Video Stories

വര്‍ഗീയത കൊണ്ട് വയറുനിറയില്ല

Published

5 years ago

August 23, 2019

ഇന്ത്യാരാജ്യം കടുത്ത സാമ്പത്തിക പ്രതിസന്ധിയെ അഭിമുഖീകരിക്കുയാണെന്ന് നാമൊക്കെ പറയാന്‍ തുടങ്ങിയിട്ട് മാസങ്ങളായി. നരേന്ദ്രമോദി സര്‍ക്കാരിന്റെ ആദ്യഘട്ടത്തില്‍ നടപ്പാക്കിയ സാമ്പത്തിക പരിഷ്‌കരണനടപടികള്‍ ഇതിലേക്ക് വഴിവെച്ചതായി സാമ്പത്തികവിദഗ്ധരുള്‍പ്പെടെ പലരും ചൂണ്ടിക്കാട്ടിയതാണ്. കേന്ദ്രസര്‍ക്കാര്‍രേഖകള്‍ പോലും ഇക്കാര്യം പലപ്പോഴായി ശരിവെച്ചതുമാണ്. നൂറ്റിമുപ്പതുകോടിയോളം വരുന്ന ജനതയാകട്ടെ, തങ്ങളകപ്പെട്ട കടുത്ത ജീവിതപ്രയാസത്തെക്കുറിച്ച് ഒരുവിദഗ്ധന്റെയും സഹായമില്ലാതെതന്നെ ഇത് സ്വാനുഭവത്തിലൂടെ പഠിച്ചു. അപ്പോഴൊക്കെയും അത്തരമൊരു സാമ്പത്തിക സ്ഥിതിവിശേഷമില്ലെന്നും പ്രതിപക്ഷത്തിന്റെ ആരോപണം മാത്രമാണെന്നും രാജ്യം പടിപടിയായി പുരോഗമിച്ചുകൊണ്ടിരിക്കുകയാണെന്നുമായിരുന്നു മോദിസര്‍ക്കാരും ബി.ജെ.പിയും അവകാശപ്പെട്ടിരുന്നത്. എന്നാലിതാ രണ്ടാമത് മോദിസര്‍ക്കാര്‍ അധികാരമേറ്റ് മൂന്നുമാസംപിന്നിടുമ്പോള്‍ കേന്ദ്രസര്‍ക്കാരിന്റെ സാമ്പത്തിക ആസൂത്രണ ഏജന്‍സിയായ നീതിആയോഗ് തന്നെ സുവ്യക്തമായി ചിലകാര്യങ്ങള്‍ വെളിപ്പെടുത്തിയിരിക്കുന്നു. വ്യാഴാഴ്ച നീതിആയോഗിന്റെ വൈസ്‌ചെയര്‍മാന്‍ രാജീവ്കുമാര്‍ നടത്തിയ പ്രസ്താവന രാജ്യം നേരിട്ടുകൊണ്ടിരിക്കുന്ന അതീവഗുരുതരമായ പ്രതിസന്ധിയിലേക്കാണ് വിരല്‍ചൂണ്ടിയിരിക്കുന്നത്. ഇതിനുപിന്നാലെ ധനമന്ത്രി നിര്‍മലസീതാരാമനും ഇന്നലെ ചില ന്യായീകരണങ്ങളുമായി രംഗത്തുവന്നിരിക്കുന്നു. സ്വന്തംവീഴ്ചകള്‍ മറച്ചുവെക്കാന്‍ ആഗോളമാന്ദ്യത്തെയാണ് നിര്‍മല കുറ്റപ്പെടുത്തുന്നത്.

