ചെന്നൈ: ഭാഷാ നയത്തിൽ കേന്ദ്രസർക്കാരുമായുള്ള പോര് രൂക്ഷമായിരിക്കെ സംസ്ഥാന ബജറ്റിൽനിന്ന് രൂപ ചിഹ്നം ഒഴിവാക്കി തമിഴ്നാട് സർക്കാർ. ദേവനാഗരി ലിപിയും ലാറ്റിനും ചേര്‍ന്ന ഇന്ത്യൻ രൂപയുടെ ഔദ്യോ​ഗിക ചിഹ്നമാണ് 2025-26 സാമ്പത്തിക വർഷത്തെ ബജറ്റിൽ നിന്ന് തമിഴ്നാട് ഒഴിവാക്കിയത്. പകരം തമിഴിൽ രൂപയെ സൂചിപ്പിക്കുന്ന ‘രൂ’ എന്ന അക്ഷരമാണ് ബജറ്റ് ലോ​ഗോയിൽ ചേർത്തിരിക്കുന്നത്.

മുൻവർഷങ്ങളിലൊക്കെ രൂപയുടെ ഔദ്യോ​ഗിക ചിഹ്നമായിരുന്നു തമിഴ്നാട് സർക്കാർ ബജറ്റിൽ ഉൾപ്പെടുത്തിയിരുന്നത്. എന്നാൽ ഹിന്ദി അടിച്ചേൽപ്പിക്കാനുമുള്ള കേന്ദ്ര നിലപാട് തുടരുന്ന സാഹചര്യത്തിലാണ് തമിഴ്നാടിന്റെ ഇത്തരമൊരു പ്രതിഷേധ നീക്കം. ഈ വർഷത്തെ ബജറ്റിന്റെ ടീസർ മുഖ്യമന്ത്രി സ്റ്റാലിൻ തന്റെ എക്സ് അക്കൗണ്ടിലൂടെ പങ്കുവയ്ക്കുകയും ചെയ്തിട്ടുണ്ട്. ടീസറിന്റെ അവസാനം കാണിക്കുന്ന ബജറ്റിന്റെ ലോ​ഗോയിൽ രൂപ ചിഹ്നമില്ല, പകരം ‘രൂ’ എന്ന തമിഴ് അക്ഷരമാണുള്ളത്.

മാർച്ച് 14നാണ് തമിഴ്നാട് നിയമസഭയിൽ ബജറ്റ് അവതരണം. സമൂഹത്തിലെ എല്ലാ വിഭാഗങ്ങൾക്കും പ്രയോജനപ്പെടുന്ന തരത്തിൽ തമിഴ്‌നാടിന്റെ വ്യാപകമായ വികസനം ഉറപ്പാക്കാൻ എന്ന കുറിപ്പോടെയാണ് സ്റ്റാലിൻ ടീസർ പങ്കുവച്ചിരിക്കുന്നത്. ‘എല്ലാവർക്കും എല്ലാം’ പ്രമേയത്തിലാണ് ഇത്തവണത്തെ ബജറ്റ്.

ദ്രവീഡിയൻ മോഡൽ, ടിഎൻബജറ്റ്2025 എന്നീ ഹാഷ്ടാ​ഗുകളും ട്വീറ്റിനൊപ്പം സ്റ്റാലിൻ പങ്കുവച്ചിട്ടുണ്ട്. 2023-24, 2024-25 വർഷങ്ങളിലെ ബജറ്റുകളിലും രൂപയുടെ ഔദ്യോ​ഗിക ചി​ഹ്നം തമിഴ്നാട് ബജറ്റ് ലോ​ഗോയിലുണ്ടായിരുന്നു. ഇതാദ്യമായാണ് ദേശീയ കറൻസി ചിഹ്നം തമിഴ്നാട് ഒഴിവാക്കുന്നത്. ദേശീയ വിദ്യാഭ്യാസ നയത്തിനും ത്രിഭാഷാ ഫോർമുലയ്ക്കുമെതിരെ തമിഴ്‌നാട് സർക്കാർ നടത്തുന്ന ചെറുത്തുനിൽപ്പിനിടെയാണ് പുതിയ തീരുമാനം.

