അശ്‌റഫ് ആളത്ത്

ദമ്മാം: സഊദി അറേബ്യയിലെ കിഴക്കൻ നഗരമായ ദമ്മാമിൽ പാചകവാതകം പൊത്തിത്തെറിച്ച് മൂന്നുപേർ മരണപ്പെട്ടു. ഇരുപത് പേർക്ക് പരിക്കേറ്റു. ഇവരിൽ മൂന്നു പേരുടെ നില ഗുരുതരമാണെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്തു. പരിക്കേറ്റവരിൽ സ്ത്രീകളും കുട്ടികളുമുണ്ട്.

ദമ്മാമിലെ അൽനഖീൽ ഡിസ്ട്രിക്‌ടിൽ ആണ് അപകടം ഉണ്ടായത്. ഫർണിഷ്‌ഡ് അപാർട്ട്മെന്റുകൾ അടങ്ങിയ കെട്ടിടത്തിലെ മൂന്നാം നിലയിലെ ഫ്ളാറ്റിലായിരുന്നു പ്രദേശത്തെ പിടിച്ചു കുലുക്കിയ സ്ഫോടനം.പരിക്കേറ്റവരെ മെഡിക്കൽടവർ ആസ് പത്രിയിൽ പ്രവേശിപ്പിച്ചു. പരിക്കേറ്റകുട്ടികളിൽ ചിലരെ പിന്നീട് മെറ്റേണിറ്റി ആന്റ് ചിൽഡ്രൻസ് ആസ്പത്രിയിലേക്ക് മാറ്റി.

സ്ഫോടനത്തിൽ ഫ്ളാറ്റിൻ്റെ ഭിത്തി തകർന്ന് ചിതറിത്തെറിച്ചു. ഇവ പതിച്ച് സമീപത്തെ കെട്ടിടങ്ങൾക്കും വാഹനങ്ങൾക്കും കേടുപാടുകൾ സംഭവിച്ചു.വിവരംഅറിഞ്ഞു കുതിച്ചെത്തിയ സുരക്ഷാസേനയാണ് സ്ഥിതിഗതികൾ നിയന്ത്രണ വിധേയമാക്കിയത്.സ്ഫോടനം നടന്ന കെട്ടിടത്തിന് മാത്രമല്ല
തെരുവിൻ്റെ മതിലുകൾക്കും അപകടം നടന്ന സ്ഥലത്തിന് സമീപമുള്ള മറ്റ് സമുച്ചയങ്ങൾക്കും നിർത്തിയിട്ടിരുന്ന വാഹനങ്ങൾക്കും സാരമായ കേടുപാടുകൾ സംഭവിച്ചതായി സിവിൽ ഡിഫൻസ് അറിയിച്ചു.മരിച്ചവരിലും പരിക്കേറ്റവരിലും ഇന്ത്യക്കാർ ഉണ്ടോ എന്ന് ഇതുവരെയും വ്യക്തമായിട്ടില്ല.