Video Stories

പ്ലസ്ടുവിന്റെ പേരില്‍ പഴി കേള്‍ക്കേണ്ടതാര്

Published

6 years ago

June 30, 2018

1957 മെയ് 6-ന് കേരള നിയമസഭയില്‍ ഗവര്‍ണറുടെ നയപ്രഖ്യാപനത്തിന്മേലുള്ള നന്ദിപ്രമേയ ചര്‍ച്ചയില്‍ പങ്കെടുത്തുകൊണ്ട് സി.എച്ച് മുഹമ്മദ്‌കോയ നടത്തിയ ഒരു പ്രസംഗമുണ്ട്. അതിലെ ഒരു ഭാഗം ഇങ്ങനെയായിരുന്നു: ”കേന്ദ്രഗവണ്‍മെന്റ് ദക്ഷിണേന്ത്യയെ അവഗണിക്കുന്നു. ദക്ഷിണ ഇന്ത്യ കേരളത്തെ അവഗണിക്കുന്നു. കേരളം മലബാറിനെ അവഗണിക്കുന്നു. മലബാര്‍ ജില്ലയിലാകട്ടെ ഏറനാട്, വള്ളുവനാട്, തിരൂര്‍ പ്രദേശങ്ങള്‍ അവഗണിക്കപ്പെടുന്നു. ഈ സ്ഥലങ്ങളിലെ ജനങ്ങള്‍ക്ക് മറ്റുള്ള ജനങ്ങള്‍ അനുഭവിക്കുന്ന സൗകര്യങ്ങള്‍ ഒന്നുമില്ല. അവിടെ പാലങ്ങളില്ല, റോഡുകളില്ല, ബസ് റൂട്ടുകളില്ല, സ്‌കൂളുകളും വിദ്യാഭ്യാസ സൗകര്യങ്ങളുമില്ല. ബ്രിട്ടീഷ് ഗവണ്‍മെന്റിന്റെ കാലത്ത് സ്റ്റാത്താം സായ്പ് മുസ്‌ലിംകള്‍ക്ക് വേണ്ടി ചെയ്തുകൊടുത്ത സൗകര്യങ്ങള്‍ പോലും ഈ കമ്മ്യൂണിസ്റ്റ് ഗവണ്‍മെന്റ് നല്‍കുമോ എന്ന് സംശയിക്കേണ്ടിയിരിക്കുന്നു”. ഡോ. ജോര്‍ജ്ജ് ഓണക്കൂര്‍ ചീഫ് എഡിറ്ററായി പ്രസിദ്ധീകരിച്ച സി.എച്ചിന്റെ നിയമസഭാ പ്രസംഗങ്ങള്‍ എന്ന പുസ്തകത്തില്‍ ഈ പ്രസംഗത്തിന്റെ പൂര്‍ണ രൂപമുണ്ട്. കേരളപ്പിറവിക്ക് ശേഷം ആദ്യമായി നടന്ന തെരഞ്ഞെടുപ്പില്‍ അധികാരത്തില്‍ വന്ന ഇ.എം.എസ് മന്ത്രിസഭയിലെ പ്രമുഖരെ നോക്കിയായിരുന്നു നിയമസഭയിലെ നവാഗതനായ സി.എച്ചിന്റെ ചാട്ടുളി പോലെയുള്ള വാക്കുകള്‍. സി.എച്ചിനന്ന് 30 വയസില്‍ താഴെയാണ് പ്രായം. ഇ.എം.എസിനെ കൂടാതെ സി. അച്യുതമേനോന്‍, ടി.വി തോമസ്, പ്രൊഫ. ജോസഫ് മുണ്ടശ്ശേരി, വി.ആര്‍ കൃഷ്ണയ്യര്‍, കെ.ആര്‍ ഗൗരി തുടങ്ങി അതിപ്രഗത്ഭരായ മന്ത്രിമാര്‍ ഉള്‍ക്കൊള്ളുന്ന ഭരണകക്ഷിയെ നോക്കിയായിരുന്നു സി.എച്ചിന്റെ പ്രസംഗം. താനൂരില്‍ നിന്നുള്ള എം.എല്‍.എ ആയിരുന്നു അന്ന് സി.എച്ച്. മലപ്പുറം ജില്ല രൂപീകരിക്കപ്പെടുന്നതിന് മുമ്പ് നടത്തിയ ആ പ്രസംഗത്തില്‍ മേഖലയിലെ പിന്നാക്കാവസ്ഥയുടെ ചിത്രം വരച്ച് കാണിക്കുകയായിരുന്നു സി.എച്ച്. എല്ലാ അര്‍ത്ഥത്തിലും പിന്നാക്കമായിരുന്ന ഈ പ്രദേശത്തെ വികസനത്തിന്റെ വെള്ളിവെളിച്ചത്തിലേക്കും വിദ്യാഭ്യാസത്തിന്റെ വഴികളിലേക്കും നയിക്കുന്നതിന് പിന്നീട് സി.എച്ചിന് തന്നെ നിയോഗമുണ്ടായത് ചരിത്രം. ആറ് പതിറ്റാണ്ട് മുമ്പാണ് സി.എച്ച് ഈ പ്രസംഗം നടത്തിയത്. ഈ 60 കൊല്ലത്തിനിടയില്‍ മലപ്പുറം ജില്ല രൂപീകരിക്കപ്പെടുകയും വിദ്യാഭ്യാസ, സാമൂഹിക, സാമ്പത്തിക മേഖലകളില്‍ ഏറെ മുന്നേറുകയും ചെയ്തു. ആ മുന്നേറ്റത്തില്‍ സി.എച്ചും മുസ്‌ലിംലീഗും വഹിച്ച പങ്ക് സമാനതകളില്ലാത്തതാണ്. അതുകൊണ്ട് തന്നെ മലബാറില്‍ പ്രത്യേകിച്ച് മലപ്പുറത്ത് വികസനത്തിന്റെയോ, സൗകര്യങ്ങളുടെയോ കാര്യത്തില്‍ എന്തെങ്കിലും കുറവ് കണ്ടാല്‍ വിമര്‍ശകര്‍ ആദ്യം ഉന്നയിക്കുന്ന ചോദ്യം മുസ്‌ലിം ലീഗിനോടാണ്. ഇപ്പോള്‍ പ്ലസ്ടു സീറ്റുകളുടെ കാര്യത്തില്‍ മലബാറിലെ ജില്ലകളില്‍ വലിയതോതിലുള്ള അപര്യാപ്തതയുണ്ട്. മലപ്പുറത്ത് പ്രശ്‌നം അതിരൂക്ഷമാണ്. ഇവിടെ പ്ലസ് വണ്‍, വി.