രാജ്യം സാമ്പത്തിക മാന്ദ്യത്തിന്റെ പിടിയിലാണെന്നും കഴിഞ്ഞ 70കൊല്ലത്തിനിടെ ഉണ്ടാകാത്ത തരത്തിലുള്ള സാമ്പത്തികപ്രതിസന്ധിയാണിതെന്നും അസാധാരണമായ നടപടികള്‍ കൊണ്ടുമാത്രമേ ഇതിനെ മറികടക്കാനാകൂ എന്നും രാജീവ്കുമാര്‍ പറയുന്നു. ‘വ്യവസായ മേഖലയില്‍ ആര്‍ക്കും ആരെയും വിശ്വാസമില്ലാത്ത അവസ്ഥയാണുള്ളത്. എല്ലാവരും പണം കെട്ടിപ്പിടിച്ചിരിക്കുകയാണ്. സ്വകാര്യ സംരംഭകരില്‍ ആത്മവിശ്വാസം വളര്‍ത്തിയെടുക്കാന്‍ അടിയന്തിരമായ നടപടികള്‍ സ്വീകരിക്കേണ്ടതുണ്ട്’- അദ്ദേഹം ന്യൂഡല്‍ഹിയില്‍ നടത്തിയ പ്രസ്താവനയില്‍ പറഞ്ഞു. 2014 കാലത്ത് ബാങ്കുകള്‍ മുന്‍പിന്‍നോക്കാതെ വായ്പനല്‍കിയതാണ് പ്രതിസന്ധിക്ക് കാരണമായതെന്നാണ് രാജീവ്കുമാറിന്റെ വാദം. എന്നാല്‍ ഇത് പ്രശ്‌നത്തെ ചുരുക്കിക്കാട്ടുന്നതിന് തുല്യമാണ്. കഴിഞ്ഞ എഴുപതുകൊല്ലത്തിനിടെ ഉണ്ടാകാത്ത സാമ്പത്തിക പ്രതിസന്ധിയെന്നുവെച്ചാല്‍ സ്വാതന്ത്യംനേടി ഇന്ത്യന്‍ജനത നേരിട്ട് ഭരിക്കാന്‍ തുടങ്ങിയതുമുതലുള്ള പ്രതിസന്ധിയെന്നാണ് അര്‍ത്ഥം. അതായത് മുന്‍കാലസര്‍ക്കാരുകളൊന്നും വരുത്താത്ത അതിവിപുലമായതും അഗാധവുമായ പ്രതിസന്ധിയെയാണ് മോദിസര്‍ക്കാര്‍ കഴിഞ്ഞ അഞ്ചുകൊല്ലംകൊണ്ട് വരുത്തിവെച്ചിരിക്കുന്നതെന്ന് പറയുന്നത് സര്‍ക്കാരിന്റെ സാമ്പത്തിക ഏജന്‍സിതന്നെയാണ്.

അതും പ്രധാനമന്ത്രി അധ്യക്ഷനായ സമിതി. തെരഞ്ഞെടുപ്പിനുശേഷം സര്‍ക്കാര്‍ അതിന്റെ പൂര്‍ണബജറ്റ് പാര്‍ലമെന്റില്‍ അവതരിപ്പിക്കുകയുണ്ടായി. ഇത്തരമൊരു കൊടിയ സാമ്പത്തിക പ്രതിസന്ധിയെയാണ് രാജ്യം അഭിമുഖീകരിക്കുന്നതെന്ന് തുറന്നുപറയാനുള്ള ആര്‍ജവം അതില്‍ മോദിയോ ധനമന്ത്രിയോ കാട്ടിയില്ല. പുറത്തുവന്ന റിപ്പോര്‍ട്ട്പ്രകാരം രാജ്യത്തിന്റെ സാമ്പത്തികവളര്‍ച്ചാനിരക്ക് അഞ്ചുവര്‍ഷത്തെ ഏറ്റവുംകുറഞ്ഞ നിരക്കായ 6.8 ശതമാനമായാണ് ഇപ്പോള്‍ രേഖപ്പെടുത്തിയിരിക്കുന്നത്. ഇത് നാലുശതമാനത്തിലേക്ക് എത്തുമെന്നാണ് പുതിയവിവരം. ഏഴുമുതല്‍ എട്ടുവരെ ശതമാനം വളര്‍ച്ചാനിരക്ക് രാജ്യംനേടുമെന്ന മോദിസര്‍ക്കാരിന്റെ അവകാശവാദത്തിനുള്ള തിരിച്ചടിയാണ് ഇത്. പൊതുതെരഞ്ഞെടുപ്പിന് മുമ്പ് അവതരിപ്പിച്ച ബജറ്റില്‍ വളര്‍ച്ചാനിരക്ക് 7.5 ശതമാനമാകുമെന്ന് പറഞ്ഞതും കാണാതിരുന്നുകൂടാ. വ്യാവസായിക ഉല്‍പാദനം കുത്തനെ ഇടിഞ്ഞതായാണ് റിപ്പോര്‍ട്ടുകള്‍. വാഹനമടക്കമുള്ള വ്യാപാരമേഖലയില്‍ കഴിഞ്ഞ ആറുമാസത്തിനിടെ പത്തുശതമാനത്തിന്റെ ഇടിവാണ് സംഭവിച്ചിരിക്കുന്നത്. തൊഴിലില്ലായ്മാനിരക്ക് കഴിഞ്ഞ നാല്‍പതുകൊല്ലത്തിന് മുമ്പിലെ അവസ്ഥയിലേക്ക് കൂപ്പുകുത്തിയതായി വെളിപ്പെടുത്തിയത് സര്‍ക്കാര്‍ഏജന്‍സി തന്നെയാണ്. ഈ വിവരം പൂറത്തുവിടാതിരുന്ന് സര്‍ക്കാര്‍ വിമര്‍ശനം ക്ഷണിച്ചുവരുത്തുകയുമുണ്ടായി.

