കോഴിക്കോട്: ലഹരി ഉപയോഗവും ലഹരി മാഫിയ സംഘങ്ങളുടെ തേരോട്ടവും വര്‍ധിച്ചു വരുന്ന വര്‍ത്തമാന സാഹചര്യത്തില്‍ ഭരണകൂടം ഇത്തരക്കാരെ പ്രതിരോധിക്കാന്‍ മുന്നോട്ടു വരണമെന്നാവശ്യപെട്ട് മുസ്‌ലിം
യൂത്ത് ലീഗ് സംസ്ഥാന കമ്മിറ്റി ആഹ്വാനപ്രകാരം കോഴിക്കോട് ജില്ലാ കമ്മിറ്റയുടെ നേതൃത്വതില്‍ നാളെ (ശനിയാഴ്ച) രാത്രി കോഴിക്കോട് ബീച്ചില്‍ നൈറ്റ് അലേര്‍ട്ട് സംഘടിപ്പിക്കും. രാത്രി 10 മണിക്ക് കോഴിക്കോട് ലീഗ് ഹൗസ് പരിസരത്ത് നിന്ന് ആരംഭിക്കുന്ന യൂത്ത് റാലിയോടെയാണ് നൈറ്റ് അലെര്‍ട്ടിന് തുടക്കമാവുക. മുസ്‌ലിം
യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങള്‍, ജനറല്‍ സെക്രട്ടറി പി.കെ ഫിറോസ്, വിവിധ സാമൂഹ്യ, രാഷ്ട്രീയ, മത, സാംസ്‌കാരിക നേതാക്കള്‍ സംബന്ധിക്കും.

ക്യാമ്പസുകളും തെരുവുകളും ലഹരി മാഫിയ കീഴടക്കിയ സാഹചര്യത്തിലാണ് ഇപ്പോള്‍ കേരളമുള്ളത്. ഇതുമൂലമുണ്ടാകുന്ന മഹാ അക്രമങ്ങളെയും കൊലപാതകങ്ങളെയും കണ്ടില്ലെന്ന് നടിക്കുന്ന അധികാരികളുടെ ഉറക്കം കെടുത്താനും തിരുത്തലാക്കാനും വേണ്ടിയാണ് ഇത്തരം സമരങ്ങള്‍ സംഘടിപ്പിക്കുന്നത്. പുതിയ നിയമ നിര്‍മ്മാണം നടത്തി കേരളത്തെ രക്ഷിക്കാന്‍ സര്‍ക്കാര്‍ മുന്നിട്ടിറങ്ങണം. കേരളത്തിലെ രാഷ്ട്രീയ ഭേദമന്യേ എല്ലാവരും പിന്തുണ പ്രഖ്യാപിച്ചിട്ടും ലഹരി മാഫിയക്കെതിരെ നടപടി സ്വീകരിക്കാന്‍ സര്‍ക്കാര്‍ മടി കാണിക്കുന്നത് എന്തുകൊണ്ടെന്ന് മനസ്സിലാകുന്നില്ല. ഇത്തരം നിലപാട് തുടര്‍ന്നാല്‍ ശക്തമായ സമരപരിപാടികളുമായി മുസ്‌ലിം
യൂത്ത് ലീഗ് രംഗത്തുണ്ടാകും.
ഇത് സംബന്ധമായി ചേര്‍ന്ന ഭാരവാഹികളുടെ യോഗത്തില്‍ ജില്ല പ്രസിഡന്റ് മിസ്ഹബ് കീഴരിയൂര്‍ അധ്യക്ഷത വഹിച്ചു. ജനറല്‍ സെക്രട്ടറി ടി മൊയ്തീന്‍ കോയ സ്വാഗതവും ട്രഷറര്‍ കെ.എം.എ റഷീദ് നന്ദിയും പറഞ്ഞു. ഭാരവാഹികളായ സി ജാഫര്‍ സാദിഖ്, എ ഷിജിത്ത് ഖാന്‍, സയ്യിദലി തങ്ങള്‍, ഷഫീക്ക് അരക്കിണര്‍, എസ്.വി ഷൗലീക്ക്, ഒ.എം നൗഷാദ്, എം ടി സൈദ് ഫസല്‍, വി അബ്ദുല്‍ ജലീല്‍, ഹാരിസ് കൊത്തിക്കുടി, എം പി ഷാജഹാന്‍, കെ പി സുനീര്‍, സിറാജ് ചിറ്റേടത്ത്, ശുഐബ് കുന്നത്ത്, സമദ് നടേരി ചര്‍ച്ചയില്‍ പങ്കെടുത്തു.

