മഞ്ചേശ്വരത്ത് കയര്‍ കട്ടയില്‍ നിര്‍ത്തിയിട്ട ടിപ്പര്‍ ലോറിക്കകത്ത് അവശനിലയില്‍ കണ്ടെത്തിയ യുവാവ് മരിച്ചു. ബായാര്‍ പദവ് ക്യാംക്കോ കോമ്പൗണ്ടിന് സമീപം താമസിക്കുന്ന അബ്ദുള്ള – സക്കീന ദമ്പതികളുടെ മകന്‍ മുഹമ്മദ് അഷീഫ് (29) ആണ് മരിച്ചത്. ഇയാളെ പൊലീസ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

പുലര്‍ച്ചെ രണ്ടു മണിയോടെ ഉപ്പളയില്‍ നിന്ന് ബന്ധു വിളിച്ചതിനെ തുടര്‍ന്ന് വാഹനവുമായി ഇറങ്ങിയതാണ് ഇയാള്‍. എന്നാല്‍ 3.20ഓടെ വഴിമധ്യേ കയര്‍ കട്ടയില്‍ ടിപ്പര്‍ ലോറിക്കകത്ത് അവശ നിലയില്‍ അഷീഫിനെ കണ്ടെത്തുകയായിരുന്നു. എന്നാല്‍ സമയമായിട്ടും കാണാത്തതിനെ തുടര്‍ന്ന് ഉപ്പളയില്‍ കാത്തുനിന്ന ബന്ധു തിരക്കി വന്നപ്പോഴാണ് കഇയാളെ അവശനിലയില്‍ കണ്ടെത്തിയത്.

പിന്നീട് ഹൈവേ പൊലീസും നാട്ടുകാരും ചേര്‍ന്ന് ബന്ദിയോട് സ്വകാര്യ ആശുപത്രിയിലും പിന്നീട് കുമ്പള ജില്ല സഹകരണ ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. ലോറിക്കകത്തു നിന്നും വടിക്കഷ്ണം കണ്ടെടുത്തിട്ടുണ്ട്. മാത്രമല്ല, വസ്ത്രത്തില്‍ രക്തക്കറയും ഇയാളുടെ ചെരുപ്പ് റോഡില്‍ കാണപ്പെട്ടതും മരണത്തില്‍ ദുരൂഹത സംശയിക്കുന്നു. പൊലീസ് അസ്വാഭാവിക മരണത്തിന് കേസെടുത്ത് അന്വേഷണം തുടങ്ങി.

ജയിലില്‍നിന്ന് ഇറങ്ങി വീണ്ടും വിവാദങ്ങളില്‍ ഇടംപിടിച്ച് ബോബി ചെമ്മണ്ണൂര്‍. ഹണി റോസിനെയും മറ്റ് സിനിമാ താരങ്ങളെയും ഉദ്ഘാടനങ്ങള്‍ക്കായി ഇനിയും വിളിക്കുമെന്ന് ബോബി ചെമ്മണൂര്‍ പറഞ്ഞു. തന്റെ ലക്ഷ്യം മാര്‍ക്കറ്റിംഗ് മാത്രമാണെന്ന് അദ്ദേഹം പറഞ്ഞു. ഇതേ കാര്യം സിനിമാ താരങ്ങളോടും തുറന്ന് പറയാറുണ്ടെന്നും ബോബി ചെമ്മണ്ണൂര്‍ വ്യക്തമാക്കി. അതേസമയം ഹണി റോസിന്റെ കേസിന് പിന്നില്‍ ഗൂഡാലോചനയുണ്ടാവില്ലെന്നും ഇത് തന്റെ ബിസിനസിനെ ഒരു തരത്തിലും ബാധിച്ചിട്ടില്ലെന്നും അദ്ദേഹം പറഞ്ഞു.