മോദിസര്‍ക്കാരിന്റെ വലിയ നേട്ടമായി കൊട്ടിഘോഷിച്ചതായിരുന്നു ആദ്യസര്‍ക്കാരിന്റെ രണ്ടാംവര്‍ഷം നടപ്പാക്കിയ നോട്ടുനിരോധനം. രാജ്യത്തിന്റെ സാമ്പത്തികരംഗം ഇതിലൂടെ കുതിച്ചുചാട്ടത്തിന് തയ്യാറെടുക്കാനാണ് 1000, 500 നോട്ടുകള്‍ റദ്ദാക്കി പുതിയ രണ്ടായിരംരൂപയുടെ നോട്ടുകള്‍ പുറത്തിറക്കിക്കൊണ്ടുള്ള മോദിയുടെ നേരിട്ടുള്ള പ്രഖ്യാപനം. എന്നാല്‍ റദ്ദാക്കിയ നോട്ടുകളില്‍ 99.3 ശതമാനവും തിരിച്ചുവന്നുവെന്നും നടപടികൊണ്ട് ദോഷമല്ലാതെ രാജ്യത്തിന് പ്രത്യേകിച്ചൊരു നേട്ടവുമുണ്ടായില്ലെന്നും വ്യക്തമായി. ജനങ്ങളെ ബന്ധികളാക്കിക്കൊണ്ട് രാജ്യത്തെ പ്രതിസന്ധിയിലേക്ക് തള്ളിവിടുകയാണെന്ന് മുന്‍പ്രധാനമന്ത്രി ഡോ. മന്‍മോഹന്‍സിംഗിനെ പോലുള്ള ഈ രംഗത്തെ വിദഗ്ധര്‍ മുന്നറിയിപ്പുനല്‍കിയെങ്കിലും കള്ളപ്പണം തിരിച്ചുപിടിക്കുന്നതിലൂടെ രാജ്യം കുതിപ്പിലേക്ക് തിരിച്ചുവരുമെന്നായിരുന്നു മോദിയുടെവാദം. പദ്ധതി പരാജയപ്പെട്ടാല്‍ തന്നെ തൂക്കിക്കൊല്ലാമെന്നുവരെ പറയാന്‍ മോദി കാട്ടിയ ആര്‍ജവം ഇന്ന് അദ്ദേഹം തുടരുന്ന മൗനകമ്പളത്തിലൂടെ പരിഹാസ്യമായി മാറിയിരിക്കുന്നു. ഈ വിഡ്ഢിത്തത്തിന് തൊട്ടുപിറകെയായിരുന്നു രാജ്യത്താകെ ഏകീകൃതനികുതി വ്യവസ്ഥകൊണ്ട് പ്രശ്‌നങ്ങള്‍ക്കെല്ലാം പരിഹാരം എന്നപേരില്‍ ചരക്കുസേവനനികുതി അടിച്ചേല്‍പിച്ചത്. ഇതിലൂടെ സ്വതവേ ദുര്‍ബല, കൂടാതെ ഗര്‍ഭിണിയും എന്ന അവസ്ഥയിലേക്ക് രാജ്യം മാറി. ഏറ്റവും പുതിയവിവരമനുസരിച്ച് മാരുതി, പാര്‍ലെ തുടങ്ങി വന്‍കിട വ്യവസായശാലകള്‍പോലും ജീവനക്കാരെ കൂട്ടത്തോടെ പിരിച്ചുവിട്ടുകൊണ്ടിരിക്കുകയാണ്.

