്റി സാമ്പത്തിക സംവരണം നടപ്പിലാക്കുക, മുസ്‌ലിം പള്ളികളുമായി ബന്ധപ്പെട്ട വഖഫ്‌ബോര്‍ഡിലെ നിയമനം പി.എസ്.സിക്ക് വിടുക, മതപ്രബോധനം നടത്തുന്നവരെ ആര്‍.എസ്.എസ്സുകാരുടെ ഒത്താശയോടെ ജയിലിലാക്കുക, ഇഷ്ടമുള്ള മതത്തില്‍ വിശ്വസിക്കാന്‍ തീരുമാനിച്ചവരെ ആര്‍.എസ്.എസ്സിനെയും പൊലീസിനെയും വിട്ട് നിരന്തരം പീഡിപ്പിക്കുക, തല്ലിക്കൊന്ന് പ്രതികളെ രക്ഷപ്പെടാന്‍ അനുവദിക്കുക എന്നിത്യാദി പീഡനമുറകളാണ് ഇടതുമുന്നണി സര്‍ക്കാരില്‍നിന്ന് കേരളത്തിലെ മുസ്‌ലിംമതവിശ്വാസികള്‍ ഏറ്റുവാങ്ങിക്കൊണ്ടിരിക്കുന്നത്. അറബി-ഉര്‍ദുഭാഷാ പഠനം തടയാന്‍ സി.പി.എം സര്‍ക്കാര്‍ മുമ്പിറക്കിയ ഉത്തരവിനെതിരെ പ്രതിഷേധിച്ചതിന്റെ പേരില്‍ മൂന്നുചെറുപ്പക്കാരെ വെടിവെച്ചുകൊന്ന ഭരണക്കാരുടെ പിന്മുറക്കാരാണ് ഇപ്പോഴത്തെ പിണറായി വിജയനും കൂട്ടുകാരുമെന്നത് മറക്കാനാവില്ല. ജനാധിപത്യഭരണത്തില്‍ ഭരണീയരുടെ തൃപ്തിയും സൈ്വര്യവുമാണ് ഭരണത്തലപ്പത്തിരിക്കുന്നവരുടെ ലക്ഷ്യമാകേണ്ടത്. അതിനാണ് പൊതുജനം അവര്‍ക്ക് ചെലവ് നല്‍കുന്നത്. എന്നാല്‍ ഇവിടെ മതവിശ്വാസികളെയും എതിരാശയക്കാരെയും തലക്കടിച്ചുകൊല്ലാനും അതിന് കൂട്ടുനില്‍ക്കാനും ഒരുഭരണകൂടം തന്നെ തയ്യാറാകുന്നിടത്താണ് കോഴിക്കോട്ട് ബുധനാഴ്ചയുയര്‍ന്നുകേട്ട വിശ്വാസികളുടെ വിലാപം. തരാതരംപോലെ പകല്‍ ചുവപ്പും രാത്രി കാവിയും എടുത്തണിയുന്നവര്‍ ഭരണചക്രങ്ങള്‍ തിരിക്കുമ്പോള്‍ ഏറ്റവും ജനസംഖ്യയുള്ളതും സ്വച്ഛസുന്ദരവുമായ മലപ്പുറത്തിന്റെ മുഖത്തുനോക്കി വര്‍ഗീയതയുടെ ഉള്ളടക്കമാണതെന്ന് വിളിച്ചുകൂവാന്‍ തോന്നിയ മന്ദമന്ത്രിയുടെ സര്‍ക്കാരിന്റെ പള്ളനിറയെ കാളകൂടവര്‍ഗീയതയാണെന്ന് തിരിച്ചറിയാന്‍ മതവിശ്വാസികള്‍ക്കും കഴിയുമെന്നുകൂടി സവിനയം ഉണര്‍ത്തട്ടെ.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

1 day ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.