കൊല്ലത്ത് സ്‌കൂള്‍ വിദ്യാര്‍ത്ഥിനികളെ ഓട്ടോയില്‍ തട്ടിക്കൊണ്ടുപോകാന്‍ ശ്രമിച്ചതായി പരാതി. വിമല ഹൃദയ ഹയര്‍ സെക്കന്ററി സ്‌കൂളിലെ പ്ലസ് ടു വിദ്യാര്‍ത്ഥിനികളെയാണ് തട്ടിക്കൊണ്ടുപോകാന്‍ ശ്രമിച്ചത്. കൊല്ലം എസ് എന്‍ കോളേജിന് സമീപത്ത് വെച്ചാണ് സംഭവം. കുട്ടികള്‍ ഓട്ടോറിക്ഷയില്‍ നിന്നും ചാടി രക്ഷപ്പെടുകയായിരുന്നു.
ഉച്ചയ്ക്ക് രണ്ടരയോടെ് ട്യൂഷന്‍ കഴിഞ്ഞ് ഓട്ടോയില്‍ കയറിയപ്പോഴാണ് സംഭവം. കൊല്ലം ഈസ്റ്റ് പൊലീസ് സ്റ്റേഷനിലേക്കെത്തിയ പെണ്‍കുട്ടികള്‍ തട്ടിക്കൊണ്ടുപോകാന്‍ ശ്രമിച്ചതായി പൊലീസിനോട് പറഞ്ഞു.
ട്യൂഷന്‍ കഴിഞ്ഞ് വിദ്യാര്‍ത്ഥിനികള്‍ ഓട്ടോയില്‍ കൈകാണിച്ച് കയറി. എന്നാല്‍ പോകുന്ന വഴി ശരിയല്ലെന്ന് പെണ്‍കുട്ടികള്‍ പറഞ്ഞതോടെ ഓട്ടോ വേഗം കൂട്ടുകയായിരുന്നു. അതോടെ പെണ്‍കുട്ടികള്‍ ഓട്ടോയില്‍ നിന്ന് ചാടി രക്ഷപ്പെടുകയയിരുന്നു. ഓട്ടോ ഡ്രൈവര്‍ മോശമായാണ് സംസാരിച്ചതെന്ന് വിദ്യാര്‍ത്ഥിനി പറഞ്ഞു.
ഇടവഴിയിലേക്ക് ഓട്ടോ കയറ്റിക്കൊണ്ട് പോകാന്‍ ശ്രമിച്ചപ്പോള്‍ മെയിന്‍ റോഡിലൂടെ പോയാല്‍ മതിയെന്ന് ആവശ്യപ്പെട്ടപ്പോഴാണ് മോശമായി സംസാരിക്കാന്‍ തുടങ്ങിയതെന്ന് വിദ്യാര്‍ത്ഥിനി പറയുന്നു.
വാഹനത്തില്‍ നിന്ന് വീണ് പെണ്‍കുട്ടിയ്ക്ക് പരുക്കേറ്റിട്ടുണ്ട്. സംഭവത്തില്‍ കൊല്ലം ഈസ്റ്റ് പോലീസ് അന്വേഷണമാരംഭിച്ചു.