ഏതൊരു സര്‍ക്കാരിന്റെയും ഏറ്റവുംവലിയ ഉത്തരവാദിത്തം ജനങ്ങളുടെ ജീവനുംസ്വത്തും സംരക്ഷിക്കുകയും അവരുടെ ജീവിതസൗകര്യം മെച്ചപ്പെടുത്തിയില്ലെങ്കിലും കുറഞ്ഞത് തകര്‍ക്കാതിരിക്കുകയെങ്കിലും ചെയ്യുകഎന്നതാണ്. ജനങ്ങളെ മത-ജാതി-ഭാഷാപരമായി തമ്മിലടിപ്പിക്കുന്ന ഭരണകൂടത്തിന്റെ ആളുകള്‍ക്ക് നാടും ജനങ്ങളും നേരിടുന്ന കൊടിയപ്രയാസത്തെക്കുറിച്ച് തെല്ലും ആശങ്കയില്ലെന്നതാണ് സത്യത്തില്‍ നാമോരോരുത്തരെയും ഞെട്ടിപ്പിക്കുന്നത്. അതിസമ്പന്നരുടെ കൈകളില്‍ രാജ്യസമ്പത്തിനെ ഏല്‍പിച്ചുകൊടുത്തവര്‍ ജീവിതപ്രയാസങ്ങള്‍ മറക്കാന്‍ ജനങ്ങളില്‍ മയക്കുമരുന്നുപോലെ ജാതിമതവര്‍ഗീയത കുത്തിവെച്ച് രക്ഷപ്പെടാന്‍ ശ്രമിക്കാതെ ഈകുരുക്കില്‍നിന്ന് അവരെ എത്രയുംപെട്ടെന്ന് രക്ഷപ്പെടുത്തിയേ തീരൂ.

Related Topics:editorial editorial today

Up Next

സാമൂഹ്യ സാമ്പത്തിക ജാതി സര്‍വേ സര്‍ക്കാരിന്റെ ബാധ്യത

Don't Miss

നീരവ് മോദിയുടെ റിമാന്‍ഡ് 19 വരെ നീട്ടി

Click to comment

Video Stories

വിദ്യാര്‍ഥികളെ മര്‍ദിച്ച സംഭവം; യൂണിവേഴ്‌സിറ്റി കോളജിലെ എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം

Published

2 days ago

December 17, 2024

webdesk18

തിരുവനന്തപുരം യൂണിവേഴ്‌സിറ്റി കോളജ് എസ്എഫ്‌ഐ യൂണിറ്റ് കമ്മിറ്റി പിരിച്ചുവിടാന്‍ നിര്‍ദേശം. തുടരെയുള്ള അക്രമസംഭവങ്ങളുടെ പശ്ചാതലത്തില്‍ സിപിഎം ജില്ലാ സെക്രട്ടേറിയറ്റിന്റേതാണ് നിര്‍ദേശം. എസ്എഫ്‌ഐ സംസ്ഥാന കമ്മിറ്റിയാണ് വിഷയത്തില്‍ തീരുമാനമെടുക്കേണ്ടത്.

