മൈസൂരു: ഇന്‍ഷുറന്‍സ് തുക ലഭിക്കുന്നതിനായി മകന്‍ അച്ഛനെ തലക്കടിച്ച് കൊലപ്പെടുത്തി. മൈസൂരു പെരിയപട്ടണ കോപ്പയ്ക്കടുത്തുള്ള ജെരാസി കോളനിയില്‍ താമസിക്കുന്ന അണ്ണപ്പ (60) ആണ് മരിച്ചത്. സംഭവത്തില്‍ മകന്‍ പാണ്ഡു (32)വിനെ ബൈലകുപ്പെ പൊലീസ് അറസ്റ്റ് ചെയ്തു.

കര്‍ണ്ണാടകയിലെ മൈസൂരു പെരിയപട്ടണ കൊപ്പ ഗ്രാമത്തിലാണ് സംഭവം. അച്ഛനും മകനും ഒരുമിച്ചായിരുന്നു താമസം. അണ്ണപ്പയുടെ പേരിലുള്ള 30 ലക്ഷം രൂപയുടെ ഇന്‍ഷുറന്‍സ് തുക തട്ടിയെടുക്കാനാണ് പാണ്ഡു കൊല നടത്തിയതെന്ന് പൊലീസ് പറഞ്ഞു.

അച്ഛനെ കൊലപ്പെടുത്തിയ ശേഷം അപകടമരണമാക്കി മാറ്റാനായിരുന്നു മകന്റെ പദ്ധതിയെന്ന് പൊലീസ് പറഞ്ഞു. വ്യാഴാഴ്ച അച്ഛന്‍ വാഹനാപകടത്തില്‍ കൊല്ലപ്പെട്ടെന്ന് പാണ്ഡു ബൈലകുപ്പെ പൊലീസ് സ്‌റ്റേഷനില്‍ ഫോണ്‍ വിളിച്ച് അറിയിക്കുകയായിരുന്നു. പൊലീസെത്തി ഗുല്ലേഡല വനമേഖലയിലെ റോഡരികിലുള്ള അണ്ണപ്പയുടെ മ്യതദേഹം ആശുപത്രിയിലേക്ക് മാറ്റി. തുടര്‍ന്ന് പോസ്റ്റ് മോര്‍ട്ടത്തില്‍ അണ്ണപ്പയുടെ മരണം കൊലപാതകമാണെന്ന് തെളിയുകയായിരുന്നു.

കഴിഞ്ഞമാസമാണ് പാണ്ഡു അച്ഛന്റെ പേരില്‍ 15 ലക്ഷത്തിന്റെ ഇന്‍ഷുറന്‍സ് പോളിസിയെടുത്തത്. അപകടമരണം സംഭവിച്ചാല്‍ ഇരട്ടി നഷ്ടപരിഹാരം നല്‍കുന്ന വ്യവസ്ഥയും പോളിസിയിലുണ്ടായിരുന്നു. ഇതാണ് കൊലപാതകത്തിലേക്ക് നയിച്ചതെന്ന് പൊലീസ് പറഞ്ഞു. സംഭവത്തില്‍ വിശദമായ അന്വേഷണം നടക്കുകയാണെന്ന് പൊലീസ് അറിയിച്ചു.

വരുണ്‍ ധവാന്‍ നായകനായെത്തിയ ബേബി ജോണിന് പകരം ഉണ്ണി മുകുന്ദന്‍ ചിത്രം മാര്‍ക്കോ പ്രദര്‍ശിപ്പിച്ച് തിയേറ്ററുകള്‍. ടൈംസ് ഓഫ് ഇന്ത്യ ഉള്‍പ്പെടെയുള്ള ദേശീയ മാധ്യമങ്ങളാണ് വാര്‍ത്ത റിപ്പോര്‍ട്ട് ചെയ്യുന്നത്. വരുണ്‍ ധവാന്‍ ചിത്രം മോശം പ്രകടനം കാഴ്ചവെക്കുന്നു എന്നതിന്റെ അടിസ്ഥാനത്തിലാണ് തിയറ്ററുകളുടെ തീരുമാനമെന്നാണ് ടൈംസ് ഓഫ് ഇന്ത്യ റിപ്പോര്‍ട്ട്.

