Video Stories

അഛേദിന്‍ വ്യാമോഹ കാലത്തെ മോദിമാരുടെ സംഘടിത കൊള്ള

Published

7 years ago

February 22, 2018

ലുഖ്മാന്‍ മമ്പാട്

വിദേശ ബാങ്കുകളിലുള്ള കള്ളപ്പണം മുഴുവന്‍ ഇന്ത്യയിലെത്തിക്കുമെന്നും സ്വിസ് ബാങ്കില്‍ മാത്രം ഇന്ത്യക്കാരുടെ 70 ലക്ഷം കോടി നിക്ഷേപം ഉണ്ടെന്നും എല്ലാവരുടെയും അക്കൗണ്ടുകളില്‍ ഒന്നര ലക്ഷം രൂപ വീതമെത്തുമെന്നുമായിരുന്നു അഛാദിന്‍ വാഗ്ദാനങ്ങളിലെ ഹൈലെറ്റ്. മോദി വര്‍ഷം നാലാവുമ്പോള്‍ ഇന്ത്യയിലെ പണവുമായി വിദേശത്തേക്ക് രക്ഷപ്പെടുന്ന സംഭവം പുതുമയല്ലാതായി എന്നതാണ് നേര്. വിദേശത്തെ കള്ളപ്പണം ലഭിച്ചില്ലെന്നു മാത്രമല്ല, സ്വദേശത്തെ നല്ല പണം കടത്തുകയും ചെ യ്യുന്നു. മോദിയെ കെട്ടിപ്പിടിക്കുന്ന കള്ളന്മാരുടെ പേരിലും ‘മോദി’ വന്നത് യാദൃച്ഛികമാണോ എന്നറിയില്ല. അംബാനിയും അദാനിയും മോദിമാരും രാജ്യത്തിന്റെ സമ്പത്ത് ഊറ്റിയെടുത്ത് തടിച്ചുകൊഴുക്കുന്നത് മുഖ്യധാരാ മാധ്യമങ്ങള്‍ക്ക് എത്രകാലം പൂഴ്ത്തിവെക്കാനാവും.
രാജ്യത്തെ രണ്ടാമത്തെ ഏറ്റവും വലിയ പൊതു മേഖലാ ബാങ്കായ പഞ്ചാബ് നാഷണല്‍ ബാങ്കില്‍നിന്ന് 11,400 കോടി രൂപ തട്ടിച്ച് നീരവ്‌മോദി എന്ന വജ്ര വില്‍പനക്കാരന്‍ കഴിഞ്ഞ 13നാണ് രാജ്യത്തുനിന്ന് മുങ്ങിയത്. 3695 കോടിയുടെ വായ്പ തട്ടിയെടുത്ത് റോട്ടോമാക് പേന നിര്‍മാതാവ് വിക്രം കോത്താരി മുങ്ങിയ വാര്‍ത്തയും പിന്നാലെയെത്തി. ആദ്യം ബാങ്ക് ഓഫ് ബറോഡയാണ് എണ്ണൂറു കോടി രൂപ തട്ടിച്ചതായി ഇയാള്‍ക്കെതിരെ പരാതി നല്‍കിയതെങ്കില്‍ പിന്നീട് യൂണിയന്‍ ബാങ്ക്, ബാങ്ക് ഓഫ് ഇന്ത്യ, ഇന്ത്യന്‍ ഓവര്‍സീസ് ബാങ്ക് തുടങ്ങി ഏഴു ബാങ്കുകളുടെ കണ്‍സോര്‍ഷ്യത്തില്‍ നിന്ന് 2,919 കോടി രൂപ കോത്താരി വായ്പയെടുത്തെന്ന വിവരം പുറത്തുവന്നു.
രാജ്യത്തെ പൊതുമേഖല ബാങ്കുകള്‍ക്ക് കഴിഞ്ഞ ഏതാനും വര്‍ഷങ്ങള്‍ക്കിടെ 61,260 കോടി രൂപയാണ് നഷ്ടപ്പെട്ടതെന്നാണ് റിസര്‍വ് ബാങ്ക് ഓഫ് ഇന്ത്യയുടെ റിപ്പോര്‍ട്ട്. വെറും 8670 കേസുകളിലാണിത്. കഴിഞ്ഞ സാമ്പത്തിക വര്‍ഷം മാത്രം 17634 കോടി രൂപയുടെ ബാങ്ക് തട്ടിപ്പ് നടന്നു. നീരവ് മോദിയുടെ 12000 കോടിയും വിക്രം കോത്താരിയുടെ 4000 കോടിയും ചേര്‍ന്നാലോ. 836,782 കോടി രൂപയുടെ കിട്ടാക്കടമാണ് രാജ്യത്ത് ബാങ്കിങ് മേഖലയിലുള്ളത്. ഇതില്‍ 733,974 കോടി രൂപയും പൊതുമേഖലാ ബാങ്കുകളിലാണ്.
ഇന്ത്യന്‍ ബാങ്കുകളിലെ മൊത്തം കിട്ടാക്കടത്തില്‍ 85 ശതമാനത്തോളം അഞ്ചു കോടി രൂപക്കു മുകളിലുള്ള വായ്പകളാണ്. മൊത്തം കുടിശികയുടെ മുഖ്യ പങ്ക് അടക്കാനുള്ളത് 150 ഓളം മുന്‍നിര വ്യവസായ ഗ്രൂപ്പുകളും. 9.9 ശതമാനം അറ്റ നിഷ്‌ക്രിയ ആസ്തിയുള്ള ഇന്ത്യന്‍ ബാങ്കിങ് മേഖല കിട്ടാക്കടത്തിന്റെ കാര്യത്തില്‍ ബ്രിക്‌സ് രാജ്യങ്ങളില്‍ ഒന്നാം സ്ഥാനത്തും ലോകത്ത് അഞ്ചാം സ്ഥാനത്തുമാണ്. പൊതുമേഖലാ ബാങ്കുകള്‍ക്ക് 2.11 ലക്ഷം കോടി രൂപ കേന്ദ്ര സര്‍ക്കാര്‍ നല്‍കുന്നുവെന്ന വാര്‍ത്ത കേള്‍ക്കുമ്പോള്‍ ഇമ്പമുള്ളതും ഫലത്തില്‍ കടക്കല്‍ കത്തിവെക്കുന്നതുമാണ്. കേന്ദ്ര ബജറ്റിന്റെ അഞ്ചില്‍ ഒന്നും ഇങ്ങനെ ബാങ്കിന് നല്‍കുമ്പോള്‍ അതെത്തിച്ചേരുന്നത് അംബാനി, അദാനി, വിജയ് മല്യ, ലളിത് മോദി, നീരവ് മോദിമാരിലേക്കാണെന്നത് രഹസ്യമല്ല. ഇതിനു പുറമെയാണ് കടപ്പത്രം വഴി 1.35 ലക്ഷം കോടിയുടെ സമാഹരണം.