ഹിന്ദി അടിച്ചേൽപ്പിക്കാനൊരുങ്ങുന്ന കേന്ദ്ര നയത്തിനെതിരെ വീണ്ടും ഒരു ഭാഷാ യുദ്ധത്തിന് തയാറാണെന്ന് തമിഴ്നാട് മുഖ്യമന്ത്രി എം.കെ സ്റ്റാലിൻ വ്യക്തമാക്കിയിരുന്നു. ഭരണകക്ഷിയായ ഡിഎംകെ ത്രിഭാഷാ നയത്തെ എന്നും എതിർക്കും. കേന്ദ്രത്തിലെ ബിജെപി നേതൃത്വത്തിലുള്ള എൻഡിഎ സർക്കാർ ഹിന്ദി അടിച്ചേൽപ്പിക്കുകയാണെന്നും സ്റ്റാലിൻ പറഞ്ഞിരുന്നു. കേന്ദ്രം 10,000 കോടി രൂപ ഫണ്ട് നൽകാമെന്ന് വാഗ്ദാനം ചെയ്താലും ദേശീയ വിദ്യാഭ്യാനയം തമിഴ്നാട്ടിൽ നടപ്പിലാക്കില്ലെന്ന് സ്റ്റാലിൻ തുറന്നടിച്ചു.

2010 ജൂലൈ 15നാണ് കേന്ദ്ര സര്‍ക്കാര്‍ രൂപയുടെ ഔദ്യോ​ഗിക ചിഹ്നം പ്രഖ്യാപിച്ചത്. തമിഴ്‌നാട് സ്വദേശിയും ഗുവാഹത്തി ഐഐടി ഡിസൈൻ വിഭാഗം മേധാവിയും അസോസിയേറ്റ് പ്രൊഫസറുമായ ഡി. ഉദയകുമാറാണ് ചിഹ്നം രൂപകല്‍പന ചെയ്തത്. 2011 ജൂലൈയില്‍ ഈ ചിഹ്നം ആലേഖനം ചെയ്ത ആദ്യത്തെ നാണയം പുറത്തിറക്കുകയും ചെയ്തു.

സുനിത വില്യംസിന്റെയും ബുച്ച് വില്‍മോറിന്റെയും തിരിച്ചുവരവ് വൈകും. വിക്ഷേപണത്തിന് ഏതാനും മണിക്കൂര്‍ മുന്‍പ് സ്‌പെയ്‌സ് എക്‌സ് ക്രൂ10ന്റെ യാത്ര മുടങ്ങി. സ്‌പെയ്‌സ് എക്‌സിലെ ഹൈഡ്രോളിക് തകരാര്‍ കണ്ടെത്തിയതോടെ ഇരുവരും അവിടെ തുടരുകയാണ്. ഉടനെ അടുത്ത വിക്ഷേപണത്തിന്റെ ഏകദേശം സമയം പ്രഖ്യാപിക്കുകയും ഒപ്പം തകരാര്‍ പരിഹരിക്കാനായി പരിശ്രമിക്കുകയും ചെയ്യുകയാണ്.

നാസയും സ്പെയ്‌സ് എക്സും പറയുന്നതനുസരിച്ച്, ലോഞ്ച് കോംപ്ലക്സ് 39A-യിലെ ഫാല്‍ക്കണ്‍ 9 റോക്കറ്റിലെ ഗ്രൗണ്ട് സപ്പോര്‍ട്ട് ക്ലാംപ് ആമിലെ ഹൈഡ്രോളിക് സിസ്റ്റം പ്രശ്നം മൂലമാണ് വിക്ഷേപണം തടസപ്പെട്ടത്. വിക്ഷേപണ സമയത്ത് റോക്കറ്റിനെ പിടിച്ചുനിര്‍ത്തുകയും പുറത്തുവിടുകയും ചെയ്യുന്ന ഘടനയായ ട്രാന്‍സ്പോര്‍ട്ടര്‍-എറക്ടര്‍ സിസ്റ്റത്തിലെ ഒരു ക്ലാംപ് ആമാണ് റോക്കറ്റിനെ സുരക്ഷിതമായി സ്ഥാനത്ത് നിര്‍ത്തുകയും സ്ഥിരതയുള്ള വിക്ഷേപണം ഉറപ്പാക്കുകയും ചെയ്യുന്നത്.

മാര്‍ച്ച് 14 വെള്ളിയാഴ്ച EDT (IST സമയം പുലര്‍ച്ചെ 4:33) വൈകുന്നേരം 7:03 ന് മുമ്പ് വിക്ഷേപിക്കാനാണ് നാസ ഇപ്പോള്‍ ലക്ഷ്യമിടുന്നത്. ക്രൂ-10 എത്തിക്കഴിഞ്ഞാല്‍, സുനിത വില്യംസും ബുച്ച് വില്‍മോറും നാസയുടെ നിക്ക് ഹേഗും ബഹിരാകാശയാത്രികനായ അലക്‌സാണ്ടര്‍ ഗോര്‍ബുനോവും ഭൂമിയിലേക്ക് മടങ്ങും, കാലാവസ്ഥ അനുകൂലമാണെങ്കില്‍ മാര്‍ച്ച് 17 ഓടെ ഭൂമിയിലെത്തും.