എച്ച്.എസ്.ഇ, പോളിടെക്‌നിക് കോളജ്, ഐ.ടി.ഐ എല്ലാം കൂടി കൂട്ടിയാലും ആകെ അറുപതിനായിരത്തോളം സീറ്റുകളെയുള്ളൂ. പ്ലസ് വണ്‍ അപേക്ഷകരുടെ എണ്ണം 84003, എസ്.എസ്.എല്‍.സി വിജയിച്ചവരില്‍ 24000 കുട്ടികള്‍ക്ക് പഠിക്കാന്‍ സീറ്റുകളില്ല. അപ്പോള്‍ ഉടന്‍ വരുന്ന ഒരു ചോദ്യമുണ്ട്. മുസ്‌ലിംലീഗും ലീഗിന്റെ വിദ്യാഭ്യാസ മന്ത്രിമാരും പല തവണ ഭരിച്ചിട്ടും എന്തേ ഇങ്ങനെ? എളുപ്പത്തില്‍ ആശയക്കുഴപ്പമുണ്ടാക്കാന്‍ പറ്റുന്ന ഒരു ചോദ്യമാണിത്. അതിന് മറുപടി പറയുമ്പോള്‍ അല്‍പം ചരിത്രം കൂടി പറയേണ്ടിവരും.
കേരളം ഒരു സംസ്ഥാനമായി മാറിയതിനു ശേഷമുള്ള ഇക്കഴിഞ്ഞ 62 വര്‍ഷത്തിനിടയില്‍ ഭരണം നടത്തിയ വിവിധ സര്‍ക്കാറുകളില്‍ മുസ്‌ലിംലീഗ് വിദ്യാഭ്യാസ വകുപ്പ് കൈകാര്യം ചെയ്തിട്ടുണ്ട്. ഈ 62 വര്‍ഷത്തിനിടയില്‍ 27 കൊല്ലമാണ് മുസ്‌ലിം ലീഗിന്റെ മന്ത്രിമാര്‍ വിദ്യാഭ്യാസ വകുപ്പ് കൈകാര്യം ചെയ്തത്. ബാക്കിയുള്ള 35 കൊല്ലവും വിദ്യാഭ്യാസ വകുപ്പ് ഭരിച്ചത് മറ്റു പാര്‍ട്ടികളായിരുന്നു. ഇതില്‍ 1982-87 വരെയുള്ള കരുണാകരന്‍ മന്ത്രിസഭയില്‍ അഞ്ച് കൊല്ലം വിദ്യാഭ്യാസ മന്ത്രിയായ ടി.എം ജേക്കബിന്റെ കാലം ഒഴിച്ച് നിര്‍ത്തിയാല്‍ ബാക്കിയുള്ളതില്‍ മൂന്നു പതിറ്റാണ്ടോളം വിദ്യാഭ്യാസ വകുപ്പ് മന്ത്രിമാരായത് ഇടതുപക്ഷക്കാരായിരുന്നു. ഇവരുടെ കാലത്ത് മലബാറിന്റെ വിദ്യാഭ്യാസ പിന്നോക്കാവസ്ഥ മാറ്റാന്‍ നല്‍കിയ സംഭാവനയെന്താണ്?
മലബാറിലെ പ്ലസ്ടു സീറ്റുകളുടെ കുറവ് പറയുമ്പോള്‍ മൂന്നു പതിറ്റാണ്ടോളം വിദ്യാഭ്യാസ വകുപ്പ് ഭരിച്ച ഇടതുപക്ഷ മന്ത്രിമാര്‍ എന്ത് ചെയ്തു എന്നുകൂടി പറയേണ്ടതല്ലേ? ഇവിടെ ഒരു കൊടുംചതിയുടെ കഥ കൂടിയുണ്ട്. പ്ലസ്ടു സീറ്റുകളും സ്‌കൂളുകളും അനുവദിച്ചപ്പോള്‍ മലബാറിനോട് ഏറ്റവും വലിയ വിവേചനം കാണിച്ചത് ഒരു ഇടതുപക്ഷ സര്‍ക്കാര്‍ തന്നെയാണ്. 1996-2001ല്‍ കേരളം ഭരിച്ച ഇ.കെ നായനാര്‍ മന്ത്രിസഭയുടെ കാലത്താണിത്. ഇതിന്റെ പാപക്കറയില്‍ നിന്ന് ഇടതുപക്ഷത്തിന് ഒരിക്കലും കരകയറാനാകില്ല.
1957ല്‍ സി.എച്ച് കേരള നിയമസഭയില്‍ പറഞ്ഞത് പോലെ, കേരളം മലബാറിനെ അവഗണിച്ചതിന്റെ നേര്‍സാക്ഷ്യമായിരുന്നു 1998ല്‍ നായനാര്‍ സര്‍ക്കാര്‍ നടപ്പിലാക്കിയ പ്ലസ്ടു നയം. ഇക്കാലഘട്ടത്തിലാണ് അതുവരെയും യൂണിവേഴ്‌സിറ്റി വിദ്യാഭ്യാസത്തിന്റെ ഭാഗമായി പ്രീഡിഗ്രി എന്ന പേരില്‍ കോളജുകളില്‍ നടന്നിരുന്ന കോഴ്‌സ്, ഹയര്‍സെക്കണ്ടറിയായി ഹൈസ്‌കൂളുകളുടെ ഭാഗമാക്കാന്‍ തീരുമാനിച്ചത്. അന്നത്തെ നായനാര്‍ സര്‍ക്കാര്‍ 1998ലും, 2000ത്തിലും രണ്ട് ഘട്ടമായി പ്ലസ്ടു സ്‌കൂളുകള്‍ അനുവദിച്ചപ്പോള്‍ പ്രാദേശികമായും സാമുദായികമായും വലിയ വിവേചനം കാണിച്ചു. ഈ രണ്ട് വര്‍ഷങ്ങളിലായി 397 എയ്ഡഡ് പ്ലസ്ടു