കോട്ടയം : കോട്ടയം ഭരണങ്ങാനം വിലങ്ങുപാറയില്‍ മീനച്ചിലാറ്റില്‍ കുളിക്കാന്‍ ഇറങ്ങിയ രണ്ട് വിദ്യാര്‍ത്ഥികളെ കാണാനില്ല.

കുളിക്കാനായി എത്തിയ നാലംഗ സംഘത്തിലെ രണ്ട് പേരെയാണ് കാണാതായത്. ഭരണങ്ങാനത്ത് ജര്‍മന്‍ ഭാഷ പഠിക്കാന്‍ എത്തിയവരാണ് അപകടത്തില്‍ പെട്ടത്. ഫയര്‍ഫോഴ്‌സും പൊലീസും സ്ഥലത്തെത്തി തിരച്ചില്‍ തുടരുകയാണ്.

വയനാട്ടില്‍ ഹൈബ്രിഡ് കഞ്ചാവുമായി യുവതിയും യുവാവും പിടിയില്‍. കണ്ണൂര്‍ അഞ്ചാംപീടിക സ്വദേശിയായ കീരിരകത്ത് വീട്ടില്‍ കെ ഫസല്‍, തളിപറമ്പ് സ്വദേശിനിയായ കെ ഷിന്‍സിത എന്നിവരെയാണ് പിടികൂടിയത്. ഇവരില്‍ നിന്ന് 20.80 ഗ്രാം ഹൈബ്രിഡ് കഞ്ചാവ് പിടിച്ചെടുത്തു. വാഹനപരിശോധനക്കിടെയാണ് ഇവര്‍ പിടിയിലായത്.

ഇരുവരും സഞ്ചരിച്ചിരുന്ന ബിഎംഡബ്ല്യു കാറും 96,290 രൂപയും മൊബൈല്‍ ഫോണുകളും കസ്റ്റഡിയിലെടുത്തിട്ടുണ്ട്. കാറിന്റെ ഡിക്കിയില്‍ രണ്ടു കവറുകളിലായാണ് കഞ്ചാവ് സൂക്ഷിച്ചിരുന്നത്. ഉപയോഗത്തിനും വില്‍പനയ്ക്കുമായി ബെംഗളൂരുവില്‍ നിന്നാണ് കഞ്ചാവ് വാങ്ങിയതെന്ന് ഇവര്‍ പൊലീസിനോട് പറഞ്ഞു.

വെള്ളമുണ്ട എസ്എച്ച്ഒ ടി.കെ. മിനിമോളുടെ നേതൃത്വത്തിലുള്ള സംഘമായിരുന്നു പരിശോധന നടത്തിയത്.

ഗസ്സയിലേക്ക് അവശ്യ വസ്തുക്കളുമായി പുറപ്പെട്ട ഫ്രീഡം ഫ്‌ലോട്ടില്ല കപ്പലില്‍ ഇസ്രാഈല്‍ ഡ്രോണ്‍ ആക്രമണം നടത്തി. ഇറ്റലിക്കടുത്ത് മാള്‍ട്ടയില്‍ നിന്ന് ഗസ്സയിലേക്ക് പുറപ്പെടാനൊരുങ്ങവേയാണ് അന്താരാഷ്ട്ര സമുദ്രാതിര്‍ത്തിക്കടുത്ത് വെച്ച് ഇസ്രാഈല്‍ ഡ്രോണ്‍ ആക്രമണം നടത്തിയത്. ഗസ്സ വംശഹത്യയുടെ പശ്ചാത്തലത്തില്‍ ഗസ്സക്ക് സഹായവുമായി ഫ്രീഡം ഫ്‌ലോട്ടില്ല കൂട്ടായ്മയുടെ ആസൂത്രണത്തില്‍ വന്ന കപ്പലാണ് ആക്രമിക്കപ്പെട്ടത്. ഫ്രീഡം ഫ്‌ലോട്ടില്ലയുമായി ബന്ധപ്പെട്ടവര്‍ നല്‍കുന്ന റിപ്പോര്‍ട്ടിന് അനുസരിച്ച് ഡ്രോണ്‍ കപ്പലിന്റെ ജനറേറ്ററിനെ ലക്ഷ്യമിട്ടാണ് ആക്രമണം നടത്തിയതെന്ന് പറയുന്നു.

ആക്രമണത്തിന് കുറച്ച് നേരം മുന്‍പ് പുറപ്പെട്ട കപ്പലില്‍ 21 രാജ്യങ്ങളില്‍ നിന്നുള്ള 30 ഓളം അംഗങ്ങള്‍ ഉണ്ടായിരുന്നുവെന്ന് സന്നദ്ധ സംഘടന അറിയിച്ചു. കപ്പലിന്റെ വൈദ്യുതി സംവിധാനവും ആശയവിനിമയ സംവിധാനവും നിലച്ചതായാണ് റിപ്പോര്‍ട്ട്. ഗസ്സയിലേക്കുള്ള മുഴുവന്‍ സഹായങ്ങളും കഴിഞ്ഞ രണ്ടുമാസമായി തടഞ്ഞു വെച്ചിരിക്കെയാണ് ഫ്‌ലോട്ടില്ല കൂട്ടായ്മ കപ്പല്‍ മാര്‍ഗം സഹായം എത്തിക്കാന്‍ തീരുമാനിച്ചത്.