അയോധ്യയിലെ രാമക്ഷേത്ര വഴിയില്‍ സ്ഥാപിച്ച 3800 വഴിവിളക്കുകള്‍ മോഷണം പോയതായി പരാതി. അതീവ സുരക്ഷാമേഖലയില്‍ സ്ഥാപിച്ച 50 ലക്ഷം രൂപവിലവരുന്ന വഴിവിളക്കുകള്‍ മോഷണം പോയതായി കരാറുകാരന്‍ പൊലീസില്‍ നല്‍കിയ പരാതിയില്‍ പറയുന്നു.
3800 ബാംബു ലൈറ്റുകളും, 36 ഗോബോ ലൈറ്റുകളുമാണ് മോഷണം പോയത്. രാമക്ഷേത്രത്തിലേക്കുള്ള പ്രധാനപാതയായ രാം പാതയിലും ഭക്തിപാതയിലും സ്ഥാപിച്ച ലൈറ്റുകളാണ് മോഷ്ടിച്ചത്.
സ്വകാര്യസ്ഥാപനങ്ങളായ യാഷ് എന്റര്‍പ്രൈസസും കൃഷ്ണ ഓട്ടോമൊബൈല്‍സും 6400 ബാംബു ലൈറ്റുകളും 96 ഗോബോ ലൈറ്റുകളും സ്ഥാപിച്ചിരുന്നു. മാര്‍ച്ച് 19 വരെ എല്ലാ ലൈറ്റുകളും ഉണ്ടായിരുന്നു. മെയ് ഒന്‍പതിന് നടത്തിയ പരിശോധനയില്‍ ചില ലൈറ്റുകള്‍ നഷ്ടമായതായി കമ്പനികള്‍ കണ്ടെത്തിയിരുന്നു.എന്നാല്‍ ആഗസ്റ്റ് ഒമ്പതിന് നല്‍കിയ പരാതിയിലാണ് 50 ലക്ഷം രൂപയുടെ ലൈറ്റുകള്‍ മോഷണം പോയതായി പരാതിയില്‍ പറയുന്നത്.