സ്‌കൂളുകള്‍ പുതുതായി അനുവദിച്ചപ്പോള്‍, കൃസ്ത്യന്‍ സമുദായത്തിന് 183, നായര്‍-92, ഈഴവ- 71, എന്നിങ്ങനെ ഹയര്‍സെക്കണ്ടറി സ്‌കൂളുകള്‍ ലഭിച്ചു. മുസ്‌ലിംകള്‍ക്ക് ആകെ നല്‍കിയത് 51 സ്‌കൂളുകള്‍. കൃസ്ത്യന്‍, ഈഴവ, നായര്‍ വിഭാഗങ്ങള്‍ക്ക് അന്ന് നല്‍കിയ സ്‌കൂളുകള്‍ മഹാഭൂരിപക്ഷവും തെക്കന്‍ ജില്ലകളിലായിരുന്നു. മലബാറിലെ ജില്ലകള്‍ക്ക് അനുവദിക്കപ്പെട്ട 51 സ്‌കൂളുകള്‍ കൊണ്ട് തൃപ്തിപ്പെടേണ്ടിവന്നു. ജനസംഖ്യാനുപാതികമായി നോക്കുകയാണെങ്കില്‍ തെക്കന്‍ ജില്ലകളില്‍ അനുവദിച്ചതിന്റെ ഇരട്ടിയിലേറെ ഹയര്‍സെക്കണ്ടറി സ്‌കൂളുകള്‍ മലബാറില്‍ അനുവദിക്കേണ്ടതായിരുന്നു. പ്ലസ്ടു സീറ്റുകളുടെയും ബാച്ചുകളുടെയും കാര്യത്തില്‍ അന്ന് നായനാര്‍ സര്‍ക്കാര്‍ തുടങ്ങിവെച്ച, മലബാറിനോടുള്ള കടുത്ത വിവേചനമാണ് ഒരു ‘ചരിത്രപരമായ’ പിന്നോക്കാവസ്ഥയായി ഇപ്പോഴും നമ്മോടൊപ്പമുള്ളത്. തുടര്‍ന്ന് 2001ല്‍ കെ. കരുണാകരന്‍ മന്ത്രിസഭയില്‍ വിദ്യാഭ്യാസ മന്ത്രിയായ അഡ്വ. നാലകത്ത് സൂപ്പിയാണ് ഈ വിവേചനം അവസാനിപ്പിക്കാനുള്ള ചില നടപടികള്‍ സ്വീകരിച്ചത്. എല്ലാ ഹൈസ്‌കൂളുകളിലും പ്ലസ് വണ്‍ ബാച്ചുകളും നിലവിലുള്ളവയില്‍ പുതിയ ബാച്ചുകളും അനുവദിക്കപ്പെട്ടു. പ്ലസ്ടു സീറ്റ് കുറവുള്ള മേഖലകളില്‍ ഹൈസ്‌കൂളുകളെ ഹയര്‍സെക്കന്ററിസ്‌കൂളുകളായി ഉയര്‍ത്തി. നാലകത്ത് സൂപ്പിയുടെ കാലത്ത്, മലപ്പുറം ജില്ലയില്‍ മാത്രം ഇങ്ങനെ 49 ഹൈസ്‌കൂളുകള്‍ ഹയര്‍സെക്കണ്ടറികളായി അപ്‌ഗ്രേഡ് ചെയ്യപ്പെട്ടു. ഇതേ മന്ത്രിസഭയില്‍ പിന്നീട് വിദ്യാഭ്യാസ മന്ത്രിയായി ഇ.ടി മുഹമ്മദ് ബഷീറും വിദ്യാഭ്യാസ സ്ഥാപനങ്ങളുടെ കാര്യത്തില്‍ മലബാറിലെ അസന്തുലിതാവസ്ഥ പരിഹരിക്കാന്‍ ചില ശ്രമങ്ങള്‍ നടത്തി. സൂപ്പിയും ബഷീറുമൊക്കെ ഇങ്ങനെയുള്ള പ്രവര്‍ത്തനങ്ങളുമായി മുന്നോട്ട് പോകുമ്പോഴൊക്കെ ഇടതുപക്ഷം, വര്‍ഗീയ പ്രീണനവും കോഴയാരോപണവുമായി രംഗത്തുണ്ടായിരുന്നു. ഇടതുപക്ഷം ഭരിക്കുമ്പോള്‍ മലബാറിനെ പൂര്‍ണമായി അവഗണിക്കുക. യു.ഡി.എഫ് സര്‍ക്കാറുകള്‍ അത് പരിഹരിക്കാന്‍ ശ്രമിക്കുമ്പോള്‍ സമരം ചെയ്ത് അതിനെ പരാജയപ്പെടുത്തുക. അടുത്ത ഇടതുപക്ഷ സര്‍ക്കാര്‍ വരുമ്പോള്‍ പ്ലസ്ടു സീറ്റും, കോളജുമൊക്കെ ചോദിക്കുമ്പോള്‍ മുസ്‌ലിംലീഗിന്റെ മന്ത്രിമാര്‍ എന്തേ അനുവദിക്കാതിരുന്നത് എന്ന് ചോദിച്ച് ആശയക്കുഴപ്പമുണ്ടാക്കുക. കഴിഞ്ഞ കുറെ വര്‍ഷങ്ങളായി ഇടതുപക്ഷത്തിന്റെ സ്ഥിരം കലാപരിപാടിയാണിത്. 2006 മുതല്‍ 2011 വരെ വീണ്ടും, കേരളം ഇടതുപക്ഷം ഭരിച്ചു. എം.എ ബേബി വിദ്യാഭ്യാസ മന്ത്രിയായി. മലബാറിലെ പ്ലസ്ടു സീറ്റുകളുടെ കുറവ് പരിഹരിക്കാന്‍ ഒന്നും ചെയ്തില്ല. മലബാറില്‍ പുതിയ കോളജുകളോ, കോഴ്‌സുകളോ അനുവദിച്ചില്ല. പഠന സൗകര്യത്തിന്റെ കാര്യത്തില്‍ തെക്കന്‍ ജില്ലകളും മലബാറും തമ്മിലുള്ള അന്തരം പരിഹരിക്കാന്‍ ഒരു ശ്രമവുമുണ്ടായില്ല. ഇതോടൊപ്പം വിജയഭേരി പോലുള്ള പദ്ധതികളിലൂടെ മലപ്പുറത്ത് എസ്.എസ്.എല്‍.സി വിജയിക്കുന്നവരുടെ എണ്ണം വര്‍ധിച്ചുകൊണ്ടിരുന്നു. മുഖ്യമന്ത്രിയായ വി.എസ് അച്യുതാനന്ദനോ, വിദ്യാഭ്യാസ മന്ത്രിയായ എം.എ ബേബിയോ, ഇടത് മുന്നണിയോ ഈ പ്രശ്‌നത്തെ ഗൗരവമായി കണ്ടില്ല. ഇതെല്ലാം പരിഹരിക്കേണ്ട ചുമതലയായിരുന്നു 2011- 2016 കാലത്തെ ഉമ്മന്‍ചാണ്ടി മന്ത്രിസഭയില്‍ വിദ്യാഭ്യാസ മന്ത്രിയായ പി.കെ അബ്ദുറബ്ബിനുണ്ടായിരുന്നത്.
