എറണാകുളം: ലൈംഗിക അധിക്ഷേപം ചൂണ്ടിക്കാട്ടി നടി ഹണി റോസ് നല്‍കിയ പരാതിയില്‍ കസ്റ്റഡിയിലെടുത്ത ബോബി ചെമ്മണ്ണൂരിന്റെ അറസ്റ്റ് ഉടന്‍ രേഖപ്പെടുത്തുമെന്ന് കൊച്ചി ഡിസിപി. ബോബിയെ എറണാകുളം സെന്‍ട്രല്‍ പൊലീസ് സ്റ്റേഷനിലാണ് എത്തിക്കും. കേസില്‍ ഹണി റോസിന്റെ മൊഴി ഇന്നുതന്നെ രേഖപെടുത്തും.

ബോബിക്കെതിരെ മറ്റ് പരാതികള്‍ ഉള്ളതായി ശ്രദ്ധയില്‍പ്പെട്ടിട്ടില്ലെന്നും കൊച്ചിയില്‍ എത്തിച്ച ശേഷം വിശദമായി ചോദ്യം ചെയ്യുമെന്നും ഡിസിപി അശ്വതി ജിജി പറഞ്ഞു. വയനാട്ടിലെ ആയിരം ഏക്കര്‍ എസ്റ്റേറ്റില്‍ നിന്നാണ് ബോബി ചെമ്മണ്ണൂരിനെ പൊലീസ് കസ്റ്റഡിയിലെടുത്തത്. വയനാട് പൊലീസിനെ അറിയിക്കാതെയായിരുന്നു കൊച്ചി പൊലീസിന്റെ ഓപ്പറേഷന്‍ ബോചെ. മുന്‍കൂര്‍ ജാമ്യം നേടാനുള്ള ബോചെയുടെ നീക്കം പൊലീസ് പൊളിച്ചു.

സ്ത്രീത്വത്തെ അപമാനിച്ചെന്ന നടി ഹണി റോസിന്റെ പരാതിയില്‍ ബോബി ചെമ്മണ്ണൂരിനെ പൊലീസ് ചോദ്യം ചെയ്യ്തിരുന്നു. നടിയുടെ പരാതിയില്‍ ഇന്നലെയാണ് ജാമ്യമില്ലാ വകുപ്പ് പ്രകാരം എറണാകുളം സെന്‍ട്രല്‍ പൊലീസ് കേസെടുത്തത്. ഐടി വകുപ്പുകള്‍ പ്രകാരമുളള കുറ്റങ്ങളും ചേര്‍ത്തിരുന്നു. മൊഴി എടുത്ത ശേഷം അറസ്റ്റ് ഉള്‍പ്പെടെയുളള നടപടികളിലേക്ക് പോകാനാണ് പൊലീസിന്റെ തീരുമാനം.

പെരിയ ഇരട്ടക്കൊല കേസ് പ്രതികളില്‍ ചിലരുടെ ശിക്ഷ സ്റ്റേ കിട്ടിയത് കൊണ്ട് അവര്‍ കുറ്റവിമുക്തരാകില്ലെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി അഡ്വ. പി.എം.എ സലാം പറഞ്ഞു. മാധ്യമങ്ങളുമായി സംസാരിക്കുകയായിരുന്നു അദ്ദേഹം. അപ്പീല്‍ കൊടുത്തത് കൊണ്ടുള്ള സ്വാഭാവിക നടപടി മാത്രമാണിത്. കോടതിയുടെ അന്തിമവിധി വരുമ്പോള്‍ കുറ്റക്കാര്‍ ശിക്ഷിക്കപ്പെടുക തന്നെ ചെയ്യും.

കേസില്‍ തുടക്കം മുതല്‍ സി.പി.എം പ്രതികളെ സംരക്ഷിക്കുന്ന നിലപാടാണ് സ്വീകരിച്ചത്. അകാരണമായി രണ്ട് ജീവനുകളെ ഇല്ലാതാക്കിയവര്‍ക്കൊപ്പാണ് സി.പി.എം നിലകൊണ്ടത്. കേസ് അന്വേഷിക്കാതിരിക്കാന്‍ ഖജനാവിലെ രണ്ട് കോടിയോളം രൂപ ചെലവഴിച്ചു. ശിക്ഷ കിട്ടിയപ്പോള്‍ ജയിലില്‍ സൗകര്യമൊരുക്കാനും വീടുകളില്‍ പോയി ആശ്വസിപ്പിക്കാനും മുന്നില്‍ നില്‍ക്കുന്നതും സി.പി.എമ്മുകാരുമാണ്. ഇത് കുറ്റകൃത്യത്തെ പ്രോത്സാഹിപ്പിക്കുന്ന നടപടിയും സമൂഹത്തോടുള്ള വെല്ലുവിളിയുമാണ്. – പി.എം.എ സലാം പറഞ്ഞു.