കഴിഞ്ഞ ദിവസവും യൂണിവേഴ്‌സിറ്റി കോളജിലെ യൂണിറ്റില്‍ നിന്നും നാല് പേരെ എസ്എഫ്‌ഐ പുറത്താക്കിയിരുന്നു. ലക്ഷദ്വീപ് സ്വദേശികളായ വിദ്യാര്‍ഥികളെ അധിക്ഷേപിച്ച സംഭവത്തിലാണ് ആകാശ്, ആദില്‍, കൃപേഷ്, അമീഷ് എന്നിവരെ പുറത്താക്കിയത്. ലക്ഷദ്വീപ് വിദ്യാര്‍ഥി നടത്തുന്ന എല്ലാ നിയമ പോരാട്ടത്തിനും പിന്തുണയെന്നും എസ്എഫ്‌ഐ അറിയിച്ചു.തുടര്‍ന്ന് വിദ്യാര്‍ഥിയെ കോളജ് ഹോസ്റ്റലിലിട്ട് ക്രൂരമായി ഏഴംഗസംഘം മര്‍ദിക്കുകയായിരുന്നു. മര്‍ദനത്തിന്റെ ദൃശ്യങ്ങളും പുറത്തുവന്നിരുന്നു. കോളജില്‍ ഭിന്നശേഷിക്കാരനായ വിദ്യാര്‍ഥി ദിവസങ്ങള്‍ക്ക് മുമ്പ് ഈ സംഘത്തിന്റെ മര്‍ദനത്തിനിരയായിരുന്നു. ഈ സംഭവത്തില്‍ മര്‍ദനമേറ്റ വിദ്യാര്‍ഥിക്കൊപ്പം നിന്നതിനാണ് ലക്ഷദ്വീപില്‍ നിന്നുള്ള വിദ്യാര്‍ഥിക്ക് മര്‍ദനമേറ്റത്.

kerala

‘സര്‍ക്കാരിന്‍റേത് കള്ളക്കളി’; വൈദ്യുതി നിരക്ക് വര്‍ധന കാര്‍ബൊറണ്ടം ഗ്രൂപ്പിനെ സഹായിക്കാനെന്ന് രമേശ് ചെന്നിത്തല

നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു.

Published

7 days ago

December 12, 2024

webdesk13

മണിയാറിൽ നായനാർ സ‍ർക്കാർ കാലത്ത് 30 വർഷത്തേക്ക് ഒപ്പിട്ട വൈദ്യുത പദ്ധതി കരാർ നീട്ടാൻ സംസ്ഥാന സർക്കാർ നീക്കം നടത്തുന്നുവെന്നും ഇതിന് പിന്നിൽ അഴിമതിയെന്നും കോൺഗ്രസ് നേതാവ് രമേശ് ചെന്നിത്തല. ഡിസംബർ 30 ന് ബിഒടി കാലാവധി അവസാനിക്കാനിരിക്കെ 30 ദിവസം മുമ്പ് നോട്ടീസ് നൽകി പദ്ധതി സംസ്ഥാന സർക്കാർ ഏറ്റെടുക്കേണ്ടതാണ്. എന്നാൽ അതിന് സർക്കാർ തയ്യാറാകുന്നില്ലെന്നും ഇത് കള്ളകളിയാണെന്നും അദ്ദേഹം ദില്ലിയിൽ ആരോപിച്ചു.

2023 ൽ ഈ ഗ്രൂപ്പുമായി സർക്കാർ ചർച്ച നടത്തി. വെള്ളപ്പൊക്കത്തിൽ നാശനഷ്ടമുണ്ടായെന്ന് വാദിച്ച് കരാർ നീട്ടാനാണ് കമ്പനി ശ്രമിച്ചത്. മുഖ്യമന്ത്രിയും, വൈദ്യുതി മന്ത്രിയും, വ്യവസായ മന്ത്രിയും ഗൂഢാലോചന നടത്തി കമ്പനിക്ക് വേണ്ടി കള്ളക്കളി കളിക്കുകയാണ്. വെള്ളപ്പൊക്കത്തിൽ കാര്യമായ പ്രശ്നങ്ങളൊന്നും മണിയാറിൽ ഉണ്ടായില്ല. നാശനഷ്ടം സംഭവിച്ചിട്ടുണ്ടെങ്കിൽ കമ്പനിക്ക് ഇൻഷുറൻസിന് അപേക്ഷിക്കാമല്ലോ. കമ്പനിക്ക് കരാർ നീട്ടിക്കൊടുക്കാനുള്ള നീക്കം സംസ്ഥാന സർക്കാർ അവസാനിപ്പിക്കണം. കെഎസ്ഇബി ഈ വൈദ്യുത പദ്ധതി ഏറ്റെടുക്കാൻ തയ്യാറാകണമെന്നും രമേശ് ചെന്നിത്തല ആവശ്യപ്പെട്ടു. ഈ അഴിമതിയുടെ കൂടുതൽ വിവരങ്ങൾ നാളെ പുറത്തുവിടുമെന്നും അദ്ദേഹം പറഞ്ഞു.