കേരളത്തിലും, പ്രത്യേകിച്ച് മലബാറിലും പ്ലസ്ടു സീറ്റുകളുടെ കുറവ് പരിഹരിക്കാന്‍ ശക്തമായ നടപടികളാണ് ഇക്കാലത്തുണ്ടായത്. 2011ല്‍ 552 പ്ലസ്ടു ബാച്ചുകളാണ് പി.കെ അബ്ദുറബ്ബ് അനുവദിച്ചത്. 33120 പ്ലസ്ടു സീറ്റുകള്‍ ഇങ്ങനെ പുതുതായി സൃഷ്ടിക്കപ്പെട്ടു. 2014ല്‍ പുതിയ 97 പ്ലസ്ടു സ്‌കൂളുകള്‍ അടക്കം 850 പ്ലസ്ടു ബാച്ചുകള്‍ കൂടി അനുവദിക്കപ്പെട്ടു. ആകെ സീറ്റുകളുടെ വര്‍ധന 51000. 2011ലും 2014ലുമായി പി.കെ അബ്ദുറബ്ബ് വിദ്യാഭ്യാസ മന്ത്രിയായ കാലത്ത് കേരളത്തിലാകെ 84000 പുതിയ പ്ലസ്ടു സീറ്റുകള്‍ ഉണ്ടായി. കേരളത്തിന്റെ ചരിത്രത്തില്‍ ഏറ്റവും കൂടുതല്‍ പ്ലസുടു സീറ്റുകള്‍ അനുവദിച്ച മന്ത്രിയാണ് അബ്ദുറബ്ബ്. മലബാറില്‍ ഏറ്റവും കൂടുതല്‍ പ്ലസ്ടു സീറ്റുകള്‍ സൃഷ്ടിക്കപ്പെട്ടതും ഇക്കാലത്ത് തന്നെയാണ്. മലപ്പുറത്ത് ഓരോ കൊല്ലവും എസ്.എസ്.എല്‍.സി വിജയിക്കുന്ന കുട്ടികളുടെ എണ്ണം വര്‍ധിച്ചുവരികയാണ്. കഴിഞ്ഞ കുറെ വര്‍ഷങ്ങളായി ഈ സ്ഥിതി തുടരുകയാണ്. തെക്കന്‍ ജില്ലകളില്‍ ഇങ്ങനെയൊരു സാഹചര്യമില്ല. ഈ കൊല്ലം എസ്.എസ്.എല്‍.സി റിസല്‍ട്ട് പ്രഖ്യാപിച്ചപ്പോള്‍ മലപ്പുറത്ത് ആകെ വിജയിച്ചവരുടെ എണ്ണം 77922 ആയിരുന്നു. പിന്നീട് സേ പരീക്ഷ എഴുതി വിജയിച്ചവരും, സി.ബി.എസ്.ഇ പത്താം ക്ലാസ് വിജയികളും കൂടി ചേര്‍ന്നപ്പോള്‍ അത് 80,000ത്തില്‍ അധികമായി. ഓരോ കാലത്തും ആവശ്യത്തിനനുസൃതമായി കുട്ടികള്‍ക്ക് പഠിക്കാനുള്ള സൗകര്യമൊരുക്കേണ്ടത് അതത് കാലത്തെ സര്‍ക്കാറുകളാണ്. ഈ വര്‍ഷം പ്ലസ്ടുവിന് പഠിക്കാന്‍ സീറ്റെവിടെ എന്നു ചോദിക്കുമ്പോള്‍ അത് ഇ.ടി മുഹമ്മദ് ബഷീറും നാലകത്ത് സൂപ്പിയും പി.കെ അബ്ദുറബ്ബുമൊക്കെ നേരത്തെ അനുവദിച്ച് വെക്കാത്തതെന്തേ എന്ന ചോദ്യം എത്രമാത്രം ബാലിശമാണ്. 62 കൊല്ലത്തെ കേരളത്തിന്റെ ചരിത്രത്തില്‍ സുദീര്‍ഘമായി വിദ്യാഭ്യാസ വകുപ്പ് കൈകാര്യം ചെയ്ത ഇടതുപക്ഷ വിദ്യാഭ്യാസ മന്ത്രിമാര്‍ സമാനമായ ചോദ്യം ചോദിച്ചാണ് ആളുകളെ പറ്റിച്ചത്. ഇപ്പോള്‍ രണ്ട് വര്‍ഷമായല്ലോ, പിണറായി കേരളം ഭരിക്കുന്നു. മലബാറിന്റെ പിന്നോക്കാവസ്ഥ പരിഹരിക്കാന്‍ എവിടെയെങ്കിലും വിദ്യാഭ്യാസ സ്ഥാപനങ്ങള്‍ അനുവദിച്ചോ? ഖജനാവിലെ നികുതി പണത്തിന്റെ അവകാശം എല്‍.ഡി.എഫ് ഭരിക്കുമ്പോഴും യു.ഡി.എഫ് ഭരിക്കുമ്പോഴും മലബാറിന് കൂടിയുള്ളതാണ് എന്ന കാര്യം ഭരണാധികാരികള്‍ മറക്കരുത്. ഓര്‍മ്മകളുണ്ടായിരിക്കണം എന്നാണല്ലോ കമ്മ്യൂണിസ്റ്റുകാര്‍ എപ്പോഴും പറയാറുള്ളത്.

