കണ്ണൂരില്‍ കനത്ത മഴയിലും കാറ്റിലും ഉളിക്കല്‍ നുച്യാട് അമേരിക്കന്‍ പാറയില്‍ വീടിനുമുകളില്‍ മരം കടപുഴകി വീണു. കല്യാണി അമ്മയുടെ വീടിനു മുകളിലാണ് മരം കടപുഴകി വീണത്. കനത്ത കാറ്റ് ഉണ്ടായിരുന്നുവെന്ന് പ്രദേശവാസികള്‍ പറയുന്നു.

അതേസമയം, വയനാട്ടിലും വിവിധയിടങ്ങളില്‍ പെയ്ത ശക്തമായ മഴയിലും കാറ്റിലും വ്യാപക നാശനഷ്ടം റിപ്പോര്‍ട്ട് ചെയ്തു. മരങ്ങള്‍ കടപുഴകി വീണ് വൈദ്യുതി മുടങ്ങി. കേണിച്ചിറയില്‍ വലിയ തോതില്‍ കൃഷിനാശമുണ്ടായെന്നും റിപ്പോര്‍ട്ടുണ്ട്. ഇന്ന് ഉച്ചക്ക് രണ്ട് മണിയോടെയാണ് വേനല്‍ മഴ ശക്തമായത്.

സംസ്ഥാനത്ത് അടുത്ത മൂന്ന് മണിക്കൂറിനുള്ളില്‍ അതിശക്തമായ മഴയ്ക്ക് സാധ്യത. ഒന്‍പത് ജില്ലകളില്‍ കേന്ദ്ര കാലാവസ്ഥാവകുപ്പ് ഓറഞ്ച് അലര്‍ട്ട് പ്രഖ്യാപിച്ചു. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂര്‍, കോഴിക്കോട്, വയനാട് കണ്ണൂര്‍, കാസര്‍കോട് എന്നീ ജില്ലകളിലാണ് ഓറഞ്ച് അലര്‍ട്ട് പ്രഖ്യാപിച്ചത്.

തിരുവനന്തപുരം, കൊല്ലം, ആലപ്പുഴ, പാലക്കാട്, മലപ്പുറം ജില്ലകളിലും മഴയ്ക്ക് സാധ്യതയുണ്ട്. അതിശക്തമായ കാറ്റിനും ഇടിമിന്നലിനും സാധ്യതയുണ്ടെന്നും കേന്ദ്രകാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്.

തിരുവനന്തപുരം കിളിമാനൂര്‍ കരിക്കകത്ത് ക്ഷേത്രത്തിലെ ഗാനമേളയ്ക്കിടെ സംഘര്‍ഷം. സംഭവത്തില്‍ തടയാനെത്തിയ പൊലീസുകാര്‍ക്കു നേരെ ആക്രമണമുണ്ടായി. എസ്‌ഐ അടക്കം മൂന്നു പൊലീസുകാര്‍ക്ക് പരിക്കേറ്റു.

കേസില്‍ നാല് പേരെ പൊലീസ് അറസ്റ്റ് ചെയ്തു. കാട്ടാമ്പുറം സ്വദേശികളായ സുബീഷ് (34), അല്‍ മുബീന്‍ (27), സുബിന്‍ (27), ഗൗതം (18) എന്നിവരാണ് അറസ്റ്റിലായത്. സംഭവത്തില്‍ പത്ത് പേര്‍ക്കെതിരെ കേസെടുത്ത പൊലീസ് ഇവരില്‍ നാലു പേരെയാണ് അറസ്റ്റ് ചെയ്തത്. മറ്റുള്ളവര്‍ക്കായുള്ള അന്വേഷണം പുരോഗമിക്കുകയാണ്.

ഇന്നലെ രാത്രിയോടെയായിരുന്നു സംഭവം. കരിക്കകം പഞ്ചമുഖം മാടന്‍ ക്ഷേത്രത്തിലെ ഉത്സവത്തിനിടെ സംഘര്‍ഷമുണ്ടായതോടെ പൊലീസ് ഉദ്യോഗസ്ഥര്‍ ഇടപെടുകയും ഇതോടെ യുവാക്കള്‍ സംഘം ചേര്‍ന്ന് ഇവരെ ആക്രമിക്കുകയുമായിരുന്നു. യുവാക്കള്‍ പൊലീസ് ജീപ്പ് അടിച്ചുതകര്‍ക്കുകയും ചെയ്തു. തുടര്‍ന്ന് വലിയ സംഘര്‍ഷത്തിലേക്ക് നീങ്ങിയതോടെ കൂടുതല്‍ പൊലീസുകാരെത്തിയാണ് രംഗം ശാന്തമാക്കിയത്.