നായനാർ സർക്കാരിന്‍റെ കാലത്ത് ബിഒടി വ്യവസ്ഥയിൽ സ്വകാര്യ വ്യക്തികൾക്ക് വൈദ്യുതി ഉൽപ്പാദിപ്പിക്കാൻ അവസരം നൽകി. ഇതിന്‍റെ ഭാഗമായി കാർബോറാണ്ടം യൂണിവേഴ്സൽ ഗ്രൂപ്പിന് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകി. ഒരു യൂണിറ്റിന് 50 പൈസക്കാണ് മണിയാറിൽ വൈദ്യുതി ഉൽപ്പാദിപ്പിക്കാൻ അവസരം നൽകിയത്. ബിഒടി അടിസ്ഥാനത്തിലുള്ള കരാർ 30 വർഷത്തേക്കാണ് ഒപ്പിട്ടത്. 2024 ഡിസംബർ 30 ന് കരാർ കാലാവധി കഴിയും. ഇതിന് 30 ദിവസം മുൻപ് നോട്ടീസ് നൽകി സംസ്ഥാന സർക്കാർ പദ്ധതി ഏറ്റെടുക്കുകയാണ് വേണ്ടത്. എന്നാൽ അതൊന്നും ചെയ്യുന്നില്ലെന്ന് ചെന്നിത്തല കുറ്റപ്പെടുത്തി.

Video Stories

അഡ്‌ലെയ്ഡില്‍ ഇന്ത്യക്കെതിരെ ഓസീസിന് പത്ത് വിക്കറ്റ് വിജയം

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്.

Published

2 weeks ago

December 8, 2024

webdesk13

ബോര്‍ഡര്‍ ഗവാസ്‌കര്‍ ട്രോഫിയിലെ രണ്ടാം ടെസ്റ്റില്‍ ഇന്നിങ്‌സ് തോല്‍വി ഒഴിവാക്കിയെന്നതില്‍ രോഹിത്തിനും സംഘത്തിനും ആശ്വസിക്കാം. അഡലെയ്ഡിലെ രണ്ടാം ടെസ്റ്റില്‍ ആസ്‌ട്രേലിയക്ക് പത്ത് വിക്കറ്റ് ജയം. രണ്ടാം ഇന്നിങ്‌സില്‍ 175 റണ്‍സിന് ഇന്ത്യയെ പുറത്താക്കിയ ഓസീസിന് ജയിക്കാന്‍ 19 റണ്‍സ് മതിയായിരുന്നു.

ഓപ്പണര്‍മാരായ നഥാന്‍ മക്‌സ്വീനെയും (10) ഉസ്മാന്‍ ഖ്വാജയും (ഒമ്പത്) അനായാസം അതിഥേയരെ ലക്ഷ്യത്തിലെത്തിച്ചു. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ഇരുടീമുകളും ഒപ്പമെത്തി. ആദ്യ ടെസ്റ്റില്‍ ഇന്ത്യ 295 റണ്‍സിന് ജയിച്ചിരുന്നു.