kerala

സി.പി.എം എന്ന വർഗീയതയുടെ കാളിയൻ

രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

Published

2 days ago

November 20, 2024

webdesk13

മുന്‍കൂട്ടി തയ്യാറാക്കിയ പൊറാട്ടുനാടകങ്ങളെല്ലാം എട്ടു നിലയില്‍ പൊട്ടുകയും ജനങ്ങളുടെ മുന്നില്‍ തീര്‍ത്തും പരിഹാസ്യരായി മാറുകയും ചെയ്തപ്പോള്‍ കേവല രാഷ്ട്രീയ നേട്ടങ്ങള്‍ക്കായി സംഘ്പരിവാറിനെ നാണിപ്പിക്കുന്ന വര്‍ഗീയ ധ്രുവീകരണത്തിന്റെ മാറാപ്പുപേറുന്ന സി.പി.എമ്മിന്റെ നെറികെട്ട സമീപനം കണ്ട് കേരളം മൂക്കത്തുവിരല്‍ മൂക്കത്തുവിരല്‍ വെച്ചുപോവുകയാണ്. ഈ രാഷ്ട്രീയത്തെ ന്യായീകരിക്കാനുള്ള ശ്രമങ്ങള്‍ കുടുതല്‍ അബദ്ധങ്ങളിലേക്ക് നേതാക്കളെ തള്ളിവിടുമ്പോള്‍ ഈ പാര്‍ട്ടിക്കിതെന്തുപറ്റിയെന്ന് സ്വന്തം അണികള്‍ തന്നെ പരസ്പരം ചോദിച്ചുകൊണ്ടിരിക്കുന്ന സാഹചര്യത്തിനാണ് രാഷ്ട്രീയ കേരളം സാക്ഷ്യംവഹിച്ചുകൊണ്ടിരിക്കുന്നത്.

കേരളം ഇന്നേവരെ സാക്ഷ്യം വഹിച്ചിട്ടില്ലാത്തവിധം അഴിമതിയുടെയും സ്വജനപക്ഷപാതത്തിന്റെയും കൂത്തരങ്ങായി സംസ്ഥാനം മാറിയപ്പോള്‍ ഭരണത്തെക്കുറിച്ച് ഒരക്ഷരംപോലും ഉരിയാടാന്‍ കഴിയാത്ത മുഖ്യമന്ത്രിയും സംഘവും ന്യൂനപക്ഷ ഭൂരിപക്ഷ പ്രീണനങ്ങള്‍ തരാതതരംപോലെ ഉപയോഗിച്ച് കൊണ്ടിരിക്കുകയാണ്. എന്നാല്‍ പഞ്ചതന്ത്രം കഥയിലെ കുറുക്കന്റെ ഈ കുശാഗ്രബുദ്ധി തിരിച്ചറിഞ്ഞ ജനാധിപത്യ വിശ്വാസികള്‍ മൂര്‍ത്താവ് നോക്കി പ്രഹരം നല്‍കിയിട്ടും അതില്‍നിന്നൊന്നും ഒരുപാഠവും പഠിക്കാന്‍ ഇക്കൂട്ടര്‍ക്ക് സാധിച്ചിട്ടില്ല എന്നാണ് പാലക്കാട് ഉപതിരഞ്ഞെടുപ്പ് തെളിയിക്കുന്നത്.

ലോക്‌സഭാ തിരഞ്ഞെടുപ്പില്‍ മുസ്‌ലിം ഭൂരിപക്ഷ പ്രദേശങ്ങളില്‍ പൗരത്വ വിഷയവും ക്രിസ്ത്യന്‍ പ്രദേശങ്ങളില്‍ മണിപ്പൂരുമെല്ലാം ഉയര്‍ത്തിപ്പിടിച്ച് പ്രചണ്ഡമായ പ്രചരണങ്ങള്‍ നടത്തിയെങ്കിലും ഈ കുതന്ത്രങ്ങള്‍ തിരിച്ചറിഞ്ഞ ജനങ്ങള്‍ ലക്ഷോപലക്ഷം വോട്ടുകള്‍ക്കാണ് അവരെ തൂത്തെറിഞ്ഞത്. എന്നിട്ടും പുഴുത്തുനാറിയ ഇതേ തന്ത്രങ്ങള്‍ തന്നെ വീണ്ടുംപയറ്റിക്കൊണ്ടിരിക്കുമ്പോള്‍ ഇടതുമുന്നണി യെന്ന സംവിധാനം എത്തിപ്പെട്ട അപചയം എത്രമേല്‍ ഭീതിതമാണെന്നതാണ് പ്രകടമായിക്കൊണ്ടിരിക്കുന്നത്. പാലക്കാട് ഉപതിരഞ്ഞെടുപ്പില്‍ എത്രമാത്രം പച്ചയായ രീതിയിലാണ് വര്‍ഗീയതയുടെ വിഷവിത്തുകള്‍ സി.പി.എം വിതറിക്കൊണ്ടിരിക്കുന്നത് എന്നതിന്റെ ഏറ്റവും ഒടുവില ത്തെ ഉദാഹരണമാണ് ഇന്നലെ രണ്ടുപത്രങ്ങള്‍ക്ക് നല്‍കിയ പരസ്യങ്ങള്‍. തിരഞ്ഞെടുപ്പു കമ്മീഷന്റെ അനുമതിപോലും നേടാതെ മുസ്‌ലിം സമുദായത്തിലെ രണ്ടു വിഭാഗങ്ങള്‍ നടത്തുന്ന പത്രങ്ങള്‍ക്ക് വര്‍ഗീയ വിഷംചീറ്റുന്ന പരസ്യങ്ങള്‍ നല്‍കിയതിലൂടെ ന്യൂനപക്ഷവോട്ടുകള്‍ സ്വന്തംപെ ട്ടിയിലാക്കാമെന്ന് കരുതുന്ന പിണറായിയും കൂട്ടരും ഈ സമുദായത്തെക്കുറിച്ച് എന്താണ് ധരിച്ചുവെച്ചിരിക്കുന്നത് എന്നതാണ് ബോധ്യമാകാത്തത്.

