Video Stories

സെക്രട്ടറിയേറ്റിലെ പുകമറ നീങ്ങണം

Published

4 years ago

August 27, 2020

സംസ്ഥാനത്തിന്റെ ഭരണസിരാകേന്ദ്രമായ സെക്രട്ടറിയേറ്റില്‍ ചൊവ്വാഴ്ച വൈകീട്ട് ഉണ്ടായതോ ഉണ്ടാക്കിയതോ ആയ അഗ്നിബാധ വലിയ തോതിലുള്ള സംശയങ്ങള്‍ക്കും പ്രതിഷേധങ്ങള്‍ക്കും വഴിവെച്ചിരിക്കുന്നു. അന്താരാഷ്ട്ര സ്വര്‍ണക്കള്ളക്കടത്തുമായി ബന്ധപ്പെട്ട് ദേശീയ അന്വേഷണ ഏജന്‍സിയും കസ്റ്റംസും എന്‍ഫോഴ്‌സ്‌മെന്റും അന്വേഷിക്കുന്ന സ്ഥലത്ത് അന്വേഷണം തുടരുന്നതിനിടെതന്നെ തീപിടിത്തമുണ്ടായത് ജനങ്ങളുടെ ഇടയില്‍ വലിയ ചോദ്യങ്ങള്‍ക്ക് ഇടയാക്കിയതില്‍ അത്ഭുതത്തിന് അവകാശമില്ല. സര്‍ക്കാര്‍ എങ്ങനെ ന്യായീകരിക്കാന്‍ പരിശ്രമിച്ചാലും ചുമ്മാ തീരുന്നതല്ല മുഖ്യമന്ത്രിയുടെ ഓഫീസുമായി അടുത്ത ബന്ധമുള്ള ഓഫീസില്‍ നടന്ന ഈ തീപിടിത്തത്തിലെ ദുരൂഹത. ഷോര്‍ട്ട്‌സര്‍ക്യൂട്ട് മുഖേനയാണ് അഗ്നിപടര്‍ന്നതെന്നാണ് സര്‍ക്കാര്‍ നിയോഗിച്ച സംഘം പ്രാഥമികമായി കണ്ടെത്തിയിരിക്കുന്നതെങ്കിലും തുടര്‍ച്ചയായ, പഴുതുകളച്ച അന്വേഷണത്തിലൂടെ മാത്രമേ സത്യാവസ്ഥപുറത്തുവരൂ. കാരണം സ്വര്‍ണക്കടത്തില്‍ പ്രധാന പങ്കു വഹിച്ച മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയുമായി ബന്ധമുള്ള പ്രോട്ടോകോള്‍ ഓഫീസറുടെ ഫയലുകളാണ് അഗ്നിക്കിരയായതായി വ്യക്തമായിരിക്കുന്നത്. കേസില്‍ സസ്‌പെന്‍ഷനിലായ പ്രിന്‍സിപ്പല്‍ സെക്രട്ടറി എം.ശിവശങ്കര്‍ സ്വപ്‌നസുരേഷുമായി നടത്തിയ വിദേശയാത്രകളുടെ വിവരങ്ങള്‍ സംബന്ധിച്ച് കേന്ദ്ര ഏജന്‍സികള്‍ പ്രോട്ടോകോള്‍ ഓഫീസറെ ചോദ്യംചെയ്തുവരികയാണ്. ഇതിനിടെതന്നെ അദ്ദേഹത്തിന്റെ ഓഫീസിലെ പ്രധാനപ്പെട്ട ഫയലുകള്‍ കത്തിനശിച്ചുവെന്ന് വരുന്നത് സംശയത്തിന് ഇടയാക്കാവുന്നതേയുള്ളൂ.