ഈയടുത്ത് പുറത്തുവന്ന ഇന്റര്‍നാഷണല്‍ റെറ്റ്‌സ് ഗ്രൂപ്പായ ഓക്‌സ്ഫാമിന്റെ വാര്‍ഷിക ഓക്‌സ്ഫാം സര്‍വേയില്‍ പറയുന്നത് ഇന്ത്യയിലേ ആകെ സമ്പത്തിന്റെ 73 ശതമാനം സമ്പത്തും കൈവശം വെച്ചിരിക്കുന്നത് ഒരു ശതമാനം മാത്രം വരുന്ന ധനവാന്‍മാരിലാണെന്നാണ്. ആ ഒരു ശതമാനത്തിന്റെ മൊത്തം ആസ്തി 20.9 ലക്ഷം കോടി രൂപയിലേറെയാണ്. കേന്ദ്ര പൊതു ബജറ്റിനേക്കാളും വരുമിത്. കഴിഞ്ഞ വര്‍ഷം 4.89 ലക്ഷം കോടിയുടെ വര്‍ധനവാണ് ആ ഒരു ശതമാനത്തിനുണ്ടായത്. കഴിഞ്ഞ ഒരു വര്‍ഷത്തിനിടെ 17 പേരാണ് 100 കോടി ആസ്തിയുള്ളവരുടെ പട്ടികയില്‍ പുതുതായി ഇടം നേടിയത്.
ഈയൊരു ശതമാനം വരുന്ന കോര്‍പറേറ്റുകളുടെ 114000 കോടിയുടെ കടമാണ് കേന്ദ്ര സര്‍ക്കാര്‍ എഴുതിത്തള്ളിയത്. അതിനു പുറമെ 90 ശതമാനം ജനത്തിനുള്ള പണത്തില്‍ നിന്നാണ് 9000 കോടി രൂപയുമായി വിജയ് മല്യയെന്ന മദ്യവ്യവസായി ലണ്ടനിലേക്ക് രക്ഷപ്പെട്ടത്. ഇപ്പോള്‍ 11300 കൊടി തട്ടിച്ച് നീരവ് മോദി രക്ഷപ്പെട്ടിരിക്കുന്നു. അദ്ദേഹത്തിന്റെ ഭാര്യയും മക്കളുമെല്ലാം വിദേശ പൗരത്വമുള്ളവരും അവിടെ സുരക്ഷിതരുമാണ്. നോട്ടീസ് അയച്ചാലോ, നിയമ നടപടി ശക്തമായി നീക്കിയാലോ നഷ്ടപ്പെട്ടതില്‍ ഒരു രൂപ പോലും തിരിച്ചു കിട്ടില്ല. കാരണം ഈ വായ്പകളില്‍ ഏറിയ കൂറും നല്‍കിയിരിക്കുന്നത് വേണ്ടത്ര ഈടില്ലാതെയാണ്. അല്ലെങ്കില്‍ പി.എന്‍.ബിയില്‍ നടന്നത് പോലെ വ്യാജ രേഖകളുടെ ബലത്തിലാണ് കുത്തകകള്‍ക്ക് വായ്പ നല്‍കുന്നത്. തിരിച്ചടവില്ലെങ്കില്‍ ഈടാക്കാന്‍ ഒന്നുമുണ്ടാവില്ല. നീരവ് മോദി വിദേശത്തു നിന്ന് പി.എന്‍.ബിയോടും സി.ബി.ഐയോടും ഭീഷണിപ്പെടുത്തിയത്, നിങ്ങള്‍ റെയ്ഡ് നടത്തുന്നത് കമ്പനിയുടെയോ തന്റെയോ സ്വത്തിലല്ലെന്നാണ്. വിജയ് മല്യക്ക് 4400 കോടിയുടെ കണ്‍സോര്‍ഷ്യം വായ്പ അനുവദിച്ചത് കിംഗ് ഫിഷര്‍ എന്ന ബ്രാന്‍ഡ് നെയ്മും വാടകക്ക് എടുത്ത വിമാനങ്ങളുമായിരുന്നു. മല്യ മുങ്ങിയപ്പോള്‍ വിമാനങ്ങള്‍ ഉടമകള്‍ കൊണ്ടുപോയി. എല്ലാം അറിയുന്ന ഉദ്യോഗസ്ഥര്‍ കൈമലര്‍ത്തി.
പഞ്ചാബ് നാഷണല്‍ ബാങ്കില്‍ നീരവ് മോദിയും കുടുംബാംഗങ്ങളും അമ്മാവനും ഉള്‍പ്പെട്ട ലോബി നടത്തിയ തട്ടിപ്പിന്റെ പേരില്‍ മുംബൈ ബ്രാഡി ഹൗസ് ശാഖയിലെ ഏതാനും ജീവനക്കാര്‍ക്ക് ജോലി പോയത്രെ. തലമുറകള്‍ക്ക് ജീവിക്കാനുള്ളത് സമ്പാദിച്ചവര്‍ക്ക് എന്തു ജോലി. ലെറ്റര്‍ ഓഫ് ക്രെഡിറ്റും ലെറ്റര്‍ ഓഫ് അണ്ടര്‍ടേക്കിങ്ങും പി.എന്‍.ബി കൊടുക്കുമ്പോള്‍ നീരവ് മോദിയുടെ ജാമ്യം എന്തായിരുന്നു. ഇപ്പോള്‍ സി.ബി.ഐ റെയ്ഡ് നടത്തുന്നതൊന്നുമല്ലെന്നും ചില ഉന്നത രാഷ്ട്രീയ നേതൃത്വവുമായുള്ള ചങ്ങാത്തമാണെന്നുമാണ് ആരോപണം. 270 കോടി രൂപയുടെ തട്ടിപ്പ് പുറത്തായപ്പോള്‍ ബാങ്ക്, സി.ബി.ഐക്കും എന്‍ഫോഴ്‌സ്‌മെന്റ് ഡയറക്ടറേറ്റിനും നല്‍കിയ പരാതി നിലനില്‍ക്കെയാണ് അതിലും വലിയ തട്ടിപ്പ് നടന്നത്. 2016 ജൂലൈ 29 നു ബാംഗ്ലൂരിലെ ബിസിനസുകാരനായ ഹരി പ്രസാദ് ഇത്തരം ഒരു തട്ടിപ്പ് നടക്കുന്നതായി പ്രധാനമന്ത്രിയുടെ ഓഫീസിനെ അറിയിച്ചിരുന്നുവത്രെ. വിജയ് മല്യയെ പോലെ ഇദ്ദേഹവും വിദേശത്തേക്ക് കടന്നുകളയുമെന്ന മുന്നറിയിപ്പും അദ്ദേഹം നല്‍കിയിരുന്നു. നീരവ് മോദിയുടെ അമ്മാവനും ഗീതാഞ്ജലി ജെംസ് എന്ന സ്ഥാപനത്തിന്റെ ചെയര്‍മാനും മാനേജിങ് ഡയറക്ടറുമായ മേഹുല്‍ എം ചോക്‌സിയെ കുറിച്ചാണ് പരാതിയില്‍ പ്രധാനമായും ആരോപണം.