സി.പി.എം ആര്‍.എസ്.എസ് ബാന്ധവം വ്യത്യസ്ത സാഹചര്യങ്ങളിലായി നിരന്തരം പുറത്തുവന്നുകൊണ്ടിരിക്കുകയും ആ ഡീലിങ്ങിന്റെ അ നന്തരഫലമായി മോദി സര്‍ക്കാറിന്റെ അതേ മാതൃകയില്‍ പതിറ്റാണ്ടുകളുടെ പോരാട്ടത്തിലൂടെ നേടിയെടുത്ത ന്യൂ നപക്ഷങ്ങളുടെ അവകാശങ്ങളുടെ കടക്കല്‍ പിണറായി സര്‍ക്കാറും നിരന്തരമായി കത്തിവെച്ചു കൊണ്ടിരിക്കുകയുമാണ്. ഈ അന്യായത്തിന്റെയും അനീതിയുടെയും പ്രതിഫലനം കൂടിയാണ് ലോക്‌സഭാ തിരഞ്ഞെടുപ്പില്‍ സംസ്ഥാനത്ത് പ്രകടമായത്. ആ യാഥാര്‍ത്ഥ്യത്തെ തിരിച്ചറി ഞ്ഞ് തിരുത്തലുകള്‍ വരുത്തുന്നതിന് പകരം വൈകാരിക വിക്ഷോഭങ്ങള്‍ക്കൊണ്ട് ഒരു സമുദായത്തെ എക്കാലവും വഞ്ചിച്ചുനിര്‍ത്താമെന്നും ബംഗാളിലെയും ത്രിപുരയിലെയും പോലെ അവരെ വണ്ടിക്കാളകളാക്കി മാറ്റാമെന്നുമാണ് സി.പി.എം സ്വപ്‌നംകാണുന്നതെങ്കില്‍ കേരളത്തിലെ ന്യൂനപക്ഷങ്ങളെക്കുറിച്ച് സി.പി.എമ്മിന് ഇനിയും ഒരു ചുക്കും മനസ്സിലായിട്ടില്ല എന്നുമാത്രമേ കരുതാന്‍ കഴിയൂ.

ഒരു ഭാഗത്ത് ന്യൂനപക്ഷങ്ങളുടെ കണ്ണില്‍പൊടിയിടാനുള്ള ശ്രമങ്ങള്‍ നടത്തുമ്പോള്‍ മറുഭാഗത്ത് ഭൂരിപക്ഷ വര്‍ഗീയത ആളിക്കത്തിക്കാനും ഇവര്‍ ഒരുമടിയും കാണിക്കുന്നില്ല. പക്ഷേ അതിനായി രൂപപ്പെടുത്തുന്ന അജണ്ടകളെല്ലാം അമ്പേ പരാജയപ്പെട്ടുപോയി എന്നതാണ് വാസ്തവം. പാണക്കാട് സയ്യിദ് സാദിഖലി ശിഹാബ് തങ്ങള്‍ക്കെതിരെ പിണറായി വിജയന്‍ രംഗത്തെത്തിയത് ഈ അജണ്ടയുടെ ഭാഗമായിരുന്നുവെങ്കില്‍ ആ ഹീനശ്രമങ്ങളെ കക്ഷിരാഷ്ട്രീയങ്ങള്‍ക്കതീതമായി ജനങ്ങള്‍ എതിര്‍ത്തുതോല്‍പ്പിക്കുകയായിരുന്നു. വിഭാഗീയതയുടെയും വിദ്വേഷത്തിന്റെയും വഴിയില്‍ നിന്ന് സ്‌നേഹത്തിന്റെയും സഹിഷ്ണുതയുടെയും മാര്‍ഗത്തിലേക്ക് ഒരാള്‍ കടന്നുവരികയും പുകള്‍പെറ്റ കൊടപ്പനക്കല്‍ തറവാട്ടിലെത്തി അനുഗ്രഹങ്ങളേറ്റുവാങ്ങുകയും ചെയ്യുമ്പോള്‍ ഇടതുപാളയത്തില്‍ നിന്ന് മുഖ്യ മന്ത്രിയുടെ നേതൃത്വത്തില്‍ കൂട്ടനിലവിളികളുയരുന്നതെന്തിനാണെന്ന ജനാധിപത്യകേരളത്തിന്റെ ചോദ്യത്തിന് മുന്നില്‍ സി.പി.എം ഉത്തരംമുട്ടിനില്‍ക്കുകയാണ്. വര്‍ഗീയ തയുടെ കാളിയന്‍മാരായി മാറിയ സി.പി.എമ്മിന്റെ ധ്രുവി കരണ ശ്രമങ്ങള്‍ക്ക് ഏതെങ്കിലും റാന്‍മുളികളുടെ ഒളിഞ്ഞും തെളിഞ്ഞമുള്ള പിന്തുണ ലഭിക്കുന്നുണ്ടാവാം. എന്നാല്‍ ഈ നെറികേടിനെതിരെയുള്ള മതേതര കേരളത്തിന്റെ പ്രതികരണം ഇന്ന് പാലക്കാട് നിയമസഭാ
മണ്ഡലത്തില്‍ വിനിയോഗിക്കപ്പടുമെന്ന കാര്യത്തില്‍ സംശയമില്ല.

Video Stories

മഹാരാഷ്ട്രയും ഝാര്‍ഖണ്ഡും വിധിയെഴുതുന്നു

ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം.

Published

2 days ago

November 20, 2024

webdesk13

നിശ്ശബ്ദ പ്രചാരണവും അവസാനിപ്പിച്ച് മഹാരാഷ്ട്ര വിധിയെഴുതുന്നു. 288 സീറ്റുകളിലേക്ക് 4,136 പേരാണ് ജനവിധി തേടുന്നത്. ശിവസേന, ബി.ജെ.പി, എൻ.സി.പി കൂട്ടുകെട്ടിലെ മഹായുതിയും കോൺഗ്രസ്, ശിവസേന-യു.ബി.ടി, എൻ.സി.പി-എസ്.പി കൂട്ടുകെട്ടിലെ മഹാവികാസ് അഘാഡിയും (എം.വി.എ) തമ്മിലാണ് മുഖ്യ പോരാട്ടം.

ഇത്തവണ 102 സീറ്റുകളിലാണ് കോൺഗ്രസ് മത്സരിക്കുന്നത്. ലോക്സഭ തെരഞ്ഞെടുപ്പിലെ തിരിച്ചുവരവാണ് കോൺഗ്രസിനും എം.വി.എയിലെ മറ്റ് ഘടക കക്ഷികൾക്കും ആത്മവിശ്വാസമേകുന്നത്. ക്ഷേമ പദ്ധതികൾക്കുപുറമെ ബി.ജെ.പിയുടെ ഹിന്ദുത്വ മുദ്രാവാക്യങ്ങളും കോൺഗ്രസിന്റെ ജാതിസെൻസസ് വാഗ്ദാനവും ജനങ്ങൾ എങ്ങനെ സ്വീകരിച്ചുവെന്നതിന്റെ പ്രതിഫലനംകൂടിയാകും ഫലം. ശനിയാഴ്ചയാണ് വോട്ടെണ്ണൽ. ചൊവ്വാഴ്ചക്കകം സർക്കാർ രൂപവത്കരിക്കണം.