ഒരു ജീവനക്കാരന് കോവിഡ് ബാധയേറ്റതിനാല്‍ 24, 25 തീയതികളില്‍ പ്രോട്ടോകോള്‍ ഓഫീസ് അടച്ചിട്ടിരിക്കുകയായിരുന്നു. ഇവിടെ അണുനാശിനി തളിച്ചതായി പറയുന്നുണ്ട്. ഫാനിന്റെ ഓണ്‍ ചെയ്തുവെച്ച സ്വിച്ചിലും അണുനാശിനി തളിച്ചെന്നും അതിലൂടെയാണ് വൈദ്യുതി പ്രവാഹം ഉണ്ടായി തീപിടിത്തത്തിന് കാരണമായതെന്നുമാണ് പ്രാഥമിക നിഗമനം. എന്നാല്‍ വളരെയധികം സംശയം നിറഞ്ഞുനില്‍ക്കുകയും ജനങ്ങളുടെ ഉദ്വേഗത്തിന് പാത്രവുമായ ഒരു ഓഫീസിലെ ഫയലുകളാണ് അഗ്നിക്കിരയായത് എന്നതിനെ ചെറുതായി കാണാനാവില്ല. കള്ളക്കടത്തുകേസില്‍ പലതും ഒളിക്കാനിരിക്കുന്നവര്‍ക്ക് ഈ ഫയലുകളും അപ്രത്യക്ഷമാകേണ്ടത് ആവശ്യമുണ്ടായിരിക്കാം. അതായിരിക്കും തീ കത്തിച്ചവരുടെ മനസ്സിലെ ഗൂഢോദ്ദേശ്യം. ഇതില്‍ സര്‍ക്കാരിലെ ഉന്നതര്‍ക്ക് പങ്കുണ്ടോ എന്ന് മാത്രമാണ് ഇനി അറിയാനുള്ളത്. സംസ്ഥാന സര്‍ക്കാരില്‍ സേവനമനുഷ്ഠിക്കുന്ന ഉദ്യോഗസ്ഥരെകൊണ്ട് ഇതിലെ ഗൂഢാലോചന പുറത്തുകൊണ്ടുവരാന്‍ കഴിയുമെന്ന് വിശ്വസിക്കാന്‍ അതുകൊണ്ടുതന്നെ ന്യായമായും ബുദ്ധിമുട്ടുണ്ട്. മുഖ്യമന്ത്രിയുടെ ഓഫീസിലേക്ക് എന്‍.ഐ.എ സംഘം കടന്നുവന്നത് കേരളത്തിന്റെ ചരിത്രത്തില്‍ ഇതാദ്യത്തേതാണ്.
കള്ളക്കടത്തുമായി ബന്ധപ്പെട്ട പ്രതികള്‍ ഈ ഓഫീസില്‍ വന്നിരുന്നോ, എത്ര തവണ വന്നു തുടങ്ങിയ വിവരങ്ങള്‍ ശേഖരിക്കാനായിരുന്നു അത്. മുഖ്യമന്ത്രിയുടെ ഓഫീസിലെ സി.സി.ടി.വി ക്യാമറയിലെ ദൃശ്യങ്ങള്‍ ആവശ്യപ്പെട്ടപ്പോള്‍ അവ ഇടിമിന്നലില്‍ നശിച്ചുവെന്ന് പറഞ്ഞവരാണ് ഈ സര്‍ക്കാരിലുള്ളത്. തിരുവനന്തപുരത്ത് എവിടെയും ഇടിയോ മിന്നലോ ഉണ്ടാകാതിരിക്കെയായിരുന്നു ഈ മുട്ടന്‍ ന്യായീകരണം. ഇത് വിവാദമായതോടെ ദൃശ്യങ്ങള്‍ ഉണ്ടെന്നും ഹാജരാക്കാമെന്നും സര്‍ക്കാര്‍ തിരുത്തി. ഇതും തീപിടിത്തവും കണക്കിലെടുക്കുമ്പോള്‍ പിണറായി സര്‍ക്കാരിന് പലതും ഒളിച്ചുവെക്കാനുണ്ടെന്നുതന്നെ കരുതുന്നവരെ കുറ്റം പറയാനാകില്ല.തീപിടിത്തത്തിന്റെ വാര്‍ത്ത പുറത്തുവന്ന് നിമിഷങ്ങള്‍ക്കകം ചീഫ് സെക്രട്ടറിയും പൊതുഭരണവകുപ്പിലെ അഡീ. സെക്രട്ടറിയും അടക്കമുള്ള ഉന്നത ഉദ്യോഗസ്ഥര്‍ കുഴപ്പമൊന്നുമില്ലെന്ന് പറഞ്ഞ് രംഗത്തുവന്നത് അത്യപൂര്‍വതയായി. ഇന്നുവരെയും ഒരു ചീഫ്‌സെക്രട്ടറിയും ചെയ്യാത്ത പണിയാണ് എം.എല്‍.എമാരെയുള്‍പ്പെടെ തടഞ്ഞതുവഴി വിശ്വാസ്‌മേത്ത നിര്‍വഹിച്ചത്. ആര്‍ക്കുവേണ്ടിയാണിതെന്ന് ന്യായമായും ഊഹിക്കാവുന്നതേയുള്ളൂ.