ഓസീസ് നായകന്‍ പാറ്റ് കമ്മിന്‍സിന്റെ അഞ്ചു വിക്കറ്റ് പ്രകടനമാണ് രണ്ടാം ഇന്നിങ്‌സില്‍ ഇന്ത്യന്‍ ബാറ്റിങ്ങിന്റെ നട്ടെല്ലൊടിച്ചത്. ഇന്ത്യക്കായി രണ്ടാം ഇന്നിങ്‌സിലും അല്‍പമെങ്കിലും പൊരുതിന്നെത് നിതീഷ് കുമാര്‍ റെഡ്ഡിയാണ്. 47 പന്തില്‍ 42 റണ്‍സെടുത്താണ് താരം പുറത്തായത്. ഒന്നാം ഇന്നിങ്‌സിലും നിതീഷ് കുമാര്‍ (42) തന്നെയായിരുന്നു ഇന്ത്യയുടെ ടോപ് സ്‌കോറര്‍.

മൂന്നാം ദിനം അഞ്ച് വിക്കറ്റിന് 128 റണ്‍സെന്ന നിലയില്‍ ബാറ്റിങ് പുനരാരംഭിച്ച ഇന്ത്യക്ക് സ്‌കോര്‍ ബോര്‍ഡ് തുറക്കുന്നതിനു മുമ്പേ ഋഷഭ് പന്തിന്റെ വിക്കറ്റ് നഷ്ടമായി. 31 പന്തില്‍ 28 റണ്‍സെടുത്ത പന്തിനെ മിച്ചല്‍ സ്റ്റാര്‍ക്ക് സ്മിത്തിന്റെ കൈകളിലെത്തിച്ചു. ഒരറ്റത്ത് നിതീഷ് കുമാര്‍ പൊരുതിനിന്നെങ്കിലും 14 പന്തില്‍ ഏഴു റണ്‍സെടുത്ത ആര്‍. അശ്വിന്‍ കമ്മിന്‍സിന്റെ പന്തില്‍ വിക്കറ്റ് കീപ്പര്‍ക്ക് ക്യാച്ച് നല്‍കി മടങ്ങി. ഹര്‍ഷിത് റാണയും (പൂജ്യം) വന്നപോലെ മടങ്ങി. കമ്മിന്‍സിന്റെ പന്തില്‍ ഖ്വാജക്ക് ക്യാച്ച് നല്‍കിയാണ് താരം പുറത്തായത്. ഇതിനിടെ വമ്പനടികള്‍ക്ക് ശ്രമിച്ച നിതീഷ് കുമാറിനെയും കമ്മിന്‍സ് മക്‌സ്വീനെയുടെ കൈകളിലെത്തിച്ചു.

എട്ടു പന്തില്‍ ഏഴു റണ്‍സെടുത്ത മുഹമ്മദ് സിറാജിനെ ബോളണ്ടും മടക്കിയതോടെ ഇന്ത്യയുടെ ഇന്നിങ്‌സ് 175 റണ്‍സില്‍ അവസാനിച്ചു. 180 റണ്‍സെന്ന ഇന്ത്യയുടെ ഒന്നാം ഇന്നിങ്‌സ് സ്‌കോറിന് മറുപടിയായി ഓസീസിനെ ട്രാവിസ് ഹെഡ്ഡിന്റെ (140) തകര്‍പ്പന്‍ സെഞ്ച്വറി 337ല്‍ എത്തിച്ചിരുന്നു. പേസര്‍മാരായ ജസ്പ്രീത് ബുംറയുടെയും മുഹമ്മദ് സിറാജിന്റെയും നാല് വിക്കറ്റ് പ്രകടനമാണ് ആതിഥേയരുടെ ഒന്നാം ഇന്നിങ്‌സ് ലീഡ് 157ല്‍ ഒതുക്കിയത് മിച്ചം.

ആദ്യ ദിനം ഒരു വിക്കറ്റിന് 86 റണ്‍സിലാണ് ഓസീസ് കളി നിര്‍ത്തിയത്. പിറ്റേന്ന് ഇവരെ 337ല്‍ പുറത്താക്കിയ ഇന്ത്യ രണ്ടാം ഇന്നിങ്‌സില്‍ തിരിച്ചടിക്കാമെന്ന പ്രതീക്ഷയില്‍ ബാറ്റിങ്ങിന് ഇറങ്ങി.