ചുരുക്കം തിയേറ്ററുകളില്‍ മാത്രമായിരുന്നു മാര്‍ക്കോയുടെ ഹിന്ദി പതിപ്പ് റിലീസായത്. എന്നാല്‍ പ്രേക്ഷകരുടെ പ്രതികരണത്തെ തുടര്‍ന്ന് രണ്ടാം വാരത്തില്‍ കൂടുതല്‍ തിയേറ്ററുകളില്‍ പ്രദര്‍ശനം വ്യാപിപ്പിക്കുകയായരുന്നു.

വരുണ്‍ ധവാന്‍ ചിത്രമായ ബേബി ജോണ്‍ ബോക്‌സ് ഓഫീസ് കളക്ഷനില്‍ ഏറെ പിന്നോട്ട് പോകുന്നുവെന്ന റിപ്പോര്‍ട്ടുകളാണ് പുറത്ത് വരുന്നത്. ആദ്യവാരം അവസാനിച്ചപ്പോള്‍ ഇന്ത്യയില്‍ 27.6 കോടി രൂപയാണ് ‘മാര്‍ക്കോ’ നേടിയത്. 8ാം ദിവസം 2.3 കോടിയും 9ാം ദിവസം 2.70 കോടിയും നേടിയതോടെ ചിത്രത്തിന്റെ രണ്ടാം ആഴ്ചയില്‍ വരുമാനംകുതിച്ചു, മൊത്തം കളക്ഷന്‍ ഏകദേശം 32.60 കോടി രൂപയായി.

ഗുജറാത്തിലെ സ്‌കൂളില്‍ വിതരണം ചെയ്ത റോബോട്ടിക്‌സ് കിറ്റിലെ ബാറ്ററി പൊട്ടിത്തെറിച്ച് എട്ടു വയസുകാരനു ഒരു കണ്ണ് പൂര്‍ണമായി നഷ്ടമാകുകയും ദേഹമാസകലം പൊള്ളലേല്‍ക്കുകയും ചെയ്തു. രണ്ടാം ക്ലാസ് വിദ്യാര്‍ഥിയായ വിരേന്ദ്രയ്ക്കാണ് അപകടത്തില്‍ കണ്ണു നഷ്ടമായത്.

കഴിഞ്ഞ വ്യാഴാഴ്ച വിരുപുര്‍ താലൂക്കിലെ സ്വകാര്യ സ്‌കൂളിലായിരുന്നു സംഭവം. സ്‌കൂളില്‍ നിന്ന് വിതരണം ചെയ്ത സ്റ്റഡി കിറ്റുമായി കളിക്കുമ്പോള്‍ പരീക്ഷണ കിറ്റിലുണ്ടായിരുന്ന ലിഥിയം ബാറ്ററി പൊട്ടിത്തെറിക്കുകയായിരുന്നു.

കണ്ണിനു ഗുരുതരമായി പരിക്കേല്‍ക്കുകയും ദേഹമാസകലം പൊള്ളലേല്‍ക്കുകയും ചെയ്ത കുട്ടിയെ ലുനാവാഡയിലെ ആശുപത്രിയില്‍ പ്രവേശിപ്പിച്ചു. തുടര്‍ന്ന് അഹ്മദാബാദിലെ ആശുപത്രിയിലേക്ക് മാറ്റി. ചികിത്സയിലിരിക്ക ശനിയാഴ്ചയാണു കുട്ടിയുടെ വലതുകണ്ണിന്റെ കാഴ്ചശക്തി നഷ്ടമായത്.

മകനെ സൈനികനാക്കാനായിരുന്നു ആഗ്രഹമെന്നും, ഇനി അതിന് സാധിക്കില്ലെന്നും പിതാവ് ഇന്ദ്രജിത് താക്കൂര്‍ മാധ്യമങ്ങളോട് പറഞ്ഞു. അനുവാദമില്ലാതെയാണ് കിറ്റുകള്‍ വിതരണം ചെയ്തതെങ്കില്‍ സ്‌കൂളിനെതിരെ നിയമനടപടി സ്വീകരിക്കുമെന്നും അദ്ദേഹം അറിയിച്ചു. സംഭവമുണ്ടായയുടന്‍ സ്‌കൂള്‍ അധികൃതര്‍ സ്ഥലത്തെത്തിയിരുന്നു.