പ്രതിപക്ഷ നേതാവ് രമേശ്‌ചെന്നിത്തലയും വി.ടി ബലറാം, കെ.എസ് ശബരീനാഥന്‍ ഉള്‍പ്പെടെയുള്ള നിയമസഭാസാമാജികരും വിവരമന്വേഷിക്കാന്‍ എത്തിയെങ്കിലും അവരെ തടയാന്‍ മാത്രം എന്തധികാരമാണ് ചീഫ് സെക്രട്ടറിക്കുള്ളത്? മാധ്യമ പ്രവര്‍ത്തകരെയും സെക്രട്ടറിയേറ്റ് വളപ്പിനകത്തേക്ക് അടുപ്പിക്കാതെ പുറത്താക്കി. ഇതോടെ തീപിടിത്തത്തിന്റെ ദൃശ്യങ്ങള്‍ പകര്‍ത്താന്‍ അവര്‍ക്കായില്ല. പുറത്തേക്കുവന്ന പുകയാണ് പിന്നീട് അവര്‍ക്ക് ക്യാമറയിലാക്കാനായത്. ഇതിനുമാത്രം എന്താണ് സര്‍ക്കാരിന് ഒളിക്കാനുള്ളത്? സംഭവസമയം മുഖ്യമന്ത്രിയുമായി അടുപ്പമുള്ള മന്ത്രി ഇ.പി ജയരാജന്‍ സ്ഥലത്തുണ്ടായിരുന്നുവെന്നതും ദുരൂഹത വര്‍ധിപ്പിക്കുകയാണ്.

മുമ്പ് മൂന്നാറില്‍ വ്യാജ പട്ടയങ്ങള്‍ സംബന്ധിച്ച അന്വേഷണത്തിനിടെയാണ് തഹസില്‍ദാര്‍ ഓഫീസില്‍ തീപിടിത്തമുണ്ടായതും പ്രധാനപ്പെട്ട പല ഫയലുകള്‍ കത്തിനശിച്ചതെന്നതും മറക്കരുത്. പ്രോട്ടോകോള്‍ ഓഫീസില്‍ ഫയലുകള്‍ മിക്കതും ഇ-ഫയലിങിലാക്കിയെന്നും കമ്പ്യൂട്ടറുകളില്‍ അവ സുരക്ഷിതമാണെന്നുമാണ് സര്‍ക്കാര്‍ വൃത്തങ്ങള്‍ ന്യായീകരിക്കുന്നത്. തീപിടിത്തത്തെക്കുറിച്ച് അന്വേഷണ സംഘത്തെ നിയോഗിച്ചിരിക്കുമ്പോള്‍ ഈ ന്യായീകരണം അന്വേഷണം എങ്ങനെയായിരിക്കണമെന്ന മുന്നറിയിപ്പാണ്. ലൈഫ് മിഷനുമായി ബന്ധപ്പെട്ട് നിര്‍ണായക ഫയലുകള്‍ എന്‍ഫോഴ്‌സ്‌മെന്റ് ആവശ്യപ്പെട്ടിട്ട് ഇനിയും അവ കൈമാറിയിട്ടില്ല. റെഡ്‌ക്രെസന്റും സര്‍ക്കാരും തമ്മിലുള്ള കരാറിന്റെ പകര്‍പ്പ് പ്രതിപക്ഷ നേതാവ് ആവശ്യപ്പെട്ടിട്ടും നല്‍കാന്‍ സര്‍ക്കാര്‍ തയ്യാറായിട്ടില്ല. സെക്രട്ടറിയേറ്റ്‌പോലെ അതിപ്രധാനമായ ഓഫീസുകള്‍ക്ക് കാവലാളാകേണ്ട സുരക്ഷാ-അഗ്നിശമനസേനാജീവനക്കാര്‍ സംഭവസമയം എവിടെയായിരുന്നുവെന്ന് അറിയാനും പുറത്തുനിന്നുള്ള ഏജന്‍സി അന്വേഷിക്കുകതന്നെ വേണം. നിലവിലെ എന്‍.ഐ.എ അന്വേഷണത്തില്‍ തീപിടിത്തവും ഉള്‍പെടുത്തണം. ഗവര്‍ണറും സന്ദര്‍ഭത്തിനൊത്ത് ഉണരണം. അപ്രധാനമായ ഫയലുകള്‍ മാത്രമേ കത്തിച്ചുള്ളൂ എന്ന പൊതുഭരണവകുപ്പ് അഡീ.സെക്രട്ടറി പി.ഹണിയുടെ പരാമര്‍ശവും ഒരു ശതമാനം ഫയലുകള്‍ ഡിജിറ്റലൈസ് ചെയ്തിട്ടില്ലെന്നതും സംഭവത്തിലെ പുകമറ കൂട്ടുകയാണ്.

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

1 day ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.