പൂര്‍വ വിദ്യാര്‍ഥി പെട്രോളൊഴിച്ചു തീകൊളുത്തിയ പ്രിന്‍സിപ്പള്‍ മരിച്ചു. ബിഎം ഫാര്‍മസി കോളജ് പൂര്‍വ്വ വിദ്യാര്‍ഥി തീകൊളുത്തിയതിനെ തുടര്‍ന്ന് 70 ശതമാനവും പൊള്ളലേറ്റ പ്രിന്‍സിപ്പള്‍ ആശുപത്രിയില്‍ ചികിത്സയിലായിരുന്നു. ഇന്‍ഡോറിലെ ബിഎം ഫാര്‍മസി കോളജ് പ്രിന്‍സിപ്പല്‍ വിമുക്ത ശര്‍മയാണ്(54) മരിച്ചത്. ശനിയാഴ്ച പുലര്‍ച്ചെ നാലു മണിയോടെയാണ് മരിച്ചത്. മാര്‍ക്ക് ലിസ്റ്റ് വൈകിയെന്നാരോപിച്ചയിരുന്നു അശുതോഷയുടെ അക്രമണം.
ഫെബ്രുവരി 20നായിരുന്നു സംഭവം. മൂര്‍ച്ചയുള്ള ആയുധം കൊണ്ട് വിമുക്തയെ ആക്രമിച്ചശേഷം പെട്രോള്‍ ഒഴിച്ച് കത്തിക്കുകയായിരുന്നു. സംഭവത്തിനു പിന്നാലെ അശുതോഷിനെ പൊലീസ് അറസ്റ്റു ചെയ്തു.
അശുതോഷ് സ്ഥിരമായി കോളജിലെത്തി ഭീഷണിപ്പെടുത്തിയിരുന്നു എന്ന് കോളേജ് ജീവനക്കാര്‍ പറഞ്ഞു. ആത്മഹത്യാ ഭീഷണി ഉന്നയിച്ചിരുന്നതായും ആരോപിക്കുന്നു. ഇവ്വിഷയം കാണിച്ച് മൂന്നു തവണ പൊലീസില്‍ പരാതി നല്‍കിരുന്നതായും പറയുന്നു.
മാര്‍ക്ക് ലിസ്റ്റുമായി ബന്ധപ്പെട്ട തര്‍ക്കങ്ങള്‍ക്കിടെ ഇതേ കോളജിലെ അസിസ്റ്റന്റ് പ്രഫസറായ ഡോ. വിജയ് പട്ടേലിനെ കഴിഞ്ഞ വര്‍ഷം ഒക്ടോബറില്‍ പൂര്‍വ്വ വിദ്യാര്‍ഥി കുത്തി പരുക്കേല്‍പ്പിച്ചിരുന്നു. ഈ കേസില്‍ ജാമ്യത്തിലിറങ്ങിയ ശേഷം മാര്‍ക്ക് ലിസ്റ്റുമായി ബന്ധപ്പെട്ട് പ്രിന്‍സിപ്പലുമായി അശുതോഷ് നിരവധി തവണ തര്‍ക്കത്തില്‍ ഏര്‍പ്പെട്ടിരുന്നുവെന്നും കോളജ് മാനേജ്‌മെന്റ് വ്യക്തമാക്കി.