ഝാർഖണ്ഡ് നിയമസഭ തെരഞ്ഞെടുപ്പിലെ അവസാന ഘട്ട വോട്ടെടുപ്പും ബുധനാഴ്ച നടക്കും. 38 മണ്ഡലങ്ങളിലേക്കാണ് വോട്ടെടുപ്പ്. മഹാരാഷ്ട്രയിൽ വിമതരുൾപ്പെടെ 2,086 സ്വതന്ത്രരും പ്രാദേശിക പാർട്ടികളും മുന്നണികളിലെ സൗഹൃദ പോരും വിധി നിർണയത്തിൽ മുഖ്യ പങ്കുവഹിക്കും. വിവിധ ജാതി സമുദായങ്ങൾക്കിടയിലെ വിള്ളലും കർഷക രോഷവും പുകയുന്ന മഹാരാഷ്ട്രയിൽ ജനം ആർക്കൊപ്പം നിൽക്കുമെന്ന് മുൻകൂട്ടി പ്രവചിക്കാനാകാത്ത അവസ്ഥ.

ഇരു മുന്നണിയും 170ലേറെ സീറ്റുകൾ കിട്ടുമെന്നാണ് അവകാശപ്പെടുന്നത്. ഭരണം പിടിക്കാൻ 145 സീറ്റ് വേണം. തൂക്കുസഭ സാധ്യതയും പ്രവചിക്കപ്പെടുന്നുണ്ട്. അങ്ങനെ വന്നാൽ പുതിയൊരു രാഷ്ട്രീയ നാടകത്തിനുകൂടി മഹാരാഷ്ട്ര സാക്ഷ്യംവഹിക്കേണ്ടിവരും. ഇരുമുന്നണിയിലെയും ആറ് പാർട്ടികൾക്കും തെരഞ്ഞെടുപ്പ് നിർണായകമാണ്. ഝാർഖണ്ഡിൽനവംബർ 13ന് നടന്ന ആദ്യഘട്ട വോട്ടെടുപ്പിൽ 43 മണ്ഡലങ്ങളിലെ വോട്ടർമാർ വിധിയെഴുതിയിരുന്നു.

നിശബ്ദ പ്രചാരണത്തിന്റെ ദിവസമായ ചൊവ്വാഴ്ച ജെ.എം.എം നേതൃത്വത്തിലുള്ള ഇൻഡ്യ സഖ്യവും ബി.ജെ.പി നേതൃത്വത്തിലുള്ള എൻ.ഡി.എ സഖ്യവും സമൂഹമാധ്യമങ്ങളിലൂടെ പിന്തുണ ഉറപ്പാക്കുന്ന തിരക്കിലായിരുന്നു. മുഖ്യമന്ത്രി ഹേമന്ത് സോറനും സംസ്ഥാനത്ത് ബി.ജെ.പിയുടെ തെരഞ്ഞെടുപ്പ് ചുമതലയുള്ള കേന്ദ്രമന്ത്രി ശിവരാജ് സിങ് ചൗഹാനും ‘എക്സി’ലൂടെ വോട്ടഭ്യർഥന നടത്തി. 1.23 കോടി സമ്മതിദായകരാണ് ബുധനാഴ്ച വോട്ട് രേഖപ്പെടുത്തുന്നത്.

ഇതിൽ 60.79 ലക്ഷം വനിതകളാണ്. 14,000ലധികം പോളിങ് സ്റ്റേഷനുകളാണ് സജ്ജീകരിച്ചിട്ടുള്ളത്. കേരളത്തിനുപുറമെ യു.പി, പഞ്ചാബ്, ഉത്തരാഖണ്ഡ് സംസ്ഥാനങ്ങളിലെ 14 നിയമസഭ മണ്ഡലങ്ങളിലേക്കുമുള്ള ഉപതെരഞ്ഞെടുപ്പ് ബുധനാഴ്ച നടക്കും. 23നാണ് വോട്ടെണ്ണൽ.

News

ഗസ്സയിലെ വംശഹത്യ; ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി

ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

Published

3 days ago

November 19, 2024

webdesk13

ഗസയില്‍ വംശഹത്യ തുടരുന്ന ഇസ്രാഈലുമായുള്ള എല്ലാ ബന്ധങ്ങളും അവസാനിപ്പിച്ചെന്ന് പ്രഖ്യാപിച്ചതിന് പിന്നാലെ ഇസ്രാഈല്‍ പ്രസിഡന്റിന് വ്യോമപാത നിഷേധിച്ച് തുര്‍ക്കി. ഇസ്രാഈല്‍ പ്രസിഡന്റ് ഐസക് ഹെര്‍സോഗിന് COP29ന് പങ്കെടുക്കുന്നതിനായി വിമാനം കടന്ന് പോകാനുള്ള വ്യോമപാത നിഷേധിച്ചാണ് തുര്‍ക്കി പ്രതിഷേധം ശക്തമാക്കിയത്.

ഇതേത്തുടര്‍ന്ന് ഹെര്‍സോഗിന് അസര്‍ബൈജാനില്‍ നടന്ന കാലാവസ്ഥ ഉച്ചകോടിയില്‍ പങ്കെടുക്കാന്‍ സാധിക്കാതെ വന്നതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ സുരക്ഷാ കാരണങ്ങളാലാണ് ഉച്ചകോടിയില്‍ പങ്കെടുക്കാത്തതെന്നാണ് ഇസ്രാഈല്‍ പരിസ്ഥിതി മന്ത്രാലയം ഈ വിഷയത്തില്‍ വിശദീകരണം നല്‍കിയത്.

പ്രസിഡന്റിന്റെ വിമാനം വ്യോമാതിര്‍ത്തിയില്‍ പ്രവേശിക്കാന്‍ തുര്‍ക്കി വിസമ്മതിച്ചതിനാല്‍ ഇസ്രാഈല്‍ പ്രസിഡന്റ് യാത്ര റദ്ദാക്കിയതായി ഞായറാഴ്ച അസര്‍ബൈജാനിലെ ഉദ്യോഗസ്ഥരെ ഉദ്ധരിച്ച് വൈ നെറ്റ് പ്രതികരിച്ചു. കോണ്‍ഫറന്‍സിലെ ബാക്കിയുള്ള ഇസ്രഈല്‍ പ്രതിനിധികള്‍ നവംബര്‍ 11 ന് ജോര്‍ജിയ വഴി ബാക്കുവില്‍ എത്തിയിരുന്നു.