ഈ മേഖലയിലുള്ളവര്‍ ഉന്നയിക്കുന്ന ചോദ്യങ്ങള്‍ക്കൊന്നും ഉത്തരമില്ല. ലെറ്റര്‍ ഓഫ് ക്രെഡിറ്റിന്മേല്‍ കോടികള്‍ വിദേശത്തേക്ക് ട്രാന്‍സ്ഫര്‍ ചെയ്തപ്പോള്‍ ബാങ്കിന്റെ സ്വിഫ്റ്റ് സാങ്കേതിക സംവിധാനം മറികടന്നത് എങ്ങനെ, ഇടപാടുകള്‍ ബാങ്ക് രേഖകളില്‍ എന്തുകൊണ്ട് ഉള്‍പ്പെട്ടില്ല, ഒരു മാനേജരും കാഷ്യറും ഏതാനും ക്ലര്‍ക്കുമാരും ചേര്‍ന്നു നടത്തുമോ, ഒരു പരിശോധനയുമില്ലാതെ അലഹബാദ് ബാങ്ക് 4000 കോടിയും ആക്‌സിസ് ബാങ്ക് 3000 കോടിയും യുകോ ബാങ്ക് 100 കോടി രൂപയും യുണൈറ്റഡ് ബാങ്ക് ഓഫ് ഇന്ത്യ 25 കോടിയും യൂണിയന്‍ ബാങ്ക് 2000 കോടിയും പഞ്ചാബ് നാഷണല്‍ ബാങ്കിന്റെ ലെറ്റര്‍ ഓഫ് അണ്ടര്‍ടേക്കിങ് സ്വീകരിച്ച് വായ്പ നല്‍കിയതിന്റെ യുക്തിയെന്ത്. പൊതുമേഖലാ ബാങ്കായ എസ്.ബി.ഐ ഉള്‍പ്പെടെ മറ്റ് 17 ബാങ്കുകള്‍ വായ്പയായി നല്‍കിയിരിക്കുന്നത് 3000 കോടി രൂപയാണെന്നാണ് പ്രാഥമിക വിവരം.
ദാവോസില്‍ പ്രധാനമന്ത്രിക്ക് ഒപ്പം നില്‍ക്കു ന്ന നീരവ് മോദിയുടെ ചിത്രവും ഒരു വായ്പാ ഈടാണ്. സാധാരണക്കാരന്‍ കാര്‍ഷികാവശ്യത്തിനോ വീടുവെക്കാനോ വിവാഹത്തിനോ ചെറിയ വായ്പകള്‍ക്ക് സമീപിക്കുമ്പോഴുള്ള തടസ്സവാദങ്ങളോ അവയുടെ തിരിച്ചടവ് മുടങ്ങിയാലുള്ള ജപ്തി നടപടികളോ മഹാകള്ളന്മാര്‍ക്ക് ഇല്ലെന്നു മാത്രമല്ല, അതിന്റെ പേരിലും ബാങ്കുകള്‍ക്ക് പൊതുപണം കയ്യിട്ടുവാരാന്‍ അവസരം ലഭിക്കുകയാണ് ചെയ്യുന്നത്.
പുതിയ ബാങ്കിങ് തട്ടിപ്പുകളെ കുറിച്ച് സമഗ്ര അന്വേഷണം ആവശ്യപ്പെട്ട് ഇന്നലെ സുപ്രീം കോടതിയില്‍ പൊതുതാല്‍പര്യ ഹര്‍ജിയായി വന്നപ്പോള്‍ നീരവ് മോദിയെ ഇന്ത്യയിലെത്തിക്കണമെന്ന ആവശ്യത്തോട് മുഖം തിരിക്കുന്നതായിരുന്നു കേന്ദ്ര സര്‍ക്കാര്‍ നിലപാട്. എഫ്.ഐ. ആര്‍ രജിസ്റ്റര്‍ ചെയ്ത് അന്വേഷണം നടക്കുന്നുണ്ടെന്നും ഇടപെടരുതെന്നും അറ്റോണി ജനറല്‍ കെ.കെ വേണുഗോപാല്‍ വാദിച്ചപ്പോള്‍ അടുത്ത 16ലേക്ക് കേസ് നീട്ടി സുപ്രീം കോടതി മൗനത്തിന്റെ കുപ്പായമണിയുകയായിരുന്നു.
3000 കോടി ചെലവഴിച്ച് മുംബൈയില്‍ ശിവജി പ്രതിമയും 2500 കോടി മുടക്കി ഗുജറാത്തില്‍ പട്ടേല്‍ പ്രതിമയും ഉണ്ടാക്കുമ്പോള്‍ കക്കൂസുകളുടെ പരസ്യത്തിനായി 3755 കോടിയും ചെലവാക്കുന്നു. 4500 കോടി മുടക്കി പ്രധാനമന്ത്രിക്ക് മിസൈല്‍ പ്രൂഫ് വിമാനം വാങ്ങുമ്പോള്‍ കൂടെ സഞ്ചരിക്കുന്നതും കൊള്ളക്കാരായ മോദിമാരാണ്. ലോകത്താകമാനം കഴിഞ്ഞ ഒരു വര്‍ഷം സമ്പാദിക്കപ്പെട്ട സമ്പത്തിന്റെ 82 ശതമാനം എത്തിച്ചേര്‍ന്നിരിക്കുന്നത് ഒരു ശതമാനം സമ്പന്നരിലേക്കാണെന്ന കണക്കുമായി തട്ടിച്ചു നോക്കുമ്പോള്‍ 2033ല്‍ ഇന്ത്യ ലോകത്തിന്റെ നെറുകയില്‍ എന്ന പരസ്യ വാചകത്തിന്റെ സാംഗത്യവും ചിന്തിക്കണം. ഗ്രാമത്തില്‍ കൂലിവേല ചെയ്യുന്ന ഒരാളുടെ ഒരു വര്‍ഷത്തെ വരുമാനവും കോര്‍പറേറ്റ് സ്ഥാപനത്തിലെ ജോലിക്കാരന്റെ 17.5 ദിവസത്തെ വരുമാനവും തുല്യമാണ്.