എന്നാല്‍, നാലാം ഓവറില്‍ ഓപണര്‍ കെ.എല്‍. രാഹുലിനെ (7) ക്യാപ്റ്റന്‍ പാറ്റ് കമ്മിന്‍സ് വിക്കറ്റിന് പിറകിലുണ്ടായിരുന്ന അലക്‌സ് കാരിയുടെ കൈകളിലേക്കയക്കുമ്പോള്‍ സ്‌കോര്‍ ബോര്‍ഡില്‍ 12. ഒന്നാം ഇന്നിങ്‌സിലെ ആദ്യ പന്തില്‍ത്തന്നെ വീണ ഓപണര്‍ യശസ്വി ജയ്‌സ്വാള്‍ 28 റണ്‍സ് സംഭാവന ചെയ്ത് മറ്റൊരു പേസറായ സ്‌കോട്ട് ബോളണ്ടിന് വിക്കറ്റ് സമ്മാനിച്ചു. കാരിക്ക് രണ്ടാം ക്യാച്ച്. 42ല്‍ രണ്ടാം ഓപണറെയും നഷ്ടമായ ഇന്ത്യയെ കരകയറ്റേണ്ട ചുമതല ശുഭ്മന്‍ ഗില്ലിന്റെയും വിരാട് കോഹ്‌ലിയുടെയും ചുമലുകളിലായി.

ഒരിക്കല്‍ക്കൂടി പരാജിതനായ കോഹ്‌ലി (11) കാരിയുടെ ഗ്ലൗസില്‍ത്തന്നെ അവസാനിച്ചു. ബോളണ്ടിനായിരുന്നു വിക്കറ്റ്. 66ല്‍ കോഹ്‌ലിയും കരക്ക് കയറിയതോടെ ഋഷഭ് പന്തെത്തി. മറുതലക്കല്‍ പ്രതീക്ഷ നല്‍കി!യ ഗില്‍ വ്യക്തിഗത സ്‌കോര്‍ 28ല്‍ മിച്ചല്‍ സ്റ്റാര്‍ക്കിന്റെ പന്തില്‍ ബൗള്‍ഡായി. നാലിന് 86. ക്യാപ്റ്റന്‍ രോഹിതും പന്തും ചേര്‍ന്ന് സ്‌കോര്‍ 100 കടത്തി. 105ല്‍ എത്തിയപ്പോള്‍ രോഹിത്തിന്റെ (5) കുറ്റി കമ്മിന്‍സ് തെറിപ്പിച്ചു. ഇവിടെ വെച്ചാണ് പന്തും റെഡ്ഡിയും സംഗമിച്ചത്.

ഒന്നാം ഇന്നിങ്‌സില്‍ ഏകദിന ശൈലിയില്‍ ബാറ്റു വീശിയ ട്രാവിസ് ഹെഡ്ഡിന്റെ സെഞ്ച്വറിയാണ് ആതിഥേയര്‍ക്ക് മികച്ച സ്‌കോര്‍ സമ്മാനിച്ചത്. 141 പന്തുകള്‍ നേരിട്ട ഹെഡ് 140 റണ്‍സെടുത്തു പുറത്തായി. നാലു സിക്‌സറുകളും 17 ഫോറുകളുമാണു താരം ബൗണ്ടറി കടത്തിയത്. അര്‍ധ സെഞ്ച്വറി നേടിയ മാര്‍നസ് ലബുഷെയ്‌നും (126 പന്തില്‍ 64) ഓസീസിനായി തിളങ്ങി.

നേഥന്‍ മക്‌സ്വീനി (109 പന്തില്‍ 39), മിച്ചല്‍ സ്റ്റാര്‍ക്ക് (15 പന്തില്‍ 18), അലക്‌സ് കാരി (32 പന്തില്‍ 15) എന്നിവരാണ് ഓസീസിന്റെ മറ്റു പ്രധാന സ്‌കോറര്‍മാര്‍. ഇന്ത്യക്കായി നിതീഷ് കുമാര്‍ റെഡ്ഡിക്കും ആര്‍. അശ്വിനും ഓരോ വിക്കറ്റുകള്‍ വീതം നേടി.