വെഞ്ഞാറമൂട് കൂട്ടക്കൊലപാതക്കേസില്‍ പ്രതി അഫാനെ കൊല്ലപ്പെട്ട സല്‍മാ ബീവിയുടെ വീട്ടിലെത്തിച്ച് തെളിവെടുപ്പ് നടത്തി. കനത്ത സുരക്ഷയിലാണ് പാങ്ങോടുള്ള വീട്ടിലെത്തിച്ച് തെളിവെടുപ്പ് നടത്തിയത്.

പിതൃമാതാവായ സല്‍മാബീവിയെ കൊലപ്പെടുത്തിയ കേസുമായി ബന്ധപ്പട്ട് അഫാനെ മൂന്ന് ദിവസത്തേക്ക് പാങ്ങോട് പൊലീസിന്റെ കസ്റ്റഡിയില്‍ വിട്ടിരുന്നു. ഇവരുടെ ആഭരണങ്ങള്‍ പണയംവെച്ച വെഞ്ഞാറമൂടിലുള്ള ധനകാര്യ സ്ഥാപനത്തിലും അഫാനെ എത്തിച്ച് പൊലീസ് തെളിവെടുപ്പ് നടത്തും. അതിന് ശേഷം മറ്റ് നാല് പേരെ കൊലപ്പെടുത്തിയ കേസിലെ നടപടിക്രമങ്ങള്‍ ആരംഭിക്കാനാണ് തീരുമാനം. വെഞ്ഞാറമൂട്, പാലോട് പൊലീസ് സ്റ്റേഷനുകളുടെ പരിധിയിലാണ് കൊലപാതകങ്ങള്‍ നടന്നത്. പ്രതി കൊല്ലാന്‍ ഉപയോഗിച്ച ചുറ്റിക വാങ്ങിയ കടയിലും തെളിവെടുപ്പ് നടത്തും.

വെള്ളിയാഴ്ച രാവിലെ ആറരയോടെ അഫാന്‍ വെഞ്ഞാറമൂട് പൊലീസ് സ്റ്റേഷനിലെ ശുചിമുറിയില്‍ തല കറങ്ങി വീണിരുന്നു. രക്തസമ്മര്‍ദം കുറഞ്ഞതാണെന്ന് ഡോക്ടര്‍മാര്‍ അറിയിച്ചു. ജയിലില്‍ കഴിഞ്ഞപ്പോള്‍ പ്രതി കൃത്യമായി ഉറങ്ങാറുണ്ടായിരുന്നില്ലെന്നും അസ്വസ്ഥത പ്രകടിപ്പിച്ചിച്ചിരുന്നെന്നും ജയില്‍ ഉദ്യോഗസ്ഥര്‍ അറിയിച്ചിരുന്നു. ആത്മഹത്യ ചെയ്യാനുള്ള സാധ്യതയെ മുന്‍നിര്‍ത്തി കനത്ത സുരക്ഷയിലായിരുന്നു അഫാനെ ജയിലില്‍ പാര്‍പ്പിച്ചത്.

പത്തനംതിട്ട മൈലാടുപാറയില്‍ 17 വയസുകാരി ബക്കറ്റ് കൊണ്ട് വീട്ടമ്മയുടെ തലയടിച്ചു പൊട്ടിച്ചെന്ന് പരാതി. പൈപ്പില്‍ നിന്ന് വെള്ളമെടുക്കുന്നതിനെ ചൊല്ലിയുള്ള തര്‍ക്കമാണ് അക്രമത്തില്‍ കലാശിച്ചത്. മൈലാട് പാറ സ്വദേശിനി രമയ്ക്കാണ് പരുക്കേറ്റത്.

പിന്നാലെ രമ പത്തനംതിട്ട ജനറല്‍ ആശുപത്രിയില്‍ ചികിത്സ തേടി. വെള്ളം പിടിക്കുന്നതിനിടയില്‍ പെണ്‍കുട്ടി ബക്കറ്റ് എടുത്തുമാറ്റി ആക്രമിച്ചുവെന്ന് വീട്ടമ്മ പറയുന്നു. ഇന്ന് ഉച്ചയ്ക്കാണ് സംഭവം നടന്നത്. പൊതു ടാപ്പിന്റെ സമീപത്തു വെച്ചാണ് അക്രമം നടന്നത്. തര്‍ക്കത്തിനിടെ രമയുടെ തലയില്‍ അടിയേല്‍ക്കുകയായിരുന്നു. തലയ്ക്ക് മൂന്ന് സ്റ്റിച്ചുകള്‍ ഉണ്ട്.

നിലവില്‍ പത്തനംതിട്ട ജനറല്‍ ആശുപത്രിയില്‍ ചികിത്സയിലാണ് ഇവര്‍. മുമ്പും പെണ്‍കുട്ടിയില്‍ നിന്നും മോശം അനുഭവം ഉണ്ടായതായി രമ വെളിപ്പെടുത്തി. പൊലീസില്‍ പരാതി നല്‍കിയിട്ടുണ്ട്.