അച്ചു ഉമ്മന്‍ അപ്പയെ കുറിച്ച്
അപ്പയുടെ വക്കീല്‍ എന്നാണ് എന്നെ ചെറുപ്പത്തിലേ വിളിച്ചിരുന്നത്. രാഷ്ട്രീയക്കാരനല്ലായിരുന്നെങ്കില്‍ അപ്പ പുരോഹിതനായേനെ എന്നെനിക്കു തോന്നിയിട്ടുണ്ട്. അദ്ദേഹം ആത്മീയവാദിയാണ്, പക്ഷേ മതവാദിയല്ല. സോളര്‍ വിഷയത്തില്‍ ആരോപണങ്ങള്‍ നേരിട്ടപ്പോഴും അപ്പ എതിരാളികളോടു മാന്യത കാണിച്ചു. അവരുടെ കുടുംബ വിഷയങ്ങള്‍ ഒന്നു പോലും പരാമര്‍ശിക്കില്ലെന്ന നിലപാടായിരുന്നു അപ്പയുടേത്. ഞങ്ങളെല്ലാം സങ്കടപ്പെട്ടപ്പോഴും അപ്പ ആശ്വസിപ്പിച്ചു. ഇത്രയും കാലം സംശുദ്ധമായ പൊതുജീവിതം നയിച്ചയാളെ ചിലരുടെ വാക്കുകളുടെ പേരില്‍ ഇത്ര വേട്ടയാടിയതില്‍ വല്ലാത്ത വിഷമമുണ്ട്.

ജനസമ്പര്‍ക്ക പരിപാടിയില്‍ 20 മണിക്കൂര്‍ വരെ ഇടവേള പോലുമെടുക്കാതെ ഒറ്റയ്ക്കു നിന്നു പതിനായിരങ്ങളുടെ പ്രശ്‌നങ്ങള്‍ പരിഹരിച്ചതു കണ്ടപ്പോള്‍, അതിന് യുഎന്നിന്റെ അംഗീകാരം കിട്ടിയപ്പോള്‍ എനിക്കുണ്ടായ സന്തോഷത്തിനു കണക്കില്ല. അതിനെ ആക്ഷേപിച്ചവരുമുണ്ട്. എന്നാല്‍ വര്‍ഷങ്ങളായി രാജ്യത്തു നില്‍ക്കുന്ന രീതി ഒറ്റ ദിവസം കൊണ്ടു മാറ്റാന്‍ ആര്‍ക്കുമാകില്ല. കൊച്ചിയില്‍ മെട്രോ ട്രെയിനിന്റെ വരവ് എല്ലാവരും ആഘോഷമാക്കി. എന്നാല്‍ അതിനു കാരണമായ അപ്പയുടെ ഇച്ഛാശക്തി എങ്ങും പരാമര്‍ശിച്ചു കേട്ടില്ല. ഉദ്ഘാടനത്തിനു ക്ഷണിക്കാനുള്ള മര്യാദ പോലും കാണിച്ചില്ല. എങ്കിലും ഒരു പരിഭവവും പറയാതെ അദ്ദേഹം അടുത്ത ദിവസം അതില്‍ സാധാരണക്കാര്‍ക്കൊപ്പം നടത്തിയ യാത്രയുണ്ടല്ലോ, അതു കണ്ടപ്പോഴും മനസ്സില്‍ സ്‌നേഹം പെരുകിയിട്ടേയുള്ളൂ.

ദാവോസിലെ ഓര്‍മത്തെറ്റ് ഒരു വേദന

ഇപ്പോഴും വേദനയുള്ള ഓര്‍മ സ്വിറ്റ്‌സര്‍ലന്‍ഡിലെ ദാവോസിലേതാണ്. സ്റ്റാന്‍ഡേഡ് ചാര്‍ട്ടേഡ് ബാങ്കിലാണു ഞാനന്ന്. അപ്പ ദാവോസില്‍ ഉച്ചകോടിയില്‍ പങ്കെടുക്കാന്‍ എത്തിയപ്പോള്‍ ബാങ്കുമായി ബന്ധപ്പെട്ട ചടങ്ങിനു ഞാനും അവിടെയുണ്ടായിരുന്നു. അപ്പയ്ക്ക് ഉണ്ടായിരുന്നത് മഞ്ഞില്‍ ഉപയോഗിക്കാന്‍ കൊള്ളാത്ത പഴയ ഷൂസായിരുന്നു. ഉച്ചകോടിയുടെ സംഘാടകര്‍ നല്‍കിയ കിറ്റില്‍ മഞ്ഞിലിടാനുള്ള ഷൂസ് ഉണ്ടായിരുന്നു. ഞാനും സെക്രട്ടറിമാരും അതു നോക്കിയില്ല. അപ്പ തെന്നി താഴെ വീണു തുടയെല്ലു പൊട്ടി. ശസ്ത്രക്രിയയില്‍ എല്ലിന്റെ കുറച്ചു ഭാഗം നീക്കം ചെയ്തു. അതോടെ ആ കാലിന് അല്‍പം നീളം കുറഞ്ഞു, ഇപ്പോള്‍ മുടന്തിയേ നടക്കാനാകൂ.

