കൊച്ചി: എറണാകുളം പെരുമ്പാവൂരില്‍ ആംബുലന്‍സ് ഡ്രൈവറെയും എമര്‍ജന്‍സി മെഡിക്കല്‍ ടെക്‌നീഷ്യമെയും കാറിലെത്തിയവര്‍ മര്‍ദിച്ചെന്ന് പരാതി. ഫോണ്‍ വിളിച്ച് അലക്ഷ്യമായി ഓടിച്ചു വന്ന കാര്‍ ആംബുലന്‍സില്‍ ഇടിച്ചിരുന്നു. ഇത് ചോദ്യം ചെയ്തതിനാണ് മര്‍ദിച്ചതെന്ന് ആംബുലന്‍സ് ഡ്രൈവര്‍ മന്‍സൂര്‍ പറഞ്ഞു.
പെരുമ്പാവൂര്‍ താലൂക്ക് ആശുപത്രിയില്‍ സര്‍വീസ് നടത്തുന്ന ആംബുലന്‍സിന്റെ ഡ്രൈവര്‍ മന്‍സൂറിനും മെഡിക്കല്‍ ടെക്‌നീഷ്യന്‍ എല്‍ദോസിനുമാണ് മര്‍ദനമേറ്റത്. രോഗിയുമായി കളമശ്ശേരി മെഡിക്കല്‍ കോളേജിലേക്ക് പോയ ശേഷം തിരികെ വരുമ്പോഴാണ് സംഭവം.
മന്‍സൂറിന്റെ മുഖത്തും എല്‍ദോസിന്റെ കൈക്കുമാണ് പരിക്കുള്ളത്. പരിക്കേറ്റ ഇരുവരും പെരുമ്പാവൂര്‍ താലൂക്ക് ആശുപത്രിയില്‍ ചികിത്സ നേടി. 324 വകുപ്പ് ചുമത്തി തടിയിട്ടപറമ്പ് പൊലീസ് കേസെടുത്ത് അന്വേഷണം ആരംഭിച്ചു.