ഓസ്‌ട്രേലിയക്കെതിരായ അഞ്ചാം ടെസ്റ്റില്‍ ഇന്ത്യന്‍ ക്യാപ്റ്റന്‍ രോഹിത് ശര്‍മ കളിക്കില്ല. സിഡ്‌നി ടെസ്റ്റില്‍ നിന്ന് രോഹിത് ശര്‍മ പിന്മാറി. മോശം ഫോമിനെ തുടര്‍ന്നായിരുന്നു ഈ തീരുമാനം. ഇതോടെ ജസ്പ്രീത് ബുംറ ടീമിനെ നയിക്കും. ശുഭ്മാന്‍ ഗില്‍ രോഹിത്തിന് പകരം ടീമില്‍ എത്തും.

രോഹിത് ശര്‍മ ഇന്ത്യയെ നയിച്ച മൂന്നു ടെസ്റ്റുകളില്‍ രണ്ടിലും ഇന്ത്യയ്ക്ക് തോല്‍വിയായിരുന്നു. പെര്‍ത്തില്‍ നടന്ന ഒന്നാം ക്രിക്കറ്റ് ടെസ്റ്റില്‍ ഇന്ത്യയെ നയിച്ചത് ജസ്പ്രീത് ബുംറ ആയിരുന്നു. പരമ്പരയില്‍ ഇന്ത്യയ്ക്ക് വിജയം നേടാനും കഴിഞ്ഞു.

ടെസ്റ്റിലെ അഞ്ച് ഇന്നിങ്സുകളില്‍ നിന്നായി വെറും 31 റണ്‍സാണ് രോഹിത്ത് നേടിയത്.

ലണ്ടന്‍: പുതുവര്‍ഷത്തില്‍ ആര്‍സനിലിന് ഗംഭീര തുടക്കം. ഇംഗ്ലീഷ് പ്രീമിയര്‍ലീഗില്‍ ഒന്നിനെതിരെ മൂന്ന് ഗോളുകള്‍ക്ക് ബ്രെന്‍ഡ്‌ഫോഡിനെ ആഴ്‌സനല്‍ മുട്ടുകുത്തിച്ചത്. ബ്രെന്‍ഡ്‌ഫോഡിനെതിരെ ഒരു ഗോളിന് പിന്നില്‍ നിന്ന ശേഷമാണ് ഗണ്ണേഴ്‌സ് മൂന്ന് തവണ വലചലിപ്പിച്ചത്. ഗബ്രിയേല്‍ ജീസുസ്(39), ഗബ്രിയേല്‍ മാര്‍ട്ടിനലി(53), മിക്കേല്‍ മെറീനോ(50) എന്നിവരാണ് ഗോള്‍ അടിച്ചെടുത്തത്. ബ്രയിന്‍ എംബെമോ(13)യാണ് ബ്രെന്‍ഡ്‌ഫോഡിനായി ആശ്വാസ ഗോള്‍ നേടിയത്. ഇതോടെ നോട്ടിങ്ഹാം ഫോറസ്റ്റിനെ മറികടന്ന് ആര്‍സനല്‍ പോയന്റ് ടേബിളില്‍ രണ്ടാംസ്ഥാനത്തെത്തി.

ആദ്യ പകുതിയില്‍ ഇഞ്ചോടിഞ്ച് പോരാട്ടം നടന്നിരുന്നെങ്കിലും രണ്ടാം പകുതിയില്‍ ആഴ്‌സനല്‍ ആധിപത്യം സ്ഥാപിക്കുകയായിരുന്നു. 13ാം മിനിറ്റില്‍ മികച്ച മുന്നേറ്റത്തിലൂടെ എംബെമോയിലൂടെ ബ്രെന്‍ഡ്‌ഫോഡ് വലചലിപ്പിച്ചു. എന്നാല്‍ 29ാം മിനിറ്റില്‍ ഗണ്ണേഴ്‌സ് ഗോള്‍ തിരിച്ചടിച്ചു.

രണ്ടാം പകുതിയുടെ ആരംഭത്തില്‍ തന്നെ ആര്‍സനല്‍ വീണ്ടുമ ഗോള്‍ നേടി. ന്വാനെറിയെടുത്ത കോര്‍ണര്‍ കിക്ക് തട്ടിയകറ്റുന്നതില്‍ ഗോള്‍കീപ്പര്‍ക്ക് ലക്ഷ്യം കണ്ടില്ല. ഡിഫന്‍ഡറുടെ കാലില്‍ തട്ടി ലഭിച്ച പന്ത് സ്പാനിഷ് താരം മിക്കേല്‍ മെറീനോ ലക്ഷ്യത്തിലെത്തിച്ചു. മൂന്ന് മിനിറ്റുകള്‍ക്ക് ശേഷം മറ്റൊരു ഗോള്‍ക്കൂടി ആഴ്‌സനല്‍ വലയിലേക്കെത്തിച്ചു.

