അശ്‌റഫ് തൂണേരി/ ദോഹ

ഖത്തറിൽ നിന്നും ബഹ്​റൈനിലേക്ക്​ പെരുന്നാൾ അവധി ആഘോഷിക്കാൻ പോയ വാഹനം സൗദി അറേബ്യയിലെ ഹഫൂഫിനടുത്ത് അപകടത്തിൽ പെട്ട്​ രണ്ട്​ മലയാളികൾ മരിച്ചു. മലപ്പുറം മേൽമുറി സ്വദേശി കടമ്പോത്ത്പാടത്ത് മനോജ്‌കുമാർ അർജുൻ (34), കോട്ടയം മണക്കനാട്​ സ്വദേശി പാലത്തനാത്ത് അഗസ്റ്റിൻ എബി (41) എന്നിവരാണ്​ സൗദി അതിർത്തി കടന്ന്​ 80ഓളം കിലോമീറ്റർ അകലെ വാഹനാപകടത്തിൽ മരിച്ചത്​. ഇവർക്കൊപ്പമുണ്ടായിരുന്ന മറ്റു രണ്ടുപേർ പരിക്കുകളില്ലാതെ രക്ഷപ്പെട്ടു. ഡ്രൈവർ കന്യാകുമാരി സ്വദേശി ഹജൽ മാത്യു മോനും പേര് വിവരം ലഭ്യമല്ലാത്ത മറ്റൊരാളുമാണ് രക്ഷപ്പെട്ടത്.
ചൊവ്വാഴ്​ച വൈകുന്നേരം ഖത്തറിൽ പെരുന്നാൾ അവധി ആരംഭിച്ചതിനു പിന്നാലെയാണ്​ നാലംഗ സംഘം ദോഹയിൽ നിന്നും യാത്ര പുറപ്പെട്ടത്​. അബു സംറ അതിർത്തിയും പിന്നിട്ട് ഹഫൂഫിൽ എത്തുന്നതിനും മുമ്പായിരുന്നു ഇവർ സഞ്ചരിച്ച ലാൻഡ്​ക്രൂയിസർ അപകടത്തിൽപെട്ടത്​. റോഡിലെ മണൽതിട്ടയിൽ കയറി നിയന്ത്രണം നഷ്​ടമായ വാഹനം പിന്നീട് മറിഞ്ഞു വീഴുകയായിരുന്നു. മനോജ് അർജുൻ സംഭവസ്ഥലത്ത് തന്നെ മരിച്ചു. ഗുരുതര പരിക്കേറ്റ അഗസ്​റ്റിൻ എബിയെ ഹുഫൂഫിലെ അൽമന ആശുപത്രിയിൽ പ്രവേശിപ്പിച്ചതിനു പിന്നാലെ മരണം സംഭവിക്കുകയായിരുന്നു. മനോജ് അർജുൻെറ മൃതദേഹം കിങ്​ ഫഹദ് ആശുപത്രിയിൽ സൂക്ഷിച്ചിരിക്കുകയാണെന്ന് സന്നദ്ധ പ്രവർത്തകർ അറിയിച്ചു. നടപടിക്രമങ്ങൾ പൂർത്തിയാക്കുന്നതിനായി നാസർ പാറക്കടവിൻെറ നേതൃത്വത്തിലുള്ള ഹുഫൂഫ്​ കെ.എം.സി.സി പ്രവർത്തകർ രംഗത്തുണ്ട്