നികുതി ഇളവുകളും വായ്പാ ഉദാര സമീപനവും ഒരു ശതമാനത്തില്‍ കേന്ദ്രീകരിക്കാനും തൊണ്ണൂറു ശതമാനവും നോട്ടപ്പുള്ളികളാവാനും അധികം കാരണം തിരയേണ്ടതില്ല. ഗ്ലോബല്‍ ഹംഗര്‍ ഇന്‍ഡക്‌സില്‍ 97-ാം സ്ഥാനവും 2016 ലെ ഹ്യൂമന്‍ ക്യാപിറ്റല്‍ ഇന്‍ഡക്‌സില്‍ 105-ാം സ്ഥാനവുമാണ് ഇന്ത്യക്കുള്ളതെന്നാണ് സര്‍വേകള്‍ പറയുന്നത്. ഇന്റര്‍നാഷണല്‍ ചൈല്‍ഡ് ഡേ റിപ്പോര്‍ട്ടില്‍ സ്‌കൂളില്‍ പോകാത്ത കുട്ടികളുടെ എണ്ണത്തിന്റെ അടിസ്ഥാനത്തില്‍ ഇന്ത്യ 116-ാം സ്ഥാനത്താണ്. ദക്ഷിണാഫ്രിക്കക്കും (78) പിന്നില്‍. ജനത്തിന്റെ ജീവിത നിലവാരം താഴോട്ടും സമ്പന്നരുടെ വരുമാനം മുകളിലോട്ടും പോകുമ്പോഴും ജി.ഡി.പി ഉയരുന്നുന്നതിന്റെ അര്‍ത്ഥമെന്താണ്.
പിടിച്ചുപറിയും കൊള്ളയും ഭരണകൂടത്തിന്റെ പേരിലാവുമ്പോള്‍ അതു നിയമവിധേയമാകുമെന്നാണ് വെപ്പ്. ജനാധിപത്യ രാജ്യത്ത് പൗരന്മാര്‍ ബന്ദിയാക്കപ്പെടുകയും പല നിയമത്തിന്റെയും പേരില്‍ പാപ്പരാക്കപ്പെടുകയും ചെയ്യുമ്പോള്‍ മുടിഞ്ഞു പോകുന്നത് യഥാര്‍ത്ഥത്തില്‍ രാജ്യം തന്നെയാണ്. നിയമ വിധേയമായ സംഘടിത കൊള്ള എന്ന് ലോകത്തെ ഒന്നാംകിട സാമ്പത്തിക ശാസ്ത്രജ്ഞന്‍ ഡോ. മന്‍മോഹന്‍ സിങ് രാജ്യസഭയില്‍ പൊട്ടിത്തെറിക്കുമ്പോള്‍ അപൂര്‍വമായി മാത്രം പാര്‍ലമെന്റിലെത്താറുള്ള പ്രധാനമന്ത്രി മോദി തലക്ക് കൈകൊടുത്ത് നിര്‍വികാരനായി ഇരിക്കുന്ന ചിത്രം മറക്കാന്‍ സമയമാട്ടില്ല. രാജ്യത്ത് നിലവിലുള്ള 86 ശതമാനം നോട്ടുകള്‍ (500, 1000) നിരോധിച്ച് ജനം ബാങ്കിന് മുമ്പില്‍ ക്യൂ നില്‍ക്കുമ്പോള്‍ 2016 നവംബര്‍ 24നാണ് സംഭവം. നോട്ടുമാറ്റത്തിന്റെ പേരില്‍ ‘സംഘടിത കൊള്ള’യും ‘നിയമപരമാക്കപ്പെട്ട പിടിച്ചുപറി’യുമാണ് കേന്ദ്ര സര്‍ക്കാര്‍ നടത്തുന്നതെന്ന് ഓര്‍മ്മപ്പെടുത്തിയ മന്‍മോഹന്‍ സിങ് ഇതിന്റെ പേരില്‍ ജി.ഡി.പി രണ്ടു ശതമാനം ഇടിയുമെന്നും പ്രവചിച്ചു.
അന്‍പതു ദിവസങ്ങള്‍ തരൂ, എല്ലാം നേരെയായില്ലെങ്കില്‍ തന്നെ ചുട്ടു കൊല്ലൂവെന്ന് രാജ്യത്തോട് പ്രഖ്യാപിച്ച പ്രധാനമന്ത്രി മോദി പക്ഷെ, മന്‍മോഹന്‍ സിങിന്റെ വിമര്‍ശനത്തോട് പുഛത്തോടെയും പരിഹാസത്തോടെയുമാണ് പ്രതികരിച്ചത്. മഴക്കോട്ടിട്ട് കുളിക്കുന്നവന്‍ എന്നു മോദി കുറ്റപ്പെടുത്തിയ മന്‍മോഹന്‍ സിങ് പറഞ്ഞത് വര്‍ഷം ഒന്നാകും മുമ്പ് എല്ലാവരും കണ്ടതും അനുഭവിക്കുകയുമാണ്. 7965 കോടി രൂപയാണ് നോട്ട് നിരോധനം കൊണ്ട് രാജ്യത്തിന് നഷ്ടമായത്. ജോലി-വ്യവസായ നഷ്ടം ഇതിനു പുറമെയുണ്ട്. ഇപ്പോഴും പഴയ നോട്ടെടുക്കുന്നവര്‍ പിടിയിലാകുമ്പോള്‍ നോട്ടസാധുവാക്കലിന്റെ പിന്നിലെ നിഷ്‌കളങ്കത ആര്‍ക്കും ഊഹിക്കാം.
ലോക രാജ്യങ്ങള്‍ സാമ്പത്തികമായി കൂപ്പുകുത്തിയപ്പോഴും ഒരു പോറലുമേല്‍ക്കാതെ ഇന്ത്യയെ പിടിച്ചുനിര്‍ത്താന്‍ പ്രധാനമന്ത്രി മന്‍മോഹന്‍ സിങിന് സഹായകമായത് രാജ്യ ത്തെ ശക്തമായ പൊതുമേഖലാ ബാങ്കുകളായിരുന്നു. നോട്ടു നിരോധനത്തിന്റെ പേരില്‍ ജനത്തിന്റെ കീശയിലെ പണം അപ്പാടെ ബാങ്കുകളില്‍ നിക്ഷേപിപ്പിച്ചപ്പോള്‍ പല പേരില്‍ ജനത്തെ പിഴിയാനുള്ള അവസരമാക്കി അവര്‍. നട്ടുച്ച വെയിലില്‍ പകലന്തിയോളം കഷ്ടപ്പെട്ട് സമ്പാദിച്ച പണം ബാങ്കുകളിലിട്ട് അന്തിപ്പട്ടിണി കിടക്കുന്നവരോടാണ് അഛാദിന്‍ സ്വപ്നം കാണാന്‍ പറയുന്നത്.