ഇസ്രാഈലില്‍ നിന്ന് അസര്‍ബൈജാന്‍ തലസ്ഥാനമായ ബാക്കുവിലേക്കുള്ള ഏറ്റവും സുരക്ഷിതമായതും എളുപ്പമാര്‍ന്നതുമായ മാര്‍ഗമായിരുന്നു തുര്‍ക്കി വഴിയുള്ളത്. ഗസയിലും ലെബനനിലും ഇസ്രാഈല്‍ സൈന്യം വ്യോമാക്രമണം നടത്തുമ്പോള്‍ ഇസ്രാഈല്‍ പ്രസിഡന്റും പ്രധാനമന്ത്രിയുമെല്ലാം തുര്‍ക്കി വഴിയാണ് വ്യോമമാര്‍ഗം സഞ്ചരിച്ചിരുന്നത്.

എന്നാല്‍ തുര്‍ക്കിയുടെ വ്യോമമാര്‍ഗം വഴി ഇസ്രാഈല്‍ നേതാക്കള്‍ക്ക് യാത്ര അനുവദിക്കേണ്ടതില്ലെന്ന് ഉന്നത വൃത്തങ്ങളില്‍ നിന്ന് അറിയിപ്പ് ലഭിച്ചതായി തുര്‍ക്കി വ്യോമയാന ഉദ്യോഗസ്ഥര്‍ പ്രതികരിച്ചു. എന്നാല്‍ ഈ വിലക്ക് ചര്‍ച്ചയിലൂടെ പരിഹരിക്കാമെന്ന് ഇസ്രഈല്‍ പ്രതീക്ഷിക്കുന്നതായി ഇസ്രാഈല്‍ സര്‍ക്കാറിന്റെ കീഴിലുള്ള കാബിര്‍ ന്യൂസ് റിപ്പോര്‍ട്ട് ചെയ്തിരുന്നു

ഇസ്രഈലുമായുള്ള എല്ലാ ബന്ധങ്ങളും അവസാനിപ്പിക്കുന്നുവെന്ന് തുര്‍ക്കി പ്രസിഡന്റ് റജബ് തയ്യിബ് എര്‍ദോഗാനാണ് കഴിഞ്ഞ ദിവസം പ്രഖ്യാപിച്ചത്. ഗസയില്‍ ഇസ്രാഈല്‍ വംശഹത്യ തുടരുന്ന സാഹചര്യത്തിലാണ് ഇസ്രാഈലുമായുള്ള ബന്ധം അവസാനിപ്പിക്കാന്‍ തുര്‍ക്കി ഭരണകൂടം തീരുമാനിച്ചത്.

‘റജബ് തയ്യിബ് എര്‍ദോഗാന്റ നേതൃത്വത്തിലുള്ള തുര്‍ക്കി റിപ്പബ്ലിക് ഇസ്രഈലുമായി ഒരു ബന്ധവും തുടരില്ല. ഞങ്ങളുടെ ഭരണസഖ്യം ഇസ്രാഈലുമായുള്ള ബന്ധം വിച്ഛേദിക്കുന്ന കാര്യത്തില്‍ ഉറച്ച് നില്‍ക്കുന്നു. ഭാവിയിലും ഇത് അപ്രകാരം തന്നെ തുടരും,’ എര്‍ദോഗന്‍ പറഞ്ഞു.

കഴിഞ്ഞ വര്‍ഷം ഒക്ടോബറില്‍ ഇസ്രാഈല്‍ ഗസയില്‍ അധിനിവേശവും വംശഹത്യയും ആരംഭിച്ചതുമുതല്‍ ഇസ്രാഈലിനു നേരെ ശക്തമായ നിലപാട് സ്വീകരിച്ചിരുന്ന നാറ്റോ രാജ്യമാണ് തുര്‍ക്കി. ഇക്കഴിഞ്ഞ മെയില്‍ ഇസ്രാഈലിനുമേല്‍ തുര്‍ക്കി വ്യാപാര ഉപരോധം ഏര്‍പ്പെടുത്തിയിരുന്നെങ്കിലും നയതന്ത്ര ബന്ധം തുടരുകയായിരുന്നു.

ഇതിന്റെ ഭാഗമായി തങ്ങളുടെ അംബാസിഡറെ ഇസ്രഈലില്‍ നിന്ന് തുര്‍ക്കി തിരിച്ച് വിളിച്ചിരുന്നു. എന്നാല്‍ അന്ന് നയതന്ത്രബന്ധം പൂര്‍ണമായി അവസാനിപ്പിച്ചിരുന്നില്ല. സമാനമായി ഇസ്രാഈലും പ്രാദേശിക സുരക്ഷാ ഭീഷണികള്‍ ചൂണ്ടിക്കാട്ടി കഴിഞ്ഞ വര്‍ഷം അങ്കാറയിലെ ഇസ്രാഈല്‍ എംബസി ഒഴിപ്പിച്ചിരുന്നു.

ഗസയില്‍ ഇസ്രാഈല്‍ നടത്തുന്നത് വംശഹത്യയാണെന്ന് മനുഷ്യാവകാശ സംഘടനകള്‍ അടക്കം അഭിപ്രായപ്പെട്ടപ്പോള്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെക്കൊണ്ട് വംശഹത്യയുടെ ഉത്തരവാദിത്വം ഏറ്റെടുപ്പിക്കാന്‍ സാധ്യമായതെല്ലാം ചെയ്യുമെന്ന് എര്‍ദോഗാന്‍ കഴിഞ്ഞ ദിവസം പറഞ്ഞിരുന്നു.

ഈ വര്‍ഷമാദ്യം, ഫലസ്തീനെ പിന്തുണച്ച് അന്താരാഷ്ട്ര നീതിന്യായ കോടതിയില്‍ ഇസ്രാഈലിനെതിരായി ഫയല്‍ ചെയ്ത വംശഹത്യ കേസില്‍ തുര്‍ക്കി ഇടപെട്ടിരുന്നു. ടെല്‍ അവീവിനെതിരെ ലോക രാജ്യങ്ങള്‍ ആയുധ ഉപരോധം ഏര്‍പ്പെടുത്തണമെന്നും തുര്‍ക്കി വാദിച്ചിരുന്നു.