ഷൂസിന്റെ കാര്യം എന്താണു ശ്രദ്ധിക്കാതിരുന്നതെന്ന് ഇത്രയും കാലമായിട്ടും ഒരിക്കല്‍ പോലും എന്നോടോ മറ്റുള്ളവരോടോ അപ്പ ചോദിച്ചിട്ടില്ല. കഴിഞ്ഞ വര്‍ഷം അപ്പയോടൊത്തു ന്യൂയോര്‍ക്കില്‍ പോകേണ്ടി വന്നു. അവിടത്തെ മുറിയിലെ പാത്രങ്ങളും ഷെല്‍ഫുമൊന്നും അപ്പയ്ക്കു പ്രവര്‍ത്തിപ്പിച്ചു പരിചയമുണ്ടായിരുന്നില്ല. എന്തെങ്കിലും ആവശ്യം വന്നാല്‍ എന്നെ വിളിക്കണമെന്നു പ്രത്യേകം പറഞ്ഞിരുന്നു. ക്ഷീണം കാരണം ഞാന്‍ ഉണര്‍ന്നതു രാവിലെ ഏഴിന്. കുളിച്ചു വേഷം മാറിയിരിക്കുന്ന അപ്പയെയാണ് അപ്പോള്‍ കണ്ടത്. അദ്ദേഹം രാത്രി രണ്ടിനു തന്നെ ഉണര്‍ന്നിരുന്നു. ഒരു ചായ കുടിക്കണമെന്ന് ആഗ്രഹിച്ചിട്ടും എന്നെ ബുദ്ധിമുട്ടിക്കേണ്ടന്നു കരുതി പുലരും വരെ കാത്തിരുന്നു.

അപ്പയ്ക്ക് എല്ലാവരും ഒരുപോലെ

പണ്ട് മാര്‍ ഇവാനിയോസില്‍ കോളജ് തിരഞ്ഞെടുപ്പില്‍ മത്സരിക്കാന്‍ തീരുമാനിച്ചപ്പോള്‍ അപ്പ തന്ന ഉപദേശവും മറക്കില്ല. അന്നു കോടിയേരി ബാലകൃഷ്ണന്റെ മകന്‍ ബിനോയ് കോടിയേരി ആയിരുന്നു എതിര്‍ സ്ഥാനാര്‍ഥി. തന്റെ പക്കല്‍ നിന്നു സഹായം പ്രതീക്ഷിക്കരുതെന്നും തന്റെ മകളാണെന്നു കരുതി ഒരു കാര്യവും വേണമെന്ന് ആഗ്രഹിക്കരുതെന്നും അപ്പ പറഞ്ഞു. അപ്പയ്ക്ക്, ഞങ്ങളും അപ്പയുടെ സഹോദരങ്ങളുടെ മക്കളും തമ്മില്‍ ഒരു ഭേദവുമില്ലായിരുന്നു. അപ്പയുടെ ഗുണങ്ങള്‍ ഏതാണ്ടെല്ലാം അതേ പോലെ കിട്ടിയിട്ടുള്ളതു സഹോദരിയുടെ മകള്‍ സുമചേച്ചിക്കാണ്. അപ്പ ഏറ്റവുമധികം വേദനിച്ചതു സഹോദരി വല്‍സമ്മാമ്മയുടെ മകന്‍ സുമോദിന്റെ മരണത്തിലാണ്.

സാറ്, മരിച്ചു നമ്മള്‍ രക്ഷപ്പെട്ടു!

നര്‍മമുള്ള കാര്യങ്ങളൊക്കെ ഓര്‍മിച്ചു വയ്ക്കും. ഒരിക്കല്‍ അപ്പയെ പഠിച്ച സ്‌കൂളില്‍ വാര്‍ഷികത്തിനു മുഖ്യാതിഥിയായി ക്ഷണിച്ചു. കോട്ടയത്തെ കോണ്‍ഗ്രസ് നേതാവായ ജെ.ജി.പാലയ്ക്കലോടി അടക്കമുള്ളവര്‍ എത്തിയിട്ടുണ്ട്. പരിപാടിക്കു തൊട്ടുമുന്‍പ് പാലയ്ക്കലോടി അപ്പയോടു സ്‌കൂളിന്റെ മുന്‍ പ്രധാനാധ്യാപകന്‍ മരിച്ചു പോയ വിവരം പറഞ്ഞു. അതോടെ യോഗം മാറ്റി വച്ചതായി അപ്പ പ്രഖ്യാപിച്ചു.

എന്നിട്ടു കാറില്‍ കയറാന്‍ എത്തിയപ്പോള്‍ പാലയ്ക്കലോടിയെത്തിയിട്ടു പറഞ്ഞു: പിശകുപറ്റിയതാണ്, ആ പ്രധാനാധ്യാപകന്‍ മരിച്ചിട്ടില്ല. അപ്പയ്ക്കു വിഷമമായി. മരിക്കാത്ത ആളെക്കുറിച്ചു പറഞ്ഞുപോയല്ലോ. ആളുകളെല്ലാം പോവുകയും ചെയ്തു. പപ്പ തിരികെ കാറില്‍ പോകുമ്പോള്‍ പാലയ്ക്കലോടി വീണ്ടുമെത്തിയിട്ടു പറഞ്ഞു. നമ്മള്‍ രക്ഷപ്പെട്ടു, സാറ് മരിച്ചു. അപ്പ ഇടയ്ക്കിടെ ഇത്തരം കഥകള്‍ ഞങ്ങളോടു പറയാറുണ്ട്.

കടപ്പാട്: മനോരമ