38 ടീമുകള്‍ മാറ്റുരച്ച സന്തോഷ് ട്രോഫിയുടെ 78-ാം എഡിഷന്റെ കലാശപ്പോരില്‍ പശ്ചിമബംഗാളും കേരളവും ഏറ്റുമുട്ടും.നാളെ രാത്രി 7.30ന് ഹൈദരാബാദിലെ ജിഎംസി ബാലയോഗി അത്‌ലറ്റിക് സ്റ്റേഡിയത്തില്‍ വെച്ച് കൊമ്പുകോര്‍ക്കും. ആകെയുള്ള 87 മത്സരങ്ങളിലെ അവസാന മാച്ചിനായി ഇരുടീമുകളും സജ്ജരായി കഴിഞ്ഞു.

ഇന്ത്യന്‍ ഫുട്ബോളിന്റെ കളിത്തൊട്ടില്‍ എന്ന് വിളിക്കപ്പെടുന്ന പശ്ചിമ ബംഗാള്‍ തങ്ങളുടെ 47-ാം ഫൈനലിനാണ് കച്ചമുറുക്കുന്നത്. 32 തവണ സന്തോഷ് ട്രോഫി നേടിയ പശ്ചിമ ബംഗാളിന് ടൂര്‍ണമെന്റില്‍ സമാനതകളില്ലാത്ത റോക്കര്‍ഡ് ആണ് ഉള്ളത്. മറുവശത്ത് കേരളമാകട്ടെ ഏഴ് തവണ കിരീടം നേടിക്കഴിഞ്ഞു.

സമീപ വര്‍ഷങ്ങളില്‍ ടൂര്‍ണമെന്റില്‍ ശക്തരായ ടീം ആയി വളരാന്‍ അവര്‍ക്ക് കഴിഞ്ഞു. 2017-18, 2021-22 ഫൈനലുകളില്‍ ബംഗാളിനെ കേരളം പരാജയപ്പെടുത്തിയിട്ടുണ്ട്. ടൂര്‍ണമെന്റില്‍ ഇതുവരെ ഫൈനല്‍ റൗണ്ടില്‍ 32 തവണ കേരളവും ബംഗാളും ഏറ്റുമുട്ടിയപ്പോള്‍ 15 തവണയും വിജയം ബംഗാളിനൊപ്പമായിരുന്നു. കേരളം ഒമ്പത് മത്സരങ്ങള്‍ ജയിച്ചു. എട്ട് മത്സരങ്ങള്‍ സമനിലയില്‍ അവസാനിച്ചു.

78-ാം എഡിഷനില്‍ ഇരു ടീമുകളും തങ്ങളുടെ പത്ത് മത്സരങ്ങളില്‍ 9 ജയവും ഓരോ സമനിലയും നേടി. ഇതുവരെയുള്ള മത്സരങ്ങളില്‍ ഗോള്‍വേട്ടയില്‍ കേരളം തന്നെയാണ് മുന്നില്‍. പത്ത് മത്സരങ്ങളില്‍ നിന്നായി കേരളം 35 ഗോളുകള്‍ നേടിയപ്പോള്‍ ബംഗാള്‍ 27 ഗോളുകളാണ് എതിരാളികളുടെ വലയിലെത്തിച്ചത്. കന്നി സന്തോഷ് ട്രോഫിയില്‍ തന്നെ 11 ഗോളുകളുമായി ബംഗാള്‍ സ്ട്രൈക്കര്‍ റോബി ഹന്‍സ്ഡയാണ് ടൂര്‍ണമെന്റിലെ ടോപ് സ്‌കോറര്‍.

കലാശപോരിലേക്കെത്തുന്നത്് മറ്റുള്ളവരെ സംബന്ധിച്ച് നേട്ടമായിരിക്കാമെന്നും എന്നാല്‍ ബംഗാളിനെ സംബന്ധിച്ച് മത്സരം വിജയിക്കുകയെന്നതാണ് പ്രധാനമെന്നും ബംഗാള്‍ മുഖ്യ പരിശീലകന്‍ സഞ്ജയ് സെന്‍ പറഞ്ഞു. തങ്ങളെ സംബന്ധിച്ചിടത്തോളം കേരളത്തിന്റെ ലോക കപ്പാണ് സന്തോഷ് ട്രോഫി. ഫൈനലില്‍ എത്തുമെന്ന് പ്രതീക്ഷിച്ചിരുന്നു. ഇനി കിരീടം നേടുകയെന്നത് തന്നെയാണ് ലക്ഷ്യം. കേരളത്തിന്റെ മുഖ്യ പരിശീലകന്‍ ബിബി തോമസ് മുട്ടത്ത് പറഞ്ഞു.