kerala

സി.പി.എം എന്ന വർഗീയതയുടെ കാളിയൻ

രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

Published

3 days ago

November 20, 2024

webdesk13

മുന്‍കൂട്ടി തയ്യാറാക്കിയ പൊറാട്ടുനാടകങ്ങളെല്ലാം എട്ടു നിലയില്‍ പൊട്ടുകയും ജനങ്ങളുടെ മുന്നില്‍ തീര്‍ത്തും പരിഹാസ്യരായി മാറുകയും ചെയ്തപ്പോള്‍ കേവല രാഷ്ട്രീയ നേട്ടങ്ങള്‍ക്കായി സംഘ്പരിവാറിനെ നാണിപ്പിക്കുന്ന വര്‍ഗീയ ധ്രുവീകരണത്തിന്റെ മാറാപ്പുപേറുന്ന സി.പി.എമ്മിന്റെ നെറികെട്ട സമീപനം കണ്ട് കേരളം മൂക്കത്തുവിരല്‍ മൂക്കത്തുവിരല്‍ വെച്ചുപോവുകയാണ്. ഈ രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

കേരളം ഇന്നേവരെ സാക്ഷ്യം വഹിച്ചിട്ടില്ലാത്തവിധം അഴിമതിയുടെയും സ്വജനപക്ഷപാതത്തിന്റെയും കൂത്തരങ്ങായി സംസ്ഥാനം മാറിയപ്പോള്‍ ഭരണത്തെക്കുറിച്ച് ഒരക്ഷരംപോലും ഉരിയാടാന്‍ കഴിയാത്ത മുഖ്യമന്ത്രിയും സംഘവും ന്യൂനപക്ഷ ഭൂരിപക്ഷ പ്രീണനങ്ങള്‍ തരാതതരംപോലെ ഉപയോഗിച്ച് കൊണ്ടിരിക്കുകയാണ്. എന്നാല്‍ പഞ്ചതന്ത്രം കഥയിലെ കുറുക്കന്റെ ഈ കുശാഗ്രബുദ്ധി തിരിച്ചറിഞ്ഞ ജനാധിപത്യ വിശ്വാസികള്‍ മൂര്‍ത്താവ് നോക്കി പ്രഹരം നല്‍കിയിട്ടും അതില്‍നിന്നൊന്നും ഒരുപാഠവും പഠിക്കാന്‍ ഇക്കൂട്ടര്‍ക്ക് സാധിച്ചിട്ടില്ല എന്നാണ് പാലക്കാട് ഉപതിരഞ്ഞെടുപ്പ് തെളിയിക്കുന്നത്.

ലോക്‌സഭാ തിരഞ്ഞെടുപ്പില്‍ മുസ്‌ലിം ഭൂരിപക്ഷ പ്രദേശങ്ങളില്‍ പൗരത്വ വിഷയവും ക്രിസ്ത്യന്‍ പ്രദേശങ്ങളില്‍ മണിപ്പൂരുമെല്ലാം ഉയര്‍ത്തിപ്പിടിച്ച് പ്രചണ്ഡമായ പ്രചരണങ്ങള്‍ നടത്തിയെങ്കിലും ഈ കുതന്ത്രങ്ങള്‍ തിരിച്ചറിഞ്ഞ ജനങ്ങള്‍ ലക്ഷോപലക്ഷം വോട്ടുകള്‍ക്കാണ് അവരെ തൂത്തെറിഞ്ഞത്. എന്നിട്ടും പുഴുത്തുനാറിയ ഇതേ തന്ത്രങ്ങള്‍ തന്നെ വീണ്ടുംപയറ്റിക്കൊണ്ടിരിക്കുമ്പോള്‍ ഇടതുമുന്നണി യെന്ന സംവിധാനം എത്തിപ്പെട്ട അപചയം എത്രമേല്‍ ഭീതിതമാണെന്നതാണ് പ്രകടമായിക്കൊണ്ടിരിക്കുന്നത്. പാലക്കാട് ഉപതിരഞ്ഞെടുപ്പില്‍ എത്രമാത്രം പച്ചയായ രീതിയിലാണ് വര്‍ഗീയതയുടെ വിഷവിത്തുകള്‍ സി.പി.എം വിതറിക്കൊണ്ടിരിക്കുന്നത് എന്നതിന്റെ ഏറ്റവും ഒടുവില ത്തെ ഉദാഹരണമാണ് ഇന്നലെ രണ്ടുപത്രങ്ങള്‍ക്ക് നല്‍കിയ പരസ്യങ്ങള്‍. തിരഞ്ഞെടുപ്പു കമ്മീഷന്റെ അനുമതിപോലും നേടാതെ മുസ്‌ലിം സമുദായത്തിലെ രണ്ടു വിഭാഗങ്ങള്‍ നടത്തുന്ന പത്രങ്ങള്‍ക്ക് വര്‍ഗീയ വിഷംചീറ്റുന്ന പരസ്യങ്ങള്‍ നല്‍കിയതിലൂടെ ന്യൂനപക്ഷവോട്ടുകള്‍ സ്വന്തംപെ ട്ടിയിലാക്കാമെന്ന് കരുതുന്ന പിണറായിയും കൂട്ടരും ഈ സമുദായത്തെക്കുറിച്ച് എന്താണ് ധരിച്ചുവെച്ചിരിക്കുന്നത് എന്നതാണ് ബോധ്യമാകാത്തത്.