ജാമ്യാപേക്ഷ പരിഗണിച്ച കോടതിക്ക് മുമ്പാകെ ബോബി ചെമ്മണ്ണൂര്‍ മാപ്പ് പറഞ്ഞിരുന്നു. ഇതോടെ കേസിലെ തുടര്‍ നടപടികള്‍ കോടതി അവസാനിപ്പിക്കുകയായിരുന്നു.

ഹൈക്കോടതി ജാമ്യം അനുവദിച്ചിട്ടും ജാമ്യം നടപ്പാക്കേണ്ടതില്ലെന്ന് ബോബി ചെമ്മണ്ണൂര്‍ അഭിഭാഷകരെ അറിയിക്കുകയായിരുന്നു.

പെരിയ ഇരട്ടക്കൊല കേസില്‍ സി.ബി.ഐ വിധിക്കെതിരെ ഫേസ്ബുക്കില്‍ ഉള്‍പ്പെടെ പോസ്റ്റിട്ടെന്ന പരാതിയില്‍ സി.പി.എം ഉദുമ ഏരിയ സെക്രട്ടറി മധു മുതിയക്കാല്‍, ഉദുമ സ്വദേശി അഖില്‍ പുലിക്കോടന്‍ എന്നിവര്‍ക്കെതിരെ പൊലീസ് കേസെടുത്തു.

2019 ജുലൈ 17ന് കൊല്ലപ്പെട്ട ശരത് ലാല്‍, കൃപേഷ് എന്നിവരുടെ കേസില്‍ എറണാകുളം സി.ബി.ഐ കോടതി കഴിഞ്ഞ മാസം 28ന് വിധി പ്രസ്താവിച്ചതിനെതിരെ ഏരിയ സെക്രട്ടറി ഫേസ്ബുക്കിലൂടെയും അഖില്‍ വാട്‌സാപ്പിലൂടെയും മരിച്ചവരെ കുറിച്ച് അപകീര്‍ത്തിയുണ്ടാക്കുന്ന പോസ്റ്റ് ഇട്ടെന്നാണ് കേസ്.

കൊല്ലപ്പെട്ട ശരത് ലാലിന്റെ പിതാവ് കല്യോട്ടെ പി.കെ. സത്യനാരായണനും കൃപേഷിന്റെ പിതാവ് പി.വി. കൃഷ്ണനും നല്‍കിയ പരാതിയിലാണ് കേസ്. ഇരുവരും ജില്ല പൊലീസ് മേധാവിക്കാണ് പരാതി നല്‍കിയത്. പരാതിയില്‍ ബേക്കല്‍ പൊലീസ് ഹോസ്ദുര്‍ഗ് കോടതിയില്‍ റിപ്പോര്‍ട്ട് സമര്‍പ്പിക്കുകയും കോടതിയുടെ അനുമതിയോട് കൂടി ഏരിയ സെക്രട്ടറി അടക്കമുള്ളവര്‍ക്കെതിരെ കേസെടുക്കുകയുമായിരുന്നു.

കാസര്‍കോട് പെരിയയില്‍ രണ്ട് യൂത്ത് കോണ്‍ഗ്രസ് പ്രവര്‍ത്തകരെ കൊലപ്പെടുത്തിയ കേസില്‍ 10 പ്രതികള്‍ക്ക് ഇരട്ട ജീവപര്യന്തം തടവും രണ്ടുലക്ഷം രൂപ പിഴയുമാണ് പ്രത്യേക സി.ബി.ഐ കോടതി ശിക്ഷ വിധിച്ചത്. കൂടാതെ, മുന്‍ എം.എല്‍.എ അടക്കം കേസിലെ മറ്റ് നാല് പ്രതികള്‍ക്ക് അഞ്ച് വര്‍ഷം തടവും 10,000 രൂപ വീതം പിഴയും ജഡ്ജി എന്‍. ശേഷാദ്രിനാഥന്‍ വിധിച്ചു.