കോഴിക്കോട്:ഇന്ത്യന്‍ ട്രൂത്തിന്റെ ഇരുപത്തി അഞ്ചാം വാര്‍ഷികത്തിനോട് അനുബന്ധിച്ച് ഏര്‍പ്പെടുത്തിയ പത്ര, ദൃശ്യ മാധ്യമ പുരസ്‌കാരങ്ങളും ബിസിനസ് എക്‌സലന്‍സ് പുരസ്‌കാരങ്ങളും പ്രഖ്യാപിച്ചു. മികച്ച കായിക റിപ്പോര്‍ട്ടര്‍ അവാര്‍ഡ് ചന്ദ്രിക പത്രാധിപരും രാജ്യാന്തര കായിക മാധ്യമ പ്രവര്‍ത്തകനുമായ കമാല്‍ വരദൂരിന്. കായിക മേഖലയിലെ കുതിപ്പിന് കരുത്ത് നല്‍കാന്‍ സഹായിക്കുന്ന വിവിധ വാര്‍ത്തകളും നിരീക്ഷണങ്ങളും പരിഗണിച്ചാണ് പുരസ്‌ക്കാരം.

ഇന്ത്യന്‍ ട്രൂത്ത് എഡിറ്റോറിയല്‍ ബോര്‍ഡും, മാധ്യമ പ്രവര്‍ത്തകന്‍ കുഞ്ഞിക്കണ്ണന്‍ വാണിമേല്‍, അധ്യാപികയും എഴുത്തുകാരിയുമായ ഡോ.ശ്രീകല മുല്ലശ്ശേരി എന്നിവരടങ്ങുന്ന സമിതിയാണ് പുരസ്‌കാര ജേതാക്കളെ തെരഞ്ഞെടുത്തത്. 10,000 രൂപയും പ്രശംസാപത്രവും, ഫലകവും ഉള്‍പ്പെടുന്ന പുരസ്‌കാരം ഈമാസം പന്ത്രണ്ടിന് കോഴിക്കോട് ഹോട്ടല്‍ മലബാര്‍ പാലസില്‍ വെച്ച് നടക്കുന്ന ചടങ്ങില്‍ പൊതുമരാമത്ത് വകുപ്പ് മന്ത്രി പി.എ.മുഹമ്മദ് റിയാസ് വിതരണം ചെയ്യും. ചടങ്ങില്‍ ജില്ലാ പഞ്ചായത്ത് പ്രസിഡണ്ട് ഷീജ ശശി അധ്യക്ഷത വഹിക്കും. വനം വന്യജീവി വകുപ്പു മന്ത്രി എ കെ ശശീന്ദ്രന്‍, മുന്‍ എക്‌സൈസ് തൊഴില്‍ വകുപ്പ് മന്ത്രി ടി പി രാമകൃഷ്ണന്‍, പിന്നണി ഗായകന്‍ എം ജി ശ്രീകുമാര്‍, എസ് കെ സജീഷ് സാമൂഹ്യ സംസ്‌കാരിക ബിസിനസ് മേഖലയിലെ പ്രമുഖര്‍ തുടങ്ങിയവര്‍ പങ്കെടുക്കും. വൈകിട്ട് 3 മണി മുതല്‍ 8 മണി വരെയാണ് പരിപാടി. ഇന്ത്യന്‍ ട്രൂത്ത് മാനേജിംഗ് എഡിറ്റര്‍ ഇ.എം ബാബു, അസ്സന്‍കോയ മാസ്റ്റര്‍ മൂലാട്, രജനി രാജേഷ്, രാജേഷ് വെങ്ങിലാട്ട്, സി.ടി.അയമു എന്നിവര്‍ വാര്‍ത്ത സമ്മേളനത്തില്‍ പങ്കെടുത്തു.