ശാസ്ത്ര സാങ്കേതിക മേഖലകളില്‍ മികവുറ്റ സംഭാവനകളര്‍പ്പിച്ച് കേരളത്തിന്റെ അഭിമാനമായ കൊച്ചി ശാസ്ത്ര സാങ്കേതിക സര്‍വകലാശാല(കുസാറ്റ്)യില്‍ 2022-23 അക്കാദമിക് വര്‍ഷത്തെ വിവിധ കോഴ്‌സുകളിലേക്ക് പിഴയില്ലാതെ മാര്‍ച്ച് 7 വരെ അപേക്ഷിക്കാം. വ്യത്യസ്ത യോഗ്യതകളുള്ളവര്‍ക്കപേക്ഷിക്കാവുന്ന നിരവധി കോഴ്‌സുകളാണ് കുസാറ്റ് നടത്തുന്നത്. CATഎന്ന ചുരുക്കപ്പേരിലറിയപ്പെടുന്ന പൊതു പ്രവേശന പരീക്ഷ വഴിയാണ് പ്രധാനമായും അഡ്മിഷന്‍. മികച്ച കാമ്പസ് പ്ലേസ്‌മെന്റ് സൗകര്യമടക്കം ഒരുക്കിയ ഈ സ്ഥാപനം ഇന്ത്യയിലെതന്നെ സവിശേഷ പ്രാധാന്യമുള്ള സ്ഥാപനങ്ങളുടെ ഗണത്തിലാണുള്‍പ്പെട്ടിട്ടുള്ളത്.

+2 കഴിഞ്ഞവര്‍ക്ക് ഇപ്പോള്‍
അപേക്ഷിക്കാവുന്ന കോഴ്‌സുകള്‍
എന്‍ജിനീയറിങ് (ബി ടെക്) ബ്രാഞ്ചുകള്‍

സിവില്‍
കംപ്യൂട്ടര്‍ സയന്‍സ്
ഇലക്ട്രിക്കല്‍ ആന്‍ഡ് ഇലക്ട്രോണിക്‌സ്
ഇലക്ട്രോണിക്‌സ് ആന്‍ഡ് കമ്യൂണിക്കേഷന്‍
ഇന്‍ഫര്‍മേഷന്‍ ടെക്‌നോളജി,മെക്കാനിക്കല്‍
സേഫ്റ്റി ആന്‍ഡ് ഫയര്‍മറൈന്‍ എന്‍ജിനിയറിങ്
നേവല്‍ ആര്‍ക്കിടെക്ചര്‍ ആന്‍ഡ് ഷിപ്പ് ബില്‍ഡിങ്
പോളിമര്‍ സയന്‍സ്ഇന്‍സ്ട്രുമെന്റേഷന്‍ ആന്‍ഡ് കണ്‍ട്രോള്‍

മറ്റു പ്രോഗ്രാമുകള്‍
പഞ്ചവത്സര ഇന്റഗ്രെറ്റഡ് എം.എസ്സി ഇന്‍ ഫോട്ടോണിക്‌സ്
പഞ്ചവത്സര ഇന്റഗ്രെറ്റഡ് എം.എസ്സി ഇന്‍ കംപ്യൂട്ടര്‍ സയന്‍സ് (ആര്‍ട്ടിഫിഷ്യല്‍ ഇന്റലിജന്‍സ് ആന്‍ഡ് ഡേറ്റ സയന്‍സ്)
പഞ്ചവത്സര ഇന്റഗ്രെറ്റഡ് എം.എസ്സി ഇന്‍ മാത്തമാറ്റിക്‌സ്/ഫിസിക്‌സ്/കെമിസ്ട്രി/സ്റ്റാറ്റിസ്റ്റിക്‌സ്/ബയോളജിക്കല്‍ സയന്‍സ്
പഞ്ചവത്സര ബിബിഎഎല്‍എല്‍ബി (ഓണേഴ്‌സ്) പ്രോഗ്രാം
പഞ്ചവത്സര ബി.കോം എല്‍ എല്‍ ബി (ഓണേഴ്‌സ്) പ്രോഗ്രാം
ത്രിവത്സര ബി.വോക് ബിസിനസ് പ്രോസസ് ആന്‍ഡ് ഡേറ്റ അനലറ്റിക്‌സ്

ഡിപ്ലോമ, ഡിഗ്രി, പിജി, പി.എച്ച്ഡി എന്നിവ കഴിഞ്ഞവര്‍ക്ക് അപേക്ഷിക്കാവുന്ന പ്രോഗ്രാമുകളും ഡിപ്ലോമ, സര്‍ട്ടിഫിക്കറ്റ്, ഹ്രസ്വകാല കോഴ്‌സുകള്‍ എന്നിവയുമുണ്ട്. തൃക്കാക്കര (ക്യാമ്പസ് 1), പുളിങ്കുന്ന് (ക്യാമ്പസ് 2), ലെയ്ക്ക്‌സൈഡ് എന്നീ 3 ക്യാമ്പസുകളിലായാണ് കുസാറ്റിലെ കോഴ്‌സുകളുള്ളത്.