ഒന്നുമുതല്‍ എട്ടുവരെ പ്രതികളായ സി.പി.എം പാക്കം മുന്‍ ലോക്കല്‍ കമ്മിറ്റി അംഗം പെരിയ എച്ചിലടുക്കം എ. പീതാംബരന്‍, പീതാംബരന്റെ സഹായി പെരിയ എച്ചിലടുക്കം സൗര്യം തോട്ടത്തില്‍ സജി സി. ജോര്‍ജ്, എച്ചിലടുക്കം താന്നിത്തോട് വീട്ടില്‍ കെ.എം. സുരേഷ്, എച്ചിലടുക്കം കെ. അനില്‍കുമാര്‍, പെരിയ കല്ലിയോട്ട് വീട്ടില്‍ ജിജിന്‍, പെരിയ പ്ലാക്കത്തൊടിയില്‍ വീട്ടില്‍ ശ്രീരാഗ്, മലങ്കാട് വീട്ടില്‍ എ. അശ്വിന്‍, പുളിക്കല്‍ വീട്ടില്‍ സുബീഷ്, 10ഉം 15ഉം പ്രതികളായ താനത്തിങ്കല്‍ വീട്ടില്‍ രഞ്ജിത്, കള്ളിയോട്ട് വീട്ടില്‍ എ. സുരേന്ദ്രന്‍ എന്നിവരെയാണ് ഇരട്ട ജീവപര്യന്തത്തിന് ശിക്ഷിച്ചത്. കൊലപാതകം, ക്രിമിനല്‍ ഗൂഢാലോചന എന്നീ കുറ്റങ്ങള്‍ക്കാണ് ശിക്ഷ.

കേസിലെ 14, 20, 21, 22 പ്രതികളായ ഡി.വൈ.എഫ്.ഐ നേതാവ് മണികണ്ഠന്‍, ഉദുമ മുന്‍ എം.എല്‍.എ കെ.വി. കുഞ്ഞിരാമന്‍, പാക്കം കിഴക്കേ വീട്ടില്‍ രാഘവന്‍ വെളുത്തോളി, പാക്കം സ്വദേശി കെ.വി. ഭാസ്‌കരന്‍ എന്നിവരെയാണ് അഞ്ച് വര്‍ഷം കഠിന തടവിനും 10,000 രൂപ പിഴക്കും ശിക്ഷിച്ചത്. പിഴ സംഖ്യ അടച്ചില്ലെങ്കില്‍ ഒരു വര്‍ഷം കൂടി അധിക തടവ് അനുഭവിക്കണം. കെ.വി. കുഞ്ഞിരാമന്‍ അടക്കം നാലു പേരുടെ ശിക്ഷ ഹൈകോടതി താല്‍കാലികമായി മരവിപ്പിച്ചിട്ടുണ്ട്.

2019 ഫെബ്രുവരി 17ന് രാത്രി 7.45നാണ് കാസര്‍കോട് പെരിയ കല്യോട്ടെ യൂത്ത് കോണ്‍ഗ്രസ് പ്രവര്‍ത്തകരായ കൃപേഷ് (21), ശരത്‌ലാല്‍ (24) എന്നിവര്‍ കൊല്ലപ്പെട്ടത്. പെരുങ്കളിയാട്ടത്തിന്റെ സംഘാടകസമിതി യോഗത്തിനു ശേഷം ബൈക്കില്‍ വീട്ടിലേക്ക് മടങ്ങുമ്പോള്‍ ജീപ്പിലെത്തിയ സംഘം ബൈക്ക് ഇടിച്ചു തെറിപ്പിച്ച ശേഷം ഇരുവരെയും വെട്ടുകയായിരുന്നു. ആദ്യം ലോക്കല്‍ പൊലീസും െ്രെകംബ്രാഞ്ചും അന്വേഷിച്ച ശേഷമാണ് സി.ബി.ഐ ഏറ്റെടുത്തത്.