സി.പി.എം ആര്‍.എസ്.എസ് ബാന്ധവം വ്യത്യസ്ത സാഹചര്യങ്ങളിലായി നിരന്തരം പുറത്തുവന്നുകൊണ്ടിരിക്കുകയും ആ ഡീലിങ്ങിന്റെ അ നന്തരഫലമായി മോദി സര്‍ക്കാറിന്റെ അതേ മാതൃകയില്‍ പതിറ്റാണ്ടുകളുടെ പോരാട്ടത്തിലൂടെ നേടിയെടുത്ത ന്യൂ നപക്ഷങ്ങളുടെ അവകാശങ്ങളുടെ കടക്കല്‍ പിണറായി സര്‍ക്കാറും നിരന്തരമായി കത്തിവെച്ചു കൊണ്ടിരിക്കുകയുമാണ്. ഈ അന്യായത്തിന്റെയും അനീതിയുടെയും പ്രതിഫലനം കൂടിയാണ് ലോക്‌സഭാ തിരഞ്ഞെടുപ്പില്‍ സംസ്ഥാനത്ത് പ്രകടമായത്. ആ യാഥാര്‍ത്ഥ്യത്തെ തിരിച്ചറി ഞ്ഞ് തിരുത്തലുകള്‍ വരുത്തുന്നതിന് പകരം വൈകാരിക വിക്ഷോഭങ്ങള്‍ക്കൊണ്ട് ഒരു സമുദായത്തെ എക്കാലവും വഞ്ചിച്ചുനിര്‍ത്താമെന്നും ബംഗാളിലെയും ത്രിപുരയിലെയും പോലെ അവരെ വണ്ടിക്കാളകളാക്കി മാറ്റാമെന്നുമാണ് സി.പി.എം സ്വപ്‌നംകാണുന്നതെങ്കില്‍ കേരളത്തിലെ ന്യൂനപക്ഷങ്ങളെക്കുറിച്ച് സി.പി.എമ്മിന് ഇനിയും ഒരു ചുക്കും മനസ്സിലായിട്ടില്ല എന്നുമാത്രമേ കരുതാന്‍ കഴിയൂ.

ഒരു ഭാഗത്ത് ന്യൂനപക്ഷങ്ങളുടെ കണ്ണില്‍പൊടിയിടാനുള്ള ശ്രമങ്ങള്‍ നടത്തുമ്പോള്‍ മറുഭാഗത്ത് ഭൂരിപക്ഷ വര്‍ഗീയത ആളിക്കത്തിക്കാനും ഇവര്‍ ഒരുമടിയും കാണിക്കുന്നില്ല. പക്ഷേ അതിനായി രൂപപ്പെടുത്തുന്ന അജണ്ടകളെല്ലാം അമ്പേ പരാജയപ്പെട്ടുപോയി എന്നതാണ് വാസ്തവം. പാണക്കാട് സയ്യിദ് സാദിഖലി ശിഹാബ് തങ്ങള്‍ക്കെതിരെ പിണറായി വിജയന്‍ രംഗത്തെത്തിയത് ഈ അജണ്ടയുടെ ഭാഗമായിരുന്നുവെങ്കില്‍ ആ ഹീനശ്രമങ്ങളെ കക്ഷിരാഷ്ട്രീയങ്ങള്‍ക്കതീതമായി ജനങ്ങള്‍ എതിര്‍ത്തുതോല്‍പ്പിക്കുകയായിരുന്നു. വിഭാഗീയതയുടെയും വിദ്വേഷത്തിന്റെയും വഴിയില്‍ നിന്ന് സ്‌നേഹത്തിന്റെയും സഹിഷ്ണുതയുടെയും മാര്‍ഗത്തിലേക്ക് ഒരാള്‍ കടന്നുവരികയും പുകള്‍പെറ്റ കൊടപ്പനക്കല്‍ തറവാട്ടിലെത്തി അനുഗ്രഹങ്ങളേറ്റുവാങ്ങുകയും ചെയ്യുമ്പോള്‍ ഇടതുപാളയത്തില്‍ നിന്ന് മുഖ്യ മന്ത്രിയുടെ നേതൃത്വത്തില്‍ കൂട്ടനിലവിളികളുയരുന്നതെന്തിനാണെന്ന ജനാധിപത്യകേരളത്തിന്റെ ചോദ്യത്തിന് മുന്നില്‍ സി.പി.എം ഉത്തരംമുട്ടിനില്‍ക്കുകയാണ്. വര്‍ഗീയ തയുടെ കാളിയന്‍മാരായി മാറിയ സി.പി.എമ്മിന്റെ ധ്രുവി കരണ ശ്രമങ്ങള്‍ക്ക് ഏതെങ്കിലും റാന്‍മുളികളുടെ ഒളിഞ്ഞും തെളിഞ്ഞമുള്ള പിന്തുണ ലഭിക്കുന്നുണ്ടാവാം. എന്നാല്‍ ഈ നെറികേടിനെതിരെയുള്ള മതേതര കേരളത്തിന്റെ പ്രതികരണം ഇന്ന് പാലക്കാട് നിയമസഭാ
മണ്ഡലത്തില്‍ വിനിയോഗിക്കപ്പടുമെന്ന കാര്യത്തില്‍ സംശയമില്ല.

Video Stories

മഹാരാഷ്ട്രയും ഝാര്‍ഖണ്ഡും വിധിയെഴുതുന്നു

ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം.

Published

3 days ago

November 20, 2024

webdesk13

നിശ്ശബ്ദ പ്രചാരണവും അവസാനിപ്പിച്ച് മഹാരാഷ്ട്ര വിധിയെഴുതുന്നു. 288 സീറ്റുകളിലേക്ക് 4,136 പേരാണ് ജനവിധി തേടുന്നത്. ശിവസേന, ബി.ജെ.പി, എൻ.സി.പി കൂട്ടുകെട്ടിലെ മഹായുതിയും കോൺഗ്രസ്, ശിവസേന-യു.ബി.ടി, എൻ.സി.പി-എസ്.പി കൂട്ടുകെട്ടിലെ മഹാവികാസ് അഘാഡിയും (എം.വി.എ) തമ്മിലാണ് മുഖ്യ പോരാട്ടം.

