സൗദിയില്‍ ഇസ്ലാം മതം സ്വീകരിക്കുന്ന വിദേശികളുടെ എണ്ണത്തില്‍ വലിയ വര്‍ധന. കണക്കുകള്‍ പ്രകാരം കഴിഞ്ഞ അഞ്ച് വര്‍ഷത്തിനിടയില്‍ മൂന്നരലക്ഷത്തിലധികം വിദേശികള്‍ ഇസ്ലാമിലേക്ക് ആകര്‍ഷിക്കപ്പെട്ട് വന്നിട്ടുണ്ടെന്നാണ് ദഅവ ഗൈഡന്‍സ് മന്ത്രാലയം പുറത്തുവിട്ട കണക്കുകള്‍.

സൗദിയിലെത്തുന്ന വിദേശികള്‍ ഇസ്‌ലാമിനെ കുറിച്ച് പഠിക്കുന്നതിനും പരിചയപ്പെടുന്നതിനും കൂടുതല്‍ താല്‍പര്യം പ്രകടിപ്പിക്കുന്നതായി സൗദി ഇസ്‌ലാമിക് അഫയേഴ്‌സ് ദഅവ ഗൈഡന്‍സ് മന്ത്രാലയം പുറത്തുവിട്ട കണക്കുകള്‍ സൂചിപ്പിക്കുന്നു. കഴിഞ്ഞ് അഞ്ച് വര്‍ഷത്തിനിടെ മന്ത്രാലയ ഗൈഡന്‍സ് സെന്ററുകള്‍ വഴി രാജ്യത്ത് നിന്നും 3,47,646 വിദേശികള്‍ ഇസ്‌ലാമിലേക്ക് കടന്നു വന്നതായി മന്ത്രാലയം അറിയിച്ചു. കഴിഞ്ഞ വര്‍ഷമാണ് ഏറ്റവും കൂടുതല്‍ പേര്‍ ഇസ്‌ലാമിലേക്ക് കടന്നുവന്നത്. 2019ല്‍ 21,654 പേര്‍ ഇസ്‌ലാം സ്വീകരിച്ചിരുന്നിടത്ത് 2023 ആയപ്പോള്‍ എണ്ണം 1,63,319 ആയി ഉയര്‍ന്നു.