ഉമാ തോമസിന് പരിക്കേറ്റ സംഭവത്തില്‍ പരിപാടിയുടെ സംഘാടകരെ രക്ഷിക്കാനാണ് മന്ത്രി സജി ചെറിയാന്‍ രംഗത്തിറങ്ങിയതെന്ന് പ്രതിപക്ഷ നേതാവ് വി.ഡി സതീശന്‍. പരിപാടിയുടെ സംഘാടകര്‍ക്ക് സിപിഎം ബന്ധമുണ്ടെന്നും അന്വേഷണം പൂര്‍ത്തിയാകുന്നതിനു മുമ്പുതന്നെ സുരക്ഷാ വീഴ്ച സംഭവിച്ചിട്ടില്ലെന്ന മന്ത്രിയുടെ പ്രസ്താവന സംഘാടകരെ സംരക്ഷിക്കാനാണെന്നും സതീശന്‍ പറഞ്ഞു.

ആളുകള്‍ അകത്തേക്ക് കയറുന്നതുപോലും പോലീസ് പരിശോധിച്ചിട്ടില്ലെന്നും സംഭവത്തില്‍ ജിസിഡിഎക്കെതിരെയും അന്വേഷണം വേണമെന്നും വി ഡി സതീശന്‍ പറഞ്ഞു. സുരക്ഷ ഉറപ്പാക്കേണ്ടത് ജിസിഡിഎയുടെ ഉത്തരവാദിത്തമാണെന്നും സതീശന്‍ പറഞ്ഞു.

അതേസമയം, കലൂര്‍ സ്റ്റേഡിയത്തിന്റെ വേദിയില്‍നിന്ന് വീണ് അപകടം സംഭവിച്ച് ചികിത്സയില്‍ കഴിയുന്ന ഉമാ തോമസ് എംഎല്‍എയുടെ ആരോഗ്യനിലയില്‍ പുരോഗതിയുണ്ടെന്ന് ഡോക്ടര്‍മാര്‍ അറിയിച്ചു. ഉമാ തോമസിന് ബോധം തെളിഞ്ഞെന്നും ചോദ്യങ്ങളോട് പ്രതികരിച്ചെന്നും ഡോക്ടര്‍ അറിയിച്ചു. അതേസമയം അവര്‍ വെന്റിലേറ്ററില്‍ തുടരുകയാണ്.

കലൂര്‍ സ്റ്റേഡിയത്തില്‍ നടന്ന മൃദംഗനാദം നൃത്ത പരിപാടിയുടെ സാമ്പത്തിക സ്രോതസുകള്‍ അന്വേഷിക്കാന്‍ പ്രത്യേക സംഘം. സംഭവുമായി ബന്ധപ്പെട്ട് നടി ദിവ്യ ഉണ്ണിയേയും നടന്‍ സിജോയ് വര്‍ഗീസിനെയും ചോദ്യം ചെയ്യും. മൃദംഗ വിഷനുമായി താരങ്ങളുടെ ബന്ധത്തെ കുറിച്ച് വിശദമായ അന്വേഷണം നടത്തും.

തെറ്റ് ചെയ്തവര്‍ക്ക് രക്ഷപ്പെടാനാവില്ലെന്നും ചുമത്തിയിരിക്കുന്നത് ശക്തമായ വകുപ്പുകളാണെന്നും കൊച്ചി സിറ്റി പൊലീസ് കമ്മീഷണര്‍ പറഞ്ഞു. മൃദംഗ വിഷന് എങ്ങനെയാണ് ഇത്ര വലിയ പരിപാടി സംഘടിപ്പിക്കാനാവുക എന്നും കുട്ടികളില്‍ നിന്ന് വലിയ തുക രജിസ്‌ട്രേഷന്‍ ഫീസ് ആയി വാങ്ങിയതിന്റെ കാര്യവും സംഘം അന്വേഷിക്കും.

പരിപാടിയെ കുറിച്ച് ഗുരുതരമായ സാമ്പത്തിക ആരോപണങ്ങള്‍ ഉയരുന്ന സാഹചര്യത്തിലാണ് അന്വേഷണം ശക്തംമാകുന്നത്. പങ്കെടുത്ത നൃത്ത അധ്യാപകരില്‍ നിന്നും വിവരങ്ങള്‍ ശേഖരിക്കും. ദിവ്യ ഉണ്ണിയുടെ നേതൃത്വത്തിലാണ് നൃത്തപരിപാടി നടന്നത്.

സ്റ്റേഡിയത്തില്‍ വന്‍ സുരക്ഷാ വീഴ്ച സംഭവിച്ചുവെന്നാണ് പൊലീസും ഫയര്‍ഫോഴ്‌സും പൊതുമരാമത്ത് വകുപ്പും ചേര്‍ന്ന് തയ്യാറാക്കിയ റിപ്പോര്‍ട്ടില്‍ പറയുന്നത്. അതേസമയം പരിക്കേറ്റ ഉമ തോമസ് എംഎല്‍എയുടെ നില ഗുരുതരാവസ്ഥയില്‍ തുടരുകയാണ്.

തിരുവനന്തപുരം നെടുമങ്ങാട് പി.എ അസീസ് എന്‍ജിനീയറിങ് കോളജിനുള്ളില്‍ മൃതദേഹം കണ്ടെത്തി. കോളേജിലെ പണി തീരാത്ത ഹാളിനുള്ളിലാണ് കത്തിക്കരിഞ്ഞ നിലയില്‍ മൃതദേഹം കണ്ടെത്തിയത്. കോളജ് ഉടമ മുഹമ്മദ് അബ്ദുള്‍ അസീസ് താഹയുടെതാണ് മൃതദേഹമെന്നാണ് കരുതുന്നത്. ഉടമയുടെ മൊബൈല്‍ ഫോണ്‍ മൃതദേഹത്തിന് സമീപത്തുനിന്നും കണ്ടെത്തിയിട്ടുണ്ട്.

പൊലീസും ഫൊറന്‍സിക് സംഘവും സ്ഥലത്തെത്തി പരിശോധന നടത്തി. അസ്വഭാവിക മരണത്തിന് പൊലീസ് കേസെടുത്ത് അന്വേഷണം ആരംഭിച്ചു. കഴിഞ്ഞ ദിവസം രാത്രിയാണ് സംഭവം നടന്നതെന്നാണ് കരുതുന്നത്. ഇന്ന് രാവിലെ കത്തിക്കരിഞ്ഞ നിലയില്‍ മൃതദേഹം കണ്ടെത്തുകയായിരുന്നു.

അസീസിന് സാമ്പത്തിക പ്രശ്‌നങ്ങളുള്ളതായാണ് പറയുന്നത്.