ഇത്തവണ 102 സീറ്റുകളിലാണ് കോൺഗ്രസ് മത്സരിക്കുന്നത്. ലോക്സഭ തെരഞ്ഞെടുപ്പിലെ തിരിച്ചുവരവാണ് കോൺഗ്രസിനും എം.വി.എയിലെ മറ്റ് ഘടക കക്ഷികൾക്കും ആത്മവിശ്വാസമേകുന്നത്. ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം. ശനിയാഴ്ചയാണ് വോട്ടെണ്ണൽ. ചൊവ്വാഴ്ചക്കകം സർക്കാർ രൂപവത്കരിക്കണം.

ഝാർഖണ്ഡ് നിയമസഭ തെരഞ്ഞെടുപ്പിലെ അവസാന ഘട്ട വോട്ടെടുപ്പും ബുധനാഴ്ച നടക്കും. 38 മണ്ഡലങ്ങളിലേക്കാണ് വോട്ടെടുപ്പ്. മഹാരാഷ്ട്രയിൽ വിമതരുൾപ്പെടെ 2,086 സ്വതന്ത്രരും പ്രാദേശിക പാർട്ടികളും മുന്നണികളിലെ സൗഹൃദ പോരും വിധി നിർണയത്തിൽ മുഖ്യ പങ്കുവഹിക്കും. വിവിധ ജാതി സമുദായങ്ങൾക്കിടയിലെ വിള്ളലും കർഷക രോഷവും പുകയുന്ന മഹാരാഷ്ട്രയിൽ ജനം ആർക്കൊപ്പം നിൽക്കുമെന്ന് മുൻകൂട്ടി പ്രവചിക്കാനാകാത്ത അവസ്ഥ.

ഇരു മുന്നണിയും 170ലേറെ സീറ്റുകൾ കിട്ടുമെന്നാണ് അവകാശപ്പെടുന്നത്. ഭരണം പിടിക്കാൻ 145 സീറ്റ് വേണം. തൂക്കുസഭ സാധ്യതയും പ്രവചിക്കപ്പെടുന്നുണ്ട്. അങ്ങനെ വന്നാൽ പുതിയൊരു രാഷ്ട്രീയ നാടകത്തിനുകൂടി മഹാരാഷ്ട്ര സാക്ഷ്യംവഹിക്കേണ്ടിവരും. ഇരുമുന്നണിയിലെയും ആറ് പാർട്ടികൾക്കും തെരഞ്ഞെടുപ്പ് നിർണായകമാണ്. ഝാർഖണ്ഡിൽനവംബർ 13ന് നടന്ന ആദ്യഘട്ട വോട്ടെടുപ്പിൽ 43 മണ്ഡലങ്ങളിലെ വോട്ടർമാർ വിധിയെഴുതിയിരുന്നു.

നിശബ്ദ പ്രചാരണത്തിന്റെ ദിവസമായ ചൊവ്വാഴ്ച ജെ.എം.എം നേതൃത്വത്തിലുള്ള ഇൻഡ്യ സഖ്യവും ബി.ജെ.പി നേതൃത്വത്തിലുള്ള എൻ.ഡി.എ സഖ്യവും സമൂഹമാധ്യമങ്ങളിലൂടെ പിന്തുണ ഉറപ്പാക്കുന്ന തിരക്കിലായിരുന്നു. മുഖ്യമന്ത്രി ഹേമന്ത് സോറനും സംസ്ഥാനത്ത് ബി.ജെ.പിയുടെ തെരഞ്ഞെടുപ്പ് ചുമതലയുള്ള കേന്ദ്രമന്ത്രി ശിവരാജ് സിങ് ചൗഹാനും ‘എക്സി’ലൂടെ വോട്ടഭ്യർഥന നടത്തി. 1.23 കോടി സമ്മതിദായകരാണ് ബുധനാഴ്ച വോട്ട് രേഖപ്പെടുത്തുന്നത്.

ഇതിൽ 60.79 ലക്ഷം വനിതകളാണ്. 14,000ലധികം പോളിങ് സ്റ്റേഷനുകളാണ് സജ്ജീകരിച്ചിട്ടുള്ളത്. കേരളത്തിനുപുറമെ യു.പി, പഞ്ചാബ്, ഉത്തരാഖണ്ഡ് സംസ്ഥാനങ്ങളിലെ 14 നിയമസഭ മണ്ഡലങ്ങളിലേക്കുമുള്ള ഉപതെരഞ്ഞെടുപ്പ് ബുധനാഴ്ച നടക്കും. 23നാണ് വോട്ടെണ്ണൽ.

News

ഗസ്സയിലെ വംശഹത്യ; ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി

ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

Published

4 days ago

November 19, 2024

webdesk13

ഗസയില്‍ വംശഹത്യ തുടരുന്ന ഇസ്രാഈലുമായുള്ള എല്ലാ ബന്ധങ്ങളും അവസാനിപ്പിച്ചെന്ന് പ്രഖ്യാപിച്ചതിന് പിന്നാലെ ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി. ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

ഇതേത്തുടര്‍ന്ന് ഹെര്‍സോഗിന് അസര്‍ബൈജാനില്‍ നടന്ന കാലാവസ്ഥ ഉച്ചകോടിയില്‍ പങ്കെടുക്കാന്‍ സാധിക്കാതെ വന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ സുരക്ഷാ കാരണങ്ങളാലാണ് ഉച്ചകോടിയില്‍ പങ്കെടുക്കാത്തതെന്നാണ് ഇസ്രാഈല്‍ പരിസ്ഥിതി മന്ത്രാലയം ഈ വിഷയത്തില്‍ വിശദീകരണം നല്‍കിയത്.

പ്രസിഡന്റിന്റെ വിമാനം വ്യോമാതിര്‍ത്തിയില്‍ പ്രവേശിക്കാന്‍ തുര്‍ക്കി വിസമ്മതിച്ചതിനാല്‍ ഇസ്രാഈല്‍ പ്രസിഡന്റ് യാത്ര റദ്ദാക്കിയതായി ഞായറാഴ്ച അസര്‍ബൈജാനിലെ ഉദ്യോഗസ്ഥരെ ഉദ്ധരിച്ച് വൈ നെറ്റ് പ്രതികരിച്ചു. കോണ്‍ഫറന്‍സിലെ ബാക്കിയുള്ള ഇസ്രഈല്‍ പ്രതിനിധികള്‍ നവംബര്‍ 11 ന് ജോര്‍ജിയ വഴി ബാക്കുവില്‍ എത്തിയിരുന്നു.