എന്‍ജിനിയറിങ്, ഫോട്ടോണിക്‌സ്, കംപ്യൂട്ടര്‍ സയന്‍സ് എന്നീ ഇന്റഗ്രേറ്റഡ് എം.എസ്സി. കോഴ്‌സുകള്‍ എന്നിവയുടെ പ്രവേശനത്തിന് മാത്തമാറ്റിക്‌സ്, ഫിസിക്‌സ്, കെമിസ്ട്രി എന്നിവയും ഫിസിക്‌സ്, കെമിസ്ട്രി, മാത്തമാറ്റിക്‌സ്, സ്റ്റാറ്റിസ്റ്റിക്‌സ്, ബയോളജിക്കല്‍ സയന്‍സസ് എന്നീ എം.എസ്സി പ്രോഗ്രാമുകളിലെ പ്രവേശനത്തിന് മാത്തമാറ്റിക്‌സ്, ഫിസിക്‌സ്, കെമിസ്ട്രി, ബയോളജി എന്നിവയില്‍ മൂന്നുവിഷയമെങ്കിലും പ്ലസ്ടുവിന് പഠിച്ചിരിക്കണം. മറൈന്‍ എന്‍ജിനീയറിങ് ഒഴികെയുള്ള ബി.ടെക്, ഇന്റഗ്രേറ്റഡ് എം.എസ്സി. എന്നിവയുടെ പ്രവേശനത്തിന് CAT വഴിയാണ് അപേക്ഷിക്കേണ്ടത്.

തിരഞ്ഞെടുക്കാനുദ്ദേശിക്കുന്ന കോഴ്‌സുകള്‍ക്ക് അനുസരിച്ച് ടെസ്റ്റ് കോഡില്‍ വ്യത്യാസം വരും. എന്നാല്‍ ദേശീയ ശാസ്ത്ര സാങ്കേതിക ഡിപ്പാര്‍ട്ടമെന്റ് നടത്തുന്ന കെവിപിവൈ പരീക്ഷയില്‍ യോഗ്യത നേടിയവര്‍ ഫോട്ടോണിക്‌സ് ഒഴികെയുള്ള ഇന്റഗ്രേറ്റഡ് എം.എസ്സി പ്രോഗ്രാമുകളുടെ പ്രവേശനപരീക്ഷ എഴുതേണ്ടതില്ല. പക്ഷേ, അവരും ഇപ്പോള്‍ അപേക്ഷ സമര്‍പ്പിക്കണം. മറൈന്‍ എന്‍ജിനീയറിങ് എന്ന റെസിഡെന്‍ഷ്യല്‍ ബി.ടെക് കോഴ്‌സിന് പ്രവേശനം ഇന്ത്യന്‍ മാരിടൈം യൂണിവേഴ്‌സിറ്റി നടത്തുന്ന കോമണ്‍ എന്‍ട്രന്‍സ് ടെസ്റ്റ് (CET) വഴിയാണ്. ഈ കോഴ്‌സിന് പ്രവേശനം ആഗഹിക്കുന്നവര്‍ CET ക്ക് അപേക്ഷിക്കാനും IMU വില്‍ നിന്ന് ലഭിക്കുന്ന റാങ്ക് ലിസ്റ്റ് യഥാസമയം അപ്‌ലോഡ് ചെയ്യണം.പഞ്ചവത്സര ബി.ബി.എ./ബി.കോംഎല്‍എല്‍.ബി(ഓണേഴ്‌സ്) കോഴ്‌സുകള്‍ക്ക് ഏതെങ്കിലും സ്ട്രീമില്‍ പ്ലസ്ടു ജയിച്ചവര്‍ക്ക് അപേക്ഷിക്കാം. രണ്ടിനും പൊതുവായ പ്രവേശന പരീക്ഷയാണുള്ളത് (CAT ടെസ്റ്റ് കോഡ് 201). ബി. വോക് (ബിസിനസ് പ്രോസസ് ആന്‍ഡ് ഡേറ്റ അനലറ്റിക്‌സ്) പ്രവേശനത്തിന് മാത്തമാറ്റിക്‌സ്/സ്റ്റാറ്റിസ്റ്റിക്‌സ് ഒരു വിഷയമായി പഠിച്ച് പ്ലസ്ടു ജയിച്ചവര്‍ക്ക് അപേക്ഷിക്കാം (CAT ടെസ്റ്റ്‌കോഡ്103). യോഗ്യതാ പരീക്ഷയില്‍ ലഭിക്കേണ്ട മാര്‍ക്ക് നിബന്ധന സംബന്ധിച്ച വിവരം പ്രോസ്‌പെക്ടസിലുണ്ട്. കമ്പ്യൂട്ടര്‍ അധിഷ്ഠിത പ്രവേശന പരീക്ഷ മേയ് 15, 16, 17 തിയതികളില്‍ നടക്കും

എം.ടെക്, എം.ബി.എ പ്രവേശനത്തിനായി കുസാറ്റ് പ്രത്യേകം പ്രവേശന പരീക്ഷ നടത്തുന്നില്ല. ഐ.ഐ.എം നടത്തുന്ന ക്യാറ്റ്, സിമാറ്റ്, കെമാറ്റ്, ഗേറ്റ് എന്നിവയിലെ സ്‌കോറുകള്‍ പരിഗണിക്കും. അപേക്ഷ സമര്‍പ്പിക്കാനും മറ്റു വിശദ വിവരങ്ങള്‍ക്കും https://cusat.ac.in/ എന്ന വെബ്‌സൈറ്റ് സന്ദര്‍ശിക്കാം. പി.എച്ച്ഡി, പോസ്റ്റ് ഡോക്ടറല്‍, ഡിപ്ലോമ, സര്‍ട്ടിഫിക്കറ്റ്, ഹ്രസ്വകാല കോഴ്‌സുകള്‍ എന്നിവക്ക് ഓഫ്‌ലൈനായാണ് അപേക്ഷിക്കേണ്ടത്.