നാല് പുതിയ ക്രൂ അംഗങ്ങളെ രാജ്യാന്തര ബഹിരാകാശ നിലയത്തിലേക്ക് (ISS) പറത്തുകയും സുനിത വില്യംസിന്റെയും ബുച്ച് വില്‍മോറിന്റെയും തിരിച്ചുവരവിന് വഴിയൊരുക്കുകയും ചെയ്യുക എന്നതായിരുന്നു റോക്കറ്റിന്റെ ലക്ഷ്യം. മാര്‍ച്ച് 14 ന് ഉച്ചകഴിഞ്ഞ് 3 മണിക്ക്(EDT) NASA+ ല്‍ വിക്ഷേപണ കവറേജ് ആരംഭിക്കും . മാര്‍ച്ച് 15 ശനിയാഴ്ച രാത്രി 11:30 ന് ഡോക്കിങ് ലക്ഷ്യമിടുന്നു.

വ്യാജ പശു കശാപ്പ് കേസില്‍ മുസ്‌ലിം മാംസ വ്യാപാരിയെ കുടുക്കാന്‍ ഗൂഢാലോചന നടത്തിയതിന് സഹാറന്‍പൂരില്‍ നിന്നുള്ള ‘ഗോ രക്ഷകനെ’ യുപി പോലീസ് ചൊവ്വാഴ്ച അറസ്റ്റ് ചെയ്തു. വിശ്വ ഹിന്ദു പരിവാര്‍ സ്ഥാപകന്‍ വിഷ് സിങ് കംബോജ് എന്ന് വ്യക്തിയാണ് അറസ്റ്റിലായത്.

തന്റെ ബിസിനസ്സ് പങ്കാളിയായിരുന്ന മുസ്ലിം യുവാവിനെ കേസില്‍ കുടുക്കാന്‍ ആഗ്രഹിച്ചിരുന്ന മാംസ വ്യാപാരിയായ ഖുറേഷിയില്‍ നിന്ന് 50,000 രൂപ ഇയാള്‍ കൈപ്പറ്റിയതായാണ് വിവരം.

പശുവിനെ കൊന്നവര്‍ക്കെതിരെ പൊലീസ് നടപടിയെടുക്കണമെന്ന് ആവശ്യപ്പെട്ട് പ്രതിയും കൂട്ടാളികളും ജില്ലയിലെ ഒരു പ്രധാന ഹൈവേയില്‍ കന്നുകാലികളുടെ അവശിഷ്ടങ്ങളുമായി റോഡ് ഉപരോധിച്ചതായി പൊലീസ് പറയുന്നു. എന്നാല്‍ ജഡത്തിന് വളരെ പഴക്കം ഉണ്ടായിരുന്നത് സംശയത്തിന് കാരണമായി. പരസ്പരവിരുദ്ധമായ മൊഴികളാണ് പ്രതിഷേധക്കാരില്‍ നിന്ന് ലഭിച്ചത്. തുടര്‍ന്ന് വലതുപക്ഷ സംഘടനയായ വിശ്വ ഹിന്ദു പരിവാര്‍ സ്ഥാപകന്‍ വിഷ് സിങ് കാംബോജിനെ കസ്റ്റഡിയിലെടുക്കുകയായിരുന്നെന്നും പൊലീസ് പറഞ്ഞു.

ഖുറേഷിയുടെ നിര്‍ദ്ദേശപ്രകാരമാണ് മൃഗത്തിന്റെ അവശിഷ്ടങ്ങള്‍ റോഡില്‍ വെച്ച് പ്രതിഷേധം സംഘടിപ്പിച്ചതെന്ന് അയാള്‍ സമ്മതിച്ചു എന്നും ഉദ്യോഗസ്ഥര്‍ കൂട്ടിച്ചേര്‍ത്തു. ഖുറേഷിയും പഴയ ബിസിനസ്സ് പങ്കാളിയും മാംസക്കച്ചവടക്കാരാണെന്നും എന്നാല്‍ അയാളുടെ ബിസിനസ്സ് കൂടുതല്‍ വിജയിക്കുകയായിരുന്നു. ഇതാണ് ഖുറേഷിയെ ഇത്തരം പദ്ധതി ആസൂത്രണം ചെയ്യാന്‍ പ്രേരിപ്പിച്ചത്.

അതേസമയം ഖുറേഷി ഇപ്പോള്‍ ഒളിവിലാണ്. ഗുണ്ടാ ആക്ട്, കലാപം എന്നിവയുള്‍പ്പെടെയുള്ള കേസുകള്‍ രജിസ്റ്റര്‍ ചെയ്തിട്ടുള്ള പതിവ് കുറ്റവാളിയാണ് വിഷ് സിങ് കാംബോജ് എന്നും പൊലീസ് അറിയിച്ചു.