ഇസ്രാഈലില്‍ നിന്ന് അസര്‍ബൈജാന്‍ തലസ്ഥാനമായ ബാക്കുവിലേക്കുള്ള ഏറ്റവും സുരക്ഷിതമായതും എളുപ്പമാര്‍ന്നതുമായ മാര്‍ഗമായിരുന്നു തുര്‍ക്കി വഴിയുള്ളത്. ഗസയിലും ലെബനനിലും ഇസ്രാഈല്‍ സൈന്യം വ്യോമാക്രമണം നടത്തുമ്പോള്‍ ഇസ്രാഈല്‍ പ്രസിഡന്റും പ്രധാനമന്ത്രിയുമെല്ലാം തുര്‍ക്കി വഴിയാണ് വ്യോമമാര്‍ഗം സഞ്ചരിച്ചിരുന്നത്.

എന്നാല്‍ തുര്‍ക്കിയുടെ വ്യോമമാര്‍ഗം വഴി ഇസ്രാഈല്‍ നേതാക്കള്‍ക്ക് യാത്ര അനുവദിക്കേണ്ടതില്ലെന്ന് ഉന്നത വൃത്തങ്ങളില്‍ നിന്ന് അറിയിപ്പ് ലഭിച്ചതായി തുര്‍ക്കി വ്യോമയാന ഉദ്യോഗസ്ഥര്‍ പ്രതികരിച്ചു. എന്നാല്‍ ഈ വിലക്ക് ചര്‍ച്ചയിലൂടെ പരിഹരിക്കാമെന്ന് ഇസ്രഈല്‍ പ്രതീക്ഷിക്കുന്നതായി ഇസ്രാഈല്‍ സര്‍ക്കാറിന്റെ കീഴിലുള്ള കാബിര്‍ ന്യൂസ് റിപ്പോര്‍ട്ട് ചെയ്തിരുന്നു

ഇസ്രഈലുമായുള്ള എല്ലാ ബന്ധങ്ങളും അവസാനിപ്പിക്കുന്നുവെന്ന് തുര്‍ക്കി പ്രസിഡന്റ് റജബ് തയ്യിബ് എര്‍ദോഗാനാണ് കഴിഞ്ഞ ദിവസം പ്രഖ്യാപിച്ചത്. ഗസയില്‍ ഇസ്രാഈല്‍ വംശഹത്യ തുടരുന്ന സാഹചര്യത്തിലാണ് ഇസ്രാഈലുമായുള്ള ബന്ധം അവസാനിപ്പിക്കാന്‍ തുര്‍ക്കി ഭരണകൂടം തീരുമാനിച്ചത്.

‘റജബ് തയ്യിബ് എര്‍ദോഗാന്റ നേതൃത്വത്തിലുള്ള തുര്‍ക്കി റിപ്പബ്ലിക് ഇസ്രഈലുമായി ഒരു ബന്ധവും തുടരില്ല. ഞങ്ങളുടെ ഭരണസഖ്യം ഇസ്രാഈലുമായുള്ള ബന്ധം വിച്ഛേദിക്കുന്ന കാര്യത്തില്‍ ഉറച്ച് നില്‍ക്കുന്നു. ഭാവിയിലും ഇത് അപ്രകാരം തന്നെ തുടരും,’ എര്‍ദോഗന്‍ പറഞ്ഞു.

കഴിഞ്ഞ വര്‍ഷം ഒക്ടോബറില്‍ ഇസ്രാഈല്‍ ഗസയില്‍ അധിനിവേശവും വംശഹത്യയും ആരംഭിച്ചതുമുതല്‍ ഇസ്രാഈലിനു നേരെ ശക്തമായ നിലപാട് സ്വീകരിച്ചിരുന്ന നാറ്റോ രാജ്യമാണ് തുര്‍ക്കി. ഇക്കഴിഞ്ഞ മെയില്‍ ഇസ്രാഈലിനുമേല്‍ തുര്‍ക്കി വ്യാപാര ഉപരോധം ഏര്‍പ്പെടുത്തിയിരുന്നെങ്കിലും നയതന്ത്ര ബന്ധം തുടരുകയായിരുന്നു.

ഇതിന്റെ ഭാഗമായി തങ്ങളുടെ അംബാസിഡറെ ഇസ്രഈലില്‍ നിന്ന് തുര്‍ക്കി തിരിച്ച് വിളിച്ചിരുന്നു. എന്നാല്‍ അന്ന് നയതന്ത്രബന്ധം പൂര്‍ണമായി അവസാനിപ്പിച്ചിരുന്നില്ല. സമാനമായി ഇസ്രാഈലും പ്രാദേശിക സുരക്ഷാ ഭീഷണികള്‍ ചൂണ്ടിക്കാട്ടി കഴിഞ്ഞ വര്‍ഷം അങ്കാറയിലെ ഇസ്രാഈല്‍ എംബസി ഒഴിപ്പിച്ചിരുന്നു.

ഗസയില്‍ ഇസ്രാഈല്‍ നടത്തുന്നത് വംശഹത്യയാണെന്ന് മനുഷ്യാവകാശ സംഘടനകള്‍ അടക്കം അഭിപ്രായപ്പെട്ടപ്പോള്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെക്കൊണ്ട് വംശഹത്യയുടെ ഉത്തരവാദിത്വം ഏറ്റെടുപ്പിക്കാന്‍ സാധ്യമായതെല്ലാം ചെയ്യുമെന്ന് എര്‍ദോഗാന്‍ കഴിഞ്ഞ ദിവസം പറഞ്ഞിരുന്നു.

ഈ വര്‍ഷമാദ്യം, ഫലസ്തീനെ പിന്തുണച്ച് അന്താരാഷ്ട്ര നീതിന്യായ കോടതിയില്‍ ഇസ്രാഈലിനെതിരായി ഫയല്‍ ചെയ്ത വംശഹത്യ കേസില്‍ തുര്‍ക്കി ഇടപെട്ടിരുന്നു. ടെല്‍ അവീവിനെതിരെ ലോക രാജ്യങ്ങള്‍ ആയുധ ഉപരോധം ഏര്‍പ്പെടുത്തണമെന്നും തുര്‍ക്കി വാദിച്ചിരുന്നു.